ხოლო ვითარცა ესმა ყოველთა მეფეთა ამორრეველთასა წიაღ კერძოთა იორდანისათა, მთით კერძოჲსათა და ველით კერძოჲსათა, და ყოველთა მეკიდეთა ზღჳსა დიდისათა, და ლიბანის მახლობთა და ქეტელთა და ქანანელთა და ფერეზელთა და ეველთა და ამორრეველთა და გერგესეველთა და იებუსელთა,
შემოკრბეს ერთბამად ბრძოლად იისუჲსა და ისრაჱლისა თანად ყოველნი.
და მკჳდრთა გაბაონისთა ესმა, რაოდენი უყო ღმერთმან იერიქოსა და გაისა.
და ყვეს რაჲმე Page of ms. Ga: 322r მათცა მრავალდონეობით და მოსრულნი აღესაგზლნეს და განემზადნეს და მოიხუნეს ძაძანი ძუელნი მჴართა მათთა ზედა და თხიერნი ღჳნისანი ძუელნი განხეთქილნი, გამოკრულნი,
და საბელნი საჴამლობელთა მათთანი და სანდალნი მათნი ძუელნი, განკაფულნი ფერჴთა ზედა მათთა. და შესამოსელნი მათნი დაძუელებულნი მათ ზედა და პური მათი საგზალი ჴმელი და დაგრკილული და დაჭმული.
და მოვიდეს იისუჲს მომართ ბანაკად ისრაჱლისა ღალღალას და თქუეს იისუჲს მიმართ და ყოვლისა მიმართ ისრაჱლისა: ქუეყანით შორით მოსრულ ვართ ჩუენ და აწ აღმითქუთ ჩუენ აღთქუმაჲ.
და ჰრქუეს ძეთა ისრაჱლისათა ხორელსა მას: იხილენ, უკუე ჩუენ შორის მკჳდრ ხარ და ვითარ ადგითქუათ შენ აღთქუმაჲ?
და თქუეს იისუჲსა მიმართ. მრწემნი შენნი ვართ. და თქუა მათდა მიმართ იისუმან. ვინანი ხართ და ვინაჲ მოხუედით?
და თქუეს იისუჲსა მიმართ: ქუეყანით შორიელით ფრიად მოვიდეს ყრმანი შენნი სახელითა უფლისა ღმრთისა შენისაჲთა, რამეთუ გუესმა სახელი მისი,
და რავდენნი უყვნა ორთა მეფეთა ამორრეველთასა, რომელნი იყვნეს წიაღ იორდანისა: სიონს, მეფესა ესებონისასა, და ოგს, მეფესა ბასანისასა, რომელი მკჳდრ იყო ასტაროთს შინა ედრაინს.
და მსმენელთა თქუეს ჩუენდამო მოხუცებულთა ჩუენთა და ყოველთა მკჳდრთა ქუეყანისა ჩუენისათა, მეტყუელთა: აღიღეთ თავთა თქუენთად საგზალი გზისაჲ Page of ms. Ga: 322v და წარედით შემთხუევად მათდა და თქუთ მათდამი: მრწემნი თქუენნი ვართ და აწ აღმითქუთ ჩუენ აღთქუმაჲ,
ესე პურნი ტფილნი შთავისაგზლენით ახალნი, და ესენი დაიბძარნეს და დით მოსლვად თქუენდამო, ხოლო აწ განჴმეს და იქმნეს შეჭმულ.
და ესე თხიერნი ღჳნისანი, რომელნი აღვავსენით ახალნი, და ესენი დაიბძარნეს და შესამოსელნი ჩუენნი და საჴამლობელნი ჩუენნი დაძუელდეს მრავლისაგან გზისა ფრიად.
და მიიღეს მთავართა საგზლისაგან მათისა და უფალსა არა ჰკითხეს.
და ქმნა იისუმან მათდამი მშჳდობაჲ და აღუთქუა მათდა მიმართ აღთქუმაჲ განრინებად მათდა. და ეფუცნეს მათ მთავარნი შესაკრებელისანი.
და შემდგომად აღთქუმისა მათდა მიმართსა აღთქუმასა ესმა-ყე, ვითარმედ მახლობლით არიან იგინი და ვითარმედ მათ შორის მკჳდრ არიან.
და იტრნეს ძენი ისრაჱლისნი და მიჰმართეს ქალაქთა მათთა. ხოლო ქალაქნი მათნი -- გაბაონი და ქეფირა და ბიროოთი და ქალაქი იარიმი.
და არა ებრძოლნეს მათ ძენი ისრაჱლისანი, რამეთუ ეფუცნეს მათ ყოველნი მთავარნი შესაკრებელისანი უფალსა ღმერთსა ისრაჱლისასა. და იდრტჳნა ყოველმან შესაკრებელმან მთავართათჳს.
და ჰრქუეს ყოველთა მთავართა ყოველსა შესაკრებელსა: ჩუენ ვეფუცენით მათ უფალსა ღმერთსა ისრაჱლისასა და ვერ ძალ-გჳც შეხებად მათდა.
ესე ვყოთ: ვაცოცხლნეთ იგინი და განვარინნეთ იგინი და არა იყოს ჩუენ ზედა რისხვაჲ ფიცისათჳს, რომელ ვეფუცენით მათ, Page of ms. Ga: 323r ცოცხალ იყვნენ.
და იყვნენ შეშისმკოდელ და წყლისმკრებელ ყოვლისა შესაკრებელისა. და ყვეს ყოველმან შესაკრებელმან, ვითარ-იგი ჰრქუეს მათ მთავართა.
და მოუწოდა მათ იისუმან და ჰრქუა მათ: რაჲსათჳს მეცილენით მე, მეტყუელნი. შორს შენგან ვართ ფრიად, ხოლო თქუენ მეზობელნი ხართ დამკჳდრებულთანი (!) ჩუენ შორის?
და აწ წყეულ იყვენით, არა მოგუაკლდეს თქუენგან მონაჲ შეშისმკოდელი და წყლისმკრებელი მე და ღმერთსა ჩემსა.
და მიუგეს იისუსა, მეტყუელთა: ჰამბვად მეჰამბვა ჩუენ, რაოდენი მიუწესა უფალმან ღმერთმან მოსეს, მონასა თჳსსა, მოცემად თქუენდა ქუეყანაჲ ესე და მოსპოლვად ჩუენდა და ყოველთა დამკჳდრებულთა მას ზედა პირისაგან თქუენისა. და შეგუეშინა ფრიად სულთათჳს ჩუენთა პირისაგან თქუენისა და ვყავთ საქმე ესე.
და აწ, აჰა, ჩუენ ჴელისქუეშენი ვართ თქუენნი, ვითარცა გთნავს თქუენ და ვითარცა გნებავს თქუენ, მიყავთ ჩუენ.
და უყვეს მათ ესრეთ და განარინნა იგინი იისუმან მას დღესა შინა ჴელისაგან ძეთა ისრაჱლისათაჲსა და არა მოსწყჳდნეს იგინი.
და დაადგინნა იგინი იისუმან მას დღესა შინა შეშისმკოდლად და წყლისმკრებლად ყოვლისა შესაკრებელისად და საკურთხეველისა ღმრთისად. ამისთჳს იყვნენ მკჳდრნი გაბაონისანი შეშისმკოდელნი და წყლისმკრებელნი საკურთხეველისა ღმრთისანი ვიდრე დღესისა დღედმდე ადგილსაცა, რომელი გამოირჩიოს უფალმან.
