მაშინ მოუწოდა იისუმან რუბინიანთა და ძეთა გადისთა და კერძოსა ტომისა მანასის.
და ჰრქუა მათ: თქუენ ისმინენით Page of ms. Ga: 341vb ყოველნი, რაოდენნი გამცნნა თქუენ მოსემან, ყრმამან უფლისამან, და ერჩდით ჴმასა ჩემსა ყოველთაებრ, რომელთა გამცნებდი თქუენ.
არა დაუტევენით ძმანი თქუენნი ამათ დღეთა და უმრავლესთა ვიდრე დღესის დღემდე, არამედ დაიმარხეთ მცნებაჲ უფლისა ღმრთისა თქუენისაჲ.
ხოლო აწ დააწყნარნა უფალმან ღმერთმან თქუენმან ძმანი თქუენნი, ვითარ-სახედ ჰრქუა მათ: აწ უკუე კუალად ქცეულნი წარედით სახიდ თქუენდა და ქუეყნად დამკჳდრებისა თქუენისად, რომელი მიგცა თქუენ მოსემან წიაღ იორდანისა.
არამედ დაიცევით ფრიად ქმნად მცნებანი და შჯული, რომელი გამცნო თქუენ მოსემან, ყრმამან უფლისამან, შეყუარებად უფალი ღმერთი თქუენი, სლვად ყოველთა გზათა მისთა, დაცვად მცნებათა მისთა და მიახლებად მისსა და მსახურებად მისსა ყოვლითა გულითა თქუენითა და ყოვლითა სულითა თქუენითა.
და აკურთხნა იგინი იისუმან და გამოავლინნა იგინი და წარვიდეს სახიდ მათდა.
და ნახევარსა ტომისა მანასისსა მისცა იისუმან ბასანელი და ნახევა\რთა Page of ms. Ga: 342r მისცა იისუმან ძმათა თანა მათთა წიაღ იორდანისა ზღჳთ კერძო. და რაჟამს წარავლინნა იგინი იისუმან სახიდ მათდა, აკურთხნაცა იგინი,
მეტყუელმან: საჴმრებითა მრავლითა აღიწიენით სახიდ თქუენდა. და წარვიდეს სახლთა მათთა და საცხოვარი მრავალი ფრიად და ვეცხლი და ოქროჲ და რვალი და რკინაჲ და საშესამოსლე მრავალი ფრიად. მოიგეს ნატყუენავი მტერთა მათთაჲ ძმათა მათთა თანა.
და წარვიდეს ძენი რუბენისნი და ძენი გადისნი და კერძოჲ ტომისა მანასსისი ძეთაგან ისრაჱლისათა სილონით, ქუეყანისაგან ქანაანისსა, წარსლვად ქუეყანად გალაადისა,ქუეყანად სამკჳდრებელისა მათისა, რომელი დაიმკჳდრეს იგი ბრძანებითა უფლისაჲთა ჴელითა მოსესითა.
და მოვიდეს ქუეყანად გალაადისა იორდანისა, რომელ არს ქუეყანასა ქანაანისასა, და აღაშენეს ძეთა გადისთა და ძეთა რ\უბინისთა Page of ms. Ga: 342rb და კერძომან ტომისა მანასსისმან ქმნეს ბომონი იორდანესა ზედა, ბომონი დიდი ხილვად.
და ესმა ძეთა ისრაჱლისათა, მეტყუელთაჲ: აჰა, აღაშენეს ძეთა გადისთა და ძეთა რუბინისთა და კერძომან ტომისა მანასესმან ბომონი საზღვართა ქუეყანისა ქანაანისათა და გალაადდ მიმართ იორდანისა, წიაღ კერძო ძეთა ისრაჱლისათაჲსა.
და შეკრბეს ყოველნი ძენი ისრაჱლისანი სილონს, რაჲთა აღსრულთა ბრძოლა უყონ მათ.
და წარავლინეს ძეთა ისრაჱლისათა ძეთა მიმართ რუბინისთა და ძეთა მიმართ გადისთა და კერძოჲსა მიმართ მანასის ტომისა ქუეყანად გალაადისა ფინეეზ, ძე ელეაზარისი, ძისა აარონ მღდელისაჲ.
და ათნი მთავართაგანნი მის თანა, მთავარი ერთი სახლისაგან ნათესავთა ყოველთა ტომთა ისრაჱლისათაჲსა, მთავარნი სახლთა ნათესავთანი არიან ათასისთავნი ისრაჱლისანი.
და მიიწინეს ძეთა მიმართ რუბინისთა და ძე\თა Page of ms. Ga: 342v მიმართ გადისთა და კერძოჲსა მიმართ ტომისა მანასისსა ქუეყანად გალაადდ და ისაუბნარეს მათდამი, მეტყუელთა:
ამას იტყჳს ყოველი შესაკრებელი ძეთა ისრაჱლისათაჲ: რაჲ არს ბრალი ეგე, რომელ იბრალეულეთ წინაშე ღმრთისა ისრაჱლისა გარემიქცევად დღეს უფლისაგან, აღიშენეთ თქუენ თავთა თქუენთათჳს ბომონი განდგომილყოფად თქუენდა უფლისაგან?
მცირე ცოდვა ჩუენდა იყო ფოღორი, რამეთუ არა განვწმდით მისგან ვიდრე დღესის დღემდე, და იქმნა შესაკრებელი უფლისაჲ წყლულებასა შინა?
და თქუენ გარემიიქცევით დღეს უფლისაგან და ხვალე ყოველსა ისრაჱლსა ზედა იყოს რისხვაჲ უფლისაჲ.
და აწ უკუეთუ მცირე არს თქუენდა ქუეყანაჲ მკჳდრობისა თქუენისაჲ, მოწიაღდით ქუეყანად სამკჳდრებელისა უფლისა, სადა მოკარვობს მუნ კარავი უფლისაჲ, და დაემკჳდრენით ჩუენ შორის და უფლისაგან ნუ იქმნებით განდგომილ და თქუენ ნუ ურწმუნოებთ აღშენებითა თქუენ Page of ms. Ga: 342vb მიერ ბომონსა გარეშე საკურთხეველისა უფლისა ღმრთისა ჩუენისა.
არა, აჰა, ახარმან [ზარ]ისმან არა ბრალი ბრალაა შენაჩუენებისაგან და ყოველსა ზედა შესაკრებელსა ძეთა ისრაჱლისათასა იქმნა რისხვაჲ? და იგი ერთი მხოლოჲ იყო. არა მხოლოჲ მოკუდა იგი ცოდვითა მისითა?
და მიუგეს ძეთა რუბინისთა და ძეთა გადისთა და კერძომან ტომისა მანასისმან და ჰრქუეს ფინეეზს მღდელსა და ათასისთავთა ისრაჱლისათა, მეტყუელთა:
ღმერთი ღმერთი უფალი არს და ღმერთმან ღმერთმან უფალმან მან იცის და ისრაჱლმან თჳთ ცნას, უკუეთუ განმდგომობით ვიბრალეულეთ წინაშე უფლისა, ნუ მიჴსნის ჩუენ ამას დღესა შინა!
და უკუეთუ ვიშენეთ თავთა თჳსთად ბომონი, ვითარცა აღღებად მას ზედა მსხუერპლი ყოვლადდასაწუველთაჲ, ვითარცა მას ზედა ქმნად მსხუერპლი მაცხოვარებისაჲ, გამოძიებად უფალი!
არამედ კრძალულებითისა სიტყჳსათჳს ვყავთ ესე, მეტყუელთა, რაჲთა არა ჰრ\ქუან Page of ms. Ga: 343r ხვალე შვილთა თქუენთა შვილთა ჩუენთა, მეტყუელთა: რაჲ არს თქუენი და უფლისაჲ -- უფლისა ღმრთისა ისრაჱლისაჲ?
საზღვარი დადვა უფალმან საშუალ ჩუენსა და თქუენსა ძეთა რუბინისთა და ძეთა გადისთა და კერძოჲსა ტომისა მანასისა იორდანე, და არა არს თქუენ შორის ნაწილი უფლისაჲ. და განაუცხოვნენ ძეთა თქუენთა ძენი ჩუენნი, რაჲთა არა ეთმნებოდინ უფალსა.
და ვთქუთ ყოფად ესრეთ აღშენებად ბომონი ესე არა ნაყოფებთათჳს, არცა მსხუერპლთათჳს,
არამედ რაჲთა იყოს ესე საწამებელად შორის ჩუენსა და შორის თქუენსა და შორის ნაშობთა თქუენთა შემდგომად თქუენსა მსახურებად მსახურებასა უფლისასა წინაშე მისსა ნაყოფებათა მიერ ჩუენთა და მსხუერპლთა მიერ ჩუენთა და მსხუერპლთა მიერ მაცხოვარებისა ჩუენისათა. და არა ეტყოდინ შვილნი თქუენნი შვილთა ჩუენთა ხვალე: არა არს თქუენი ნაწილი უფლისა თანა.
და ვთქუთ: უკუეთუ Page of ms. Ga: 343rb იყოს ოდესმე და თქუან ჩუენდამო ანუ ნათესავთა ჩუენთა ხვალე და თქუან: იხილეთ მსგავსებაჲ საკურთხეველისა უფლისაჲ, რომელი ქმნეს მამათა ჩუენთა არა ნაყოფებათათჳს, არცა მსხუერპლთათჳს, არამედ საწამებელი არს შორის ჩუენსა და შორის თქუენსა და შორის ძეთა ჩუენთა.
ნუ იყოფინ უკუე ჩუენდა განდგომაჲ უფლისაგან დღესისა დღესა, ვითარმცა აღგუეშენა ჩუენ საკურთხეველი ნაყოფებათაჲ და მსხუერპლთა სალამინთაჲ და მსხუერპლისა მაცხოვარებათაჲსაჲ გარეშე საკურთხეველისა უფლისა ღმრთისა ჩუენისა, რომელ არს წინაშე კარვისა მისისა.
და ესმნეს ფინეეზს მღდელსა და ყოველთა მთავართა შესაკრებელისა ძეთა ისრაჱლისათაჲსათა ათასის თავთა, რომელნი იყვნეს მის თანა, სიტყუანი, რომელნი თქუნეს ძეთა რუბენისთა და ძეთა გადისთა და ძეთა მანასისთა, და სთნდეს მათ.
და ჰრქუა ფინეეზ მღდელმან ძეთა რუბინისთა და ძეთა გადისთა და ძეთა მა\ნასისთა: Page of ms. Ga: 343v დღეს ვცანთ, ვითარმედ თქუენ შორის არს უფალი მით (!), რამეთუ არა იბრალეთ წინაშე უფლისა ბრალი და რამეთუ იჴსნენით ძენი ისრაჱლისანი ჴელისაგან უფლისა.
და მიიქცა ფინეეზ მღდელი და მთავარნი ტომთანი ძეთაგან რუბინისთა და ძეთაგან გადისთა და კერძო ტომისაგან მანასსისსა გალაადით ქუეყანად ქანაანისა ძეთა მიმართ ისრაჱლისათა. და მიუგნეს მათ სიტყუანი
და ითნნეს ძეთა ისრაჱლისათა. და აკურთხნეს იგინი ძეთა ისრაჱლისათა და არა მერმეცა თქუეს აღსლვაჲ მათდამი ბრძოლის ყოფად, მოსპობად ქუეყანაჲ ძეთა გადისთა და ძეთა რუბენისთაჲ და კერძოთა ძეთა მანასსესთაჲ და დაემკჳდრნეს მას ზედა.
და სახელსდვეს ბომონი რუბენისი და გადისი და ნახევრისა ტომისა მანასისი და თქუეს, ვითარმედ. საწამებელი არს შორის მათსა, რამეთუ ვითარმედ უფალი ღმერთი ღმერთი მათი არს.
