TITUS
Biblia Iberica: Psalterium et Odae
Part No. 103
Previous part

Chapter: 103 
Verse: 1  Link to mcat Link to sept Link to armat   აკურთხევს სული ჩემი უფალსა; უფალი ღმერთო ჩემო, განსდიდენ ფრიად, აღსაარებაჲ და დიდად შუენიერებაჲ შთაიცუ,

Verse: 2  Link to mcat Link to sept Link to armat   შეიმოსე ნათელი ვითარცა სამოსელი, გარდაართხენ ცანი ვითარცა კარავნი;

Verse: 3  Link to mcat Link to sept Link to armat   დაჰრთენ წყალთა ზედა ზესკნელნი მისნი; რომელმან დასხნა ღრუბელნი აღსავალად თჳსა, და იქცევის იგი ფრთეთა ზედა ქართაჲსა;

Verse: 4  Link to mcat Link to sept Link to armat   რომელმან შექმნა ანგელოზნი მისნი სულად და მსახურნი მისნი - ალად ცეცხლისა;

Verse: 5  Link to mcat Link to sept Link to armat   რომელმან დაამტკიცა ქუეყანაჲ სამყაროსა ზედა თჳსსა, არა შეიძრას იგი უკუნისამდე.

Verse: 6  Link to mcat Link to sept Link to armat   უფსკრულნი ვითარცა სამოსელნი გარე-მოდებულ არიან მის ზედა, მთათა დადგენ წყალნი.

Verse: 7  Link to mcat Link to sept Link to armat   სასტიკებითა შენითა ივლტოდიან და ჴმითა ქუხილისა შესისაჲთა შეძრწუნდიან.

Verse: 8  Link to mcat Link to sept Link to armat   აღმაღლდიან, მთა იქმნიან, დამდაბლდიან, ვერ იქმნიან ადგილსა მას, რომელსაცა დაამტკიცენ შენ იგინი.

Verse: 9  Link to mcat Link to sept Link to armat   საზღვარი დასდევ და არა გარდაჰვლენ, არცაღა მიიქციან დაფარვად ქუეყანისა.

Verse: 10  Link to mcat Link to sept Link to armat   რომელმან გამოადინენ წყარონი ჴევნებსა შორის, მთათა დიოდიან წყალნი;

Verse: 11  Link to mcat Link to sept Link to armat   სუან იგი ყოველთა მჴეცთა ველისათა, განძღენ კანჯარნი წყურილსა მათსა.

Verse: 12  Link to mcat Link to sept Link to armat   მუნ მფრინველთა ცისათა დაიმკჳდრონ და შორის კლდესა გამოსცენ ჴმაჲ მათი.

Verse: 13  Link to mcat Link to sept Link to armat   რომელმან დაათრვნა მთანი საუნჯითა თჳსითა, ნაყოფითა საქმეთა ჴელთა თჳსთაჲთა აღავსო ქუეყანაჲ.

Verse: 14  Link to mcat Link to sept Link to armat   რომელმან აღმოაცენა თივაჲ მთათა და მწუანე სამსახურებელად კაცთა, რომელმან გამოიღის პური ქუეყანით.

Verse: 15  Link to mcat Link to sept Link to armat   ღჳნოვან ახარის გულსა კაცისასა, საცხებელმან მხიარულ-ყვის პირი, და პურმან განამტკიცის გული კაცისაჲ.

Verse: 16  Link to mcat Link to sept Link to armat   განძღენ ხენი უფლისანი და ნაძუნი ლიბანისანი, რომელ შენ დაჰნერგენ.

Verse: 17  Link to mcat Link to sept Link to armat   მუნ მფრინველთა მართუე-ისხან, და ბუდე ყარყადთაჲ შერაცხილ მათდა.

Verse: 18  Link to mcat Link to sept Link to armat   მთანი მაღალნი ირემთა და კლდენი შესავედრებელად ყურგდელთა.

Verse: 19  Link to mcat Link to sept Link to armat   შეჰქმენ მთოვარე ჟამთათჳს, მზემან ცნა ჟამი დასლვისა თჳსისაჲ.

Verse: 20  Link to mcat Link to sept Link to armat   შექმნა ბნელი და იქმნა ღამჱ, მას შინა ვიდოდიან ყოველნი მჴეცნი ველისანი,

Verse: 21  Link to mcat Link to sept Link to armat   ლეკუნი ლომთანი ყჳრიედ ტაცებად და ითხოვენ ღმრთისაგან საზრდელსა მათსა.

Verse: 22  Link to mcat Link to sept Link to armat   მოფენასა მზისასა შეკრბიან და სადგურსავე თჳსსა დაადგრიან.

Verse: 23  Link to mcat Link to sept Link to armat   გამოვიდის კაცი საქმესა თჳსსა და შრომასა ჴელთა მისთასა მიმწუხრამდე.

Verse: 24  Link to mcat Link to sept Link to armat   რამეთუ დიდ არიან საქმენი შენნი, უფალო, და ყოველივე სიბრძნით ჰქმენ; აღივსო ქუეყანაჲ დაბადებულითა შენითა.

Verse: 25  Link to mcat Link to sept Link to armat   ესე ზღუაჲ დიდი და ვრცელი, მას შინა არიან ყოველნი ქუეწარმავალნი, რომელთაჲ არა არს რიცხჳ, მჴეცნი წულილნი დიდთა თანა; მას ზედა ნავნი ვლენან;

Verse: 26  Link to mcat Link to sept Link to armat   ვეშაპი ესე, რომელ შენ დაჰბადე სამღერელად მათდა.

Verse: 27  Link to mcat Link to sept Link to armat   ყოველნივე შენგან ელიან მოცემად საზრდელი მათი ჟამსა;

Verse: 28  Link to mcat Link to sept Link to armat   მოსცე მათ, და აღიზარდნენ იგინი, აღამაღლე ჴელი შენი და ჰზრდიდე ყოველთავე სიტკბოებითა ნებისა შენისაჲთა.

Verse: 29  Link to mcat Link to sept Link to armat   გარე-მიიქციე პირი შენი მათგან, შეძრწუნდიან; მოუღე სული მათი მათგან, მოაკლდიან და მიწადვე თჳსა მიიქციან.

Verse: 30  Link to mcat Link to sept Link to armat   გამოავლინო სული შენი, დაჰბადნე იგინი, განაახლო პირი ქუეყანისაჲ.

Verse: 31  Link to mcat Link to sept Link to armat   იყავნ დიდებაჲ უფლისაჲ უკუნისამდე, იხარებდინ უფალი ქმნულთა თჳსთა ზედა.

Verse: 32  Link to mcat Link to sept Link to armat   რომელმან მოხედო ქუეყანასა და შეაძრწუნო იგი, შეახო მთათა, და კუმოდიან.

Verse: 33  Link to mcat Link to sept Link to armat   ვაქებდე უფალსა ცხორებასა ჩემსა, უგალობდე ღმერთსა ჩემსა, ვიდრემდის ვიყო მე.

Verse: 34  Link to mcat Link to sept Link to armat   ტკბილ ეყავნ მას კურთხევაჲ ჩემი, და მე ვიხარებდე უფლისა მიმართ.

Verse: 35  Link to mcat Link to sept Link to armat   მოაკლდენ ცოდვილნი ქუეყანით, და უსჯულონი ნუღარა იპოებიან მას ზედა; აკურთხევს სული ჩემი უფალსა.


Next part


This text is part of the TITUS edition of Biblia Iberica: Psalterium et Odae.

Copyright TITUS Project, Frankfurt a/M, 18.11.2023. No parts of this document may be republished in any form without prior permission by the copyright holder.