და ცოდეს ძეთა ისრაჱლისათა ცოდვაჲ დიდი და მიიხუჭეს შენაჩუნებისაგან: Page of ms. Ga: 318r და მიიღო აქარ ძემან ქარმისმან, ძისა ზამბისმან, ძისა ზარაჲსმან ტომისაგან იუდაჲსსა შენაჩუნებისაგან. და განგულმწყრალნა რისხვით უფალი ძეთა ზედა ისრაჱლისათა.
და წარავლინნა იისუმან კაცნი იერიქოჲთ გაიდ, რომელ არს ბეთელით კერძო, მეტყუელმან: აღსრულთა მოიხილეთ ქუეყანაჲ იგი. და აღვიდეს კაცნი და მოიხილეს ქუეყანაჲ გაი.
და მოიქცეს იისუჲს მიმართ და თქუეს მისდამი. ნუ აღვალს ყოველი ერი, არამედ ვითარ ათასნი ანუ სამ ათასნი კაცნი აღვედინ და გამოიღენ ქალაქი. ნუ აღიყვანებ მუნ ყოველსა ერსა, რამეთუ მცირედნი არიან.
და აღვიდეს ვითარ სამ ათასნი კაცნი და ივლტოდეს პირისაგან კაცთა გაისათა.
და მოკლნეს მათგანნი კაცთა გაინელთა ვითარ ოცდაათექუსმეტნი კაცნი და წარდევნნეს იგინი ბჭისაგან და შემუსრნეს იგინი შთაღმართსა მას და დაიჴსნა გული ერისაჲ და იქმნა, ვითარცა წყალი.
და დაიბძარნა იისუმან საამოსელნი თჳსნი და დავარდა იისუ პირსა ზედა წინაშე უფლისა Page of ms. Ga: 318v ვიდრე მწუხრამდე თჳთ და მოხუცებულნი ერისანი და დაისხეს მიწაჲ თავთა ზედა მათთა.
და თქუა იისუმან: გევედრები, უფალო, უფალო! რაჲსათჳს განავლო ყრმამან შენმან ერსა ამას იორდანე მიცემად იგი ამორეველთა წარწყმედად ჩუენდა? და-მცა-დგრომილ და კიდის მკჳდრქმნილ ვიყვენით იორდანისა.
და რაჲ ვთქუა, ვინაჲთგან მიაქცია ისრაჱლმან ქედი წინაშე მტერთა თჳსთა?
და მსმენელმან ქანანელმან და ყოველთა მკჳდრთა ქუეყანისათა გარემომიცვენ ჩუენ და აღმჴოცნენ ჩუენ ქუეყანისაგან. და რასა უყოფ სახელსა შენსა დიდსა?
და თქუა უფალმან ისუჲს მიმართ: აღდეგ, რაჲსათჳს შენ ესრეთ დავრდომილ ხარ პირსა შენსა ზედა?
ცოდა ერმან და გარდაჰჴდა დამცნილსა, რომელი დავამცენ მათ, და მპარავთა შენაჩუენებისაგან შთადვეს ჭურჭელთა მათთა.
და ვერ ძალ-ედვას ძეთა ისრაჱლისათა პირისპირ დადგომაჲ მტერთა მათთაჲ, ქედნი მიაქცინენ წინაშე მტერთა მათთა და იქმნნეს შენაჩუენებ. არა შევსძინო მერმე ყოფად თქუენ თანა, არა თუ აღიღოთ შენაჩუენები თქუენ მაგათგან.
აღდგომილმან წმიდა-ყავ ერი და არქუ წმიდა-ყოფაჲ ხვალისად, ამას იტყჳ უფალი ღმერთი ისრაჱლისაჲ: შენაჩუენები თქუენ შორის არს, ვერ ძალ-გიც-ყე წინადადგომაჲ წინაშე მტერთა თქუენთა. ვიდრემდის არა აღიღოთ შენაჩუენები თქუენ მაგათგან.
და შეკერბით განთიად ყოველნი ტომადად. და იყოს ტომი, რომელიცა აჩუენოს უფალმან, მოიყვანეთ ერადად Page of ms. Ga: 319r . და ერი. რომელი აჩუენოს უფალმან, მოიყვანეთ კაცადად.
და რომელიცა განიჩინოს უფლისა მიერ, დაწჳთ ცეცხლითა. და ყოველი, რაოდენი არს მისი, რამეთუ გარდაჰჴდა დამცნილსა უფლისასა და ქმნა უშჯულოებაჲ ისრაჱლსა შორის.
და აღიმსთო იისუმან განთიად! და მოიყვანა ერი ტომადად და იჩუენა ტომი იუდაჲსი.
და მოიყვანა ერადად და იჩუენა ერი ზარაისი. და მოიყვანა ერი ზარაისი კაცადად.
და იჩუენა აქარ, ძე ზამბრისი, ძისა ზარაჲსი, ხარმისი ძისა მისისაჲ.
და ჰრქუა იისუმან აქარს: მიეც დიდებაჲ დღეს უფალსა ღმერთსა ისრაჱლისასა და მიეც აღსაარებაჲ და მითხარ მე, რაჲ ჰყავ და ნუ დაჰფარავ ჩემგან.
და მიუგო აქარმან იისუსა და ჰრქუა: ჭეშმარიტად ვცოდე წინაშე უფლისა ღმრთისა ისრაჱლისა, ესრეთ და ესრეთ ვყავ.
ვიხილე ნატყუენავსა შინა ნაქსოი ჭრელი და ორასი დიდრაქმაჲ ვეცხლისაჲ და ენაჲ ერთი ოქროჲსაჲ ერგასისთა დიდრაქმათაჲ და გულისმთქუმელმან მათმან მოვიხუენ, და, აჰა, ესენი დამალულ არიან მიწასა შინა კარავსა შინა ჩემსა და ვეცხლი დამალულ არს ქუეშე კერძო მათსა.
და წარავლინნა იისუმან ქადაგნი და რბიოდეს კარავად მიმართ ბანაკსა შორის. და ესენი იყვნენ დამალულ კარავსა შინა და ვეცხლი ქუეშე კერძო მათსა.
და გამოიხუნეს იგინი კარვით და მოიხუნეს იისუჲს მომართ. და მოხუცებულთა ისრაჱლისათა დასხნეს იგინი წინაშე უფლისა.
და გამოიყვანა იისუმან აქარ, ძე ზარაჲსი, და აღი\ყვანა Page of ms. Ga: 319v იგი ჴევსა აქორისსა, და ძენი მისნი და ასულნი მისნი და ზუარაკნი მისნი და კაჰრაულნი მისნი და ცხოვარნი მისნი და კარავი მისი და ყოველნი ნაქონნი მისნი და ყოველი ისრაჱლი მის თანა. და აღიყვანნა იგი ემეკახორდ.
და ჰრქუა იისუმან აქარსა: რად მომსპოლენ ჩუენ? მოგსპოლენ შენ უფალმან, ვითარ ესე დღეს. და დაქოლა იგი ქვებითა ყოველმან ისრაჱლმან.
და აღადგეს მას კონცხი ქვათაჲ დიდი და დააცხრო უფალმან გულისწყრომაჲ რისხვისაჲ ამისთჳს უწოდა მას ემეკახორ ვიდრე დღედმდე ამად.
