და თქუა უფალმან იისუჲს მიმართ: ნუ გეშინინ, ნუცა იწყლვი. მიიყვანენ შენ თანა ყოველნი მამაკაცნი მბრძოლნი და აღდგომილი აღვედ გაიდ. აჰა, მიგეც ჴელთა შენთა მეფე გაისაჲ და ცოლი მისი.
და უყო გაინსა, ვითარ-სახედ უყავ იერიქოსა და მეფესა მისსა. და ნატყუენავი საცხოვართაჲ წარმოსტყუენო თავისად, ხოლო მოჰმზადე თავისა შენისად მზირი ქალაქისათჳს უკუანა კერძო.
და აღდგა იისუ და ყოველი ერი მეჰომე, რაჲთა აღვიდენ გაიდ. და გამოირჩინა იისუმან ოცდაათნი ათასნი კაცთა შემძლებელთანი ძალითა და წარავლინნა იგინი ღამე.
და ამცნო მათ, მეტყუელმან: თქუენ დაიდარნეთ (!) უკუანა კერძო ქალაქისა, ნუ შორს იქმნებით ქალაქისაგან და იყვენით ყოველნი მზა.
და მე და ყოველნი ჩემ თანა დავესხნეთ ქალაქსა. და იყოს, ვითარცა გამოვიდენ მკჳდრნი გაისანი შემთხუევად ჩუენდა, Page of ms. Ga: 320r ვითარ-იგი პირველცა, და ვივლტოდით პირისაგან მათისა.
და ვითარცა გამოვიდენ უკუანა ჩუენსა, განვწვალნეთ იგინი ქალაქისაგან და თქუან: ივლტიან ესენი პირისაგან ჩუენისა, ვითარ-სახედ წინაპარცა.
ხოლო თქუენ აღდეგით სამზირისაგან და მივედით ქალაქად.
და მოწჳთ იგი ცეცხლითა, სიტყჳსა ამისებრ ყავთ, აჰა, გამცნებ თქუენ.
და წარავლინნა იგინი იისუმან და წარვიდეს სამზირად და დასხდეს საშუალ ბეთელსა და საშუალ გაისა ზღჳთ კერძო გაისა. და იქცეოდა იისუ ღამესა მას შორის ერისა.
და აღმმსთობმან იისუმან განთიად მიმოიხილა ერისა ზედა და აღვიდეს თჳთ და მოხუცებულნი ერისანი წინაშე ერისა გაისა ზედა.
და ყოველი ერი მეჰომე მის თანა აღვიდეს და მავალნი მივიდეს პირისპირ ქალაქისა აღმოსავლით კერძო. და მზირნი ქალაქისანი ზღჳთ კერძო*...
და იყო, ვითარცა იხილა მეფემან გაისამან, ისწრაფა და გამოვიდა შემთხუევად მათდა დამართებით ბრძოლის-ყოფად იგი და ყოველი ერი მის თანაჲ (!) და მან არა უწყოდა, ვითარმედ მზირი მისი არს უკუანა კერძო ქალაქისა.
და იხილა და განეშორა იისუ და ყოველი ისრაჱლი პირისაგან მათისა.
და დევნა-ყვეს უკუანა ძეთა ისრაჱლისათა, და იგინი განიწვალნეს ქალაქისაგან,
არა დაშთა არცა ერთი ქალაქსა შინა, რომელმან არა დევნა-ყო შემდგომად ისრაჱლისა და დაუტევეს ქალაქი განდებულად Page of ms. Ga: 320v და დევნა-ყვეს უკუანა ისრაჱლისა.
და თქუა უფალმან იისუჲს მიმართ: განირთხ ჴელი შენი გესონითა, მყოფითა ჴელსა შინა შენსა, ქალაქისა ზედა, რამეთუ ჴელთა შენთა მივსცენ იგინი, და მზირნი აღდგედ მწრაფლ ადგილით მათით. და განირთხა იისუმან გესონი და ჴელი თჳსი ქალაქსა ზედა.
და მზირნი აღდგეს მსწრაფლ უკუანა კერძო მათსა და გამოვიდეს, რაჟამს განირთხა ჴელი, და შევიდეს ქალაქად ცეცხლითა.
და მიმხილველნი მკჳდრნი გაისათა უკუანა კერძო მათსა ჰხედვიდეს კუამლსა აღმავალსა ქალაქისაგან ცად მიმართ და არღარა აქუნდა, სადა ივლტოდინ, აქა ანუ იქი.
და იისუ და ყოველმან ერმან იხილეს, ვითარმედ დაიპყრეს მზირთა ქალაქი და ვითარმედ აღვიდა კუამლი ქალაქისაჲ ცად, და შემოქცეულთა მოსრნეს კაცნი გაისანი.
და ესენი გამოვიდეს ქალაქისაგან შემთხუევად და იქმნეს საშუალ ბანაკისა, ესენი ამიერ და იგინი იმიერ, და დასცნა იგინი ისრაჱლმან ვიდრე არა დაშთომადმდე მათგანი განრომილი ანუ განლტოლვილი.
და მეფე გაისაჲ შეიპყრეს ცოცხალი და მოიყვანეს იგი იისუჲს მომართ.
და ვითარცა დასცხრეს ძენი ისრაჱლისანი, მსრველნი ყოველთა გაისა შინათა ველის ზედათა და უდაბნოჲსათანი შთასავალსა ზედა, არა დევნა-უყვეს მათ მას ზედა სრულიად. და მიიქცა ისუ გაიდ, დასცნა იგინი პირითა მახჳლისაჲთა.
და იყვნეს დაცემულნი მას დღესა შინა მამაკაცითგან ვიდრე დედაკაცადმდე ათორმეტ ათას, ყოველნი მკჳდრნი Page of ms. Ga: 321r გაისანი თჳნიერ საცხოვართა.
...
და ალაფთა ქალაქისა შინათასა ყოველნი წარმოტყუენნეს ძეთა ისრაჱლისათა თავთა მათთად ბრძანებისაებრ უფლისა, ვითარ-სახედ მიუწესა უფალმან იისუს.
და მოწუა იისუმან ქალაქი ცეცხლითა, მიწად უმკჳდროდ უკუნისამდე დადვა იგი ვიდრე დღისამდე ამის.
და მეფე გაისაჲ დამოჰკიდა ძელსა ზედა მარჩბივსა, და იყო ძელსა ზედა ვიდრე მწუხრადმდე. და დასლვასა ოდენ მზისასა მიუწესა იისუმან და გარდამოჰჴსნეს სხეული მისი ძელისაგან და შთააგდეს იგი მთხრებლსა და აღადგეს მას კონცხი ქვათაჲ ვიდრე დღისამდე ამის.
მაშინ აღუშენა იისუმან საკურთხეველი უფალსა ღმერთსა ისრაჱლისასა მთასა ზედა გებალსა,
ვითარიგი ამცნო მოსემან, მსახურმან უფლისამან, ძეთა ისრაჱლისათა, ვითარცა წერილ არს შჯულსა მოსესსა, საკურთხეველი ქვათაგან ყოვლად სრულთა, რომელთა ზედა არა მიიყო რკინაჲ. და აღართუნა მუნ ყოვლადდასაწუავნი უფალსა და მსხუირპლი მაცხოვარებისაჲ.
და დაწერა Page of ms. Ga: 321v იისუმან ქვათა ზედა მეორე შჯული, შჯული მოსესი, რომელი დაწერა წინაშე ისრაჱლისა.
და ყოველი ისრაჱლი და მოხუცებულნი მისნი და მსაჯულნი მათნი და მწიგნობარნი მათნი თანაუვიდოდეს ამიერ და იმიერ კიდობნისა წინაშე. და მღდელთა და ლევიტთა (!) აღიღეს კიკიდობანი აღთქუმისა უფლისაჲ და მწირი და მკჳდრი იყვნეს ნახევარნი მახლობელ მთისა ღარიზინისა და იყვნეს ნახევარნი მახლობელ მთისა გებალისა, ვითარცა ამცნო მოსემან, მსახურმან უფლისამან, კურთხევად ისრაჱლი.
და ამის შემდგომად ესრეთ აღმოიკითხნა იისუმან ყოველნი სიტყუანი ამის შჯულისანი, კურთხევანი და წყევანი, ყოველთაებრ შთაწერილთა შჯულსა მოსესსა.
არა იყო სისიტყუაჲ ყოველთაგან, რომელნი ამცნნა მოსემან იისუსა, რომელი არა აღმოიკითხა იისუმან ყურთა მიმართ ყოვლისა ეკკლესიისა ძეთა ისრაჱლისათაჲსასა -- მამათა და დედათა და ყრმათა და მწირთა თანამავალთა ისრაჱლისათა.
