ხოლო ესმა ვითარცა იავიმს, მეფესა ასორისასა, წარავლინა იოაბის მიმართ, მეფისა მარდონისა, და მეფისა მიერ ჳმერონისა, და მეფისა მიმართ ზიფაჲსსა,
და მეფეთა მიმართ დიდად სიდონად კერძოთა მთად კერძოდ და არაბოთად და წინაშე კენერეთისა და ველად და ფანაედდორად და მეზღჳსკიდეთა.
ქანანელთა მიმართ აღმოსავალით კერძოთა და მეზღჳსპირეთა, ხორრეველთა და ამორრეველთა და ქეტელთა და ფერეზელთა და იევუსელთა და მთისშინათა და ეველთა უდაბნოჲთ კერძოთა მასემათს.
და გამოვიდეს იგინი და მეფენი მათნი მათ თანა, ვითარცა ქჳშაჲ ბაგეთა ზედა ზღჳსათა სიმრავლითა, და ცხენნი და ეტლები მრავალი ფრიად.
და შეკრბეს ყოველნი ესე მეფენი და მოვიდეს ერთბამად და დაიბანაკეს წყალსა ზედა მარომსა ბრძოლად ისრაჱლისა.
და თქუა უფალმან იისუჲს მიმართ: ნუ გეშინინ პირისაგან მათისა, რამეთუ ხვალე ამას ჟამსა მე მიგცემ მათ ძლეულთა წინაშე შენსა. ცხენნი მათნნი ძარდუკუ\ეთილ-ჰყვნე Page of ms. Ga: 326v და ეტლნი მათნი დასწუნე ცეცხლითა.
და მოვიდა იისუ და ყოველი ერი ბრძოლისმოქმედი მათ ზედა წყალსა ზედა მარრონსა ანაზდა და დაესხა მათ ზედა მთით კერძო.
და მისცნა იგინი უფალმან ჴელისქუეშედ ისრაჱლისა და დამჭრელნი მათნი სდევდეს ვიდრე სიდონადმდე დიდად და ვიდრე მასერომადმდე და ვიდრე ველთამდე მასოკისათა აღმოსავალით კერძო, მოსრვიდეს მათ ვიდრე არა დაშთომადმდე მათგანისა ცხოვნებულისა და განრინებულისა.
და უყო მათ იისუმან, ვითარცა ამცნო მას უფალმან: ცხენნი მათნი აძარღუეკუეთილნა და ეტლები მათნი დაწუა ცეცხლითა.
და მიიქცა იისუ მას ჟამსა შინა და დაიპყრა ასორ და მეფე მისი, ხოლო იყო ასორ პირველმმთავრობი ყოველთა ამათ მეფობათაჲ.
და მოკლა ყოველი აღმომფშჳნველი მას შინა პირითა მახჳლისაჲთა და მოასრულნა ყოველნი და არა დაშთა მას შინა აღმომფშჳნავი, და ასორი მოწუა ცეცხლითა
და ყოველნი ქალაქნი მეფეთანი და მეფენი მათნი მოიპყრნა იისუმან და მოსრნა იგინი პირითა მახჳლისაჲთა. და მოსპოლნა იგინი, ვითრ-სახედ განუჩინა მოსემან, ყრმამან უფლისამან.
არამედ ყოველნი ქალაქნი მომტურეულნი არა მოწუნა ისრაჱლმან, თჳნიერ ასორი იგი მხოლოჲ მოწუა იისუმან.
და ყოველნი ნატყუენავნი მათნი წარმოიხუნეს თავთა მათთად ძეთა ისრაჱლისათა, ხოლო ყოველნი იგი მოასრულნეს პირითა მახჳლისაჲთა ვიდრემდის წარწყმიდნეს იგინი და არა დაუტევეს მათგან არცა ერთი აღმომფშჳნავი,
ვითარ-სახედ მიუწესა უფალმან მოსესა, ყრმასა თჳსსა, და მოსემან ეგრეთვე ამცნო Page of ms. Ga: 327r იისუსა. და ეგრეთ ყო იისუმან. არა გარდაჰჴდა არარას ყოველთაგან, რაოდენნი მიუწესნა მას მოსემან.
და მოიპყრა იისუმან ყოველი ქუეყანაჲ მთით კერძო და ყოველი ქუეყანაჲ ნაღავი და ყოველი ქუეყანაჲ გოსომი და ველობი და დასავალთაჲთ კერძო და მთაჲ ისრაჱლისაჲ და ველობნი,
მთით კერძონი მთითგან აღელით და რომელი აღვალს სირდ და ვიდრე ვალადადამდე და ველნი ლიბანისანი ძირსა მთისა აერმონისასა და ყოველნი მეფენი მათნი დაიპყრნა და მოსრნა და მოსწყჳდნა.
და მრავალნი დღენი დაყვნა იისუმან მბრძოლმან ამათ მეფეთა მიმართ.
და არა იყო ქალაქი, რომელი არა დაიპყრა ისრაჱლმან, ყოველნი დაიპყრნა ბრძოლით,
რამეთუ უფლისა მიერ იყო განძლიერებაჲ გულისა მათისაჲ მიგებებისათჳს ბრძოლად ისრაჱლისა მიმართ, რაჲთა მოესრულნენ, რაჲთა არა ეცეს მათ წყალობაჲ, არამედ რაჲთა მოსრულდენ, ვითარ-სახედ თქუა უფალმან მოსეს მიმართ.
და მოვიდა იისუ მას ჟამსა შინა და მოსრა ენაკიმნი მთით კერძოჲთ ქებრონისაჲთ და დაბირით და ანაბოთით და ყოვლით მთით ისრაჱლისაჲთ და ყოვლით მთით იუდაჲსით ქალაქთა მათთა თანა. და მოსრნა იგინი უფალმან.
და არა დაშთა ენაკიმთაგანი ძეთაგან ისრაჱლისათა გარნა თჳნიერ ღაზას შინა და გეთს და ასედდოთს დაშთეს.
და დაიპყრა იისუმან ყოველი ქუეყანაჲ, ვითარცა ამცნო უფალმან მოსესა. და მისცა იგი იისუმან სამკჳდრებელად ისრაჱლისა განწილვით ტომადსა მი\სსა Page of ms. Ga: 327v და ქუეყანაჲ დასცხრა ბრძოლილი.
