ხოლო ვითარცა ესმა აღონიბეზეკს, მეფესა იერუსალემისასა, ვითარმედ გამოიღო იისუ\მან Page of ms. Ga: 323v გაი და მოსრნა იგინი, ვითარ-სახედ უყო იერიქოსა და მეფესა მისსა, და ვითარმედ თჳთ მივიდეს მკჳდრნი გაბაონისანი იისუჲს მიმართ და ძეთა მიმართ ისრაჱლისათა და იქმნეს შორის მათსა.
და შეეშინაყე თავთა შორის მათთა ფრიად, რამეთუ უწყოდეს, ვითარმედ ქალაქი გაბაონი დიდი არს, ვითარცა ერთი დედაქალაქთაგანი მეფეთაჲსაჲ, რამეთუ იგი დიდ არს უფროჲს გაისა და ყოველნი კაცნი მისნი ძლიერნი.
და მიავლინა აღონიბეზეკ, მეფემან ისრაჱლისამან, ელამის მიმართ, მეფისა ქებრონისა, და ფიდონის მიმართ, მეფისა იერიმუთისა, და იეფთაჲს მიმართ, მეფისა ლაქისა, და დამინის მიმართ, მეფისა ოდოლამისა, მეტყუელმან:
მოვედით, აღმოედით ჩემდა და შემეწიენით მე და ვებრძოლნეთ გაბაონსა, რამეთუ თჳთ მივიდეს იისუჲს მიმართ და ძეთა მიმართ ისრაჱლისათა.
და შემოკრბეს და აღმოვიდეს ხუთნი მეფენი იევუსელთანი: მეფე იერუსალჱმისაჲ და მეფე ქებრონისაჲ და მეფე იერომუთისაჲ და მეფე ლაქისაჲ და მეფე ოდოლამისაჲ, -- ესენი და ყოველი ერი მათი და გარემოადგეს გაბაონსა და მოიცვეს იგი.
და მიავლინეს მკჳდრთა გაბაონისთა იისუჲს მიმართ ბანაკად გალგალას, მეტყუელთა: ნუ მიჰჴსნი ჴელთა შენთა ყრმათაგან შენთა და აღმოვედ ჩუენდა მწრაფლ და განმარინენ ჩუენ და შემეწიენ ჩუენ, რამეთუ შეკრებულ არიან ჩუენ ზედა ყოველნი მეფენი ამორრეველთანი, რომელნი იყვნეს დამკჳდრებულ მთით კერძოსა.
Page of ms. Ga: 324r და აღვიდა იისუ გალგალთაჲ[თ] თჳთ და ყოველი ერი მეჰომე მის თანა, ყოველი შემძლე ძალითა.
და თქუა უფალმან იისუჲს მიმართ: ნუ ეშიშვი მათ, რამეთუ ჴელთა შენთა მივსცენ იგინი, არ დაშთეს მათგანი არცა ერთი წინაშე თქუენსა.
და ვინაჲთგან მიიწია მათ ზედა იისუ მყის. ყოველსა ღამესა ვიდოდა გალგალთაჲთ.
და განაკრთვნა იგინი უფალმან პირისაგან ძეთა ისრაჱლისათაჲსა და შემუსრნა იგინი უფალმან შემუსრვითა დიდითა გაბაონს და სდევდა მათ გზასა აღსავალისა ორონიიმისასა და დაშჭრიდა მათ ვიდრე აზიდმდე და ვიდრე მადიკამდე.
ხოლო სივლტოლასა მათსა პირისაგან ძეთა ისრაჱლისათაჲსა შთასავალსა თანა ორონიიმისასა, და უფალმან დაასხნა მათ ქვანი სეტყჳსანი ცით გამო ვიდრე აზიკამდე, და მოკუდეს. და უმრავლე იყვნეს მომკუდარნი ქვებითა სეტყჳსაჲთა, ვიდრე რომელნი მოსწყჳდნეს ძეთა ისრაჱლისათა მახჳლითა ბრძოლასა შინა.
მაშინ თქუა იისუმან უფლისა მიმართ: რომელსა დღესა მისცა ღმერთმან ამორრეველი ჴელისქუეშედ ისრაჱლსა, რაჟამს შემუსრნა იგინი გაბაონს და შეიმუსრნეს პირისაგან ძეთა ისრაჱლისათაჲსა, და თქუა იისუმან: დადეგინ მზე გაბაონსა თანა და მთოვარე ჴევსა თანა ელომისასა, ვიდრე არა განვებრძოლო (!) ერსა ამას.
და დადგა მზე და მთოვარე დადგრომით, ვიდრემდის მიაგო უფალმან მტერთა თჳსთა. არა ესე არსა წერილი წიგნსა შინა ევთუსისასა: და დადგა მზე საშუალსა ცისასა, არა მივიდოდა დასავა\ლად Page of ms. Ga: 324v შესრულებადმდე დღისა ერთისა.
და არა იქმნა დღე ეგევითარი არცა პირველ, არცა უკუანაჲსკნელ, ვითარმცა ესმა ღმერთსა ჴმაჲ კაცისაჲ.
და შემოიქცა ყოველი ისრაჱლი მის თანა ბანაკად მომართ გალგალას, რამეთუ უფალი ეთანამბრძოლა ისრაჱლსა.
და ივლტოდეს ხუთნი იგი მეფენი და დაიმალნეს ქუაბსა შინა მაკიდას.
და მიუთხრეს იისუს, მეტყუელთა: იპოებიან ხუთნი მეფენი დამალულნი ქუაბსა შინა მაკიდას.
და თქუა იისუმან: მიაგორვენით ლოდნი პირსა ზედა ქუაბისასა და დაადგინენით მათ ზედა კაცნი დაცვად მათდა.
ხოლო თქუენ ნუ სდგათ აქა, არამედ სდევდით უკუანა მტერთა ჩუენთა და დაიჭირეთ უკუანა კერძოჲ მათი და ნუ უტევებთ მათ შესლვად ქალაქთა მათთა, რამეთუ მიგცნა იგინი უფალმან ღმერთმან თქუენმან ჴელთა თქუენთა.
და იყო, ვითარცა დასცხრა იისუ და ყოველი ისრაჱლი დამჭრელნი მათნი დაჭრითა დიდითა ფრიად და სრულიად და განრომილნი შეივლტოდეს ქალაქთა ძნელთა,
და მიიქცა ყოველი ერი იისუჲს მიმართ მაკიდად მრთელი და არა ივაა (!) არცა ერთმან ძეთა ისრაჱლისათამან ენითა თჳსითა.
და თქუა იისუმან: განადეთ ქუაბი და გამოიყვანენით მეფენი ხუთნი ქუაბისაგან.
და გამოიყვანნეს ხუთნი მეფენი ქუაბით: მეფე იერუსალემისაჲ და მეფე ქებრონისაჲ და მეფე იერიმუთი\საჲ Page of ms. Ga: 325r და მეფე ლაქისაჲ და მეფე ოდოლამისაჲ.
და ვინაჲთგან გამოიყვანნეს იგინი იისუჲსა მიმართ, და მიუწოდა იისუმან ყოველსა ისრაჱლსა და დამწყებელთა ბრძოლისათა თანამავალთა მისთა, მეტყუელმან მათდა მიმართ. წინა წარმოდეგით და დადგენით ფერჴნი თქუენნი ქედთა ზედა მათთა.
და თქუა მათდა მიმართ იისუმან: ნუ ეშიშვით მათ, ნუცა ეწიწვით! მჴნე იქმნენით და განძლიერდით. რამეთუ ესრეთ უყოს უფალმან ყოველთა მტერთა თქუენთა, რომელთა თქუენ შეეკადრენით მათ.
და მოაკუდინნა იგინი იისუმან და დამოჰკიდნა იგინი ხუთთა ზედა ძელთა. და იყვნეს დამთკიდებულ ძელთა ვიდრე მწუხრადმდე.
და იქმნა დასლვასა მზისასა და ამცნო იისუმან და გარდამოჰჴსნნეს იგინი ძელთაგან და შეყარნეს იგინი ქუაბსა შინა, რომელსა შეილტოდეს მუნ. და მიაგორვეს ლოდი ქუაბსა ზედა ვიდრე დღესის დღემდე.
და მაკადაჲ დაიპყრეს მას დღესა შინა და მოსწყჳდეს იგი პირითა მახჳლისაჲთა და მოასრულეს აღმომფშჳნველი, რომელი იყო მას შინა და არა დაშთა არცა ერთი მას შინა ცხოვნებული და განრინებული. და უყვეს მეფესა მაკიდაჲსასა, ვითარ-სახედ უყვეს მეფესა იერიქოჲსასა.
და წარვიდა იისუ და ყოველი ერი მის თანა მაკიდაჲთ ლემნად და გარემოიცვ\ეს Page of ms. Ga: 325v იგი.
და მისცა იგინი უფალმან ჴელთა ისრაჱლისათა. და დაიპყრა იგი და მეფე მისი და მოსრეს იგი პირითა მახჳლისაჲთა და ყოველი აღმომფშჳნველი მას შინა და არა დაშთა მათგანი არცა ერთი ცხოვნებული და განრინებული. და უყო მეფესა მისსა, ვითარ-სახედ უყო მეფესა იერიქოჲსასა.
და წარვიდა იისუ და ყოველი ისრაჱლი ლემნაჲთ ლაქისდ და გარემოადგა მას და მოიცვა იგი.
და მისცა უფალმან ლაქისი ჴელთა ისრაჱლისათა. და დაიპყრა იგი დღესა მეორესა და მოსრეს იგი პირითა მახჳლისაჲთა და მოასრულეს იგი, ვითარ-სახედ უყვეს ლემნას.
მაშინ გამოვიდა ელამ, მეფე ღაზისაჲ, შემწედ ლაქისისად. და დასცა იგი იისუმან პირითა მახჳლისაჲთა და ერი მისი ვიდრე არა დაშთომადმდე მათგან ცხოვნებული და განრინებული.
და წარვიდა იისუ და ყოველი ერი მის თანაჲ ლაქისით ოდოლამად და გარემოადგეს მას და მოიცვეს იგი.
Page of ms. Ga: 325vb და მისცა იგი უფალმან ჴელთა ისრაჱლისათა. და დაიპყრა იგი მას დღესა შინა და მოსრა იგი პირითა მახჳლისაჲთა და ყოველი აღმომფშჳნველი მას შინა მოკლეს, ვითარ-სახედ უყვეს ლაქისსა.
და წარვიდა იისუ და ყოველი ისრაჱლი ქებრონდ და გარემოადგა მას.
და გამოიღო იგი და დასცა იგი პირითა მახჳლისაჲთა და ყოველი აღმომფშჳნველი, რაოდენი იყო მას შინა, არ (!) დაუტევა მრთელად, ვითარ-სახედ უყვეს ოდოლამსა, მოსრეს იგი და რაოდენი იყო მას შინა, ვითარ-სახედ უყვეს ქალაქთა.
და მიიქცა იისუ და ყოველი ისრაჱლი დაბირდ და გარემოადგეს მას.
და გამოიღეს იგი და მეფე მისი და დაბნები მისნი და დასცეს იგი პირითა მახჳლისაჲთა. და მოსრნეს იგი და ყოველი აღმომფშჳნველი მას შინა და არა დაუტევეს არცა ერთი განრინებული, ვითარ-სახედ უყვეს ქებრომსა და მეფესა მისსა, ეგრეთ უყვეს დაბირსა და მეფესა მისსა.
და მოსრა იისუმან ყოველი ქუეყანაჲ მთით კერძოჲ\საჲ Page of ms. Ga: 326r და ნავაი და ველობი და ასიდოთი და მეფობანი მათნი. არა დაუტევეს მათგანი განრინებული და ყოველი აღმომფშჳნველი მათ შინა მოკლეს, ვითარ-სახედ ამცნო უფალმან ღმერთმან ისრაჱლისამან.
და მოსრნა იგინი იისუმან კადის ბარნითგან ვიდრე ღაზადმდე, ყოველი ქუეყანაჲ ღოზომისაჲ ვიდრე გაბაონადმდე.
და ყოველნი მეფენი მათნი და ქუეყანაჲ მათი მოსრა იისუმან ერთგზის, რამეთუ უფალი ღმერთი ისრაჱლისაჲ ეთანამბრძოლებოდა ისრაჱლსა.
...
