და იტყოდა უფალი მოსეს მიმართ მთასა სინასა, მეტყუელი:
ეტყოდე ძეთა ისრაელისთა და თქუ მათდა მიმართ: რაჟამს შეხჳდეთ ქუეყანად, რომელსა მე მიგცემ თქუენ, და განისუენნეს ქუეყანამან, რომელი მე მიგცე თქუენ, შაბათნი უფლისანი.
ექუს წელ დასთესო აგარაკი შენი და ექუს წელ მოჰკრიბო ვენაჴი შენი და შეჰკრიბო ნაყოფი მისი.
ხოლო წელსა მეშჳდესა შაბათი განსუე\ნებისაჲ Page of ms. Ga: 75r იყოს ქუეყანისაჲ, შაბათი უფლისაჲ. აგარაკი შენი არა დასთესო და ვენაჴი შენი არა მოჰკრიბო.
და თჳთ აღმოსრულნი აგარაკისა შენისანი არა მოჰმკნე და ყურძენი სიწმიდისა შენისაჲ არა მოსწნიხო: წელიწადი განსუენებისაჲ იყავნ ქუეყანისაჲ.
და იყვნენ შაბათნი ქუეყანისანი ჭამადად შენდა და მონისა შენისა Page of ms. Ga: 75v და მჴევალისა შენისა და მორეწისა შენისა და მსხემისა, რომელი დამეზობლებულ იყოს შენდა.
და საცხოვართა შენთა და მჴეცთა ქუეყანისათა იყოს ყოველი ნაშრომი მისი საჭმელად.
და აღჰრაცხნე თავისა შენისად შჳდნი განსუენებანი წელთანი, შჳდნი წელნი შჳდგზის, და იყვნენ შენდა შჳდნი Page of ms. Ga: 76r შჳდეულნი წელიწადთანი ცხრა და ორმეოც წელ.
და მიმოდათქუთ საყჳრისა ჴმითა ყოველსა შინა ქუეყანასა თქუენსა თთუესა მეშჳდესა, მეათესა თთჳსასა, დღესა ლხინებისა მიმოდათქუთ საყჳრითა ყოველსა შინა ქუეყანასა თქუენ\სა Page of ms. Ga: 76v .
და წმიდა-ყავთ წელიწადნი მეერგასისა წლისაჲ და მოიღაღადეთ მიტევებაჲ ქუეყანასა ზედა ყოველთა დამკჳდრებულთა მისთათჳს. წელიწადი მიტევებისა შესწავებისაჲ იყოს ესე თქუენ შორის და წარვიდეს თითოეული მამულად თჳსად წარვიდეს.
მიტევებისა შესწავება ესე იყოს თქუენდა. წელიწადი მეერგასისა წლისაჲ არს თქუენი. არა სთესოთ, არცა ჰლეწოთ თჳთ აღმოსრული მისი და არა მოსწნიხოთ განწმედილი მისი.
რამეთუ მიტევებისა შესწავებაჲ არს, წმიდა იყოს თქუენდა, ყოველთაგან ჭამეთ ნაშრომი მისი.
კუალად იქცეს თითოეული მონაგებად თჳსად.
ხოლო უკუეთუ მისცე სყიდით მოყუასსა შენსა და უკუეთუ მოიგოცა მოყუსისაგან, ნუ აჭ\ირვებნ Page of ms. Ga: 77r კაცი მოყუასსა.
რიცხჳსაებრ წელიწადთაჲსა ნაშრომნი მოგეცნენ შენ.
რაოდენცა უმრავლეს წელთაჲსა, განამრავლოს მოგებაჲ მისი და რაოდენცა მოკლებით წელთამსა, მოაკლოს მოგებაჲ მისი, რამეთუ რიცხჳ ნაშრომთაჲ მოგცეს მან შენ.
ნუ აჭირვებნ კაცი მოყუასსა თჳსსა და გეშინოდენ უფლისა ღმრთისა შენისა. მე ვარ უფალი ღმერთი თქუენი.
და ჰყვნეთ ყოველნი სამართალნი ჩემნი და ყოველნი მშჯავრნი ჩემნი და დაიცვენით და ყვენით იგინი და დაიმკჳდრნეთ სასოებით მას ზედა.
ხოლო უკუეთუ სთქუათ: რაჲ ვჭამოთ წელსა ამას მეშჳდესა, არა თუ ვსთესოთ, არცა შევიკრიბნეთ ნაშრომნი ჩუენნი?
Page of ms. Ga: 77v და მოგივლინო კურთხევაჲ ჩემი თქუენ წელიწადსა მეექუსესა და ყვნეს ნაშრომნი მისნი სამთა წელიწადთათჳს.
და სთესოთ წელიწადსა მერვესა და შჭამდეთ ნაშრომთაგან ძუელთა ვიდრე არა მოვიდენ ნაშრომნი მისნი და შჭამდეთ ძუელსა ძუელთასა.
და ქვეყანაჲ განჰვაჭროთ დამტკიცებით, რამეთუ ჩემი არს ქუეყანაჲ, ამით რამეთუ მწირ და მსხემ ხართ თქუენ წინაშე ჩემსა.
და ყოვლისა ადგილისათჳს მკჳდრობისა თქუენისა საჴსარი მისცეთ ქუეყანისაჲ.
უკუეთუ დავრდომილ იყოს ძმა იგი შენი შენთაჲ და განსცეს მკჳდრობისაგან თჳსისა, მოვიდეს თჳსი, მახლობელი მისი, და უკმოიჴსნას განსყიდული ძმისა თჳსისაჲ.
ხოლო უკუეთუ არავინ იყოს თჳსი და პოვნიერ იყოს ჴელითა და ეპოოს მას კმად საჴსარი მისი,
და თანა-შერაცხნეს წელნი განსყიდისა მისისანი და განსცეს, რომელი აქუნდეს კაცსა, რომლისადა მიეყიდა იგი, და მიიქცეს სამკჳდრებელად თჳსად.
და უკუეთუ ვერ პოვნიერ იყოს ჴელი მისი კმა-საყოფელად, რაჲთამცა მისცა მას, იყოს მისყიდული იგი მომგებელისა მისისა ვიდრე მეექუსედ წლადმდე განტევებისა. და გამოვიდეს მიტევებასა მას და აღვიდეს მკჳდრობისა თჳსისა მიმართ.
და უკუეთუ ვინმე განყიდოს სახლი სამკჳდრებელი ქალაქსა შინა ზღუდვილსა, და იყოს ჴსნაჲ მისი,
Page of ms. Ga: 78r ხოლო უკუეთუ არა იჴსნას, ვიდრე არა განსრულდეს წელიწადი სრული, დამტკიცდეს სახლი იგი, მყოფი ქალაქსა შინა მქონებელსა ზღუდისასა, მტკიცედ მომგებელისა მის თჳსისა ნათესავთა შინა მისთა და არა გამოვიდეს განტევებასა მას.
ხოლო სახლნი ველისანი, რომელთა არა იყოს ზღუდე გარემოჲს მათსა, აგარაკსა თანა ქუეყანისასა შეირაცხნენ და გამოსაჴსნელ იყვნენ მარადის იგინი და მიტევებასა მას განვიდნენ იგინი.
და ქალაქნი ლევიტელთანი, სახლნი ქალაქთა მკჳდრობისა მათისანი გამოჴსნილ იყვნენ მარადის ლევიტელთათჳს.
რომელმანცა გამოიჴსნას ლევიტელთაგანმან, და განვიდეს სყიდულობაჲ სახლთა ქალაქისა სამკჳდრებელისა მათისათაჲ მიტევებასა მას, რამეთუ სახლნი ქალაქთა ლევიტელთა მკჳდრობისა მათისათანი ...
... არა განისყიდნენ, რამეთუ სამკჳდრებელ საუკუნო არს მათდა.
ხოლო უკუეთუ დავრდომილობდეს ძმაჲ შენი, მყოფი შენ თანა, და უძლურ იყოს ჴელითა შენ თანა, ჴელი აღუპყრა მას, ვითარცა მწირსა და მსხემსა, და ცოცხალ იყოს ძმაჲ შენი შენ თანა.
არა მიიღო მისგან ვახში, არცა აღნადგინები და გეშინოდის ღმრთისა შენისა -- მე ვარ უფალი -- და ცოცხალ იყოს ძმაჲ შენი შენ თანა.
ვეცხლი შენი არა მისცე მას აღნადგინებად და განსამრავლებლად არა ავასხნე მას საზრდელნი შენნი.
მე ვარ უფალი ღმერთი თქუენი, რომელმან გამოგიყ\ვანენ Page of ms. Ga: 78v თქუენ ქუეყანით ეგჳპტით, მიცემად თქუენდა ქუეყანაჲ ქანაანისაჲ, რაჲთა ვიყო თქუენდა ღმერთ.
ხოლო უკუეთუ დამდაბლდეს ძმაჲ შენი შენ შორის და მოგესყიდოს შენ, არა გმსახურებდეს შენ მსახურებასა მონისასა,
ვითარცა მორეწე ანუ მწირი იყოს შენდა, ვიდრე წლადმდე განტევებისა გიქმოდის შენ.
და განტევებასა მას განვიდეს და შვილნი მისნი მის თანა და წარვიდეს ნათესავისა მიმართ თჳსისა და სამკჳდრებელისა მიმართ მამულისა მივიდეს.
ამით რამეთუ ჩემნი არიან მონანი, რომელნი გამოგიყვანენ სასყიდლით.
არა დაჰქენჯნო იგი შრომითა და გეშინოდის ღმრთისა შენისა.
და მონანი და მჴევალნი, რაოდენნიცა იყვნენ შენდა წარმართთაგან, რომელთა გარე-შეუცავთ, მათგან მოიგნეთ მონაჲ და მჴევალი.
და ძეთაგან მსხემთაჲსა, რომელნი არიან თქუენ შორის, ამათგან მოიგნეთ და ნათესავთაგან მათთა, მყოფთა თქუენ შორის, რაოდენნიცა იყვნენ ქუეყანასა თქუენსა, იყვნენ თქუენდა ნაწილებად.
და განუყვნეთ იგინი შვილთა თქუენთა შემდგომად თქუენსა და იყვნედ იგინი თქუენდა მონად საუკუნოდ. ხოლო ძმანი თქუენნი -- ძენი ისრაელისანი. კაცად-კაცადმან ძმაჲ თჳსი არა დაქენჯნოს შრომათა მიერ.
Page of ms. Ga: 79r და უკუეთუ პოვნიერ იყოს ჴელი მწირისა ანუ მსხემისაჲ შენ შორის და უღონოქმნილი ძმაჲ შენი მიესყიდოს მწირსა ანუ მსხემსა შენ შორის, ანუ მწირ-ქმნილსა,
შემდგომად მისყიდისა მისისა ხსნაჲ იყოს მისი. ერთმან ძმათა მისთაგანმან იჴსნას იგი,
ანუ თჳსთაგანმან ჴორციელთა მისთამან ტომისაგან მისისა იჴსნას იგი. ხოლო უკუეთუ პოვნიერ იყოს ჴელითა, თჳთ იჴსნას თავი.
და ანდეზ-ყოს მომგებელისა-თანა მისისა წლითგან, რომლით მიჰყიდა მას თავი თჳსი, ვიდრე წლადმდე მიტევებისა და იყოს ვეცხლი ნასყიდობისა მისისაჲ, ვითარცა დღისა სასყიდლისაჲ, წელიწადსა წელიწადთაგან იყოს მის თანა.
ხოლო უკუეთუ უმეტესი რაჲმე წელიწადთაჲ იყოს, ამისსა მიმართ უკუნ-სცეს საჴსარი თჳსი ვერცხლისაგან ნასყიდობისა მისისა.
და უკუეთუ მცირედი დაშთეს წელიწადთაგან ვიდრე წლადმდე მიტევებისა, თანა შეარაცხოს მას წელიწადთაებრ მისთა და უკუნ-სცეს საჴსარი მისი.
და ვითარცა სასყიდლით დადგინებული წელიწადისაჲ წელიწადისაგან იყოს მის თანა, არა დაჰქენჯნო იგი რუდუნებითა წინაშე შენსა.
ხოლო უკუეთუ ვერ იჴსნას თავი თქუმულთა ამათებრ, გამოვიდეს წელიწადსა მიტევებისასა თჳთ და ყრმანი მისნი მის თანა.
რამეთუ ჩემნი არიან ძენი ისრაელისანი მსახლობნი, ყრმანი Page of ms. Ga: 79v ჩემნი ესენი არიან, რომელნი გამოვიყვანენ ქუეყანით ეგჳპტით. მე ვარ უფალი ღმერთი თქუენი.
