; 7:7-11)
; 7:7-11)
Sa ġi Isusen afərənney. Afərəpi čarḳiṭuxun oša Iz šagirdxoy sunṭin Šoṭo pine: "Ay Q̣onʒ́ux, Ioanen iz šagirdxo zombi ḳinäḳ Hunal yax afərəpsuna zomba".
Isusen šoṭoġo pine: "Afərəḳaṭan metär upanan:
Beši ġiluġ śuma yax här ġi tada.
Yax borǯlu bakala amdarxo yan baġəšlayinšala ḳinäḳ
Oša Isusen šoṭoġo pine: "Mäsälä, ef bošṭan sunṭay dosṭe bu. Üšenin yarinesṭa ṭe dosṭe ṭo͑ġo͑l taci nexnu: "Bez dosṭ, za xib dänä borǯ śum tada,
šoṭaynaḳ ki, bez ḳoya amdare hare, iz be͑ś laxala hiḳḳal tezax bu".
Dosṭenal ḳoyaxun metäre ǯoġab tasṭa: "Za naraat ma ba. Ćomo ene kiriṭe, äyloxal bez ṭo͑ġo͑l basḳeṭun, zu häysä hayzeri va hiḳḳal tades tez baksa".
Vä͑x nexzu, me amdara iz dosṭ baksuna görä nuval tadayin, šoṭay inaden čuresuna göräl bakayin hayzeri šoṭay čureġalṭu tadale.
Šoṭo göräl vä͑x nexzu: čurekinan - \ vä͑x tadeġale, qä͑vekinan - bä͑ġä͑balnan, ćomo ṭapanan - vä͑ynaḳal qayeġale.
Šoṭaynaḳ ki, här čureġalṭin haq̇ale, här qä͑veġalṭin bä͑ġä͑bale, här ćomo ṭaṗḳalṭaynaḳal ćomo qayeġale.
Ef arane ṭetär sa bava bune ki, iz ġaren ičuxun čäli čureġane, ama čälin gala šoṭo diziḳ tadane?
Nääl ki, qoq̇la čureġayin, šoṭo sḳarṗion tadane?
Metärluġen, ägär vä͑n pis baksun-baksun ef äyloġo šaaṭ šeymux tades bananksasa, göynul bakala Bavan Ičuxun čureġalṭoġo ω͑vel Uruf tene tadon ki?"
; Mrḳ. 3:20-27)
; Mrk'. 3:20-27)
Sa ġi Isusen lal sa amdaraxun murdar urufane č̣evḳi. Murdar uruf č̣eriṭuxun oša lale muz qayeci. Ǯamaat mat manedi.
Ama šoṭoġoy bäziṭoġon nexṭuniy: "Koṭin murdar urufxo šoṭoġoy kalo bakala Baal-Zevuli zorene č̣evksa". *
Ṭə͑yämiṭoġon isä Isusa sinäyinšbseynaḳ Šoṭoxun göynuxun eġala sa möǯüzä aḳesṭunaṭun täläbbsay. *
Ama šoṭoġoy ḳä fikirbsuna avabakala Isusen šoṭoġo pine: "Iz boš dava bakala padčaġluġ väräne bakon. Iz boš dava bakala ḳožal careġon.
Ägär Šeytanal ič-ičuxun davinane \ č̣eysasa, šoṭay padčaġluġ hetärä portṗon? Vä͑n nexnan ki, Zu murdar urufxo Baal-Zevuli zorenez č̣evksa.
Ama ägär Zu murdar urufxo Baal-Zevuli zorenez č̣evḳsasa, ṭe vädä ef amdarxon ši zorene č̣evksa? Koṭaynaḳal šorox ičan vä͑ynaḳ divanbal bakalṭun.
Ama ägär Zu murdar urufxo Buxaʒ́uġoy zorenez č̣evḳsasa, mo šo upsune ki, Buxaʒ́uġoy padčaġluġ ef aranene.
Ägär zorba sa amdar belxun-ośe silaxlayinšaki iz ḳoža q̇orišebsasa, šoṭay var-dövläteynaḳ q̇ə͑ butene.
Ama šoṭoxun zorbaṭin iču hüǯümbi q̇alib eġayin, ṭe vädä šoṭay güväyinšäki silaxxo iz kiyexun exedon, talayinši šeyurxoval ǯöyebon.
Zaxun sagala nu bakalo Bez äleyinäne, Zaxun sagala nu girbalṭin carene. *
Murdar uruf amdaraxun č̣eġaṭan xesus ganxone taraḳon, ičeynaḳ iräätluġe qä͑veġon. Šoṭo nu bä͑ġä͑baṭan isä uneḳon: "Bezi č̣eri ḳoya qaybakaz".
Ḳoya qaybakaṭanal šoṭo śameci girecine aḳon.
Me vädä šoṭin taci ičuxun samalal betär bakala vu͑ġ murdar urufe ečon. Šoroxal ṭiya baci manṭundon. Ṭe vädä me amdari hal süfṭinṭuxunal pise bakon".
Isusen moṭo uḳaṭan sa čuġon amdarxoy bošṭan alloy säsen Šoṭo pine: "Va iz tapane taradiyo, va döš tadiyo he bäxṭäväre!"
Ama Isusen pine: "Buxaʒ́uġoy äyitä ibaki šoṭo \ ämälbaloroxe bäxṭävär!"
Ǯamaat Šoṭay härräminä gelene baksay. Isusenal pine: "Häysäṭin näsil gele pise. Šoṭoġon möǯüzäṭun qä͑vesa, ama šoṭoġo Ionay möǯüzänaxun bašq̇a sal sa möǯüzä tene tadeġal. *
Šoṭaynaḳ ki, Iona Ninevin ǯamaateynaḳ hetär sa möǯüzä bakenesa, Amdari Ġaral me näsileynaḳ haṭetär bakale. *
Güney täräfin čuux-padčaġenal * axərənǯi ġine me näsili amdarxoxun sagala be͑yinbaki šoṭoġo taxsərkär č̣evḳi pisläyinšale. Axəri šo dünyäni ṭe ṭo͑ġo͑lxun hayzeri Solomoni müdrik äyitmoġo u͑mu͑xlaxsane harey. Ama memiya Solomonaxunal ala Bakalono.
Ninevin amdarxonal axərənǯi ġine me näsiläxun sagala be͑yinbaki šoṭoġo taxsərkär č̣evḳalṭun. Axəri šoṭoġon Ionay karooza ibaki toobabeṭuniy. Ama häysä ef ṭo͑ġo͑l Bakalo Ionaxunal üsṭüne! *
Šuḳḳalen šama bäč̣üḳṭi šoṭo \ č̣äṗḳin gala, nääl ki q̇ave oq̇a latenexo. Ama šama čiraġi q̇ave boše laxon ki, bona baġalṭoġon išiġa aḳaṭun. *
Amdara išiġlu balo isä izi pule. Ägär vi pul saġlam bakayin, dirisṭ vi bädänäl išiġlu bakale. Ama piin zäif aḳayin, bädänäl bayinq̇une bakon.
Metärluġen, be͑ġa ki, vasṭa bakala "išiġ" bayinq̇un maq̇an baki.
Šoṭaynaḳ ki, dirisṭ vi bädän išiġlu baki sal sa ga bayinq̇un nu mandayin, vasṭa bakala išiġ šamen vi loxol sakala išiġ ḳinäḳ bakale".
Isusen moṭoġo piṭuxun oša fariseyxoy sunṭin Šoṭo iz ḳoya śum uksane ḳalpi. Šoval šoṭay ḳoya taci sulfin bel areci.
Isusi śum ukalṭuxun be͑ś Iz kulmoġo nu oc̣ksuna aḳala farisey määṭṭäle mandi. *
Ṭe vädä Q̣onʒ́uġon šoṭo pine: "Vä͑n, ay fariseyxo, ef ṭaliḳi, bošq̇avi bać̣anal oc̣nanḳsa, ama ef bonaxun tamaxkärluġen q̇a pisluġen buynan.
Ay haq̇əlsuzxo, q̇amištenanbaksa ki, qavuna bakalṭu Yaratmišalṭine bona bakalṭuval yaratmiše.
Vä͑x isä ef q̇ave boš bakalṭoġo käsibxo \ tasṭune mansṭa, ṭe vädä vä͑ynaḳ här šey tämize bakon.
Ama vay ef hala, ay fariseyxo! Šoṭaynaḳ ki, vä͑n irääni q̇a q̇eräzäl göyüni vic̣ paye sunṭu tasṭuna än vaǯib hesabbi, insafa q̇a Buxaʒ́uġo čuresuna isä ṭo͑o͑xnan bosṭa! Ama sunṭu baṭan, ṭe sunṭuval gäräy eyexun nu č̣evḳan! *
Vay ef hala, ay fariseyxo! Axəri vä͑n sinagogxo än hörmätlü gala arsṭuna, bazarin meydanxo amdarxon vä͑xun ṗä͑ kiin kul-kiye biq̇i "xeyirq̇an baki" upsunanan čuresa.
Vay ef hala! Šoṭaynaḳ ki, vä͑n insanxoy nu avabaki iz looxun ćaxṗi č̣ovakala aći gärämzoġxonan ošq̇arsṭa".
Ṭe vädä ḳanun zombalxoy sunṭin Isusa ǯoġabe tadi: "Määlim, hun moṭoġo upsunen yaxal tähḳirenbsa".
Isusenal metäre pi: "Vay efiyal hala, ay ḳanun zombalxo! Šoṭaynaḳ ki, amdarxo bə͑hi yüken yükläyinšnanbsa, ama vä͑n ef ḳäšinal me yükürxo tenan duġsa.
Vay ef hala! Šoṭaynaḳ ki, ef bavoġon besṗi xavarečalxoynaḳnan mäġbärox * biq̇sa.
Metärluġen, ef bavoġon, kalboġon biṭoġo täsṭiġnanbsa. Šoṭaynaḳ ki, šoṭoġonṭun xavarečalxo besṗe, vä͑nal šoṭoġoynaḳ mäġbäroxnan biq̇sa.
Moṭaynaḳal Buxaʒ́uġoy äyit \ metärey: "Zu šoṭoġoynaḳ xavarečalxo q̇a aṗosṭolxo yaq̇aboz, ama šoṭoġon bäziṭoġo besṗalṭun, bäziṭoġo šäṗeġalṭun".
Moṭaynaḳal me näsilen dünyäni binora laxeciṭuxun maġay
bari bütüm xavarečalxoy ṗiya görä ǯoġab tadale: Aveli ṗiyaxun burqi q̇urban ečala gane q̇a xrami arane besṗi Zäkäriyäy ṗiyal ciriḳ. Hoo, Zu vä͑x nexzu, me äšurxo görä ǯoġab tadalo me näsil bakale. *
Vay ef hala, ay ḳanun zombalxo! Šoṭaynaḳ ki, avabaksuni ćomoy ačara exnandi, ama nä vä͑n baġalo tenan baki, nääl ṭiya baysun čureġalṭoġo tenan barti".
Isus ṭeṭiin č̣eġaṭan, ḳanun zombalxon q̇a fariseyxon Šoṭo ṗä͑bulla sualxo tadi čätinluġa basṭunṭun čuresay ki,
Iz źomoxun č̣eġala sa särf äyiten Šoṭo tälinä badaṭun.
