და ეტყოდა უფალი იისუსა:
არქუ ძეთა ისრაჱლისათა, მეტყუელმან: მისცენით ქალაქნი მისალტოლავნი, რომელნი ვთქუენ თქუენდამი მოსეს მიერ,
მისალტოლავი მკლველისაჲ, რომელმან მოკლას სული უნებლიეთ. და იყვნენ თქუენდა ქალაქნი მისალტოლავ და არა მოკუდეს მკლველი ძეძიებელისაგან სისხლისა, ვიდრემდის დადგეს წინაშე შესაკრებელისა საშჯელად.
და მიივლტოდინ ერთსა ქალაქთა ამათგანსა და დადგეს კარსა ზედა ქალაქისასა და თქუნეს მოხუცებულთა მიმართ მყოფთა მის ქალაქისათა სიტყუანი ესე. და მიაქციონ იგი შესაკრებელმან მათდა მიმართ და მისცენ მას ადგილი და დაემკჳდროს მათ თანა.
და რამეთუ სდევს მეძიებელი სისხლისა მისისაჲ უკუანა, და არა შეაყენონ მკლველი ჴელსა მისსა, რამეთუ არა მეცნიერმან მოკლა მოყუასი თჳსი და არა სძულდა მას იგი გუშინდითგან და მესამით.
და დაიმკჳდროს ქალაქსა Page of ms. Ga: 337v მას შინა, ვიდრემდის დადგეს წინაშე შესაკრებელისა საშჯელად, ვიდრემდის მოკუდეს მღდელი დიდი, რომელი იყოს მათ დღეთა შინა, მაშინ მიიქცეს მკლველი და მივიდეს ქალაქად თჳსა და სახლისა მიმართ თჳსისა და ქალაქისა მიმართ, სადაჲთ ივლტოდა მუნით.
და განაჩინეს კედესი გალილეას საზღვარსა ნეფთალიმისსა და სჳქემი -- მთასა ეფრემისსა და ქალაქი არბოკი (ესე არს ქებრონი) -- მთასა შინა იუდაჲსსა.
და წიაღ კერძო იორდანისა და იერიქოსა აღმოსავალით მისცა, ბოსორი უდაბნოს ველსა ზედა ტომისაგან რუბენისსა და რაბოთი გალაადს ტომისაგან დანისსა და ღავლონი ბასანელისა შორის ტომისაგან მანასსისსა.
ესე ქალაქნი წოდებულნი ძეთა ისრაჱლისათად და მდებარენი მათ შორის მისალტოლავად მუნ ყოვლისა, რომელმან დასცეს სული უნებლიეთ, რაჲთა არა მოკუდეს ჴელისაგან სისხლისმეძიებელისა, ვიდრემდის დადგეს წინაშე შესაკრებელისა საშჯელად.
