TITUS Texts: Biblia Udica, Versio Nizhensis: Vetus Testamentum

TITUS
Biblia Udica, Versio Nizhensis: Vetus Testamentum
Part No. 64

Chapter: 24

Verse: 1

Bileamen isä Q̣ONƷ́UĠOY israilluġoxun Iz xeyir-bäräkätä nu kambsuna q̇amišakeney. Šoṭin ene me azuḳi loxol q̇arġiš cipseynaḳ Buxaʒ́uġoy iču sa niśan aḳesṭuna tene yaqbe͑ġi, ama fərəpi ṭe ṭe xam oćalxone be͑ġi.
Bileamen isə Q'ONČUĞOY israilluğoxun İz xeyir-bərəkətə nu kambsuna q'amişakeney. Şot'in ene me azuk'i loxol q'arğiş śipseynak' Buxačuğoy içu sa nišan ak'est'una tene yaqběği, ama fırıpi t'e t'e xam oç̌alxone běği.

Verse: 2

Ṭiyal ičoġoy tayfoġo görä däsṭä-däsṭä čurpi israilluġo aḳaṭan, Buxaʒ́uġoy uruf šoṭay loxole \ ciri,
T'iyal içoğoy tayfoğo görə dəst'ə-dəst'ə çurpi israilluğo ak'at'an, Buxačuğoy uruf şot'ay loxole \ śiri,

Verse: 3

šoṭo me äyitmoġone pesṭi:
   şot'o me əyitmoğone pest'i:
    "Mone, Beori ġar Bileamene äyite!
   "Mone, Beori ğar Bileamene əyite!
    Mone, efi nu aḳalṭoġo aḳalṭin,
   Mone, efi nu ak'alt'oğo ak'alt'in,

Verse: 4

Efi nu ibakalṭoġo ibakalṭin,
   Efi nu ibakalt'oğo ibakalt'in,
    Ala Arciṭay xoži iz piin be͑ś eġalṭin,
   Ala Arśit'ay xoji iz piin běš eğalt'in,
    Šoṭay äyitmux iz u͑mu͑ġo lafṭaṭan oćala pasṭeġalṭine äyite!
   Şot'ay əyitmux iz ǔmǔğo laft'at'an oç̌ala past'eğalt'ine əyite!

Verse: 5

Ay Iaḳovi näsiläxun bakalorox, efi čadərxo,
   Ay İak'ovi nəsiləxun bakalorox, efi çadırxo,
    Ay israilluyox, efi mandala ganxoy gözälluġa äyit butene!
   Ay israilluyox, efi mandala ganxoy gözəlluğa əyit butene!

Verse: 6

Xene ṭo͑ġo͑l bakala o ḳinäḳnan,
   Xene t'ǒğǒl bakala o k'inək'nan,
    Oqe börine bakala baġča,
   Oqe börine bakala bağça,
    Q̣ONƷ́UĠON yaratmiši gözäl xodurxo,
   Q'ONČUĞON yaratmişi gözəl xodurxo,
    Arxe bel bakala šame xod ḳinäḳnan!
   Arxe bel bakala şame xod k'inək'nan!

Verse: 7

Efi xazalxoxun xene ḳaṭe,
   Efi xazalxoxun xene k'at'e,
    Vä͑xun bitala här cil göyünebaksa!
   Və̌xun bitala hər śil göyünebaksa!
    Ef padčaġ Agag padčaġaxunal üsṭün bakale,
   Ef padçağ Agag padçağaxunal üst'ün bakale,
    Ṭe padčaġluġen bitova čökṭesṭale!
   T'e padçağluğen bitova çökt'est'ale!

Verse: 8

Buxaʒ́uġon šoṭoġo Misiräxune č̣evḳi,
   Buxačuğon şot'oğo Misirəxune c'evk'i,
    Šoṭoġo čölnä öküzi zore tadi!
   Şot'oğo çölnə öküzi zore tadi!
    Düšmänxoy pula haq̇alṭun,
   Düşmənxoy pula haq'alt'un,
    U͑q̇e͑nxo xoxṗi oxurxo šoṭoġoy tapane basakalṭun!
   Ǔq'ěnxo xoxp'i oxurxo şot'oğoy tapane basakalt'un!

Verse: 9

Mone, ǯupsuna häzir sa šir ḳinäḳṭun arsṭa,
   Mone, cupsuna həzir sa şir k'inək't'un arst'a,
    Basḳi aslani gözälluġe bu šoṭoġosṭa!
   Bask'i aslani gözəlluğe bu şot'oğost'a!
    Šuva ṭe aslana ə͑śa bitalo? ^*
   Şuva t'e aslana ı̌ša bitalo? ^*
    Vä͑x xeyir-bäräkät tadalṭaynaḳ xeyir-bäräkät,
   Və̌x xeyir-bərəkət tadalt'aynak' xeyir-bərəkət,
    Vä͑x q̇arġišbalṭaynaḳ isä bäläne eysa!" ^*
   Və̌x q'arğişbalt'aynak' isə bələne eysa!" ^*

Verse: 10

Ṭe vädä Balagi äǯuġon Bileami loxol ṭetäre biq̇i ki, iz kulmoġo yumburuġ biq̇i pine: "Va bez düšmänxo q̇arġišbseynaḳez ḳalpe, yoxsa šoṭoġo xeyir-bäräkät tasṭeynaḳ? Mo xibimǯine ki, šoṭoġoynaḳ xeyir-bäräkäten ḳale.
T'e vədə Balagi əcuğon Bileami loxol t'etəre biq'i ki, iz kulmoğo yumburuğ biq'i pine: "Va bez düşmənxo q'arğişbseynak'ez k'alpe, yoxsa şot'oğo xeyir-bərəkət tast'eynak'? Mo xibimcine ki, şot'oğoynak' xeyir-bərəkəten k'ale.

Verse: 11

Aća bez piin be͑śṭan! Č̣eki taki vi ḳoya! Va šaaṭ hörmätbi vi čureġala ḳinäḳ yaq̇abadala fikirzax buy! Ama Q̣ONƷ́UĠON moṭo vaynaḳ gelene aḳi".
Aç̌a bez piin běšt'an! C'eki taki vi k'oya! Va şaat' hörmətbi vi çureğala k'inək' yaq'abadala fikirzax buy! Ama Q'ONČUĞON mot'o vaynak' gelene ak'i".

Verse: 12

Bileamen isä Balaga pine: "Bez bać̣anexun yaq̇abiṭoġo tez pey ki,
Bileamen isə Balaga pine: "Bez bač'anexun yaq'abit'oğo tez pey ki,

Verse: 13

Balagen za iz q̇əzəlen q̇a gümüšen buy ḳožal tadayin, zu Q̣ONƷ́UĠOY äyitäxun č̣eri hiḳḳal bes tez bakon? Zu sayǯä Q̣ONƷ́UĠON za uḳalṭoġo uḳoz.
Balagen za iz q'ızılen q'a gümüşen buy k'ojal tadayin, zu Q'ONČUĞOY əyitəxun c'eri hik'k'al bes tez bakon? Zu saycə Q'ONČUĞON za uk'alt'oğo uk'oz.

Verse: 14

Baneki, zu bez ölkinä qayezbaksa! Ama barta hälä ki miyazu, va sa šeyal ṗaṗesṗaz. Gäläǯäye me azuḳen vi azuḳi bel ečalṭoġo ibaka!" \ Bileami gäläǯäyä aksun
Baneki, zu bez ölkinə qayezbaksa! Ama barta hələ ki miyazu, va sa şeyal p'ap'esp'az. Gələcəye me azuk'en vi azuk'i bel eçalt'oğo ibaka!" \ Bileami gələcəyə aksun

Verse: 15

Metär piyal Bileamen gäläǯäyä aḳala äyitmoġone iz źomoxun č̣evḳi:
   Metər piyal Bileamen gələcəyə ak'ala əyitmoğone iz ǰomoxun c'evk'i:
    "Mone, Beori ġar Bileamene äyite!
   "Mone, Beori ğar Bileamene əyite!
    Mone, efi nu aḳalṭoġo aḳalṭin,
   Mone, efi nu ak'alt'oğo ak'alt'in,

Verse: 16

Efi nu ibakalṭoġo ibakalṭin,
   Efi nu ibakalt'oğo ibakalt'in,
    Bitova Bašarbalṭuxun ičeynaḳ sa alaxun aḳesun bakalṭin,
   Bitova Başarbalt'uxun içeynak' sa alaxun ak'esun bakalt'in,
    Šoṭay äyitmux iz u͑mo͑ġo lafṭaṭan
   Şot'ay əyitmux iz ǔmǒğo laft'at'an
    Oćala pasṭeġalṭine äyite!
   Oç̌ala past'eğalt'ine əyite!

Verse: 17

Šoṭo azaksa, ama ə͑śa tene!
   Şot'o azaksa, ama ı̌ša tene!
    Iz loxolez be͑ġsa, ama hälä ä͑xile!
   İz loxolez běğsa, ama hələ ə̌xile!
    Mone, muć̣uli č̣eġalṭullariḳ Iaḳovi näsiläxunal sa padčaġe č̣eysa,
   Mone, muč'uli c'eğalt'ullarik' İak'ovi nəsiləxunal sa padçağe c'eysa,
    Israilluġoy bošṭan zorba sa kule e͑qesa!
   İsrailluğoy boşt'an zorba sa kule ěqesa!
    Moavluġoy bula ć̣aḳḳale,
   Moavluğoy bula č'ak'k'ale,
    Šeṭluġoy mä͑yä duġi carḳale!
   Şet'luğoy mə̌yə duği śark'ale!

Verse: 18

Edoma iz kiyel badale, Seyra exṭi iz düšmänä turin oq̇a sakale!
   Edoma iz kiyel badale, Seyra ext'i iz düşmənə turin oq'a sakale!
    Israilluyox isä e͑qeġalṭun!
   İsrailluyox isə ěqeğalt'un!

Verse: 19

Iaḳovi näsiläxun č̣eriṭin šoṭoġo iz zora aḳesṭale,
   İak'ovi nəsiləxun c'erit'in şot'oğo iz zora ak'est'ale,
    Šähäre mandiṭoġo bitova ḳac̣ṗi ciḳale!"
   Şəhəre mandit'oğo bitova k'as'p'i śik'ale!"

Bileami israilluyox nu bakalṭoġoy gäläǯäyäl aḳi äyitbsun
Bileami israilluyox nu bakalt'oğoy gələcəyəl ak'i əyitbsun

Verse: 20

Oša Bileamen amalegluġoy gäläǯäyäne aḳi pi:
   Oşa Bileamen amalegluğoy gələcəyəne ak'i pi:
    "Millätxoy boš bitoṭuxun üsṭüne amalegluyox,
   "Millətxoy boş bitot'uxun üst'üne amalegluyox,
    Ama ičoġoy axər butene - bito äfčibakalṭun!"
   Ama içoğoy axır butene - bito əfçibakalt'un!"

Verse: 21

Bileamen Ḳayini näsiläxun bakalṭoġoy gäläǯäyäl aneḳi:
   Bileamen K'ayini nəsiləxun bakalt'oğoy gələcəyəl anek'i:
    "Mone, häysä efi ḳožurxoynaḳ q̇ə͑ butene,
   "Mone, həysə efi k'ojurxoynak' q'ı̌ butene,
    Efi mes q̇ayani loxol ḳinäḳe.
   Efi mes q'ayani loxol k'inək'e.

Verse: 22

Ama, ay Ḳayinaxun bakiyorox, ašurluyox eġaṭan xarabina mandalnan!
   Ama, ay K'ayinaxun bakiyorox, aşurluyox eğat'an xarabina mandalnan!
    Bito šoṭoġoy kiyel bafṭalnan".
   Bito şot'oğoy kiyel baft'alnan".

Verse: 23

Bileamen gäläǯäyä aḳi saal pine:
   Bileamen gələcəyə ak'i saal pine:
    "Vay, Buxaʒ́uġon moṭoġo biṭuxun oša šuva dirisṭ mandon?
   "Vay, Buxačuğon mot'oğo bit'uxun oşa şuva dirist' mandon?

Verse: 24

Ḳiṭṭimluyox gämiġon eġalṭun,
   K'it't'imluyox gəmiğon eğalt'un,
    Šoṭoġon Ašura q̇a Evera exṭalṭun,
   Şot'oğon Aşura q'a Evera ext'alt'un,
    Ama axərda ičanal äfčibakalṭun".
   Ama axırda içanal əfçibakalt'un".

Verse: 25

Moṭoxun oša Bileam č̣eri iz ḳoya, Balagal iz ḳoyane qaybaki.
Mot'oxun oşa Bileam c'eri iz k'oya, Balagal iz k'oyane qaybaki.

This text is part of the TITUS edition of Biblia Udica, Versio Nizhensis: Vetus Testamentum.

Copyright TITUS Project, Frankfurt a/M, 18.11.2023. No parts of this document may be republished in any form without prior permission by the copyright holder.