და იერიქოჲ შეყენებულ და მომაგრებულ იყო ქალაქი მაგარი და არცა ერთი ვინ განვიდოდა მისგან, არცა შევიდოდა.
და თქუა უფალმან იისუჲს მიმართ: აჰა, მე მიგცემ შენ იერიქოსა ჴელის-ქუეშედ და მეფესა მისსა მის შორისსა ძლიერად მყოფთა ძალითა.
ხოლო შენ გარემოადგინენ მას ყოველნი მეჰომენი გარემო*.
და იყოს, ვითარცა აყჳრნეთ საყჳრნი, აღღაღატყავნ ყოველმან ერმან თანად და აღღაღადებასა მათსა დაეცნენ თავით თჳსით ზღუდენი ქალაქისანი და შევიდეს ყოველი ერი მიმმართებელი თითოეული პირისპირ ქალაქად მიმართ.
და შევიდა იისუ ნავესი მღდელთა მიმართ...
და ჰრქუა მათ, მეტყუელმან: ამცენით ერსა გარემოდგომაჲ და მოცვაჲ ქალაქისაჲ და მეჰომენი წინა წარედიდ შეჭურვილნი წინაშე უფლისა.
და შჳდნი მღდელნი, მქონებელნი შჳდთა საყჳრთა სამღდელოთა, წარედიდ ეგრეთვე წინაშე უფლისა და დაჰბერედ ჴმა-კეთილად და კიდობანი აღთქუმისა უფლისაჲ შეუდეგინ.
ხოლო მეჰომენი წარედიდ წინა კერძო Page of ms. Ga: 316r და მღდელნი მღდელმოქმედნი უკუანა კიდობნისა აღთქუმისა უფლისა მავალნი და საყჳრისმცემნი.
და ერსა ამცნო იისუმან, მეტყუელმან: ნუ ჰჴმობთ, ნუცა ესმის ნუ ვის ჴმაჲ თქუენი ვიდრე მად დღედ, რომელსა თჳთ გამცნო ჴმა-ყოფაჲ, და მაშინ ჴმა ჴმა-ყავთ.
და გარემომვლელი კიდობანი აღთქუმისა უფლისა ღმრთისაჲ ქალაქისაჲ გარემოჲს მეყსეულად წარვიდა ბანაკად და დაიძინა მუნ.
და დღესა მეორესა აღდგა იისუ განთიად და აღიღეს მღდელთა კიდობანი აღთქუმისა უფლისაჲ.
და შჳდნი მღდელნი, აღმღენი საყჳრთა შჳდთანი, წინაშე ვიდოდეს წინაშე უფლისა და შემდგომად მათსა ვიდოდეს მეჰომენი და ნეშტი ერი უკუანა კიდობნისა აღთქუმისა უფლისა. და მღდელთა საყჳრ-სცეს საყჳრითა და ნეშტმან ერმან ყოველმან გარემოიცვვს ქალაქი ახლოს.
და წარვიდეს კუალად ბანაკად. ესრეთ ჰყოფდა ექუსთა დღეთა ზე.
და მეშჳდესა დღესა აღდგეს ცისკარს და გარემოვლეს ქალაქი შჳდგზის.
და მოვლასა მეშჳდესა საყჳრ-სცეს მღდელთა საყჳრებსა და ჰრქუა იისუმან ძეთა ისრაჱლისათა: ღაღად-ყავთ, რამეთუ მოგცა თქუენ უფალმან ქალაქი.
და იყოს ქალაქი შეჩუენებულ იგი და ყოველნი რაოდენნი არიან მას შინა უფლისა საბაოთისასა, თჳნიერ რააბ მეძავი Page of ms. Ga: 316v განარინეთ იგი და ყოველნი რაოდენნი არიან სახლსა შინა მისსა, რამეთუ დამალნა მსტოარნი, რომელნი მივავლინენით.
გარნა თქუენ დაიცვენით თრიად შენაჩუენებისაგან, ნუსადა მომგონებელთა თქუენ მიიღოთ შენაჩუნებისაგან და ჰყოთ ბანაკი ძეთა ისრაჱლისათაჲ შენაჩუენებ და აღმჴოცნეთ ჩუენ.
და ყოველი ვეცხლი ანუ ოქროჲ, ანუ რვალი. ანუ რკინაჲ წმიდა იყოს უფლისა, საუნჯედ უფლისა შეიდეთ.
და საყჳრ-სცეს საყჳრებსა მღდელთა, ხოლო ვითარცა ესმა ერსა ჴმაჲ საყჳრთაჲ. აღიყუელა ყოველმან ერთბამად ღაღადებაჲ დიდი და ძლიერი. და დაეცა ყოველი ზღუდე გარემოჲს და აღვიდა ყოველი ერი ქალაქად თითოეული წინაშე პირისპირისა თჳსისა და გამოიღეს ქალაქი.
და შეჩუენებულ-ყვეს იგი და რაოდენი ქალაქსა შინა მამაკაცითგან და ვიდრე დიაცადმდე, ჭაბუკითგან და ვიდრე მოხუცებულადმდე და ვიდრე ცხოვრადმდე და კაჰრაულად პირითა მახჳლისაჲთა.
და ორთა ჭაბუკთა განმსტრობთა ჰრქუა იისუმან. შევედით სახიდ დედაკაცისა და გამოიყვანეთ იგი მიერ და ყოველნი, რაოდენნი არიან მის\ნი. Page of ms. Ga: 317r
და შევიდეს ორნი ჭაბუკნი განმსტრობნი ქალაქისანი სახიდ დედაკაცისა და გამოიყვანეს რააბი მეძავი და მამაჲ მისი და დედაჲ მისი და ძმანი მისნი და ყოველნი, რაოდენნი იყვნეს მათნი და ყოველი ნათეს[ა]ვობაჲ მისი და დაადგინეს იგი გარეშე ბანაკისა ძეთა ისრაჱლისათაჲსა.
და ქალაქი მოიწუა წუვითა ყოველთა თანა მის შორისთა თჳნიერ ვეცხლი და ოქროჲ მისცეს საუნჯედ უფლისა შეღებად.
და რააბი მეძავი და ყოველნი სახლისა მისისა მამულისანი მოინადირნა იისუმან და დაამკჳდრნა ისრაჱლსა შორის ვიდრე დღედმდე ამად მით, რამეთუ დამალნა განმსტრობნი, რომელნი მიავლინნა იისუმან განმსტრობად იერიქოჲსა.
და დაწყევა იისუმან მას დღესა შინა წინაშე უფლისა, მეტყუელმან: წყეულ Page of ms. Ga: 317v იყავნ კაცი, რომელმან აღადგინოს და აღაშენოს ქალაქი იგი, პირმშოჲსა თჳსისა ზე დააფუძნოს იგი და უმრწემესისა მისისა ზე შეაბნეს ბჭენი მისნი. და ესრეთ ყო ოზან ბეთელითგანმან, აბირონის ზე პირმშოჲსა დააფუძნა იგი და უმრწემესისა ზე დაშთომილისა შეაბნა ბჭენი მისნი.
და იყო უფალი იისუჲს თანა და იყო სახელი მისი ყოველსა შინა ქუეყანასა.
