არა უქმნეთ თქუენ თავთა თქუენთა ჴელით ქმნული, არცა ქანდაკებული, არცა ძეგლი აღჰმართოთ თქუენ, არცა ლოდი მსტუარი აღსდგათ ქუეყანასა შინა თქუენსა თაყუანის-ცემად მისსა. მე ვარ უფალი ღმერთი თქუენი.
შაბათნი ჩემნი დაიმარხენით და წმიდათა ჩემთაგან გეშნოდენ. მე ვარ უფალი.
უკუეთუ ბრძანებათა ჩემთა ჴვიდოდით და მცნებანი ჩემნი დაიცვნეთ და ჰყვნეთ იგინი,
მოგცე თქუენ წჳმაჲ ჟამსა მისსა და ქუეყანამან მოსცეს ნაშრომნი მისნი და ხეთა ველისათა გამოსცენ ნაყოფი მათი.
და მიიწიოს თქუენი სალეწავი სთუალად და სთუელი მიიწიოს თესვად და შჭამდეთ პურსა თქუენსა მაძღრივ და დაემკჳდრნეთ კრძალულებით ქუეყანასა ზედა თქუენსა.
და ბრძოლაჲ არა მოიწიოს ქუეყანასა თქუენსა და მოვსცე მშჳდობაჲ ქუეყანასა თქუენსა და დაიძინოთ და არა იყოს შემაშინებელი თქუენი. და წარვწყმიდო მჴეცი ბოროტი ქუეყანისაგან თქუენისა. Page of ms. Ga: 80r და ბრძოლამან არა განვლოს ქუეყანაჲ თქუენი.
სდევნიდეთ მტერნი თქუენნი და დაეცნენ წინაშე თქუენსა სიკუდილითა.
სდევნიდნენ თქუენგანნი ხუთნი ასთა და ასნი თქუენნი სდევნიდნენ ბევრთა და დაეცნენ მტერნი თქუენნი წინაშე თქუენსა მახჳლითა.
და მოვიხილო თქუენ ზედა და აღგაორძინე თქუენ და განგამრავლნე თქუენ და დავამტკიცო აღთქუმაჲ ჩემი თქუენ თანა.
და შჭამდეთ ძუელთა და ძუელისძუელთა და ძუელი პირისაგან ახლისა გამოსდვათ.
და აღვჰმართო კარავი ჩემი თქუენ შორის და არა მოგიძაგნეს თქუენ სულმან ჩემმან.
და ვიდოდი თქუენ შორის და ვიყო მე თქუენდა ღმერთ და იყვნეთ ჩემდა ერ.
მე ვარ უფალი ღმერთი თქუენი, რომელმან გამოგიყვანენ თქუენ ქუეყანისაგან ეგჳპტისა, რამეთუ იყვენით თქუენ მონა, და შევმუსრე საკრველი უღლისა თქუენისაჲ და გამოგიყვანენ თქუენ კადნიერებით.
ხოლო უკუეთუ არა ისმინოთ ჩემი, არცა ჰყვანეთ ბრძანებანი ესე ჩემნი,
არამედ ურჩ-ექმნ[ნ]ეთ ამათ და მშჯავრნი ჩემნი მოიწყინეს სულმან თქუენმან, რაჲთა არა ჰყოფდეთ თქუენ ყოველთა მცნებათა ჩემთა, რაჲთა განაქარვნეთ თქუენ აღთქუმანი ჩემნი,
და მეცა ეგრეთვე გიყო თქუენ: და დავამტკიცო თქუენ ზედა უღონოებაჲ, სიმღიერე და სიყჳთლე წარმომატყულობელი თუალთა თქუენთაჲ და დამადნობელი სულისა თქუენისაჲ, და სთესვიდეთ წინააღმდგომნი თქუენნი.
და დავამტკიცო თქუენ ზედა პირი ჩემი და დაეცნეთ წინაშე მტერთა თქუენთა და გდევნიდენ თქუენ მოძულენი თქუენნი და ივლტოდით თქუენ თჳნიერ მდევარისა.
და უკუეთუ ვიდრე აქამომდე არა ისმინოთ ჩემი, და შევსძინო წურთად Page of ms. Ga: 80v თქუენდა წყლულებითა შჳდგზის ცოდვათა ზედა თქუენთა
და შევმუსრო გინებაჲ ამპარტავნებისა თქუენისაჲ და ვყო ცაჲ თქუენთჳს ვითარცა რკინაჲ, და ქუეყანაჲ თქუენი -- ვითარცა რვალი.
და ცუდად იყოს ძალი თქუენი და ქუეყანამან თქუენმან არა მოსცეს თესლი მისი და ხემან ველისა თქუენისამან არა გამოსცეს ნაყოფი მისი.
და უკუეთუ ამათსა შემდგომად ხჳდოდით ქცეულად და არა ინებოთ მორჩილებაჲ ჩემი, შეგძინნე თქუენ წყლულებანი შჳდნი ცოდვათაებრ თქუენთა.
და მოვავლინო თქუენ ზედა მჴეცი მძჳნვარე ქუეყანისაჲ და შეგჭამდეს თქუენ და აღჴოცოს საცხოვარი თქუენი და შემცირებულ-გყვნე თქუენ და ოჴერ-იყვენით გზანი თქუენნი.
და უკუეთუ ამას ზედა არა განისწავლენით, არამედ ხჳდოდით ქცეულად,
ვიდოდი მეცა ტქუენ თანა გულისწყრომითა ქცეულითა და გგუემნე მე თქუენ შჳდგზის ნაცვალად ცოდვათა თქუენთა.
და მოვჰჴადო თქუენ ზედა მახჳლი შურისმეძიებელი შურსა აღთქუმისასა და შეივლტოდით ქალაქებსა თქუენსა და მოვავლინო სიკუდილი თქუენ ზედა და მიეცნით ჴელთა მტერთა თქუენთასა.
გჭირდეს-რაჲ თქუენ საზრდელოჲსათჳს პურისა, და აცხობდენ ათნი დედანი პურსა თქუენსა თორნეთა შინა ერთსა და მოგცემდენ თქუენ პურსა თქუენსა სასწორით. და შჭამდეთ და ვერ განსძღებოდით.
Page of ms. Ga: 81r და უკუეთუ ამათსა ზედა არავე ისმინოთ ჩემი, არამედ ხჳდოდით ჩემდა მომართ ქცეულად,
და მეცა ვიდოდი თქუენ თანა გულისწყრომითა ქცეულითა და გწუართნე მე თქუენ შჳდგზის მსგავსად ცოდვათა თქუენთა.
და შეშჭამნეთ ჴორცნი ასულთა თქუენთანი.
და მოვაოჴრნე ძეგლნი თქუენნი ძუალთა თანა კერპთა თქუენთასა და მოგიწყინნეს თქუენ სულმან ჩემმან.
და დავსხნე ქალაქნი თქუენნი ოჴრად და მოვაოჴრნე წმიდანი თქუენნი და არა ვიყნოსი სული მსხუერპლთა თქუენთაჲ.
და მოვაოჴრო მე ქუეყანაჲ ტქუენი და უკჳრვეს მას ზედა მტერთა თქუენთა, რომელნი მკჳდრ-იყვნენ მას ზედა.
და განგთესნე თქუენ წარმართთა შორის და აღჴოცნეს თქუენ მომავალმან თქუენ ზედა მახჳლმან. და იყოს ქუეყანაჲ თქუენი ოჴერ და ქალაქნი თქუენნი იყვნენ უშენ.
მაშინ სათნო-იყვნეს ქუეყანამან შაბათნი თჳსნი ყოველთა დღეთა ოჴრებისა მისისათა. და თქუენ იყვნეთ ქუეყანასა მტერთა თქუენთასა. მაშინ შაბათობდეს ქუეყანაჲ და სათნო-იყვნენ შაბათნი მისნი.
და ყოველთა დღეთა ოჴრებისა მისისათა შამათობდეს, რომელი არა იშაბათნა შაბათთა შინა თქუენთა, რაჟამს დაგემკჳდრა თქუენ იგი.
დაშთომილთა თქიენთაგანთა მოუვლინი შიში გულსა მათსა Page of ms. Ga: 82r ქუეყანასა შინა მტერთა მათთასა და სდევნიდეს მათ ჴმაჲ ფურცლისა ატაცებულისაჲ და ივლტოდის, ვითარცა ლტოლვილი ბრძოლისაგან და დაეცნენ თდნიერ მდევარისა.
და უგულვებელს-ყოს ძმამან ძამაჲ თჳსი, ვითაცა ბრძოლასა შინა, თჳნიერ დევნისა ვისისამე, და ვერ გეძლოს წინა-დადგომად მტერთა Page of ms. Ga: 82v თქუენთა.
და წარწყმდეთ წარმართთა შორის და შეგჭამდეს თქუენ ქუეყანაჲ მტერთა თქუენთაჲ.
და დაშთომილნი თქუენგან განიჴრწნენ ...
... ცოდვათა მათთათჳს და ცოთვათათჳს მამათა მათთაჲსა, რამეთუ გარდაჴდეს და უგულებელს-მყვეს მე და რამეთუ ვიდოდეს წინაშე ჩემსა გარდაქცეულად.
და მე ვიდოდე მათ თანა გულისწყრომით გარდაქცეულად და წარვწყმიდნე იგინი ქუეყანასა მტერთა მათთასა. მაშინ სირცხჳლეულ იქმნენ გულნი მათნი წინადაუცვეთელნი და მაშინ სათნო იყუნენ ცოდვანი მათნი.
და მოვიჴსენო მე აღთქუმისა იაკობისი და აღთქუმისა ისაკისი და აღთქუმისა აბრაამისი მოვიჴსენო და ქუეყანისაჲ მოვიჴსენო.
და დაშთეს ქუეყანაჲ მათგან. მაშინ შეიწყნარეს ქუეყანამან შაბათნი მისნი მოოჴრებულ რაჲ იყოს ესე მათგან და მათ შეიწყნარენენ უშჯულოებანი ჩემნი მოიწყინნა სულმან მათმან.
და არცა ვიდრე იყვნესღა იგინი ქუეყანასა მტერთა მათთასა არა უგულვებელს-ვყვნენ იგინი, რაცა მოვიწყინენ იგინი განქარვებად აღთქუმაჲ ჩემი მათდამიმართი, რამეთუ მე ვარ უფალი ღმერთი თქუენი.
და მოვიჴსენო აღთქუმისა მათისა პირველისაჲ, რაჟამს გამოვიყვანენ იგინი ქუეყანით ეგჳპტით სახლისაგან მონებისა წინაშე ყოველთა წარმართთა[ჲ]სა, რაჲთა ვიყო მათდა ღმერთ. მე უფალი.
ესე არიან მშჯავრნი და ბრძანებანი და შჯულნი, რომელნი მოსცნა უფალმან შორის თჳსსა და შორის ძეთა ისრაელისათა მათსა ზედა სინასა ჴელითა მოსესითა.
