და იქმნეს საზღვარნი ძეთა იოსებისთანი იორდანით კერძოჲთგან და იერიქოჲთ კერძოჲთ აღმოსავალით კერძო უდაბნოჲ და აღვალს იერიქოჲთ ბეთელდ.
და გამოვალს ბეთილდ ლუზად და გარემოჰვლის საზღვართაა აპატაიმისათა.
ვიდრე საზღვართამდე ვეთორონისათა ქუენა\თა Page of ms. Ga: 333r და არს გამოსავალი მათი ზღუასა ზედა.
და დაიმკჳდრეს ძეთა იოსებისათა, ეფრემმან და მანასემან.
და იქმნეს საზღვარნი ძეთა ეფრემისთანი ერობისაებრ მათისა. და იქმნეს საზღვარნი მკჳდრობისა მათისანი აღმოსავალით კერძო ზენაჲსა და ზარაჲსაჲ.
და მიიწევიან საზღვარნი ზღუასა ზედა მახთოთს ჩრდილოჲთ კერძო და გარემოჰვლის აღმოსავალით კერძო ვინაესლოდ მიმართ და თანაწარჰვლის აღმოსავალით კერძო იანოდ,
და ატაროთდ მიმართ და ნაარათაჲ და დაბანი მათნი და წარჰვლის იერიქოსა ზედა და შთაიწევის იორდანედმდე.
და თაფფუჲთგან თანაწარჰვლიან საზღვარნი ზღუად მიმართ ნაღუარევსა თანა კანაჲსასა და არს გამოსავალი მისი ზღუასა ზედა, ესე სამკჳდრებელი ტომისა ძეთა ეფრემისთაჲ ერობისაებრ მათისა.
Page of ms. Ga: 333rb და ქალაქნი განსაზღვრებულნი ძეთა ეფრემისთანი საშუალ სამკჳდრებელსა ძეთა მანასისთასა, ყოველნი ქალაქნი და დაბანი მათნი.
და არა წარწყმიდა ეფრემმან ქანანელი დამკჳდრებული ღაზერს, და მკჳდრ იყო ქანანელი მთა[სა] ეფრემისსა ვიდრე დღედმდე ამად, ვიდრემდის აღმოვიდა ფარაო მეფე ეგჳპტისაჲ და დაიპყრა ქალაქი და მოწუა იგი ცეცხლითა და ქანანელთა და ფერეზელთა და დამკჳდრებულთა ღაზერისათა უწერტა, და მისცა იგი ფარაომან ენფერნის, ასულსა თჳსსა.
