TITUS
Biblia Udica, Versio Nizhensis: Vetus Testamentum
Part No. 158
Previous part

Chapter: 78 

78-ǯi ω͑vel mä͑ġ
78-ci Ǐvel mə̌ğ



Asafi ögüd-näsyät tadala ω͑vel mä͑ġ.
Asafi ögüd-nəsyət tadala Ǐvel mə̌ğ.


Verse: 1    Ay bezi azuḳ, bez zombsuna u͑mu͑xlaxanan,
   Ay bezi azuk', bez zombsuna ǔmǔxlaxanan,
    Bez uḳalṭoġo ibakanan.
    Bez uk'alt'oğo ibakanan.

Verse: 2    Mäsäloġon äyitḳoz,
   Məsəloğon əyitk'oz,
    Dünyä yaranmišakiṭuxun maġay č̣aṗ mandiṭoġo bayanboz. *
    Dünyə yaranmişakit'uxun mağay c'ap' mandit'oğo bayanboz. *

Verse: 3    Hetär ki, beš bavoġone yaynaḳ exlätṗe,
   Hetər ki, beş bavoğone yaynak' exlətp'e,
    Hetär ki, yanal šoṭoġoxunyan ibaki avabake.
    Hetər ki, yanal şot'oğoxunyan ibaki avabake.

Verse: 4    Avabakesṭalyan yan moṭo beš nävoġo:
   Avabakest'alyan yan mot'o beş nəvoğo:
    Sayǯä alxəšen źomo ečes bakala Q̣ONƷ́UĠOY äšurxo,
    Saycə alxışen ǰomo eçes bakala Q'ONČUĞOY əşurxo,
    Šoṭay zora, biq̇i bito nu aḳeci äšurxo
    Şot'ay zora, biq'i bito nu ak'eśi əşurxo
    Exlätṗalyan yan ošin eġala näsileynaḳ!
    Exlətp'alyan yan oşin eğala nəsileynak'!

Verse: 5    Iaḳovaxun bakiṭoġo Iz buyruġxone tadi Šoṭin,
   İak'ovaxun bakit'oğo İz buyruğxone tadi Şot'in,
    Israila Iz ḳanunxone avabakesṭi.
    İsraila İz k'anunxone avabakest'i.
    "Ef äyloġoval moṭo zombanan" pine tapšurbi beš bavoġo.
    "Ef əyloğoval mot'o zombanan" pine tapşurbi beş bavoğo.

Verse: 6    Metär pine ki, barta ošin eġala näsilenal avabakeq̇an,
   Metər pine ki, barta oşin eğala nəsilenal avabakeq'an,
    Šoṭoġoxun baki äyloġonal oša ičoġoy äyloġoynaḳq̇aṭun exlätṗi.
    Şot'oğoxun baki əyloğonal oşa içoğoy əyloğoynak'q'at'un exlətp'i.

Verse: 7    Buxaʒ́uġoq̇aṭun umudbaki,
   Buxačuğoq'at'un umudbaki,
    Šoṭay biq̇i äšurxo eyexun maq̇aṭun č̣evḳi,
    Şot'ay biq'i əşurxo eyexun maq'at'un c'evk'i,
    Šoṭay laxi yaq̇enq̇aṭun taci barta.
    Şot'ay laxi yaq'enq'at'un taśi barta.

Verse: 8    Ṭe vädä ičoġoy bavoġollariḳ teṭun bakon,
   T'e vədə içoğoy bavoğollarik' tet'un bakon,
    Šoṭoġollariḳ ičoġoy źomoy tüšen taġala,
    Şot'oğollarik' içoğoy ǰomoy tüşen tağala,
    Ičoġoy yaq̇a aćesṗi sa näsil teṭun bakon!
    İçoğoy yaq'a aç̌esp'i sa nəsil tet'un bakon!
    Buxaʒ́uġoxun ä͑xilṭuniy šorox,
    Buxačuğoxun ə̌xilt'uniy şorox,
    Šoṭoxun ġaćeci iräziluġa axəral ciriḳ ämälteṭunbi šoṭoġon!
    Şot'oxun ğaç̌eśi irəziluğa axıral śirik' əməltet'unbi şot'oğon!

Verse: 9    Efraimi näsiläxun bakala q̇oččaxxo be͑ġanan:
   Efraimi nəsiləxun bakala q'oççaxxo běğanan:
    Ox-kamana ičoġoy kiyel exṭiṭun davina č̣eri šorox,
    Ox-kamana içoğoy kiyel ext'it'un davina c'eri şorox,
    Ama ṗurumal düšmäni be͑ś čurpes teṭun baki, č̣eri ṭiṭalaṭun baki.
    Ama p'urumal düşməni běš çurpes tet'un baki, c'eri t'it'alat'un baki.

Verse: 10    Šoṭo görä ki, Buxaʒ́uġoy ičoġoxun ġaćeci iräziluġa ämälteṭunbsay,
   Şot'o görə ki, Buxačuğoy içoğoxun ğaç̌eśi irəziluğa əməltet'unbsay,
    Šoṭay laxi yaq̇en taysun teṭun čuresay.
    Şot'ay laxi yaq'en taysun tet'un çuresay.

Verse: 11    Eyexun č̣evḳeṭuniy šoṭoġon Šoṭay biq̇i äšurxo q̇a aḳesṭi möǯüzoġo!
   Eyexun c'evk'et'uniy şot'oğon Şot'ay biq'i əşurxo q'a ak'est'i möcüzoğo!

Verse: 12    Manu ki, Buxaʒ́uġon Misirä,
   Manu ki, Buxačuğon Misirə,
    Coan šähäri düzänluġxo aḳesṭi ṭe möǯüzoġo
    Üoan şəhəri düzənluğxo ak'est'i t'e möcüzoğo
    Šoṭoġoy bavoġon ičoġoy piinṭun aḳey. *
    Şot'oğoy bavoğon içoğoy piint'un ak'ey. *

Verse: 13    Šoṭin dänizi xena šoṭoġoy yön saal tärs täräf bari ḳinäḳ efi
   Şot'in dənizi xena şot'oğoy yön saal tərs tərəf bari k'inək' efi
    Šoṭoġo dänizi tumexun, q̇ari ganuxune č̣ovakesṭi. *
    Şot'oğo dənizi tumexun, q'ari ganuxune c'ovakest'i. *

Verse: 14    Ġenaxun asoyi boš,
   Ğenaxun asoyi boş,
    Üše isä išiġ sakala aruġoy boš
    Üşe isə işiğ sakala aruğoy boş
    Šoṭoġoy be͑ś taci yaq̇e aḳesṭay. *
    Şot'oğoy běš taśi yaq'e ak'est'ay. *

Verse: 15    Q̣ayana qə͑bi xene č̣evḳi Šoṭin amc̣i oćala,
   Q'ayana qı̌bi xene c'evk'i Şot'in ams'i oç̌ala,
    Bä͑ġä͑loy orayini xe ḳinäḳ ac̣ar xene tadi šoṭoġo. *
    Bə̌ğə̌loy orayini xe k'inək' as'ar xene tadi şot'oğo. *

Verse: 16    Źe͑naxune č̣erey,
   J̌ěnaxune c'erey,
    Šaġapi oq ḳinäḳ taġala ṭe xe. *
    Şağapi oq k'inək' tağala t'e xe. *

Verse: 17    Ama günax äšṗesṭunaxun kul teṭun haq̇i šorox,
   Ama günax əşp'est'unaxun kul tet'un haq'i şorox,
    Ala Arciṭu hiḳḳal bi
    Ala Arśit'u hik'k'al bi
    P̣urum ičoġoy źomonṭun taysa burqi amc̣i oćala bakaṭan.
    P'urum içoğoy ǰomont'un taysa burqi ams'i oç̌ala bakat'an.

Verse: 18    Buxaʒ́uġoy här šeya bašarbsunaxunṭun šüpäläyinšaki,
   Buxačuğoy hər şeya başarbsunaxunt'un şüpələyinşaki,
    Ičoġoy üḳexun č̣ovakala ukunxo čuresunenṭun sinäyinši Šoṭo. *
    İçoğoy ük'exun c'ovakala ukunxo çuresunent'un sinəyinşi Şot'o. *

Verse: 19    "Čätin ukesṭes bakale yax me amc̣i oćala Buxaʒ́uġon" pi
   "Çətin ukest'es bakale yax me ams'i oç̌ala Buxačuğon" pi
    Šoṭay bać̣anexunṭun äyitey.
    Şot'ay bač'anexunt'un əyitey.

Verse: 20    Metärṭun nexey:
   Metərt'un nexey:
    "Q̣ayana duġi xene č̣evḳi Šoṭin,
    "Q'ayana duği xene c'evk'i Şot'in,
    Oq ḳinäḳ taġala xene č̣eri ṭeṭiin.
    Oq k'inək' tağala xene c'eri t'et'iin.
    Ama śum tades tene bakon yax Šoṭin,
    Ama šum tades tene bakon yax Şot'in,
    Čätin me azuḳi źomo yeq̇en boševḳi girbes bakane!" *
    Çətin me azuk'i ǰomo yeq'en boşevk'i girbes bakane!" *

Verse: 21    Q̣ONƷ́UĠOYAL moṭo ibaki äǯuġone biq̇i,
   Q'ONČUĞOYAL mot'o ibaki əcuğone biq'i,
    Bäč̣üḳeci Šoṭay äǯuġ Iaḳovi näsili loxol,
    Bəc'ük'eśi Şot'ay əcuğ İak'ovi nəsili loxol,
    Hirsene duġi Šoṭo israilluġoy me äyitä ibakaṭan.
    Hirsene duği Şot'o israilluğoy me əyitə ibakat'an.

Verse: 22    Šoṭaynaḳ ki, šoṭoġon Buxaʒ́uġo bać̣an teṭun taradi,
   Şot'aynak' ki, şot'oğon Buxačuğo bač'an tet'un taradi,
    Teṭun ve͑baki ki, Šoṭin ičoġo čarḳesṭale.
    Tet'un věbaki ki, Şot'in içoğo çark'est'ale.

Verse: 23    Ṭe vädä ämirebi Buxaʒ́uġon göyurxo,
   T'e vədə əmirebi Buxačuğon göyurxo,
    Šoṭoġoyal źomone ä͑meci.
    Şot'oğoyal ǰomone ə̌meśi.

Verse: 24    Mannane bari alaxun šoṭoġoy loxol aġala barala ḳinäḳ,
   Mannane bari alaxun şot'oğoy loxol ağala barala k'inək',
    Göynuxun śume tadi šoṭoġo Buxaʒ́uġon. *
    Göynuxun šume tadi şot'oğo Buxačuğon. *

Verse: 25    Amdarxonal angelxoy ukala ukunaxunṭun käyi,
   Amdarxonal angelxoy ukala ukunaxunt'un kəyi,
    Boššamine ukesṭi šoṭoġo.
    Boşşamine ukest'i şot'oğo.

Verse: 26    Be͑ġč̣eġala täräfäxun eġala muše e͑qevḳi Šoṭin göynul,
   Běğc'eğala tərəfəxun eğala muşe ěqevk'i Şot'in göynul,
    Güney täräfäxun eġala muše ečeri Iz zoren.
    Güney tərəfəxun eğala muşe eçeri İz zoren.

Verse: 27    Ṭemane tadi ki, belxune bari yeq̇ šoṭoġoy,
   T'emane tadi ki, belxune bari yeq' şot'oğoy,
    Dänizi börine bakala q̇ume hama q̇ušurxone yaq̇abi šoṭoġoynaḳ.
    Dənizi börine bakala q'ume hama q'uşurxone yaq'abi şot'oğoynak'.

Verse: 28    Ṭe q̇ušurxo hari šoṭoġoy čurḳala gala,
   T'e q'uşurxo hari şot'oğoy çurk'ala gala,
    Ičoġoy čadərxoy härräminene bisṭay.
    İçoğoy çadırxoy hərrəminene bist'ay.

Verse: 29    Uṭunksay šoṭoġonal ičoġoy źomoxun baramin,
   Ut'unksay şot'oğonal içoğoy ǰomoxun baramin,
    P̣aṭunṗi ičoġoy arzuna šorox!
    P'at'unp'i içoğoy arzuna şorox!

Verse: 30    Ama yeq̇a hälä ḳäč̣ṗi q̇uč̣ṗinuṭ,
   Ama yeq'a hələ k'əc'p'i q'uc'p'inut',
    Šo ičoġoy q̇oq̇exun hälä č̣ovakinut
    Şo içoğoy q'oq'exun hələ c'ovakinut

Verse: 31    Baredi Buxaʒ́uġoy äǯuġ šoṭoġoy bel!
   Baredi Buxačuğoy əcuğ şot'oğoy bel!
    Israilluġoy än zorbaṭoġone ḳac̣ṗi-cipi,
    İsrailluğoy ən zorbat'oğone k'as'p'i-śipi,
    Q̣oččaġxone duġi saki! *
    Q'oççağxone duği saki! *

Verse: 32    Metär äšure eysay ičoġoy bel,
   Metər əşure eysay içoğoy bel,
    Ama ṗurumal günax äšṗesṭunaxun kul teṭun haq̇say šorox,
    Ama p'urumal günax əşp'est'unaxun kul tet'un haq'say şorox,
    Šoṭay aḳesṭi me möǯüzoġo ve͑teṭunbaksay.
    Şot'ay ak'est'i me möcüzoğo větet'unbaksay.

Verse: 33    Buxaʒ́uġonal moṭo görä ičoġoy ömüräne pučbi,
   Buxačuğonal mot'o görə içoğoy ömürəne puçbi,
    Biyamin q̇ə͑ye boš č̣ovaḳala yäšäyinšaxun bašq̇a sa ġi teṭun aḳi šoṭoġon.
    Biyamin q'ı̌ye boş c'ovak'ala yəşəyinşaxun başq'a sa ği tet'un ak'i şot'oğon.

Verse: 34    Hari ičoġoy axər ṗaṗaṭane pulmux qayesay šoṭoġoy,
   Hari içoğoy axır p'ap'at'ane pulmux qayesay şot'oğoy,
    Ṭe vädäṭun burqsay Buxaʒ́uġo qä͑ve͑sa,
    T'e vədət'un burqsay Buxačuğo qə̌věsa,
    Šoṭo ḳalpi xoyinśpsa.
    Şot'o k'alpi xoyinšpsa.

Verse: 35    Ṭe vädäne ičoġoy eyex bafsṭay ki, Šo ičoġoynaḳ sa q̇aya,
   T'e vədəne içoğoy eyex bafst'ay ki, Şo içoğoynak' sa q'aya,
    Ala Arciyo ičoġoy čarḳesṭes bakala Q̣onʒ́uxe!
    Ala Arśiyo içoğoy çark'est'es bakala Q'ončuxe!

Verse: 36    Ćoyexunṭun ičoġo pe͑śmanbaki ḳinäḳ tašṭay,
   Ç̌oyexunt'un içoğo pěšmanbaki k'inək' taşt'ay,
    Äfčine äyitey ičoġoy muzin.
    Əfçine əyitey içoğoy muzin.

Verse: 37    Üḳe boš isä hälä Buxaʒ́uġoxun ä͑xilṭuniy,
   Ük'e boş isə hələ Buxačuğoxun ə̌xilt'uniy,
    Šoṭay ičoġoxun ġaćeci iräziluġa ämälteṭunbsay šoṭoġon.
    Şot'ay içoğoxun ğaç̌eśi irəziluğa əməltet'unbsay şot'oğon.

Verse: 38    Ama Buxaʒ́uġon Izi üḳ boḳosṗal baksuna görä šoṭoġo baġəšlayinšebsay,
   Ama Buxačuğon İzi ük' bok'osp'al baksuna görə şot'oğo bağışlayinşebsay,
    Äfčitenepsay šoṭoġo.
    Əfçitenepsay şot'oğo.
    Basḳesesṭay Izi hirsä gele vädä,
    Bask'esest'ay İzi hirsə gele vədə,
    Enefsay Iču Izi bäč̣üḳeci äǯuġo šoṭoġoy bel cipsaxun.
    Enefsay İçu İzi bəc'ük'eśi əcuğo şot'oğoy bel śipsaxun.

Verse: 39    Avaney šoṭoġoy günaxi be͑ś aǯiz mandala sa insani bala baksuna,
   Avaney şot'oğoy günaxi běš aciz mandala sa insani bala baksuna,
    Č̣ovaki taġala sa mušaxun avuzin nu baksuna.
    C'ovaki tağala sa muşaxun avuzin nu baksuna.

Verse: 40    Hema kärämṭun šorox amc̣i oćala Šoṭay laxi ḳanunxoxun č̣erey?!
   Hema kərəmt'un şorox ams'i oç̌ala Şot'ay laxi k'anunxoxun c'erey?!
    Ṭe čölmoġo ičoġoy źomon taci
    T'e çölmoğo içoğoy ǰomon taśi
    Šoṭay äǯuġo hema käräm biq̇esṭuna bo͑q̇ä͑lpi čarḳala šey tene!
    Şot'ay əcuğo hema kərəm biq'est'una bǒq'ə̌lpi çark'ala şey tene!

Verse: 41    Här däfäl Buxaʒ́uġoy kiyexun ayeġalṭoġoxun šüpäläyinšaki
   Hər dəfəl Buxačuğoy kiyexun ayeğalt'oğoxun şüpələyinşaki
    Ṭo͑ṗe͑vṭunksay israilluġoynaḳ ω͑vel Bakalṭu!
    T'ǒp'ěvt'unksay israilluğoynak' Ǐvel Bakalt'u!

Verse: 42    Šoṭay kiyexun här äš ayesuna,
   Şot'ay kiyexun hər əş ayesuna,
    Ičoġo düšmäni kiyexun exṭi čarḳesṭuna eyexun č̣evḳeṭuniy šoṭoġon.
    İçoğo düşməni kiyexun ext'i çark'est'una eyexun c'evk'et'uniy şot'oğon.

Verse: 43    Misirä biṭoġo,
   Misirə bit'oğo,
    Coani düzänluġa aḳesṭi möǯüzoox eyex tene bafsṭay šoṭoġoy.
    Üoani düzənluğa ak'est'i möcüzoox eyex tene bafst'ay şot'oğoy.

Verse: 44    Misirä bakala oqurxoy xenane ṗiya taradi Šoṭin,
   Misirə bakala oqurxoy xenane p'iya taradi Şot'in,
    Šuḳḳalenal xe u͑ġes tene baki. *
    Şuk'k'alenal xe ǔğes tene baki. *

Verse: 45    Duġala ṭaṭure yaq̇abi misirluġoy loxol,
   Duğala t'at'ure yaq'abi misirluğoy loxol,
    Väränbala be͑dalaq̇xone ečeri buybi ölkinä. *
    Vərənbala bědalaq'xone eçeri buybi ölkinə. *

Verse: 46    Äkinä čärtḳänxone ukesṭi,
   Əkinə çərtk'ənxone ukest'i,
    Meqene ḳac̣ṗi cipi šoṭoġoy oćala ḳä buneysa bitova. *
    Meqene k'as'p'i śipi şot'oğoy oç̌ala k'ə buneysa bitova. *

Verse: 47    Šoṭoġoy ṭulluġxone täären äfčibi,
   Şot'oğoy t'ulluğxone təəren əfçibi,
    Inǯilnä xodurxone alaxun barala buzen ṭapi. *
    İncilnə xodurxone alaxun barala buzen t'api. *

Verse: 48    Beliyoxe tääri oq̇a mandi šoṭoġoy,
   Beliyoxe təəri oq'a mandi şot'oğoy,
    Sürüġone c̣ä͑q̇en duġi.
    Sürüğone s'ə̌q'en duği.

Verse: 49    Izi bäč̣üḳeci äǯuġo q̇a hirsäne cipi šoṭoġoy loxol,
   İzi bəc'ük'eśi əcuğo q'a hirsəne śipi şot'oğoy loxol,
    Läänäti q̇onʒ́ux bi bäloġone badi šoṭoġoy bula,
    Ləənəti q'ončux bi bəloğone badi şot'oğoy bula,
    Ičoġoy bisuni xavaraṭun haq̇i šoṭoġon besṗala angelxoxun.
    İçoğoy bisuni xavarat'un haq'i şot'oğon besp'ala angelxoxun.

Verse: 50    Basḳestenedi Šoṭin Iz äǯuġo,
   Bask'estenedi Şot'in İz əcuğo,
    Šoṭoġoy elmoġoynaḳ bisun eġaṭan Iz kula boxodi čarḳestenedi -
    Şot'oğoy elmoğoynak' bisun eğat'an İz kula boxodi çark'estenedi -
    Ḳac̣eci barṭundi šorox azar bafṭi!
    K'as'eśi bart'undi şorox azar baft'i!

Verse: 51    Bisune hari Xame näsiläxun bakalṭoġoy * ḳožin süfṭin ġarmoġoynaḳ,
   Bisune hari Xame nəsiləxun bakalt'oğoy * k'ojin süft'in ğarmoğoynak',
    Nanay tapanexun č̣eri čuresa insani,
    Nanay tapanexun c'eri çuresa insani,
    Čuresa heyvani süfṭin ärkäy baloġoy sayǯo tene mandi Misirä! *
    Çuresa heyvani süft'in ərkəy baloğoy sayco tene mandi Misirə! *

Verse: 52    Izi azuḳeynaḳ isä sa čoban baki
   İzi azuk'eynak' isə sa çoban baki
    Iz kiine amc̣i oćalen tašeri šoṭoġo.
    İz kiine ams'i oç̌alen taşeri şot'oğo.

Verse: 53    Šoṭay ṭo͑ġo͑l q̇ə͑ hiḳä teṭun avay,
   Şot'ay t'ǒğǒl q'ı̌ hik'ə tet'un avay,
    Hiḳḳalal tene baki šoṭoġo!
    Hik'k'alal tene baki şot'oğo!
    Šoṭoġoy düšmänxo isä dänizi boš batḳi ḳac̣ṭunci! *
    Şot'oğoy düşmənxo isə dənizi boş batk'i k'as't'unśi! *

Verse: 54    Metärṭun šorox hari ičoġoynaḳ häzirbaki ə͑vel oćal burqeġala gala,
   Metərt'un şorox hari içoğoynak' həzirbaki ı̌vel oç̌al burqeğala gala,
    Buxaʒ́uġon Izi bi buruġoy tumel č̣eri. *
    Buxačuğon İzi bi buruğoy tumel c'eri. *

Verse: 55    Millätxone šäṗeci Buxaʒ́uġon šoṭoġoy be͑śṭan,
   Millətxone şəp'eśi Buxačuğon şot'oğoy běšt'an,
    Ṭe oćalxo ǯöybi mülk ḳinäḳe tadi šoṭoġo,
    T'e oç̌alxo cöybi mülk k'inək'e tadi şot'oğo,
    Ičoġoy nu bakala ḳožurxoṭun baci arci Israilaxun baki tayfoox! *
    İçoğoy nu bakala k'ojurxot'un baśi arśi İsrailaxun baki tayfoox! *

Verse: 56    Ama šorox ṗurumal Buxaʒ́uġoy kiyexun ayeġalṭoġoxun šüpäläyinšṭunbaksay,
   Ama şorox p'urumal Buxačuğoy kiyexun ayeğalt'oğoxun şüpələyinşt'unbaksay,
    Ala Arciṭay laxi yaq̇en teṭun taysay,
    Ala Arśit'ay laxi yaq'en tet'un taysay,
    Šoṭoxun ġaćeci iräziluga teṭun ämälbsay.
    Şot'oxun ğaç̌eśi irəziluga tet'un əməlbsay.

Verse: 57    Ičoġoy bavoġollariḳ tadi äyiti loxol nu čurḳalorox,
   İçoğoy bavoğollarik' tadi əyiti loxol nu çurk'alorox,
    Qə͑ yaq̇axun qaybakaloroxey šorox.
    Qı̌ yaq'axun qaybakaloroxey şorox.
    Küt xišṭiḳäxun sa xeyir nu bakala ḳinäḳ,
    Küt xişt'ik'əxun sa xeyir nu bakala k'inək',
    Šoṭoġoxunal sa xeyir tene buy.
    Şot'oğoxunal sa xeyir tene buy.

Verse: 58    Šoṭin q̇eräz buxaʒ́uxxo nu portpsuna avabaksun,
   Şot'in q'erəz buxačuxxo nu portpsuna avabaksun,
    Taci šoṭoġo bulṭun ḳoc̣bsay,
    Taśi şot'oğo bult'un k'os'bsay,
    Ičoġoynaḳ biniḳ-buxaʒ́uxxo düzbi Šoṭay äǯuġoṭun biq̇esṭay.
    İçoğoynak' binik'-buxačuxxo düzbi Şot'ay əcuğot'un biq'est'ay.

Verse: 59    Buxaʒ́uġoyal biin tene haq̇i moṭoġo bitova,
   Buxačuğoyal biin tene haq'i mot'oğo bitova,
    Hirsene duġi Šoṭo me äšurxo aḳaṭan,
    Hirsene duği Şot'o me əşurxo ak'at'an,
    Taranedi Šoṭin Iz ćoya israilluġoxun. *
    Taranedi Şot'in İz ç̌oya israilluğoxun. *

Verse: 60    Tene čurpi Iz bakala gala Šo,
   Tene çurpi İz bakala gala Şo,
    Šilona, amdarxoy čadərxoy arane laxeci čadəra amc̣ine efi Šoṭin. *
    Şilona, amdarxoy çadırxoy arane laxeśi çadıra ams'ine efi Şot'in. *

Verse: 61    Iräziluġi sanduġane düšmäni kiyel tadi,
   İrəziluği sanduğane düşməni kiyel tadi,
    Izi zora, izi tamtaraġa aḳesṭala iräziluġi sanduġa! *
    İzi zora, izi tamtarağa ak'est'ala irəziluği sanduğa! *

Verse: 62    Q̣ələnǯi źomone tadi Iz azuḳa Šoṭin,
   Q'ılınci ǰomone tadi İz azuk'a Şot'in,
    Iz piyexune biti Ičeynaḳ č̣äḳṗiyorox.
    İz piyexune biti İçeynak' c'ək'p'iyorox.

Verse: 63    Ǯäyil ġarmoġoy aruġo boḳi barsṭunen
   Cəyil ğarmoğoy aruğo bok'i barst'unen
    Xuyärmuxe išq̇ara taġala mandi.
    Xuyərmuxe işq'ara tağala mandi.

Verse: 64    Be͑yinśxoṭun kac̣ṗi q̇ələnǯen šoṭoġoy,
   Běyinšxot'un kas'p'i q'ılıncen şot'oğoy,
    Ičoġoy čupuxxoy piin neġe q̇aribaki.
    İçoğoy çupuxxoy piin neğe q'aribaki.

Verse: 65    Ama muġurebaki Q̣onʒ́ux!
   Ama muğurebaki Q'ončux!
    Bä͑ġä͑loy sa neṗaxun muġurbakala ḳinäḳ,
    Bə̌ğə̌loy sa nep'axun muğurbakala k'inək',
    U͑ġi fine täsir č̣ovakiṭuxun oša ičul hari sa q̇oččaġ ḳinäḳ.
    Ǔği fine təsir c'ovakit'uxun oşa içul hari sa q'oççağ k'inək'.

Verse: 66    Duġi šäṗeci Šoṭin Iz düšmänxo,
   Duği şəp'eśi Şot'in İz düşmənxo,
    Šoroxal qoš qaybaki biyaburṭunbaki hämišäluġ.
    Şoroxal qoş qaybaki biyaburt'unbaki həmişəluğ.

Verse: 67    Tene čureci Šoṭin Iosifi näsiläxun bakalṭoġoy čadəra,
   Tene çureśi Şot'in İosifi nəsiləxun bakalt'oğoy çadıra,
    Efraimi tayfina ṭo͑o͑xebi Šoṭin.
    Efraimi tayfina t'ǒǒxebi Şot'in.

Verse: 68    Iuday tayfina,
   İuday tayfina,
    Iz üḳe basḳi Sion buruġone č̣äḳṗi!
    İz ük'e bask'i Sion buruğone c'ək'p'i!

Verse: 69    Göyurxollariḳ osṭaar,
   Göyurxollarik' ost'aar,
    Me dünyä ḳinäḳ hämišäluġ laxeci ə͑vel gane biq̇i Ičeynaḳ.
    Me dünyə k'inək' həmişəluğ laxeśi ı̌vel gane biq'i İçeynak'.

Verse: 70    Iz ḳul bakala Davidane č̣äḳṗi Šoṭin,
   İz k'ul bakala Davidane c'ək'p'i Şot'in,
    Šoṭo iz be͑ġala eġelxoxun ǯöybi
    Şot'o iz běğala eğelxoxun cöybi

Verse: 71    Ečeri Iaḳovaxun baki näsileynaḳe čoban laxi.
   Eçeri İak'ovaxun baki nəsileynak'e çoban laxi.
    Lanexi ki, iz sürünä be͑ġi ḳinäḳ
    Lanexi ki, iz sürünə běği k'inək'
    Isääl hari Ičeynaḳ č̣äḳṗi azuḳa,
    İsəəl hari İçeynak' c'ək'p'i azuk'a,
    Israilaxun bakiṭoġoq̇an be͑ġi. *
    İsrailaxun bakit'oğoq'an běği. *

Verse: 72    Davidi kalaluġbsunenal aḳesedi izi müdrik baksuna q̇a
   Davidi kalaluğbsunenal ak'esedi izi müdrik baksuna q'a
    Tämiz üḳen baki šoṭoġoy q̇ayġina čurpsuna.
    Təmiz ük'en baki şot'oğoy q'ayğina çurpsuna.



Next part


This text is part of the TITUS edition of Biblia Udica, Versio Nizhensis: Vetus Testamentum.

Copyright TITUS Project, Frankfurt a/M, 18.11.2023. No parts of this document may be republished in any form without prior permission by the copyright holder.