და შეიყუარო უფალი ღმერთი შენი და დაიცვნე დასაცველნი მისნი და სამართალნი მისნი და მშჯავრნი მისნი ყოველთა დღეთა.
და გულისჴმა-ჰყოთ დღეს, ვითარმედ არა ყრმათა თქუენთა, რომელთა არა უწყიან, არცა იხილეს წურთაჲ უფლისა ღმრთისა შენისაჲ და დიდებულებანი მისნი და ჴელი მტკიცე და მკლავი მაღალი,
და სასწაულნი მისნი და ნიშნი მისნი, რომელნი ქმნნა შორის ეგჳპტისა ფარაოს მეფესა ეგჳპტისასა და ყოველსა ქუეყანასა მისსა.
და რაოდენი უყო ძალსა მეგჳპტელთასა, ეტლთა მათთა და ცხენსა მათსა, ვითარ დაფარნა წყალმან ზღჳსამან წინაშე პირსა მათსა, გუდევდეს რაჲ იგინი შემდგომად ჩუენსა, და წარწყმიდნა იგინ უფალმან ვიდრე დღენდელად დღემდე,
და რაოდენი გიყო თქუენ უდაბნოს ზედა, ვიდრემდის მოხუედით ადგილსა ამას,
და რაოდენი უყო დათანს და აბირონს, ძეთა ელიაბისთა, ძისა რუბენისთა, რომელნი განმღებელმან პირისა თჳსისა\მან Page of ms. Ga: 231r ქუეყანამან შთანთქნა იგინი და სახლნი მათნი და კარავნი მათნი და ყოველი საცხორებელი მათი მათ თანა შორის ყოვლისა ისრაელისა.
თუალნი თქუენნი ჰხედვიდეს ყოველთა საქმეთა უფლისათა დიდთა, რომელნი გიყვნა თქუენ დღეს.
და დაიცვენით ყოველნი მცნებანი მისნი, რაოდენთა მე გამცნებ თქუენ დღეს, რაჲთა ცოცხალ იყვნეთ და განჰმრავალწილნეთ და შეხჳდეთ და დაიმკჳდროთ ქუეყანაჲ, რომლისა მიმართ თქუენ განჰვლით იორდანესა მუნ დამკჳდრებად მისსა,
რაჲთა იდღეგრძელოთ ქუეყანასა ზედა, რომელსა ეფუცა უფალი მამათა თქუენთა მიცემად მათდა და თესლისა მათისა მათ თანა, ქუეყანაჲ დამომდინარე სძისა და თაფლისაჲ.
რამეთუ არს ქუეყანაჲ, რომლისა მიმართ თქუენ შეხუალთ მუნ დამკჳდრებად მისსა, არა ვითარ ქუეყანაჲ ეგჳპტისაჲ არს, ვინაჲ გამოხუედით მუნით, რაჟამს დასთესიან თესლი და მორწყიან ფერჴებითა, ვითარ მტილი მხლისაჲ.
ხოლო ქუეყანაჲ, რომელსა შეხუალ შენ დამკჳდრებად მისსა, ქუეყანაჲ მთოანი და Page of ms. Ga: 231v ველოანი წჳმისაგან ცისა სუამს წყალსა,
ქუეყანაჲ, რომელსა უფალი ღმერთი ზედა-ჰხედავს მას მარადის, თუალნი უფლისა ღმრთისანი მას ზედა დასაბამითგან წელიწდისაჲთ ვიდრე აღსასრულამდე წელიწდისა.
ხოლო უკუეთუ სმენით ისმინნეთ ყოველნი მცნებანი მისნი, რომელთა მე გამცნებ თქუენ დღეს, შეყუარებად მისსა ყოვლითა გულითა შენითა და ყოვლითა სულითა შენითა,
და მოსცეს წჳმაჲ ქუეყანასა შენსა ჟამიერი ჟამსა თჳსსა მსთოაჲ და მცხუედი და შეიკრიბო იფქლი შენი და ღჳნოჲ შენი და ზეთი შენი,
და მოცემაჲ თივათაჲ ველთაგან შენთა საცხოვართა შენთათჳს, და შჭამო რაჲ, და განსძღე,
ეკრძალე თავსა შენსა, ნუსადა განზრქნეს გული შენი და გარდაჰჴდეთ და ჰმსახუროთ ღმერთთა სხუათა და თაყუანის-სცეთ მათ.
და გულისწყრომით განრსხნეს უფალი თქუენ ზედა და შეკრას ცაჲ და არა იყოს წჳმაჲ და ქუეყანამან არა მოსცეს ნაყოფი მისი, და წარსწყმდეთ Page of ms. Ga: 232r მწრაფლ ქუეყანისაგან კეთილისა, რომელი მოგცა თქუენ უფალმან.
და შეიხუენით სიტყუანი ესე გულად თქუენდა და შეიბენით ესენი სასწაულად ჴელსა თქუენსა და იყვნენ შეუძრველ წინაშე თუალთა თქუენთა.
და ასწავენით ესენი შვილთა თქუენთა, მსხდომარეთა სახლსა შინა და მავალთა გზასა ზედა და მწოლარეთა და მდგომარეთა.
და დაწერენით წყირთლთა ზედა სახლთა თქუენთასა და ბჭეთა თქუენთა,
რაჲთა იმრავალდღეოთ და დღენი ძეთა თქუენთანი ქუეყანასა ზედა, რომელსა ეფუცა უფალი მამათა თქუენთა მიცემად მათდა, ვითარცა დღენი ცისანი ქიეყანასა ზედა.
და იყოს, უკუეთუ სმენით ისმინეთ ყოველნი ესე მცნებანი, რომელთა მე დღეს გამცებ ქმნად: შეყუარებად უფლისა ღმრთისა თქუენისა და სლვად ყოველთა შინა გზათა მისთა და შედგომად მისსა,
და განასხნეს უფალმან ყოველნი ესე წარმართნი პირისაგან თქუენისა და დაიმკჳდრენით ნათესავნი დიდნი და უძლიერესნი უფროჲს, ვიდრე თქუენ.
ყოველი ადგილი, რომელიცა დატკებნოს კუალმან ფერჴთა თქუენთამან, თქუენი იყოს უდაბნოჲთგან და წინაშე ლიბანესა და მდინარითგან დიდით ევფრატით და ვიდრე ზღუადმდე დასავალისა იყვნენ საზღვარნი თქუენნი.
არა წინა-აღგიდგეს არავინ წინაშე პირსა თქუენსა. შიში თქუენი და ძრწოლაჲ თქუენგან დასდვას უფალმან ღმერთმან თქუენმან პირსა ზედა ყოვლისა ქუეყანისასა, რომელსაცა ზედა მიხჳდეთ მას ზედა, ვითარ-სახედ იტყოდა უფალი თქუენდა მიმართ.
აჰა, მე მივ\სცემ Page of ms. Ga: 232v წინაშე თქუენსა დღეს კურთხევათა და წყევათა.
კურთხევათა, უკუეთუ ისმინნეთ მცნებანი უფლისა ღმრთისა თქუენისანი, რომელტა მე გამცნებ თქუენ დღეს;
და წყევათა, უკუეთუ არა ისმინნეთ მცნებანი უფლისა ღმრთისა თქუენისანი, რაოდენთა მე გამცნებ თქუენ დღეს, და შესცთეთ გზისაგან, რომელი გამცენ თქუენ მავალნი მსახურებად ღმერთთა სხუათა, რომელნი არა უწყოდენით.
და იყოს, რაჟამს შეგიყვანოს შენ უფალმან ღმერთმან შენმან ქუეყანად, რომელსა წიაღ-ხუალ მუნ დამკჳდრებად მისსა, და მისცე კურთხევაჲ მთასა ზედა ღარიზინსა და წყევაჲ -- მთასა ზედა გებალსა.
არა, აჰა, ესენი წიაღ იორდანესა, უკუანა კერძო გზასა მზის დასავალისასა, ქუეყანასა ქანაანისასა, დამკჳდრებულსა მზის დასავალით კერძო თანაშე ღოლღოლისა მახლობელად მუხისა მაღლისა?
რამეთუ თქუენ განჰვლით იორდანესა შემავალნი დამკჳდრებად უეყანისა, რომელსა უფალი ღმერთი თქუენი მოგცემს თქუენ წილად ყოველთა დღეთა, დაიმკჳდრეთ იგი და დაემკჳდრენით მას ზედა.
და დაიცევით ქმნაჲ ყოველთა ბრძანებათა მისთაჲ და მშჯავრთა მისთაჲ, რომელთა მე მივსცემ წინაშე თქუენსა დღეს.
