და საცხოვარი მრავლად იყო ძეთა რუბენისთაჲ და ძეთა გადისთაჲ, სიმრავლე დიადი ფრიად; და იხილეს სოფელი იაზირისი და სოფელი გალაადისაჲ, და იყო ადგილი იგი ადგილი სასაცხოვრე.
და მოსრულთა ძეთა რუბენისთა და ძეთა გადისთა თქუეს მოსეს მიმართ და ელეაზარ მღდელისა და მთავართა მიმართ შესაკრებელისათა, მეტყუელთა:
ატარონი და დებონი და იაზინი და მამვრანი და ესებონი და ელეალი და სემამაჲ და ნავავი და ივეანი,
ქუეყანაჲ, რომელი მისცა უფალმან წინაშე ძეთა ისრაელისათა, ქუეყანაჲ ცხოვართ მზრდელი არს და მონათა შენთაჲ საცხოვარი არს.
და ეტყოდეს: ვპოეთ თუ მადლი წინაშე შენსა, მომეცინ ქუეყანაჲ ესე მონათა შენთა დაპყრობად და ნუ წიად-მიყვანებ ჩუენ იორდანესა.
და ჰრქუა მოსე ძეთა გადისთა და ძეთა რუბენისთა: ძმანი თქუენნი ვიდოდინ ბრძოლად და თქუენ ჰსხდეთ მანდა?
და რად გარდასდრეკთ გულებსა ძეთა ისრაელისათასა არა წიაღ-სლვად ქუეყანასა მას, რომელი მისცა უფალმან მათ?
არა ესრეთ ყვესა მამათა თქუენთა, ოდეს წარვავლინენ იგინი კადეს-ბარნით მოხილვად ქუეყანისად?
და მივიდეს იგინი ჴევსა მას ტევნისასა და მოიხილეს ქუეყანაჲ და განდრიკეს გული ძეთა ისრაელისათაჲ, რაჲთა არა შევიდენ ქუეყანად, რომელი მისცა მათ უფალმან.
და განრისხნა გულისწყრომით უფალი მას დღესა შინა და ფუცა, მეტყუელმან:
უკუეთუ იხილონ კათა ამათ, აღმოსრულთა ეგჳპტით, ოცით წლითგან და წარმართ მეცნიე\რთა Page of ms. Ga: 202r კეთილისა და ბოროტისათა, ქუეყანაჲ, რომელ ვეფუცე აბრაამს და ისააკს და იაკობს, რამეთუ არა შემომიდგეს უკუანა ჩემსა,
თჳნიერ ხალებ, ძემან იეფონესმან, განყენებულმან, და იისუ ნავესმან, რამეთუ შეუდგეს უკუანა უფლისა.
და განრისხნა გულისწყრომით უფალი ისრაელსა ზედა და აგურიობნა იგინი უდაბნოს ზედა ორმეოც წელ, ვიდრემდის აღისპოლა ყოველი ნათესავი, მოქმედნი ბოროტისანი, წინაშე უფლისა.
აჰა, აღსდეგით ნაცვალად მამათა თქუენთა კრებული კაცთა ცოდვილთაჲ შეძინებად მერმე გულისწყრომასა ზედა უფლისასა რისხვისა ისრაელისათჳს.
რამეთუ უკუნ-იქცევით თქუე მისგან შეძინებად მერმე დატევებისა მისისა უდაბნოს ზედა და უშჯულოებთ ყოვლისა ამის შესაკრებელისა მომართ.
და მოუჴდეს მას და ეტყოდეს: ბოსლები ცხოვართაჲ უშენოთ აქა საცხოვართა ჩუენთა და ქალაქები მონაგებისა ჩუენისათჳს.
და ჩუენ შეჭურვილნი წინა-ცვად უპირველეს ძეთა ისრაელისათა, ვიდრემდისცა მივიყვანეთ იგინი თავთა მათთა ადგიდ, და დაემკჳდროს ბუნაგი ჩუენი ქალაქთა შინა მოზღუდვილთა მკჳდრთათჳს ქუეყანისათა.
არა კუალად-ვიქცეთ სახლთა ჩუენთა, ვიდრემდის განიყვნენ ძენი ისრაელისანი თითოეული სამკჳდრებელსა თჳსსა.
და არღარა დავიმკჳდროთ მათ შორის წიაღ იორდანისა მიერ კერძო, რამეთუ მოგჳღებიეს ჩუენ ნაწილი ჩუენნი წიაღ იორდანესა, აღმოსავალით კერძო.
და თქუა მათდა მიმართ მოსემან: უკუეთუ Page of ms. Ga: 203r ჰყოთ სიტყჳსა ამისებრ, უკუეთუ შეიჭურნეთ წინაშე Page of ms. Gb: 88v უფლისა ბრძოლად,
და განვიდეს თქუენი ყოველი ჭურვილი იორდანესა წინაშე უფლისა, ვიდრემდის აღიჴოცოს მტერი მისი პირისაგან მისისა,
და დაიუფლოს ქუეყანაჲ წინაშე უფლისა. და ამათსა შემდგომად მიიქცეთ და იყვნეთ უბრალო წინაშე უფლისა და ისრაელისაგან, და იყოს ქუეყანაჲ ესე თქუენდა დასაპყრობელ წინაშე უფლისა.
ხოლო უკუეთუ არა ჰყოთ ესრეთ, სცოდოთ წინაშე უფლისა და სცნათ ცოდვაჲ თქუენი, რაჟამს გეწინენ თქუენ ძჳრნი.
და უშენენით თქუენ თქუენდად ქალაქნი ბუნაგსა თქუენსა და ბოსელი საცხოვართა თქუენთა, და გამოსრული პირისაგან თქუენისა ყავთ.
და თქუს ძეთა რუბენისთა და ძეთა გადისთა მოსეს მიმართ, მეტყუელთა: მონათა შენთა ყონ, ვითარცა უფალმან ჩუენმან ამცნო,
ბუნაგი ჩუენი და ცოლნი ჩუენნი და საცხოვარი ჩუენი იყვნენ ქალაქთა შინა გალაადისათა,
ხოლო მონანი შენნი განვიდენ ყოველნი შეჭურვილნი და განწყობილნი წინაშე უფლისა ბრძოლად, ვითარცა-სახედ უფალმან თქუა.
და შეასწავლნა იგინი მოსემან ელეაზარს მღდელსა და იისუს, ძესა ნავესსა, და მთავართა ტომთა ძეთა ისრაელისათასა,
და თქუა მათდა მიმართ მოსემან: უკუეთუ წიაღ-მოჴდენ ძენი რუბენისნი და ძენი გადისნი თქუენ თანა იორდანესა ყოველი შეჭურვილი ბრძოლად წინაშე უფლისა, და დაეუფლნეთ ქუეყანასა წინაშე თქუენსა და მიეცით მათ ქუეყანაჲ გალაადისაჲ დასაპყრობელად.
ხოლო არა თუ წიაღ-მოჴდენ თქუენ თანა შეჭ\ურვილნი Page of ms. Ga: 203v ბრძოლად წინაშე უფლისა, წიაღ-ავლეთ ბუნაგები მათი და ცოლნი მათნი და საცხოვარი მათი პირველად თქუენსა ქუეყანად ქანაანისა, და თანა-დაემკჳდრნენ თქუენ შორის ქუეყანასა ქანაანისასა.
და მიუგეს ძეთა რუბენისთა და ძეთა გადისთა, მეტყუელთა: რაოდენი უფალმან მრქუას მსახურთა თჳსთა, ეგრეთ ვყოთ,
და ჩუენ წიაღ-მოვჴდეთ შეჭურვილნი წინაშე უფლისა ქუეყანად ქანაანისა, და მომეცით ჩუენ დასაპყრობელი წიაღ-კერძო იორდანისა.
და მისცა მათ მოსე ძეთა რუბენისთა და ძეთა გადისთა და კერძოსა ტომსა მანასის, ძისა იოსებისსა, სამეფოჲ სიონ მეფისა ამორრეველთაჲსაჲ, და სამეფოჲ ოგ მეფისა ბასანისაჲ, ქუეყანაჲ და ქალაქნი მისნი საზღვართა თანა, ქალაქნი ქუეყანისანი გარემოჲს.
და აღაშენეს ძეთა გადისთა დებოთი
და ტაროთი და აროირი და სოფანი და იაზირი და აღამაღლნეს იგინი,
და ამვრანი და ბეთარრანი -- ქალაქნი ძნელნი და ბოსლები ცხოვართაჲ.
და ძეთა რუბენისთა აღაშენეს ესებონი და ელეალი და კარიათემი
და ნაბოჲ და ვეელსემეონი, გარემობურვილნი, და სევამაჲ და სახელ-სდვეს სახელსა ზედა თჳსსა სახელები ქალაქთაჲ, რომელი აღაშენნეს.
და წარვიდა ძე მაქირისი, ძისა მანასსისი, გალაადდ და გამოიღო იგი და აღჴოცა ამორრეველი, დამკჳდრებული მას შინა.
და მისცა მოსემან გალაადი მაქირს, ძესა მანასსისსა და დაემკჳდრნეს მუნ.
და იაირ მანასსისი წარვიდა და მოიხუნა ბოსლებნი მათნი და სახელ-სდვა მათ `ბოსლები იაირისი'.
და Page of ms. Gb: 89r ნავავ წარვიდა და დაიპყრა კანაათი და დაბანი Page of ms. Ga: 204v მისნი და სახელ-სდვა მათ `ნავოთ', სახელისაგან თჳსისა.
