და მოიღეს ორთა ძეთა აარონისთა ნადაბ და აბიუდ კაცად-კაცადმან საცეცხური თჳსი, დადვეს მათ ცეცხლი და დაასხეს მათ ზედა საკუმეველი და მოიღეს წინაშე უფლისა ცეცხლი უცხოჲ, რომელი არა უბრძანა უფალმან.
და გამოჴდა ცეცხლი უფლისა მიერ და შეჭამნა იგინი და მოკუდეს წინაშე უფლისა.
და თქუა მოსე აარონის მიმართ: ესე არს, რომელი თქუა უფალმან, მეტყუელმან: მახლობელქმნილთა ჩემთა ზედა განვწმიდნე და ყოველსა შესაკრებელსა შოვრის ვიდიდო. და შეწუხნა აარონ.
და მიუწოდა მოსე მასადაის და იასაფანს, ძეთა ოზიილისთა, ძეთა ძმისა აარონის მამისათა, და ჰრქუა მათ: მოვედით და აღიხუენით ძმანი თქუენნი პირისაგან წმიდათაჲსა გარეშე ბანაკისა.
(აკლია)
და თქუა მოსე აარონის მიმართ და ელეაზარ და ითამარ ძეთა მისთა: თავთა თქუენთა კიდარი არა მოიჴადოთ და სამოსელნი თქუენნი არა დაიპნეთ, რაჲთა არა მოჰკუდეთ. და ყოველსა შესაკრებელსა ზედა იყოს გულისწყრომაჲ. ხოლო ძმათა თქუენთაჲ ყოველმან სახლმან ისრაელისამან დაიტიროს დაწუვაჲ, რომლითა დაიწუნეს უფლისა მიერ.
და კარისაგან კარვისა საწამებელისა არა განჴჳდეთ, რაჲთა არა მოჰკუდეთ, რამეთუ ზეთი ცხებისაჲ უფლისა მიერ არს თქუენ ზედა. და ყვეს სიტყუთაებრ მოსესთა.
და ეტყოდა უფალი აარონს, მეტყუელი:
ღჳნოჲ და თაფლუჭი არა ჰსუათ შენ და ძეთა შენთა, ოდესცა შემოხჳდოდით კარვად წამებისად, ანუ მო-რაჲ-უხდებოდით თქუენ საკურთხეველისა მომართ, და არა მოჰკუდეთ: შჯულად საუკუნოდ ნათესავსა შორის თქუენსა
და განსარჩეველად შოვრის წმიდათა და შეგინებულთა და შორის არაწმიდათა და შორის წმიდათა.
და მითხრობად ძეთა ისრაელისათა ყოველთა შჯულვილთა, რაოდენნი თქუნა უფალმან მათდა მიმართ ჴელითა მოსესითა.
და თქუა მოსე აარონის მიმართ და ელეაზარის მიმართ და ითამარის მიმართ, ძეთა მისთა დაშთომილთა: მიიღეთ მსხუერპლი დაშთომილი სანაყოფეთაგან უფლისათა და ჭამეთ უცომოჲ საკურთხეველით, რამეთუ წმიდა წმიდათა არს.
და ჭამეთ იგი ადგილსა წმიდასა, რამეთუ შჯულვილი არს და შჯულვილი ძეთა შენთათჳს ესე ნაყოფებთაგან უფლისათა, Page of ms. Ga: 22v რამეთუ ესრეთ მამცნო მე უფალმან.
და მკერდი იგი განჩემებისაჲ ჭამეთ ადგილსა წმიდასა შენ და ძეთა შენთა და სახლმან შენმან შენ თანა, რამეთუ შჯულვილად შენდა, შჯულვილად ძეთა შენთა მოეცა მსხუერპლთაგან მაცხოვარებისა ძეთა ისრაეილისათაჲსა.
მჴარი განჩემებისაჲ, მკერდი განჩემებისაჲ ნაყოფებსა თანა ცმელთასა შეიწირვოდიან, და იყოს შენდა და ძეთა შენთა და ასოთა შენთა შენთანა შჯულვილად საუკუნოდ, ვითარ-სახედ განუწესა უფალმან მოსეს.
და ვაცი იგი ცოდვისაძლითი ძიებით იძია მოსე და იგი დამწუარ იყო და გულმოწყე იქმნა მოსე ელიაზარს ზედა ითამარს ძეთა აარონისთა დაშთომილთა, მეტყუელი:
რად არ შეშჭამეთ ცოდვისა ძლითი ადგილსა წმიდასა? რამეთუ წმიდა წმიდათა იყო ესე, მოგეცა თქუენ ჭამად, რაჲთა მიეტეოს ცოდვაჲ შესაკრებელისაჲ და ლხინება ჰყოთ მისთჳს წინაშე უფლისა.
რამეთუ არა შევიდა სისხლი მისი წმიდათა მიმართ, პირის-პირ შინაგან ჭამეთ იგი ადგილსა წმიდასა, ვითარ-სახედ მემცნო მე.
და თქუა აარონ მოსეს მიმართ, მეტყუელმან: უკუეთუ დღეს-ღა მოუღებიეს ცოდვისათჳს მათისა და ყოვლად დასაწუველნი მათნი წინაშე უფლისა და შემემთჴვნეს მე ესევითარნი და ვჭამო მე ცოდვისა ძლითი დღეს, არა სათნო იყოს უფლისა?
და ესმა მოსეს და სთნდა მას.
