და იტყოდა უფალი მოსეს მიმართ და აარონისა, მეტყუელი:
არქუთ ძეთა ისრაელისათა: ესე არიან საცხოვარნი, რომელთა შჭამდეთ ყოველთაგან საცხოვართა ქუეყანისათა:
ყოველი საცხოვარი ორ-განყოფილი ჭლიკითა და ფრცხენით მფრცხენალი ორითა ფრცხილითა და აღმომღებელი ნაცოხლისაჲ, ნაცხოვართა შორის ესე ჭამეთ.
გარნა ამათგანცა არა შჭამოთ, აღმომღე\ბელთა Page of ms. Ga: 24r ნაცოხლისათა და არგანყოფილთა ჭლიკითა და ფრცხენით მფრცხენალთა ორითავე ფრცხილითა: აქლემი, რამეთუ აღ\მოიღებს Page of ms. Ga: 24v იგი ნაცოხალსა და ჭლიკი არამრჩობლგანპებულობს, არაწმიდა არს იგი თქუენდა.
და ყურდგელი, რამეთუ აღმოიღებს იგი ნაცოხალსა და ჭლიქი არამრჩობლგანჴებულ არს, არაწმიდა არს იგი თქუენდა.
და მაჩჳ, რამეთუ აღმოიცოხნის იგი და ჭლიკი არამრჩობლგანპებულ არს, არაწმიდა არს იგი თქუენდა.
და ღორი, რამეთუ მრჩობლგანპებულ Page of ms. Ga: 25r არს ჭლიკი მისი და ფრცხენს ფრცხილითა ჭლიკისაჲთა და ესე არა აღმოიღებს ნაცოხარსა, და არამიდა არს ესე თქუენდა.
ამათთა ჴორცთაგან არა შჭამოთ და მძორსა მათსა არა შეეხნეთ, რამეთუ არაწმიდა არიან ესენი თქუენდა.
Page of ms. Ga: 25v და ესენი შჭამნეთ ყოველთაგან, რომელნი არიან წყალთა შინა: ყოველთა, რაოდენთა არიან მათდა ფრთენი და ქეცნი წყალთა შინა და ზღუათა შინა და ღუართა შინა, მათ შჭამდეთ.
და ყოველთა, რაოდენთა არა არიან მათდა ფრთენი და ქეცნი წყალთა შინა და ზღუათა შინა და ღუართა შინა, ყოველთაგან, რომელთა აღმოაბოყინებენ წყალნი და ყოვლისაგან სულისა სიცოცხლისა წყალთა შინა, საძაგელ არს.
და საძაგელ იყვნენ თქუენდა, ჴორცთა მათთაგან არა შჭამოთ და მძორთა მათთა სძულობდეთ.
და ყოველთა, რაოდენთა არა არიან მათდა ფრთენი, არცა ქეცნი წყალთა შინათა შოვრის, საძაგელ თქუენდა იყავნ იგი.
Page of ms. Gb: _ და ესენი გძაგდინ მფრინველთაგან და არა სჭამნეთ, რამეთუ საძაგელ არს: არწივი და ძერაჲ და ყანჩი,
და სოვი და ძერქორი და მსგავსი მისი,
და ყოველი ყორანი და მსგავსნი მისნი.
და სირი და ჭკაჲ Page of ms. Gb: ? და ქორი მსგავსნი მისნი.
და ღამის ყორანი და ბუჲ და მიმინოჲ და ძენძერუკი
და ვარხჳ და კჳკინოჲ და ეროდიოჲ
და ტივყუავი და კიოტი და მსგავსნი მისნი; და ოფოფი და მღამიობი.
და ყოველნი ქუეწარმავალნი მფრინველთა შოვრის, რომელნი ვლენან ოთხთა ზედა, საძაგელ იყვნენ თქუენდა.
არამედ ანუ ესენი სჭამნეთ ქუეწარმავლთაგან და მფრინველთაგან, რომელნი ვლენან ოთხთა ზედა, რომელთა ჰქონან წჳვნი უზემოეს ფერჴთა მათთასა ხლდომად მათ მიერ ქუეყანასა ზედა.
და ესენი მათგან არა შჭამნეთ: ბუზჳ და მსგავსნი მისნი, როჯი და მსგავსნი მისნი მკალი და მსგავსნი მისნი, და გუელისმბრძოლი და მსგავსნი მისნი.
და ყოველი ქუეწარმავალი მფრინველთაგანი, რომელნი ვლენან ოთხითა ფერჴითა, საძაგელ თქუენდა იყავნ და ამათ მიერ შეიგინებოდით.
ყოველი, რომელი შეეხოს მძორსა მათსა, არაწმიდა იყო ვიდრე მწუხრადმდე.
და ყოველმან, რომელმან აღიღოს მძორ[ი] მათგანი, განირცხას სამოსელი თჳსი და არაწმიდა იყოს ვიდრე მწუხრადმდე.
ყოველთა შორის პირუტყუთა, რომლისაჲ მრჩობლგანყოფილი არს ჭლიკი ჰფრცხენს ფრხილითა და ნაცოხალსა არა აღმოიღებს, არაწმიდა იყავნ თქუენდა. ყოველი შეხებული მძირისა მათისაჲ არაწმიდა იყოს ვიდრე მწუხრადმდე.
და ყოველი, რომელი ვალს ჴელთა ზედა ყოველთა შოვრის, რომელნი ვლენან ოთხთა ზედა არაწმიდა იყავნ თქუენდა. ყოველი შეხებული მძორთა მათთაჲ არაწმიდა იყოს ვიდრე მწუხრადმდე.
და ყოველმა აღმღებელმან მძორისა მათისამან განირცხას სამოსელი თჳსი და არაწმიდა იყვნენ ესენი თქუენდა.
და ესეცა არაწმიდა არიან თქუენდა ქუეწარმავალთაგან მძურომალეთა ქუეყანასა ზედა: ქურცინი და თაგჳ და ხჳთქი ჴმელისაჲ.
ვრცინი და თაგჳ და მსუენ-ლომი და მხულივი და მსუენი და მთხუნველი.
ესენი არაწმიდა იყვნენ თქუენდა ყოველთაგან ქუეწარმავალთა, რომელნი ძურებიან ქუეყანასა ზედა; ყოველი შეხებული მძორის მათისა არაწმიდა იყოს, ვიდრე მწუხრადმდე.
და ყოველსა, რომელსაცა ზედა დაეცეს მათგანი, მო-რაჲ-მკუდარ იყვნენ იგინი, არაწმიდა იყოს: ყოველისაგან წურჭლისა ძელისა ანუ ფიჩჳსა, ყოვლისა ჭურჭლისა, რომლითა იქმნების საქმე მით, წყლითა გამოირცხეს და არაწმიდა იყოს ვიდრე მწუხრადმდე და განწმდეს.
და ყოველი ჭურჭელი კეცისაჲ, რომელსაცა შთავარედეს ამათგანი შიდა, რავდენი-რაჲ იყოს მას შიდა, არაწმიდა არს და იგი შეიმუსროს.
და ყოველი ჭამადი, რომელი იჭამების, რომლისაცა მივიდეს მის ზედა წყალი და და-რაჲმე-ეცეს მძორთა მათგანი მას ზედა არაწმიდა იყოს თქუენდა და ყოველი სასუმელი რომელსა ჰსუამთ ჭურჭლითა, არაწმიდა იყოს.
და ყოველი, რომელსაცა შინა შთავარდეს მძორთა მათთაგანი მას შინა, არაწმიდა იყოს: თორნენი და ყუერბნი განიწმიდნენ, რამეთუ არაწმიდა არიან და არაწმიდა იყვნენ თქუენდა.
თჳნიერ წყაროები წყალთაჲ და ჯურღმულები და შესაკრებელი წყლისაჲ წმიდა არიან, ხოლო შემხებელი მძორისა მათისაჲ არაწმიდა არს.
და უკუეთუ შთავარდეს მძორი მათი ყოველსა თესლსა შინა სათევსა, რომელი დაითესვის, წმიდა არს.
ხოლო უკუეთუ დაესხას წყალი ყოველსა ზედა თესლსადა დავარდეს მძორთა მათთაგანი მას ზედა, არაწმიდა იყოს თქუენდა.
ხოლო უკუეთუ მოკუდ\ეს Page of ms. Ga: 27r ოთხფერჴთაგანი, რომელი საჭამად იყოს თქუენდა იგი, შეხებული მძორისა მათისაჲ არაწმიდა იყოს მწუხრადმდე.
და რომელმან აღიღოს მძორისაგან მათისა, განირცხას სამოსელი მისი და არაწმიდა იყოს მწუხრამდე.
და ყოველი ქუეწარმძრომი, რომელი ძურების ქუეყანასა ზედა, საძაგელ არს ესე თქუენდა, არა იჭამოს.
და ყოველი მავალი მუცელსა ზედა და ყოველი მავალი ოთხთა მიერ მარადის, რომელი მრავალფერჴ იყოს ყოველთა შოვრის ქუეწარმძურომელთა, რომელნი ძურებიან ქუეყანასა ზედა, არა სჭამოთ მათგანი, რამეთუ საძაგელ არს თქუენდა.
და არა საძაგელ ჰყვეთ სულნი თქუენნი ყოველთაგან ქუეწარმძურომელთა, რომელნი ძურებიან ქუეყანასა ზედა და არა შეიგინნეთ მათ მიერ არაწმიდა არა იყვნეთ მათ ძლით.
რამეთუ მე ვარ უფალი ღმერთი თქუენი, და განსწმდეთ და წმიდა იყვნეთ, რამეთუ წმიდა ვარ მე, უფალი ღმერთი თქუენი და არა შეაგინნეთ სულნი თქუენნი ყოველთა მიერ ქუეწარმძ[უ]რომელთა, რომელნი იძრვიან ქუეყანასა ზედა.
რამეთუ მე ვარ უფალი, აღმომყვანებელი თქუენი ქუეყანით ეგჳპტით ყოფად თქუენდა ღმრთად და იყვენით წმიდანი, რამეთუ წმიდა ვარ მე.
ესე არს შჯული საცხოვართათჳს და მფრინველთათჳს და ყოვლისა სულისა, რომელი იძრვის წყალსა შინა და ყოვლისა სულისა მძურამალისა ქუეყანასა ზედა
განსაწვალებელად შოვრის არაწმიდათა და წმიდათა და დაზავებად ძეთა ისრაელისათა შოვლის მაცხოვნებელთა საჭამადად და შოვრის მაცხოვნებელთა, არა იჭმებოდინ რაჲ.
