TITUS
Biblia Udica, Versio Nizhensis: Vetus Testamentum
Part No. 149
Previous part

Chapter: 69 

69-ǯi ω͑vel mä͑ġ
69-ci Ǐvel mə̌ğ



Farḳalxoy däsṭin kalaṭaynaḳ. Davidi "Ge͑śe vard ḳinäḳ gözäl bakala iräziluġ" uḳala faren mä͑ġe͑ġala ω͑vel mä͑ġ.
Fark'alxoy dəst'in kalat'aynak'. Davidi "Gěše vard k'inək' gözəl bakala irəziluğ" uk'ala faren mə̌ğěğala Ǐvel mə̌ğ.


Verse: 1    Čarḳesṭa za, ay Buxaʒ́ux, xenen za q̇uč̣ene,
   Çark'est'a za, ay Buxačux, xenen za q'uc'ene,
    Hari bez xərṭṭäyel ciriḳ ṗaṗene!
    Hari bez xırt't'əyel śirik' p'ap'ene!

Verse: 2    Ṭetär sa bataġluġaz bafṭe ki,
   T'etər sa batağluğaz baft'e ki,
    Bez tura laxala ga tez bä͑ġä͑bsa.
    Bez tura laxala ga tez bə̌ğə̌bsa.
    Xenen tanešṭa za, bä͑ġä͑loy sa oqnu batḳala ḳinäḳzu zu!
    Xenen taneşt'a za, bə̌ğə̌loy sa oqnu batk'ala k'inək'zu zu!

Verse: 3    Halnuxunez bite zu kömäyä ḳalpsaxun,
   Halnuxunez bite zu köməyə k'alpsaxun,
    Bez piin neġe q̇aribaki Buxaʒ́uġoy yaq̇a be͑ġsaxun.
    Bez piin neğe q'aribaki Buxačuğoy yaq'a běğsaxun.

Verse: 4    Hiḳḳali loxol za nifrätbalorox bez biin popaxun gelene bake,
   Hik'k'ali loxol za nifrətbalorox bez biin popaxun gelene bake,
    Nahaq̇ gala bez bać̣anexun bafṭiṭoġoy saye avuzbake.
    Nahaq' gala bez bač'anexun baft'it'oğoy saye avuzbake.
    Zaxun heṭu tadi exṭes teṭun baksa tez q̇amišaksa.
    Zaxun het'u tadi ext'es tet'un baksa tez q'amişaksa.

Verse: 5    Bez biq̇i äšurxo bito Vi piin be͑śe, ay Buxaʒ́ux,
   Bez biq'i əşurxo bito Vi piin běše, ay Buxačux,
    Bez günaxxo Vaxun č̣aṗ tene.
    Bez günaxxo Vaxun c'ap' tene.

Verse: 6    Za ćomä͑yin ma efa, ay Buxaʒ́ux, ay Q̣ošuni Q̣ONƷ́UX!
   Za ç̌omə̌yin ma efa, ay Buxačux, ay Q'oşuni Q'ONČUX!
    Tene Va umudbakalṭoġoyal bula ḳoc̣bi bakoz,
    Tene Va umudbakalt'oğoyal bula k'os'bi bakoz,
    Va q̇ä͑ve͑ġalṭoġoval oṭṗesṭi bakoz zu, ay Israili Buxaʒ́ux!
    Va q'ə̌věğalt'oğoval ot'p'est'i bakoz zu, ay İsraili Buxačux!

Verse: 7    Axəri źame q̇onʒ́uxal bazki zu Vi yaq̇en taysuna görä,
   Axıri ǰame q'ončuxal bazki zu Vi yaq'en taysuna görə,
    Bezi ćoyel äyitäl hari vädä bakene.
    Bezi ç̌oyel əyitəl hari vədə bakene.

Verse: 8    Bezi ə͑śaṭoġone zaxun ćo taradi,
   Bezi ı̌šat'oğone zaxun ç̌o taradi,
    Nanaxun sa vičimoġoy piyexunez biti zu.
    Nanaxun sa viçimoğoy piyexunez biti zu.

Verse: 9    Šoṭo görä ki, Va lafṭala här äyit zaal lafesṭa,
   Şot'o görə ki, Va laft'ala hər əyit zaal lafest'a,
    Vi ḳoža čuresunen za boḳosṗi-cinne, *
    Vi k'oja çuresunen za bok'osp'i-śinne, *
    Vi bakala gane barada pis äyit ibakaṭan bez pisa ibakala ḳinäḳez baksa!
    Vi bakala gane barada pis əyit ibakat'an bez pisa ibakala k'inək'ez baksa!

Verse: 10    Bezi ġurux efi o͑nepsunal
   Bezi ğurux efi ǒnepsunal
    Laġlaġin gane bake,
    Lağlağin gane bake,

Verse: 11    Mä͑yin lapi yas efaṭanal bez loxolṭun axśume!
   Mə̌yin lapi yas efat'anal bez loxolt'un axšume!

Verse: 12    Dirisṭ šähären zaxune äyite,
   Dirist' şəhəren zaxune əyite,
    Finaġoyxoyal źomoz bafṭe zu!
    Finağoyxoyal ǰomoz baft'e zu!

Verse: 13    Zu isä Vaz afərəpi ḳale, ay Q̣ONƷ́UX,
   Zu isə Vaz afırıpi k'ale, ay Q'ONČUX,
    Za ǯoġabsuz ma efa zu Vi piyes šaaṭ aḳeġala vädine,
    Za coğabsuz ma efa zu Vi piyes şaat' ak'eğala vədine,
    Vi nu badalbakala čuresuna aḳesṭi za čarḳesṭa.
    Vi nu badalbakala çuresuna ak'est'i za çark'est'a.

Verse: 14    Zapa č̣evḳa za me čeyilluġaxun,
   Zapa c'evk'a za me çeyilluğaxun,
    Bafsṭa ma barta!
    Bafst'a ma barta!
    Za bä͑ġä͑loy xeyurxoy boš batevḳala me düšmänxoxun čarḳesṭa!
    Za bə̌ğə̌loy xeyurxoy boş batevk'ala me düşmənxoxun çark'est'a!

Verse: 15    Ma barta za selen tašeri bä͑ġä͑loy sa oqnu bosane,
   Ma barta za selen taşeri bə̌ğə̌loy sa oqnu bosane,
    Bez bafṭi kure ćoya buṭesa ma barta!
    Bez baft'i kure ç̌oya but'esa ma barta!

Verse: 16    Vi nu badalbakala čuresuni ḳä baksuna aḳesṭi za čarḳesṭa, ay Q̣ONƷ́UX,
   Vi nu badalbakala çuresuni k'ə baksuna ak'est'i za çark'est'a, ay Q'ONČUX,
    Bez loxol be͑ġa, Vi üḳ boḳospsuna zaxun kammaba!
    Bez loxol běğa, Vi ük' bok'ospsuna zaxun kammaba!

Verse: 17    Me Vi ḳula nu aksuna ma laxa,
   Me Vi k'ula nu aksuna ma laxa,
    Eki bez ṭarnu ṗaṗa, za ibaka.
    Eki bez t'arnu p'ap'a, za ibaka.

Verse: 18    Zaxun ä͑xil ma baka, eki za čarḳesṭa,
   Zaxun ə̌xil ma baka, eki za çark'est'a,
    Za bez düšmänxoy kiyexun haq̇a!
    Za bez düşmənxoy kiyexun haq'a!

Verse: 19    Anksa Hun bez düšmänxoy balṭoġo bitova:
   Anksa Hun bez düşmənxoy balt'oğo bitova:
    Šoṭoġoy za bakala nifrätä q̇a
    Şot'oğoy za bakala nifrətə q'a
    Za biyaburbi amdarxoy piyexun saksun čuresuna.
    Za biyaburbi amdarxoy piyexun saksun çuresuna.

Verse: 20    Za uḳala äyitmoġo ibaki bez üḳe xä͑xä͑yesa,
   Za uk'ala əyitmoğo ibaki bez ük'e xə̌xə̌yesa,
    Bez kiyexun hiḳḳal tene ayesa!
    Bez kiyexun hik'k'al tene ayesa!
    Nä zaynaḳ sa üḳ boḳosṗale bu,
    Nə zaynak' sa ük' bok'osp'ale bu,
    Nääl sa üḳ tadal.
    Nəəl sa ük' tadal.

Verse: 21    Busabakaṭan aġuṭun tadi za,
   Busabakat'an ağut'un tadi za,
    Xenezaluġa oq̇oyenṭun boṭi šoṭoġon. *
    Xenezaluğa oq'oyent'un bot'i şot'oğon. *

Verse: 22    Barta q̇urbani q̇onaxluġxo č̣ovakesṭala gala ičoġoy kul-turq̇an ġaćeci,
   Barta q'urbani q'onaxluğxo c'ovakest'ala gala içoğoy kul-turq'an ğaç̌eśi,
    Barta ičoġoxun sa isṭolin bel arcalorox ičoġoy turin oq̇axun kaśḳaloroxq̇an baki.
    Barta içoğoxun sa ist'olin bel arśalorox içoğoy turin oq'axun kašk'aloroxq'an baki.

Verse: 23    Piin išiġq̇an bari,
   Piin işiğq'an bari,
    Bać̣anq̇an xoxbaki šoṭoġoy barta!
    Bač'anq'an xoxbaki şot'oğoy barta!

Verse: 24    Vi hirsläyinšaḳsun ḳä baksuna aḳesṭa šoṭoġo,
   Vi hirsləyinşak'sun k'ə baksuna ak'est'a şot'oğo,
    Barta Vi boḳosṗi ciḳala äǯuġ šoṭoġoy belq̇an bari!
    Barta Vi bok'osp'i śik'ala əcuğ şot'oğoy belq'an bari!

Verse: 25    Ḳožin išiġq̇an aći šoṭoġoy,
   K'ojin işiğq'an aç̌i şot'oğoy,
    Čadərxoq̇an xarabina mandi! *
    Çadırxoq'an xarabina mandi! *

Verse: 26    Šoṭo görä ki, Hun Vi ćoya taradiṭoġoy bać̣anexun bafṭiyoroxe,
   Şot'o görə ki, Hun Vi ç̌oya taradit'oğoy bač'anexun baft'iyoroxe,
    Bitiṭoġo samalal liḳṭi sakaloroxe šorox.
    Bitit'oğo samalal lik't'i sakaloroxe şorox.

Verse: 27    Campa šoṭoġoy me günaxal ǯazasuz nu mandala günaxxoy siyäyinä,
   Üampa şot'oğoy me günaxal cazasuz nu mandala günaxxoy siyəyinə,
    Vi be͑ś ičoġo tämizä č̣evksa ma barta šoṭoġo!
    Vi běš içoğo təmizə c'evksa ma barta şot'oğo!

Verse: 28    Silba šoṭoġoy c̣iya Vi girkäxun, *
   Silba şot'oğoy s'iya Vi girkəxun, *
    Hämišäluġ yäšäyinš q̇azayinšes bakala düzgünṭoġoxun sa siyäyinä maq̇aṭun baki barta.
    Həmişəluğ yəşəyinş q'azayinşes bakala düzgünt'oğoxun sa siyəyinə maq'at'un baki barta.

Verse: 29    Zu isä goroxzu, därde boš bakala sa amdarzu,
   Zu isə goroxzu, dərde boş bakala sa amdarzu,
    Zapa č̣evḳa za me äzyäti bošṭan, ay čarḳesṭes bakala Buxaʒ́ux!
    Zapa c'evk'a za me əzyəti boşt'an, ay çark'est'es bakala Buxačux!

Verse: 30    Mä͑ġpi alaboz Buxaʒ́uġoy c̣iya zu,
   Mə̌ğpi alaboz Buxačuğoy s'iya zu,
    Šükürbala mä͑ġur barale bez źomoxun.
    Şükürbala mə̌ğur barale bez ǰomoxun.

Verse: 31    Mo Q̣ONƷ́UĠOY piyes öküzi q̇urbanaxunal šaaṭ aḳeġale,
   Mo Q'ONČUĞOY piyes öküzi q'urbanaxunal şaat' ak'eğale,
    Bul-turaxun sagala q̇urban ečala araḳaxunal üsṭün bakale.
    Bul-turaxun sagala q'urban eçala arak'axunal üst'ün bakale.

Verse: 32    Faġərxo mu͑qbakale moṭo aḳi,
   Fağırxo mǔqbakale mot'o ak'i,
    Buxaʒ́uġo qä͑ve͑ġalṭoġoy üḳ qayeġale!
    Buxačuğo qə̌věğalt'oğoy ük' qayeğale!

Verse: 33    Axəri inebaksa Q̣ONƷ́UĠON ehṭiyäǯi boš bakalṭoġo,
   Axıri inebaksa Q'ONČUĞON eht'iyəci boş bakalt'oğo,
    Iz azuḳaxun äzyät aḳalṭoġoy sayǯäṭu nu ibaksuna tene laxsa.
    İz azuk'axun əzyət ak'alt'oğoy saycət'u nu ibaksuna tene laxsa.

Verse: 34    Barta göyurxoxun q̇a oćalaxun,
   Barta göyurxoxun q'a oç̌alaxun,
    Barta dänizxoxun q̇a moṭoġoy boš bakalṭoġoxun bitoṭuxun Šoṭaynaḳ tärifq̇an hari!
    Barta dənizxoxun q'a mot'oğoy boş bakalt'oğoxun bitot'uxun Şot'aynak' tərifq'an hari!

Verse: 35    Čarḳesṭale Buxaʒ́uġon Siona, *
   Çark'est'ale Buxačuğon Siona, *
    Iudeyin šähärmoġo täzädän biq̇i Iz azuḳa ṭiya ečeri arcesṭale,
    İudeyin şəhərmoğo təzədən biq'i İz azuk'a t'iya eçeri arśest'ale,
    Šoṭoġo oćal tadale.
    Şot'oğo oç̌al tadale.

Verse: 36    Buxaʒ́uġo bul ḳoc̣balṭoġoy näsilä mandale me oćal,
   Buxačuğo bul k'os'balt'oğoy nəsilə mandale me oç̌al,
    Šoṭo čalxalṭoġon ṭiya mäsḳän sakale!
    Şot'o çalxalt'oğon t'iya məsk'ən sakale!



Next part


This text is part of the TITUS edition of Biblia Udica, Versio Nizhensis: Vetus Testamentum.

Copyright TITUS Project, Frankfurt a/M, 18.11.2023. No parts of this document may be republished in any form without prior permission by the copyright holder.