და იტყოდა უფელი მოსეს და აარონის მიმართ:
კაცსა უკუეთუ იყოს ვისმე გარსსა ფერისა მისისასა ბრძჳლი ნიშნოვნობისაჲ ანუ ბზინვისა ანუ აელვებისაჲ და იყოს გარსა ზედა ფერისა მისისასა მიხებაჲ კეთრისაჲ, და მოვიდეს აარონის მიმართ მღდელისა ანუ ერთისა ძეთა მისთაგანისა მღდელისა.
და იხილოს მღდელმან ნიში წყალსა ფერისა მისისასა და უკუეთუ თმაჲ ნიშსა მას Page of ms. Ga: 30r შინა გარდაიქცეოდის სპეტაკად და შესახედავი ნიშისაჲ დამდაბლდებოდის ტყავისგან ჴორცისა მისისა, ნიში კეთროვნებისაჲ არს. და იხილოს მღდელმან და შეგინებულ-უჩნდეს იგი.
ხოლო უკუეთუ ბზინვაჲ თეთრი იყოს ტყავსა შინა ფერისა მისისასა და დამდაბლებაჲ არა იყოს შესახედავისა მისისაჲ ტყავისაგან, და თმაჲ მისი არა გარდაიცვალებოდის თეთრად, ხოლო იყოს იგი შავ, და განვლინოს მღდელმან ნიში იგი შჳდ დღე.
და იხილოს მღდელმან ნიში დღესა მერვესა: და აჰა ნიში ჰგიეს წინააღმდგომად მისსა, არა განეშორა ნიში ტყავსა მისსა. და განავლინოს იგი მღდელმან შჳდ დღე მეორედ.
და იხილოს იგი მღდელმან მერვესა დღესა მეორედ და აჰა მოშავე იქმნა ნიში, და რა იცვალა ნიში ტყავისაგან. და განწმიდოს იგი მღდელმან, რამეთუ შენიშნვაჲ არს, და განირცხას სამოსელი მისი და წმიდა იყოს.
ხოლო უკუეთუ შეცვალებით შეიცვალოს შენიშნვაჲ ტყავსა ზედა შემდგომად ხილვისა მისასა მღდელისაგან და გაწმედისა მისისა, და ეჩუენოს მეორედ მღდელსა
და იხილოს მღდელმან და აჰა განეყენა ნიში ნიშნოვნებაჲ ტყავისაგან და შეგინებულ-იჩინოს იგი მღდელმან, რამეთუ კეთროვნება არს. და ნიში კეთროვნებისაჲ უკუეთუ იქმნეს კაცისა შოვრის და მოვიდეს მღდელისა მომართ.
და იხილოს მღდელმან და აჰა ბრძჳლი სპეტაკი ტყავსა შინა და მან გარდაცვალა თმაჲ თეთრად და მრთელისაგან ჴორცისა, მცხოვნისა ბრძჳლსა შოვრის,
კეთრი დაძუელებული არს ტყავსა ზედა ფერისა მისისასა და შეგინებულ-იჩინოს იგი მღდელმან. არა განავლინოს იგი, რამეთუ არაწმიდა არს.
ხოლო უკუეთუ აღყუავებით აღყუავნეს კეთრი ტყავსა ზედა და და\ფაროს Page of ms. Ga: 31v კეთრმან ყოველი ტყავი ნიშისაჲ თავითგან ვიდრე ფერჴადმდე მისსა, ყოვლითურთ სახილველ იქმნას მღდელისა,
და იხილოს მღდელმან და აჰა დაფარა კეთრმან ყოველი ფერი ტყავისა მისისაჲ, და გაწმიდოს ნიში; რამეთუ ყოვლად გარდაიქცა თეთრად, წმიდა არს.
Page of ms. Ga: 32r და რომელსა დღესა იხილვოს მას შინა ფერი ცოცხალი, შეიგინოს.
და იხილოს მღდელმან ფერი მრთელი და შეაგინოს იგი ფერმან მრთელმან.
... და გარდაცვალოს სპეტაკად და მოვიდეს მღდელისა მომართ.
და იხილოს იგი მღდელმან, გარდაიცვალა ნიში სპეტაკად და განწმიდოს მღდელმან ნიში და წმიდა არს.
და უკუეთუ იქმნეს ჴორცსა ტყავისა მისისასა წუთხი და განმრთელდეს
და იქმნეს ადგილსა წუთხისასა ბრძჳლი სპეტაკი ანუ ბზინვარე მოთეთრედ გინა მოწითლედ, და ეჩუენოს მღდელსა.
და იხილოს მღდელმან და აჰა შესახედავი უმდაბლეს არს ტყავისა და თმაჲ მისი გარდაცვალებულ თეთრად, და შეგინებულად შეჰრაცხოს იგი მღდელმან: ნიში კეთროვნებისაჲ არს წუთხისა მიერ აღყუავნა.
ხოლო უკუეთუ იხილოს მღდელმან და აჰა არა იყოს მას თანა თმაჲ სპეტაკი და სიმდაბლე არა იყოს ტყავისაგან ფერისა მისისა და იგი იყოს შავ, და განავლინოს იგი მღდელმან შჳდ დღე.
უკუეთუ განფენით განეფინოს ტყავსა შინა, და შეგინებულ-ყოს იგი მღდელმან: ნიში კეთროვნებისაჲ არს, წყლულსა შინა აღყუავნა.
ხოლო უკუეთუ ადგილსა მისსა ეგოს ბზინვაჲ და არა განეფინოს ბრძჳლი Page of ms. Ga: 32v წყლულისაჲ არს. და განწმიდოს იგი მღდელმან.
და ჴორცისა უკუეთუ იქმნეს ტყავსა მისსა დამწუარი ცეცხლისაჲ და იქმნეს ტყავსა მისსა, განმრთელდეს რაჲ დამწუარი, აელვებაჲ ბზინვისაჲ თეთრი მოწითანოდ ანუ მოთეთროდ,
და იხილოს მღდელმან და აჰა გარდაიქცა თმაჲ თეთრად აელვებასა მას შინა და შესახედავი მისი დამდაბლდა ტყავისაგან, კეთროვნებაჲ არს, დამწუარსა შორის აღყუავნა. და არაწმიდა-ყოს იგი მღდელმან: ნიში კეთროვნებისაჲ არს.
და უკუეთუ იხილოს იგი მღდელმან და Page of ms. Ga: 33r აჰა არა არს აელვებასა შინა თმაჲ თეთრი და უმდაბლე არა იყოს ტყავისაგან, ხოლო თჳთ მოშავე იყოს, და განავლინოს იგი მღდელმან შჳდთა დღეთა.
და განიხილოს მღდელმან მერვესა და უკუეთუ განფენით განფენილ იყოს ტყავსა ზედა, და შეგინებულ-ყოს იგი მღდელმან: ნიში კეთროვანებისაჲ არს, წყლულსა შინა აღყუავნა.
ხოლო ადგილობანს ეგოს აელვებაჲ იგი და არა გენეფინოს ტყავსა ზედა და იგი მოშავე იყოს, დამწურობისაჲ არს. და განწმიდოს იგი მღდელმან, რამეთუ ხატი დამწურობისაჲ არს.
და მამაკაცისა ანუ დედაკაცისა, რომლისაცა იქმნეს მის შოვრის ნიში კეთროვნებისაჲ თავსა შინა ანუ ნიყბერსა,
და იხილოს მღდელმან ნიში და აჰა შესახედავი მისი უწყლტოეს არს ტყავისა, ხოლო მისშორისი თმაჲ მომწითურე არს სპეტაკად, და შეგინებულ-ყოს იგი მღდელმან: დასურიანგებული არს კეთროვნებაჲ თავისაჲ ანუ კეთროვნებაჲ ნიყბრისაჲ.
და უკუეთუ იხილოს მღდელმან ნიში იგი დასჳრინგებისა და აჰა იყოს შესახედავი უწყლტუეს ტყავისა, თმაჲ მომწითური არა არს მას შინა, და განაყენოს მღდელმან ნიში დასჳრინგებისაჲ შჳდ დღე.
და იხილოს მღდელმან ნიში დღესა მერვესა და აჰა არა განეფინა სჳრინგობაჲ და თმაჲ მომწითურე არა არს მას შინა და შესახედავი სჳრინგისაჲ არა უმდაბლეს არს ტყავისაგან,
და დაყუენილ-იქმნეს ტყავი, ხოლო სჳრინგობაჲ არა დაყუენილ იქნეს, და განავლინოს მღდელმან სჳრინგობაჲ იგი შჳდ დღე მეორედ.
და იხილოს მღდელმან სჳრინგობაჲ იგი დღესა მეშდჳესა და აჰა არა განეფინა სჳრინგობაჲ ტყავ\სა Page of ms. Ga: 34r ზედა შემდგომად დაყუენისა მისისა და შესახედავი სჳრინგისაჲ არა არს უმდაბლეს ტყავისა და განწმიდოს იგი მღდელმან ...
...
... და აჰა განფენილ არს სჳრინგობაჲ ტყავსა ზედა და არა განიხილა მღდელმან თმისათჳს მომწითუროჲსა არაწმიდა არს.
ხოლო უკუეთუ წინაშე მისსა ადგილობანს ეგოს სჳრინგობაჲ და თმაჲ შავი აღმოჴდა მას შინა, განმრთელებულ არს სჳრინგობაჲ, წმიდა არს და განწმიდოს იგი მღდელმან.38. მამაკაცისა ანუ დედაკაცისა, რომლისა იქმნეს ტყავსა ჴორცა მისთასა ბზინვაჲ მბზინვარე მოთეთროჲ,
და იხილოს მღდელმან, მძოარი არს, წმიდა არს, ყუაოდის ტყავსა ზედა ჴორცთა მისთასა, წმიდა არს.
ხოლო უკუეთუ მტიერი არს პირით კერძო თმა, დასრულ არს თავის მისი, შლუვ არს, წმიდა არს.
ხოლო უკუეთუ იქმნეს სიმტიერესა მისსა შინა ანუ სიშლუვესა ნიში სპეტაკი ანუ მომწითურე, კეთრი აღყუავებადი არს სიმტიერესსა მისსა შინა ანუ სიშლუვესა მისსა შინა.
და იხილოს მღდელმან და აჰა შესახედავი ნიშისაჲ სპეტაკი ანუ მომწითურე სიმტიერესა შინა ანუ სიშლუვესა მისსა, ვითარცა სახე კეთროვნებისაჲ ტყავსა ზედა ჴორცთა მისთასა.
კაცი კეთროანი არს. შეგინებით შეგინებულ-ყოს იგი მღდელმან, თავსა შინა მისსა ნიში მისი.
და კეთროვნისა, რომლისა შორის არს ნიში, სამოსელნი მისნი Page of ms. Ga: 34v იყვნენ განრღუეულ და თავი მისი დაუბურველ და გარემოჲს პირსა მისსა მოიბურენ და არაწმიდა ეწოდოს.
ყოველთა დღეთა, რაოდენთა იყოს მის ზედა ნიში, არაწმიდად მყოფი, არაწმიდა იყოს, განშორებით ჯდეს, გარეშე ბანაკისა იყოს ქცევაჲ მისი.
და სამოსელსა შინა უკუეთუ იქმნას მას შინა ნიში კეთროვნებისაჲ, სამოსელსა მატყლისასა ანუ სამოსელსა სელისასა,
ანუ საქუსალსა ანუ ფესუსა შინა ანუ სელისათა შინა ანუ მატყლისათა ანუ ტყავსა შინა
და იქმნას Page of ms. Ga: 35r ნიში მომწუანე ანუ მომწითურე ტყავსა შინა ანუ სამოსელსა შინა ანუ საგუასლსა შინა ანუ ფესუსა შინა ანუ ყოველსა ჭურჭელსა შინა ნაქმარსა ტყავისაგან, ნიში კეთროვნებისაჲ არს და უჩუენონ მღდელსა.
და იხილოს მღდელმან ნიში და განავლინოს მღდელმან ნიში იგი შჳდთა დღეთა.
და იხილოს მღდელმან ნიში იგი დღესა მეშჳდესა და უკუეთუ განფენილ იყოს ნიში იგი სამოსელსა ზედა ანუ საგუასლსა ანუ ფესუსა, ანუ ტყავსა ყოვლისამებრ, რაოდენადცა შეიქმნების ტყავი მოქმნასა შინა, ვითარმედ კეთროვნებაჲ დადგრომილი არს ნიში იგი. არაწმიდა არს.
დაწუას სამოსელი Page of ms. Ga: 35v ანუ საგუასლი, ანუ ფესჳ, ანუ მატყლიერთა შინა, ანუ სულიერთა გინა ყოველთა ჭურჭელსა შინა ტყავიერსა, რომელსაცა შინა იყოს მას შინა, ნიში კეთროვნებისაჲ დადგრომილი არს, ცეცხლითა დაიწუას.
ხოლო უკუეთუ იხილოს მღდელმან და არა განფენილ იყოს ნიში სამოსელსა შინა, ანუ საგუასლსა, ანუ ფესუსა, ანუ ყოველსა შინა ჭურჭელსა ტყავიერსა,
და ბრძანოს მღდელმან და განრცხას, რომელსაცა ზედა იყოს ნიში იგი მას ზედა, განავლინოს მღდელმან Page of ms. Ga: 36r ნიში იგი შჳდთა დღეთა მეორედ.
და იხილოს მღდელმან შემდგომად განრცხისა ნიშისა და არა თუ შეეცვალოს ნიშსა შესახედავი მისი და ნიშნი არა განბნეულ იყოს, არაწმიდა არს, ცეცხლითა დაიწუას, დადგრომილ არს სამოსელსა შინა ანუ საგუასლსა შინა გინა ფესუსა შინა.
და უკუეთუ იხილოს მღდელმან და ყოს მოშავე ნიში შემდგომად განრცხრისა მისისა, გამოჰხიოს იგი სამოსლისაგან, ანუ საგუასლისა, ანუ ფესჳსა, ანუ ტყავისა.
ხოლო უკუეთუ იხილვებოდის მერმეცა სამოსელსა შინა გინა საგუასლსა შინა გინა ფესუსა შინა ანუ ყოველსა ჭურჭელსა შინა ტყავიერსა, კეთრი აღყუავებული არს, ცეცხლითა დაიწუას, რომელსა შინა იყოს ნიში იგი.
და სამოსელი ანუ საგუასლი ანუ ფესჳ ანუ ყოველი ჭურჭელი ტყავიერი, რომელი განირცხას, და განეშოროს მისგან ნიში და განირცხას ,ეორედ.
ესე არს შჯული ნიშისა კეთროვნებისა სამოსლისა მატყლიერისა, ანუ სელიერისა, ანუ სგუასლისა, ანუ ფესჳსა, ანუ ყოვლისა ჭურჭლისა ტყავიერისა განსაწმედელად მისსა, ანუ შეგინებულ-შესარაცხად მისსა.
