და იყო მერვესა დღესა მოუწოდა მოსემან აარონს და ძეთა მისთა და ბერობასა ისრაელისასა.
და თქუა მოსე აარონის მიმართ: მიიყვანე თავისა შენისა ჴბოჲ ზროხათაგან ცოდვისათჳს და ვერძი ყოვლად დასაწუველად, უბიწონი, და შესწირენ ესენი წინაშე უფლისა.
და ბერობასა ისრაელისასა ჰრქუა, მეტყუელმან: მოიყვანეთ ვაცი თიკანი თხათაგან ერთი ცოდვისათჳს და ვერძი და ჴბოჲ და კრავი წელიწდეული ნაყოფებად, უბიწონი,
და ზუარაკი ზროხათაგან და ვერძი მსხუერპლად მაცხოვარებისად წინაშე უფლისა და სამინდოჲ აღსუარული ზეთითა, რამეთუ უფალი დღეს გამოჩნდეს თქუენს შორის.
და მოიღეს, ვითარცა ამცნო მოსემან, წინაშე კარვისა საწამებელისა და მოვიდა ყოველი შესაკრებელი და დადგა წინაშე უფლისა.
და თქუა მოსემან: ეს სიტყუაჲ, რომელი თქუა უფალმან: ყავთ და იხილვოს თქუენ შოვრის დიდებაჲ უფლისაჲ.
და თქუა მოსემან აარონის მიმართ: მოუჴედ საკურთხეველსა და ყავ ცოდვისა შენისათჳს და ყოვლად დასაწუველი შენი და ლხინება-ყავ თავისა შენისათჳს და სახლისა შენისა და ყვენ ძღუენნი ერისანი და ლხინება-ყავ ერისათჳს, ვითარცა [მ]ამცნო უფალმან.
და მოუჴდა აარონ საკურთხეველსა და დაკლა ჴბოჲ ცოდვისათჳს თჳსისა.
და მოიღეს ძეთა მითა სისხლი იგი მისსა მიმართ. და დააწო თითი თჳსი სისხლსა და სხცო რქათა საკურთხეველისათა. და სისხლი მოღუარა ხარისხსა თანა საკურთხეველისასა.
და ცმელი და ორნი თირკუმელნი და ყური ღჳძლისა ცოდვისა ძლითისაჲ აღიხუან საკურთხეველსა ზედა სახითა, რომლითა ამცნო უფალმან მოსეს.
და ჴორცნი და ტყავი დაწუეს ცეცხლითა გარეშე ბანაკსა.
და დაკლნეს ყოვლად დასაწუველნი და მოიღეს ძეთა აარონისთა სისხლი მისსა მიმართ და მოასხა საკურთხეველსა ზედა გარემო.
და ყოვლად დასაწუეველი მოართუეს მას და ასონი იგი და თავი და დადვა საკურთხეველსა ზედა.
და განრცხა მუცლიერი და ფერჴნი წყლითა და დასხნა ყოვლად დასაწუველსა თანა საკურთხეველსა ზედა.
და მოიღო, შეწირა ძღუენი ერისაჲ და მოიყვანა ვაცი თიკანი ცოდვისათჳს ერისა და დაკლა იგი განწმიდა, ვითარ-სახედ პირველი იგი.
და შეწირა ყოვლად დასაწუველად და ყო იგი, ვითარ ჯერ-იყო,
და მოიღო მსხუერპლი და აღივსნეს ჴელნი მისგან და დადვა საკურთხეველსა ზედა თჳნიერ ყოვლად დასაწუველისა საგანთიადოჲსა.
და დაკლა ზუარაკი და ვერძი მსხუერპლისა და მაცხოვარებისა ერისაჲ. და მოიღეს ძეთა აარონისთა სისხლი მისსა მიმართ და მოღუარა საკურთხეველსა ზედა გარემო
და ცმელი ჴბოჲსაგან და ვერძისაგან, წელნი და ცმელი გარდაბურვილი მუცელსა და ორნი თირკუმელნი და ცმელი მათზედაჲ და ყური ღჳძლისაჲ.
და დასხნეს ცმელი მკერდსა ზედა და აღიხუნა ცმელნი საკურთხეველსა ზედა.
და მკერდი და მჴარი მარჯუენე მოჰჴადა აარონ აღსაღებელად წინაშე ღმრთისა, ვითარცა-სახედ განუწესა მოსეს.
და აღმხუმელმან ჴელთამან აარონ ერისა ზედა აკურთხა იგინი. და შთამოვიდა შემწირველი ცოდვისა ძლითისაჲ და ყოვლად დასაწუველთაჲ.
და შევიდეს მოსე და აარონ კარვად საწამებელისა. და ვითარცა მიერ გამოვიდეს, აკურთხეს ერი იგი. და გამოუჩნდა დიდებაჲ ღმრთისაჲ ყოველსა მას ერსა.
და გამოვიდა ცეცხლი უფლისა მიერ და შეჭამნა საკურთხეველისზედანი. და იხილა ყოველმან ერმან და განკჳრდა დაეცნეს პირსა ზედა.
