ესე არს შჯული უფლისაჲ ბრალისათჳს: წმიდა წმიდათა არს.
ადგილსა, რომელსა დაჰკლვენ ყოვლად დასაწუველთა, დაჰკვლიდნენ ვერძსაცა ბრალისასა წინაშე უფლისა და სისხლი მოითხეოდის ხარისხსა ზედა საკურთხეველისასა მრგულივ.
და ყოველი ცმელი მისი შეწირონ მისგან და წელნი და ყოველი ცმელი, დამფარველი შინაგანთაჲ, და ყოველი ცმელი ზედაკერძოჲ შინაგანთაჲ.
და ორნი თირკუმელნი და ცმელი იგი მათზედაჲ, ბარკალთაზედაჲ, და ყური ღჳძლისაჲ, თირკუმელთა თანა მოჰკუეთნეს იგინი.
და აღიხუნეს იგინი მღდელმან საკურთხეველსა ზედა ნაყოფებად სული სულნელებისაჲ უფალსა: ბრალისათჳს არიან ესე.
ყოველი წული მღდელთაჲ ჭამდეს მას; ადგილსა წმიდასა ჭამდენ მათ, რამეთუ წმიდა წმიდათა არიან.
ვითარცა ცოდვისა ძლითი ეგრეთვე ბრალისა ძლითი შჯულად იყოს მათ შოვრის: მღდელი, რომელი ლხინება-ჰყოფდეს მის მიერ, მისდა იყოს.
და მღდელი, რომელი შესწირვიდეს ყოვლად დასაწუველსა კაცისა, ტყავი ყოვლად დასაწუველისაჲ, რომელსა შესწირავს იგი, მისდა იყოს.
და ყოველი მსხუერპლი, რომელი შეიმზადებოდის თორნითა, და ყოველი, რომელი შეიმზადებოდის ლანძუსა ზედა ანუ ტაფაკსა, მღელისა, შემწირველისა მისისა, იყოს იგი მისსა.
და ყოველი მსხუერპლი, რომელი აღსუარული ზეთითა და არა აღსუარული, ყოველთა ძეთა აარონისთა იყოს, თითოეულისათჳს სწორად.
ესე სჯული მსხუერპლისა მაცხოვარებისაჲ, რომელსა შესწირვენ უფლისა.
და უკუეთუ ქებისათჳს ვიდრემე მოაქუს იგი და შესწირავს მსხუერპლსა ზედა ქებისასა, პურნი უცომონი სამინდოჲსაგან, აღსუარულნი ზეთითა, და სამინდოჲ შესუარული ზეთითა,
ბოკელთა თანა პურთა უცომოთა შეწირნეს ძღუნად მისსა მსხუერპლსა ზედა ქებისა მაცხოვარებისა მისისასა.
და შეწიროს მისგან ერთ-ერთი ყოველთაგან ღძუენთა მისთა განნაჩინებად უფლისად. მღდელისა, რომელმან ოღუაროს სისხლი მაცხოვარებისაჲ, მისდა იყოს ნეშტი.
და ჴორცი მსხუერპლისა ქებისა მაცხოვარებისაჲ მისდავე იყოს და რომელსა დღესა მიეძღუნას, შეჭამოს, არა დაუტეონ მისგან განთიადამდე.
და უკუეთუ აღთქუმამან ნებსითმან მსხუერპლ-ყოს ძღუენი მისი, რომელსაცა დღესა შეწიროს მსხუერპლი მისი, იჭამოს და ხვალისაგანცა.
და დაშთომილნი ჴორცთაგან მსხუერპლისათა ვიდრე მესამედ დღედმდე ცეცხლითა დაიწუნენ.
ხოლო უკუეთუ მჭამელმან ჭამოს დღესა მესამესა, არა შეწყნარებულ იქმნეს შემწირველისაგან მისისა, არა შეერაცხოს, რამეთუ შეგინება არს. ხოლო სულმან, რომელმან ჭამოს მისგან, ცოდვაჲ მიიღოს.
და ჴორცი, რომელი შეიხოს ყოვლისა არაწმიდისაგან, არა იჭამოს, ყოველი წმიდაჲ ჴორცი ჭამეთ.
ხოლო სულმან, რომელმან ჭა\მოს Page of ms. Gb: 1r ჴორცთაგან მსხუერპლისა მაცხოვარებისათა, რომელ არს უფლისაჲ, არაწმიდებაჲცა მისი მას ზედა იყოს.
უკუეთუ შეეხოს ყოველსა საქმესა არაწმიდასა ანუ არაწმიდებითგან კაცისაჲთ, ანუ ოთხფერჴთა არაწმიდათაგანთა, ანუ ყოველსა საძაგელებასა არაწმიდასა და ჭამოს ჴორცთაგანი მსხუერპლისა მაცხოვრებისაჲ, რომელ არს უფლისაჲ, წარწყმდეს სული იგი ერისაგან მისისა.
და იტყოდა უფალი მოსეს მიმართ, მეტყუელი:
არქუ ძეთა ისრაელისათა, მეტყუელმან: ყოველი ცმელი ზროხათა და ცხოვართა და თხათაჲ არა შჭამოთ!
და ცმელი მძორისა და ნამჴეცავისაჲ და იმსახუროს ყოველსა ზედა საქმესა და ჭამით არა იჭამოს.
ყოველმან, რომელმან ჭამოს ცმელი ოთხფერჴთაგან, რომელთა მოიყვანებთ მათგან ნაყოფებად უფლისა, წარწყმდეს სულ იგი ერისაგან თჳსისა.
ყოველი სისხლი არა შჭამოთ ყოველსა შინა სამკჳდრებელსა თქუენსა მფრინველთაგან და ოთხფერჴთაგან.
ყოველი სული, რომელმან ჭამოს სისხლი, წარწყმდეს სული იგი ერისაგან თჳსისა.
და იტყოდა უფალი მოსაეს მიმართ, მეტყუელი:
ძეთა ისრაელისათა ჰრქუაო, მეტყუელმან: რომელი შესწირვიდეს მსხუერპლსა მაცხოვარებისა თჳსისასა უფალსა, მოართუას ძღუენი მისი უფალსა მსხუერპლისაგან მაცხოვარებისა მისისა.
ჴელთა მისთა მოართუან ნაყოფები უფალსა: ცმელი მკრდისაგან და ღჳძლის ყური. შეწირნეს ესენი ვიდრე დადებადმდეთცა დასადებელი წინაშე უფლისა.
და აღიღოს მღდელმან მკრდისზედაჲ ცმელი საკურთხეველსა ზედა და იყოს მკ\ერდი Page of ms. Ga: 17r აარონისა და ძეთა მისთა.
და მჴარი მარჯუენე მიეცით განნაჩინებად მღდელსა მსხუერპლთაგან მაცხოვარებისა თქუენისათა.
და რომელმან შეწიროს სისხლი მაცხოვარებისაჲ და ცმელი, ძეთაგანმან აარონისთამან, მისი იყოს მჴარი მარჯუენე ნაწილად.
რამეთუ მკერდი ზედადასადებელისაჲ და მჴარი იგი განნაჩინებისაჲ მოვიღე ძეთაგან ისრაელისათა მსხუერპლთაგან მაცხოვარებისა თქუენისათა და მივეც იგი აარონს მღდელსა და ძეთა მისთა შჯულად საუკუნოდ ძეთაგან ისრაელისათა.
ესე არს საცემელი აარონისი და საცემელი ძეთა მისთაჲ სანაყოფეთაგან უფლისათა, რომელსა დღესა მოყვანებულ-იქმნნეს იგი მღდელობად უფლისა.
ვითარცა ამცნო უალმან მიცემად მათდა, რომელსა დღესა სცხო მათ ძეთაგან ისრაელისათა, შჯულად საუკუნოდ ნათესავსა შორის მათდა.
ესე არს შჯული ყოვლად დასაწუველთაჲ და მსხუერპლისაჲ ცოდვისათჳს და ბრალისათჳს და სრულებისათჳს და მაცხოვარებისათჳს,
ვითარ-სახედ ამცნო უფალმან მოსეს მთასა ზედა სინასა, რომელსა დღესა ამცნო ძეთა ისრაელისათა მოხუმაჲ ძღუენთაჲ წინაშე უფლისა მთასა ზედა სინასა.
