და თქუა უფალმან აარონის მიმართ, მეტყუელმან: შენ და ძეთა შენთა და სახლმან მამისა შენისამან შენ თანა მიიხუნეთ ცოდვანი წმიდათანი, და Page of ms. Gb: 65r შენ და ძეთა შენთა მიიხუნენით ცოდვანი მღდელობისა თქუენისანი.
და ძმანი შენნი, ტომი ლევისი, ერი მამისა შენისაჲ Page of ms. Ga: 151v მოიყვანენ შენდა მომართ და შეგეძინნენ შენ და გმსახურებდენ შენ და ძეთა შენთა შენ თანა წინაშე კარვისა საწამებლსიასა,
და ჴუმილვიდენ საჴუმილავთა შენთა, გარნა ჭურჭელთა წმიდათა და საკურთხეველსა არა მოუჴდენ და არა მოკუდენ იგინიცა და თქუენ.
და შეგეძინნენ შენ და ჴუმილვიდენ ჴუმილვათა კარვისა წამებისათა და ყოველთა მსახურებათა კარვისათა, და სხუა ნათესავი არა შემოვიდეს შენდამო.
და ჴუმილვიდენ ჴუმილვათა წმიდათასა და ჴუმილვათა საკურთხეველისათა და არღა იყოს მერმე გულისწყრომაჲ ძეთა შორის ისრაელისათა.
და მე მოვიხუენ ძმანი თქუენნი ლევიტელნი შორისისაგან ძეთა ისრაელისათაჲსა მისაცემელად მოცემულად უფლისად მსახურებად მსახურებათა კარვისა საწამებლისათა.
და Page of ms. Ga: 152r შენ და ძეთა შენთა შენ თანა დაიცევით მღდელობაჲ თქუენი ყოვლისაებრ გუარისა საკურთხეველისაჲსა და შინაგან კრეტსაბმელისა და ჰმსახურებდით მსხურებათა, და უცხო ნათესავი, რომელი მოუჴდეს, მოკუდეს.
და იტყოდა უფალი მოსეს და აარონის მიმართ: და აჰა მე მიგეც თქუენ დამარხვაჲ ყოველთა დასაბამთა ჩემთაჲ, ყოველთაგან წმიდაქმნულთა ჩემდად ძეთაგან ისრაელსიათა შენ მიგცენ იგინი პატივად და ძეთა შენთა შენ თანა შჯულად საუკუნოდ.
და ესე იყავნ თქუენდა ყოველთაგან განწმედილთა წმიდათა ნაყოფებთა, ყოველთაგან ძღუენთა მათთა და ყოველთაგან სამსხუერპლოთა მათთა და ყოვლისაგან ნაბრალებისა მათისა და ყოველთაგან ნაცოდავთა მათთა, რაოდენთა მომცემენ მე ყოველთაგან წმიდათა, შენდა იყვნენ და ძეთა შენთა.
წმიდასა შინა წმიდათასა შეჭამენით იგი ყოველმან წულმან, შეჭამენით იგი შენ და ძეთა შენთა, წმიდა Page of ms. Gb: 65v იყვნენ შენდა.
და ესე იყვნენ თქუენდა დასაბამთაგან მოსაცემელთა თქუენთა: ყოველთაგან ზედნადებთა ძეთა ისრაელისათაჲსა შენ მიგცენ იგინი და ძეთა შენთა და ასულთა შენთა შჯულად საუკუნოდ. ყოველი წმიდაჲ სახლსა შინა შენსა ჭამდეს მათ.
ყოველი დასაბამი ზეთისაჲ და ყოველი დასაბამი იფქლისა და ღჳნისაჲ, დასაბამი მათი, რაოდენთა მისცემენ უფალსა, შენ მიგცენ იგინი.
პირველნი ნაშრომთანი ყოველნი, რაოდენნი იყვნენ ქუეყანასა შინა მათსა, რაოდენთა მოართუმენ უფალსა, შენდა იყვნენ; ყოველი წმიდაჲ სახლსა შინა შენსა ჭამდეს მათ.
ყოველი შენაჩუენები Page of ms. Ga: 153r ძეთა შორის ისრაელისათა შენდა იყოს.
და ყოველი განმღებელი ყოვლისა საშოჲსაჲ ყოვლისაგან ჴორცისა, რაოდენთა მოჰგურიან უფალსა კაცითგან მიპირუტყუამდე, შენდა იყოს, არამედ საჴსრით იჴსნებოდინ პირმშონი კაცთანი და პირმშონი პირუტყუთა არაწმიდათანი გამოიჴსნნენ.
და ჴსნაჲ მათი: თჳთგან სასყიდელი ხუთი სიკლაჲ სიკლისაებრ წმიდისა, ოცი დანგი არს.
გარნა Page of ms. Ga: 153v პირმშონი ზროხათაგანი და პირმშონი ცხოვართანი და პირმშონი თხათანი არა იჴსნნენ, წმიდა არიან, და სისხლი მათი დასთხიო საკურთხეველსა თანა და ცმელი შესწირო ნაყოფებად სულად სულნელებისად უფალსა.
და ჴორცნი იყვნენ შენდა, ვითარ-იგი მკერდი ზედადასადებელისაჲ და მსგავსად მჴრისა მარჯუენისა იყვნენ შენდა.
ყოველი განნაჩინები წმიდათაჲ, რაოდენთა-რათ განუჩინებენ ძენი ისრაელისანი უფალსა, მიგეც შენ და ძეთა შენთა და ასულთა შენთა შენ თანა შჯულად საუკუნოდ, აღთქუმაჲ მარილისა საუკუნოჲსაჲ არს წინაშე უფლისა, შენდა და თესლისა შენისა შემდგომად შენსა.
და იტყოდა უფალი აარონის მიმართ: ქუაყანასა მათსა არა დაემკჳდრო და ნაწილი არა იყოს შენი მათ შორის, რამეთუ მე ვარ ნაწილ შენდა და სამკჳდრებელ შენდა ძეთა შორის ისრაელისათა;
და ძეთა ლევისა ესერა მივეც ყოველი ათეული ისრაელისაჲ ნაწილად ნაცვალად მსახურებათა მათთა, რაო\დენთა Page of ms. Ga: 154r ჰმსახურებენ იგინი მსახურებათა კარავსა შინა წამებისასა;
და არღა შევიდენ მერმე ძენი ისრაელისანი კარვად წამებისად მიღებად ცოდვისა სიკუდიდშემოსილისა.
და ჰმსახურებდეს ლევიტელი თჳთ მსახურებასა კარვისა საწამებლისასა და იგინი მიიხუმიდენ ცოდვათა მათთა. შჯულად საუკუნოდ ნათესავთა შინა მათთა: და შორის ძეთა ისრაელისათა არა დაიმკჳდრონ სამკჳდრებელი,
რამეთუ ათეულნი ძეთა ისრაელსათანი, რაოდენთა-რათ განუჩინებენ უფალსა განნაჩინებად, მივცენ ლევიტელთა ნაწილად. ამისთჳს ვარქუ მათ შორის ძეთა ისრაელისათა არა დამკჳდრებად სამკჳდრებელი.
და იტყოდა უფალი მოსეს მიმართ, მეტყუელი:
და ლევიტელთა ჰრქუა და იტყ\ოდი Page of ms. Ga: 154v მათდა მიმართ: რაჟამს მოიღოთ ათეული ძეთაგან ისრაელისათა, რომელი მიგეც თქუენ მათგან ნაწილად, და განუჩინეთ თქუენცა მათგან განნაჩინები უფალსა -- ათეული ათეულისაგან,
და შეგერაცხნენ თქუენ განნაჩინებნი თქუენნი, ვითარცა იფქ\ლი Page of ms. Ga: 155r კალოჲსაგან და ვითარცა განნაჩინები Page of ms. Gb: 66v საწნახელისაგან.
ესრეთ განუჩინეთ თქუენცა ყოველთაგან განნაჩინებთა უფლისათა ყოველთაგან ათეულთა თქუენთა, რაოდენი-რაჲ მიიხუნეთ ძეთაგან ისრაელისათა, და მიეცით მათგან განნაჩინები უფლისაჲ აარონს მღდელსა.
ყოველთაგან მოსაცემელთა თქუენთა განუჩინნეთ განნაჩინები უფალსა, ყოველთაგან დასაბამთა განწმედილთა მის მიერ.
და თქუთ მათდა მიმართ: რაჟამს განიჩინებდეთ დასაბამსა მისგან, და შეერაცხოს ლევიტელთა, ვითარცა ნაშრომი კალოჲსაგან და ვითარცა ნაშრომი საწნახელისაგან.
და შჭამდეთ მას ყოველსა ადგილსა თქუენ და ძენი თქუენნი და სახლნი თქუენნი, რამეთუ სასყიდელ თქუენდა არს ესე მსახურებათა წილ თქუენთა კარავსა შინა წამებისასა,
და არა მიიღოთ მისთჳს ცოდვაჲ, გან-თუ-იჩინოთ დასაბამი მისგან, და წმიდანი ძეთა ისრაელისათანი არა შეაგინნეთ, რაჲთა არა მოჰკუდეთ.
