და იტყოდა უფალი მოსეს მიმართ, მეტყუელი:
არქუ ძეთა ისრაელისათა და ეტყოდე მათ: უკუეთუ ვინმე ძეთა ისრაელისაგანთამან ანუ მოსრულთა მწირთამან ისრაელსა შორის, რომელმანცა მისცეს თესლი თჳსი მთავარსა, სიკუდილით მოკუედის. ნათესავმან მის ქუეყანისამან დაქოლოს იგი ქვითა.
და მე დავამტკიცო კაცსა მას ზედა პირი ჩემი და წარვწყმიდო იგი ერისაგან თჳსისა, რამეთუ თესლი მისი მისცა მთავარსა, რაჲთა შეაწბილნეს წმიდანი ჩემნი და შეაგინოს სახელი განწმედილი ჩემი.
ხოლო უკუეთუ მირიდებით მიარიდენ მკჳრთა მის ქუეყანისათა თუალნი მათნი კაცისა მისგან, მი-რაჲ-სცემდა იგი თესლსა თჳსსა მთავარსა არა მოკლვად მისსა,
და დავამტკიცო პირი ჩემი კაცსა მას ზედა და ნათესავობასა მისსა ზედა და წარვწყმიდო იგი და ყოველნი თანა-შეთქმულნი მისნი, ვითარმცა ისიძვიდეს იგინი მთავრისა მიმართ ერისაგან თჳსისა.
და სული, რომელი შეუდგეს მუცლით მეზღაპრეთა და მსახრვალთა, რაჲთა, რაჲთა ისიძვიდეს შემდგომად მათსა, დავამტკიცო პირი ჩემი სულსა მას ზედა და წარვწყმიდო იგი ერისაგან მისისა.
და იყვენით წმიდა, რამეთუ წმიდა ვარ უფალი ღმერთი თქუენი.
და დაიმარხენით ბრაძებანი ჩემნი და ყვენით იგინი. მე ვარ უფალი ღმერთი, წმიდა-მყოფელი თქუენი.
უკუეთუ კაცმან, კაცმან ბოროტი ჰრქუას მამასა თჳსსა ანუ დედასა თჳსსა, მოკუედინ. რამეთუ მამასა თჳსსა ანუ და დედასა თჳსსა ბოროტი ჰრქუა, თანამდებ არს.
კაცმან, კაცმან, რომელმან იმრუშოს ცოლი ქმრისაჲ ანუ რომელმან იმრუშოს ცოლი მოყუსისა თჳსისაჲ, სიკუდილით მოკუდეს მემრუშე და მრუშებელი.
და უკუეთუ ვინმე დაწვეს ცოლსა თანა მამისა თჳსისასა, უშუერებაჲ მამისა თჳსისა გამოაცხადა, სიკუდილით მოკუედინ ორნივე, თანამდებ არია.
უკუეთუ ვინმე დაწვეს სძლისა თჳსისა თანა, სიკუდილით მოკუდენ ორნივე, უღმრთო იქმნნეს, თანამდებ არიან.
და რომელი დაწვეს წულსა თანასაწოლითა დედაკაცისაჲთა, საძაგელებაჲ ქმნეს. ორნივე სიკუდილით მოკუდენ, თანამდებ არიან.
რომელმან შეირთოს ცოლი და დედაჲცა მისი, უსჯულოებაჲ არს. ცეცხლითა დაწუან იგი და იგინი. და არა იყოს უსჯულოებაჲ თქუენ შორის.
და რომელმან ყოს საწოლი თჳსი ოთხფერჴსა თანა, სიკუდილით მოკუედინ და ოთხფერჴი იგი მოკალით.
და დედაკაცი, რომელი მოუჴდეს ყოველსა პირუტყუსა ცოდვად იგი მის ქუეშე, მოაკუდინეთ დედაკაცი და პირუტყჳ სიკუდილით მოკალთ, თანამდებ არიან.
რომელმან მოიყვანოს დაჲ თჳსი მამისაგანი მისისაჲ ანუ დედისაჲ და მან იხილოს უშუერებაჲ ამისი, და ამან -- მისი, საყუედრელი არს, მოისპნენ წინაშე ძეთა ნათესავისა მათისათა: უშუერებაჲ დისა თჳსისაჲ გამოაცხადა, ცოდვაჲ მისი მიიღოს.
და მამაკაცი, რომელი დაწვეს დედაკაცსა თანა გამოჯდომილი\სა Page of ms. Ga: 60v და გამოაცხადოს უშუერებაჲ მისი, წყაროჲ მისი გამოაცხადა. და თჳთ მან გამოაცხადა მდინარე სისხლისა თჳსისაჲ. მოისპნენ ორნივე ნათესავისაგან მათისა.
უშუერებაჲ დისა მამისა შენისა და დისა დედისა შენისაჲ არა გამოაცხადო; რამეთუ თჳსებაჲ გამოაცხადეს, ცოდვაჲ მიიღონ.
რომელი დაწვეს ნათესავსა თჳსისა თანა, უშუერებაჲ ნათესავობისა მისისაჲ გამოაცხადა. უშვილონი მოკუდენ.
და მამაკაცმან, რომელმან მოიყვანოს ცოლი ძმისა თჳსისაჲ, არაწმიდებაჲ არს: უშუერებაჲ ძმისა თჳსისაჲ გამოაცხადა. უშვილონი მოკუდენ.
და დაიცვენით ყოველნი ბრძანებანი ჩემნი და ყოველნი მშჯავრნი ჩემნი და ყვენით იგინი. და არა მოგიწყინნეს თქუენ ქუეყანამან, რომლისა მიმართ მე შეგიყვანებ თქუენ მუნ დამკჳდრებად მას ზედა.
Page of ms. Ga: 62r და არა ხჳდოდით შჯულთაებრ წარმართთაჲსა, რომელთა განვასხამ თქუენგან, რამეთუ ესე ყოველნი ქმნნეს და მივიძაგენ იგინი.
და გარქუ თქუენ: თქუენ დაიმკჳდრეთ ქუეყანაჲ მათი და მე მოგცე იგი თქუენ მონაგებად, ქუეყანაჲ, რომელ არს მადინებელი სძისა და თაფლისაჲ. მე ვარ უფალი ღმერთი, რომელმან განგასაზღვრენ თქუენ ყოველთა ნათესავთაგან.
და განაჩინეთ თქუენცა შორის საცხოვართა არაწმიდათა და შორის მფრინველთა წმიდათა და არაწმიდათა. და არა საძაგელ-ჰყვნეთ სულნი თქუენნი პირუტყუთა შორის და მფრინველთა შორის და ყოველთა შორის ქუეწარმავალთა ქუეყანისათა, რომელთაჲ განგიჩინე თქუენ არაწმიდებაჲ.
და იყვენით ჩემდა წმიდა, რამეთუ წმიდა ვარ მერ, უფალი ღმერთი თქუენი, რომელმან განგისაზღვრენ თქუენ ყოველთა წარმართთაგან ყოფად ჩემდად.
მამაკაცი ანუ დედაკაცი, რომელიცა იქმნეს მათგანი მუცლით მეზღაპრე ანუ მსახრვალ, სიკუდილით მოკუდენ. ქვითა დაქვაენით Page of ms. Ga: 62v იგინი: თანამდებ არიან.
