და იტყოდა უფალი მოსეს მიმართ, მეტყუელი:
მოიყვანე აარონ და ძენი მისნი და შესამოსელნი მისნი და ზეთი ცხებისაჲ და ზუარაკი ცოდვისაჲ და ორნი ვერძნი და ლანკნაჲ უცომოთაჲ.
და ყოველი შესაკრებელი ეკლესია-ყავ კარსა ზედა კარვისა საწამებლისასა.
და ქნა მოსე, ვითარ-სახედ უბრძანა მას უფალმან, და ეკლესია-ყო შესაკრებელი კარსა ზედა კარვისა საწამებლისასა.
და ჰრქუა მოსე შესაკრებელსა: ესე არს სიტყუაჲ, რომელი ამცნო უფალმან ქმნად.
და Page of ms. Ga: 17v მოიყვანნა მოსემან აარონ და ძენი მისნი და განბანნა იგინი წყლითა.
და შეჰმოსა მას მამოსელი და შეარტყა მას სარტყელი და შეჰმოსა მას ქუეშეთსაცუმელი და გარდასდვა მას ზედა სამჴრე და თანა-შეარტყა მას ქმნულებისაებრ სამჴრისა და შეამტკიცა იგი მით.
და დასდვა მას ზედა სიტყჳერი და დასდვა სიტყჳერსა ზედა გამოცხადებაჲ და ჭეშმარიტებაჲ.
და დასდვა მიტრაჲ თავსა ზედა მისსა და დასდვა მიტრასა ზედა პირით კერძო მისსა პეტალი ოქროჲსაჲ განწმედილი წმიდაჲ, ვითარ-სახედ უბრძანა უფალმან მოსეს.
და მოიღო მოსემან ზეთისაგან ცხებისა
და ასხურა მას საკურთხეველსა ზედა შჳდგზის და სცხო საკურთხეველსა და განწმიდა იგი და ყოველი ჭურჭელი მისი და ემბაზი და ხარისხი მისი და განწმიდნა იგინი. და სცხო კარავსა და ყოველთა ჭურჭელთა მისთა და განწმიდა იგი.
და დაასხა მოსემან ზეთისაგან ცხებისა თავსა ზედა აარონისა და სცხო მას და განწმიდა იგი.
Page of ms. Ga: 18r და მოიყვანა მოსემან ძენი აარონისნი და შეჰმოსნა მათ შესამოსელნი და მოარტყნა მათ სარტყელნი და დაადგა მათ კიდარები, ვითარცა უბრძანა უფალმან მოსეს.
და მოიყვანა მოსემან ზუარაკი ცოდვისა ძლითი და დაასხნენს აარონ და ძეთა მისთა ჴელნი მათნი თავსა ზედა ზუარაკისა ცოდვისასა.
და დაკლა იგი და მოიღო მოსემან სისხლისაგან და სცხო რქათა საკურთხეველისათა გარემოჲს თითითა თჳსითა და წმიდა-ყო საკურთხეველი და სისხლი მოღუარა ხარისხსა ზედა საკურთხევლისასა და წმიდა-ყო იგი ლხინების-ყოფად მას ზედა.
და მოიღო მოსემან ყოველი ცმელი შინაგანთაჲ და ყური ღჳძლისაჲ და ორნივე თირკუმელნი და მათზედაჲ ცმელი და აღიღო მოსემან საკურთხეველსა ზედა.
და ზუარაკი და ტყავი მისი და ჴორცნი მისნი და სკორე მისი, დაწუნა ესენი ცეცხლითა გარეშე ბანაკსა, ვითარ-სახედ განუწესა უფალმან მოსეს.
და მოიყვანა მოსემან ვერძი ყოვლად დასაწუველად, და დაასხნეს აარონ და ძეთა მისთა ჴელნი მათნი თავსა ზედა მის ვერძისასა.
და დაკლა მოსემან ვერძი და მოღუარა მოსემან სისხლი საკურთხეველსა ზედა გარემოჲს.
და ვერძი იგი ჴორცთგანთჳსულ-ყო და ასონი მისნი და აღიღო მოსემან თავი და ასონი და ცმელი
და მუცლიერნი და ფერჴნი განრცხნა წყლითა. და აღიღო მოსემან ყოვლითურთ ვერძი იგი საკურთხეველსა ზედა: რამეთუ ყოვლად ნაყოფება არს სულად სულნელებისად, ნაყოფება არს უფლისა, ვითარცა ამცნო უფალმან მოსეს.
და მოიყვანა მოსემან ვერძი მეორე, ვერძი სრუ\ლებისაჲ, Page of ms. Ga: 18v და დაასხნა აარონ და ძეთა მისთა ჴელნი მათნი თავსა ზედა ვერძისასა.
და დაკლა იგი და მოიღო მოსე სისხლისაგან მისისა და სცხო ცმელსა ყურისა აარონისსა მარჯუენესა და მწუერვალსა ჴელისა მისისა მარჯუენისასა და მწუერვალსა ფერჴისა მისისა მარჯუენისასა.
და მოიყვანა მოსემან ძენი აარონისნი და სცხო მოსემან სისხლისაგან ცმელსა ყურთა მათთა მარჯუენეთასა და მწუერვალთა ჴელთა მათთა მარჯუენეთასა და მწუერვალთა ფერჴთა მათთა მარჯუენეთასა და მოღუარა მოსემან სისხლი საკურთხეველსა ზედა მრგულივ.
და მოიღო მოსემან ცმელი და წელნი და ცმელი მუცლისაჲ და ყური ღჳძლისაჲ და ორნი თირკუმელნი და ცმელი იგი მათზედაჲ და მჴარი მარჯუენე.
და ლანკნისაგან სრულებისა, მყოფისა წინაშე ღმრთისა, მოიღო პური ერთი უცომოჲ და პური ზეთისაგანი ერთი და ლელანგოჲ ერთი და დასხნა ცმელსა ზედა და Page of ms. Ga: 19r მჴარსა მარჯუენესა.
და დასხნა ყოველნი ჴელსა ზედა აარონისსა და ჴელთა ზედა ძეთა მისთასა და აღიღო იგი შესაწირავად წინაშე ღმრთისა.
და მოიხუნა იგინი მოსემან ჴელთაგან მათთა და აღიხუნა იგინი საკურთხეველსა ზედა ყოვლად დასაწუველსა ზედა სრულებისასა: სული სულნელებისაჲ, ნეყოფებაჲ არს უფლისაჲ.
და მოიღო მოსემან მკერდი და მოჰჴადა იგი სესაწირავად წინაშე უფლისა ვერძისაგან სრულებისა და იყო მოსე მონაწილედ, ვითარცა ამცნო უფალმან მოსეს.
და მიიღო მოსემან ზეთისაგან ცხებისა და სისხლისაგან საკურთხეველისა და შეაპკურა აარონს და შესამოსელთა მისთა, და ძეთა მისთა და შესამოსელთა ძეთა მისთასა, და განწმიდა აარონ და სამოსელი მისი და ძენი მისნი და სამოსელი მათი მათ თანა.
და თქუა მოსემან აარონის მიმართ და ძეთა მისთა: შეაგბეთ ჴორცი ეზოსა შინა კარვისა საწამებლისასა, ადგილსა წმიდასა, და მუნ ჭამეთ იგი და პურნი ლაკნისა სრულებისანი, ვითარ-სახედ მამცნო მე უფალმან, მეტყუელმან: აარონ და ძენი მისნი ჭამდნენ ამათ.
და ნეშტი ჴორცისა და პურითაჲ ცეცხლითა დასწუათ.
და კარისაგან საწამებლისაჲსა არა გომოხჳდეთ შჳდ დღე, ვიდრე დღემდე დასრულებისა დღეთაგან სრულებისა თქუენი\სათა, Page of ms. Ga: 19v რამეთუ შჳდთა დღეთა სრულ-იქმნნენ ჴელნი თქუენნი,
ვითარცა ყო ამას დღესა შინა, ამცნო უფალმან ქმნად, რაჲთა ლხინება-იქმნეს თქუენთჳს.
და კართა თანა კარვისა საწამებლისათა ჰსხდეთ შჳდთა დღეთა, დღე და ღამე, და სცევდით საცავთა უფლისათა, რათა არა მოჰკუდეთ, რამეთუ ესრეთ მამცნო მე უფალმან.
და ყვნა აარონ და ძეთა მისთა ყოველნი სიტყუანი, რომელნი განუწესნა უფალმან მოსეს.
