ყოველი სიტყუაჲ, რომელსა მე გამცნებ შენ დღეს, იგი დაიცევ ქმნად, არა შესძინო მას ზედა, არცა დააკლო მისგან.
აღ-თუ-დგეს Page of ms. Ga: 236r შენ შორის წინაწარმეტყუელი ანუ ზმანებული სიზმრისაჲ და მოგცეს შენ სასწაული ანუ ნიში
და იქმნეს სასწაული ანუ ნიში, რომელი თქუა შენდა მიმართ, მეტყუელმან: მივიდეთ და ვჰმსახუროთ ღმერთთა სხუათა, რომელნი არა უწყოდენით.
არა ისმინოთ სიტყუაჲ მის წინაწარმეტყუელისა ანუ ზმანებულისაჲ მის სიზმარსა, რამეთუ განმოგცდის უფალი ღმერთი თქუენი თქუენ ცნობითა, უკუეთუ გიყუარსყე უფალი ღმერთი თქუენი ყოვლითა გულითა თქუნითა და Page of ms. Ga: 236v ყოველთა სულითა თქუენითა,
შემდგომად უფლისა ღმრთისა ქუენისა, სლვად მისსა შიშად და მცნებათა მისთა დაცვად და ჴმისა მისისა სმენად და მისსა მონებად და მისსა შეყოფად.
და წინაწარმეტყუელი იგი ანუ სიზმრის ზმანებული მოაკუდინეთ, რამეთუ თქუა შეცთუნებაჲ შენი უფლისაგან ღმრთისა შენისა, გამომყვანებელისა შენისა ქუეყანით ეგჳპტით, გამომჴსნელისა შენისა მონებისაგან, განშორებაჲ შენი გზისაგან, Page of ms. Ga: 237r რომელი გამცნო შენ უფალმან ღმერთმან შენმან სლვად მას ზედა, და უჩინო-ყავთ ბოროტი იგი თქუენგან.
ხოლო უკუეთუ გლოცვიდეს შენ ძმაჲ შენი მამითი შენი ანუ დედითი შენი, ანუ ძე შენი, ანუ ასული შენი, ანუ ცოლი შენი, მყოფი წიაღთა, ანუ მოყუარე შენი, სწორი სულისა შენისაჲ, იდუმალ მეტყუელი: მივიდეთ და ვმსახუროთ ღმერთთა სხუათა, რომელნი არა უწყნი შენ და მამათა შენთა,
წა\რმართთაგან Page of ms. Ga: 237v გარემოჲს თქუენსა, მახლობელთა შენთაგან ანუ მშოროდელთა შენგან კიდითგან ქუეყანისაჲთ ვიდრე კიდედმდე ქუეყანისა.
არა თანა-მნებებელ ექმნე მას და არა ისმინო მისი და არა ჰრიდოს თუალმან შენმან მის ზედა, არცა დაჰფარო იგი.
მოთხრობით მიუთხრა მისთჳს და ჴელი შენი იყოს მის ზედა მოკუდინებად მისსა პირველად და ჴელი ყოვლისა ერისაჲ უკუანაჲსკნელ.
და ქვადაკრებულ-ყონ იგი ქვებითა და მოკუდეს, რამეთუ იძია განყენებაჲ შენი უფლისაგან ღმრთისა შენისა, გამომყვანებელისა შენისა ქუეყანით ეგჳპტისაჲთ, სახლისაგან მონებისა.
და ყოველსა ისრაელსა, მსმენელსა, შეეშინოს და არა შესძინოს მერმე ქმნად სიტყჳსა ამისებრ ბოროტისა თქუენ შორის.
უკუეთუ გესმას ერთსა შინა ქალაქთაგანსა, რომელნი მოგცნა შენ უფალმან ღმერთმან შენმან დამკჳდრებად შენდა, მუნ მეტყუელთაჲ:
განვიდეს კაცნი უშჯულონი ჩუენგან და განადგინნეს ყოველნი Page of ms. Ga: 238r მკჳდრნი ქალაქისა მათისანი, მეტყუელთა: ვიმიდეთ და ვჰმსახუროთ ღმერთთა, რომელნი არა უწყნით,
და გამოიკულიო და გამოიკითხო და გამოიძიო და გამოიკრკჳნო ფრიად და, აჰა, ჭეშმარიტად ცხად იქმნეს სიტყუაჲ ეს საძაგელი თქუენ შორის,
მომსრველმან მოჰსრნე ყოველნი მკჳდრნი ქალაქსა მას შინა სიკუდილითა მახჳლისაჲთა, შეჩუენებით შეჩუენებულ-ჰყოთ იგი და ყოველი, რაოდენი იყოს მას შინა.
და ყოველი იავარ მათი შეჰკრიბო თანაწარსავალსა ზედა მათსა და მოსწუა ქალაქი ცეცხლითა და ყოველი იავარი მისი ყოველმან ერმან წინაშე უფლისა ღმრთისა შენისა, და იყოს უმკჳდრო უკუნისამდე, არღარა აღეშენოს მერმე.
არა აღეწებოს ჴელსა შენსა არარაჲ შენაჩუენებისაგან, რაჲთა მოიქცეს უფალი გულისწყრომისაგან და რისხვისა მისისა და მოგცეს შენ წყალობაჲ და შეგიწყალოს შენ და განგამრავლოს შენ, ვითარცა ეტყოდა ღმერთი მამათა შენთა,
და უკუეთუ ისმინოთ ჴმაჲ უფლისა ღმრთისაჲ, დაცვად ყოველთა მცნებათა მისთა, რომელთა მე გამცნებ თქუენ დღეს, ქმნად კეთილი და სათნოჲ წინაშე უფლისა ღმრთისა შენისა.
