მერმე ეტყოდა ღმერთი მოსეს და ჰრქუა:
არქუ აარონს და ძეთა მისთა და ეკრძალნენ წმიდათაგან ძეთა ისრაელისათაჲსა და არა შეაგინოს სახელი წმიდაჲ ჩემი და რაოდენთა განმიწმედენ მე. მე ვარ უფალი.
არქუ მათ: ნათესავთა შორის თქუენთა ყოველი კაცი, რომელიცა მოვიდეს ყოვლისაგან თესლისა თქუენისა წმიდათა მომართ, რაოდენთა-რათ განუწმიდენ ძენი ისრაელისანი უფალსა, და არაწმიდებაჲ მისი მის თანა იყოს, მოისპოს სული იგი ჩემგან. მე ვარ უფალი.
და კაცი, რომელი იყოს თესლისაგან აარონ მღდელისა, და ესე კეთროან ანუ თესლმცენარე იყოს წმიდათაგანი, არა ჭამოს ვიდრე არა განწმდეს. და რომელი შეეხოს Page of ms. Ga: 65v ყოველსა არაწმიდებასა სულისასა ანუ კაცსა, რომლისაგან გამოჴდეს მისგან საწოლი თესლისაჲ,
ანუ რომელიცა შეეხოს ყოველსა ქუეწარმავალსა არაწმიდასა, რომელი შეაგინებს მას, ანუ კაცსა, რომელი შეაგინებს მას, ანუ კაცსა, რომელი შეაგინებდეს მას ყოვლისაებრ არაწმიდებისა მისისა,
სული, რომელსაცა რაჲ შეეხოს მას, არაწმიდა არს ვიდრე მწუხრამდე, არა ჭამოს წმიდათაგან, არა თუ დაიბანოს ტანი მისი წყლითა.
და დაჰჴდეს მზე და წმიდა იყოს და მაშინ ჭამოს წმიდათაგან, რამეთუ პური მისი არს.
მძორი და ნამჴეცავი არა ჭამოს შეგინებად მისსა მათგან. მე ვარ უფალი.
და დაიცვნენ დასაცავნი, რაჲთა არა მოიღონ მათძლითი ცოდვაჲ და მოკუდენ მათთჳს. მე ვარ უფალი, წმიდამყოფელი მათი.
და ყოველი სხუა ნათესავი არა ჭამდეს წმიდათა. მსხემი მღდელისაჲ ანუ მორეწე არა ჭამდეს წმიდათა.
ხოლო უკუეთუ მღდელმან მოიგოს სული მოსაგებელითა ვერცხლისაჲთა, ესე ჭამდეს პურთა მისთა. და სახლისწულნი მისნი და იგინიცა ჭამდენ პურთა მისთა.
და ასული კაცისა მღ\დელისაჲ Page of ms. Ga: 66r უუეთუ შეერთოს ქმარსა სხუანათესავსა, ესე დასაბამთაგან წმიდათა არა ჭამდეს.
და ასული მღდელისაჲ უკუეთუ იქმნეს ქურივ ანუ განდევნილ, ხოლო თესლი არა ესუას მას, მოიქცეს სახლისავე მამულისა თჳსისა, მსგავსად სიჭაბუკისა მისისა. პურთაგან მამისა მისისათა ჭამდეს მათგან. ხოლო ყოველმან უცხომან არა ჭამოს მათგანი.
და კაცმან, რომელმან ჭამნეს წმიდანი უმეცრებით, შესძინოს ხუთი წილი მისი მას ზედა და მისცეს მღდელსა წმიდაჲ.
და არა შეაგინნეს წმიდანი ძეთა ისრაელისათანი, რომელთა იგინი შესწირვენ უფალსა.
და მოაწიონ მათ ზედა უსჯულოებაჲ ბრალისაჲ ჭამათა მათგან სიწმიდეთა მათთაჲთა, რამეთუ მე ვარ უფალი, განწმედილი მათი.
და ეტყოდა უფალი მოსესა და ჰრქუა:
არქუ აარონ და ძეთა მისთა და ყოველსა შესაკრებელსა ისრაელისასა და თქუ მათდა მიმართ: კაცმან, კაცმან ძეთაგან ისრაელისათა ანუ მწირთაგანმან, მოსრულთამან ისრაელისა მომართ, რომელმან მოიღოს ძღუენი მისი ყოვლისაებრ აღსაარებისა მათისა, რაოდენი-რაჲ შესწირონ უფალსა ყოვლად დასაწუველად,
მითუალულად თქუენდა ვერძნი უბიწონი სამროწლისაგან და ცხოვართაგან და თხათაგან.
ყოველსა, რომელსა აქუნდეს ბიწი მის შორის, არა შესწირონ უფალსა, ამისთჳს რამეთუ არა მისათუა\ლველ Page of ms. Ga: 66v არს თქუენგან.
და კაცმან, რომელმან მოიხუნეს ძღუენი მისნი ყოვლისაებრ აღრჩევისა მისისა მსხუერპლად მაცხოვრებისად უფლისა, განმჩინებელმან აღთქუმისამან ანუ მსგავსად აღრჩევისა ანუ დღესასწაულთა შინა თქუენთა სამროწლეთაგან ანუ ცხოვართაგან, უბიწოჲ იყოს მისათუალველად. ყოველი ბიწი არა იყოს მის თანა.
ბრმაჲ ანუ შემუსრვილი ანუ ენაკუეთილი ანუ ზმურდლიანი ანუ მღიერიანი ანუ მეფხანიანი არა მოიყვანნეთ ესენი ღმრთისა და სანაყოფედ არა მისცეთ მათგანი საკურთხეველსა ზედა უფალსა.
და ზუარაკი ანუ ცხოვარი, ყურდაკუეთილი ანუ მოკლეკუდი, საკლველებ-\ჰყვნე Page of ms. Ga: 67r იგინი თავისა შენისა, ხოლო აღთქუმად შენდა არა შეწყნარებულ იქმნენ.
გამოდუჟიანი, ტეხილი და შეჭყლემული და გამოკუეთილი და გამონატაცები არა მოჰგუარენით ესენი უფალსა და ქვეყანასა ზედა არა ჰყოთ.
და ჴელითა სხუანათესავისაჲთა არა შესწირნეთ ძღუენნი ღმრთისა თქუენისანი ამათ ყოველთაგან, რამეთუ ხრწნილებანი არიან მათ შორის, არა შეწყნარებულ-იქმნენ ესენი თქუენგან.
და იტყოდა უფალი მოსეს მიმართ, ემტყუელი:
ჴბოჲ ანუ ცხოვარი ანუ თხაჲ, ვითარცა იშვას, და იყოს შჳდ დღე დედასა ქუეშე მისსა, ხოლო დღესა მერვესა და წამართ შეწყნარებულ იქმნეს ძღუნად სანაყოფედ უფლისა.
და ჴბოჲ და სამწყსოჲსაგან Page of ms. Ga: 67v ცხოვარი იგი და შვილი მისი არა დაჰკლნეთ დღესა შინა ერთსა.
ხოლო უკუეთუ ამხუერპლებთ მსხუერპლსა აღნათქუემსა მხიარულებისასა უფალსა, მისათუალველად თქუენდა ამსხუერპლეთ მას.
მასვე დღესა შეიჭამოს და არა დაშთეს ჴორცთაგანი განთიადამდე. მე ვარ უფალი.
და მცნებანი ჩემნი დაიმარხენით და ყვენით იგინი. მე ვარ უფალი.
და არა შეაგინოთ სახელი წმიდისაჲ და წმიდა ვიქმნე შორის ძეთა ისრაელისათა. მე ვარ უფალი, წმიდამყოფელი თქუენი,
რომელმან გამოგიყვანენ თქუენ ქუეყანით ეგჳპტით, რაჲთა ვიყო თქუენდა ღმერთ, მე უფალი.
