და შემოკრიბნა იისუმან ყოველნი ტომნი ისრაჱლისანი სილოს და მოუწოდა ყოველთა მოხუცებულთა ისრაჱლისათა და მთავართა მათთა და მწიგნობართა მათთა და მსაჯულთა მათთა და დაადგინნა იგინი წინაშე ღმრთისა.
და თქუა იისუმან ყოვლისა მიმართ ერისა უფლისა. ამათ იტყჳს უფალი ღმერთი ისრაჱლისაჲ: წიაღ მდინარისა მკჳდრ იყვნეს მამანი თქუენნი პირველად, -- თარრა, მამაჲ აბრაამისი და მამაჲ ნაქორი[სი], და ჰმსახურებდეს ღმერთთა სხუათა.
და მოვიყვანე მამაჲ თქუენი აბრაამი წიაღით მდინარისაჲთ და გზა-უყავ მას ყოველსა შინა ქუეყანასა ქანაანისასა და განვამრავლე თესლი მისი და მივეც მას ისაკი,
და მივეც ისაკსა იაკობი და ესავი, და მივეც ესავსა მთაჲ სეირი დამკჳდრებად Page of ms. Ga: 344vb იგი. და იაკობი და ძენი მისნი შთავიდეს ეგჳპტედ და იქმნა მუნ ნათესავად დიდად და მრავლად და ძლიერად.
და ძჳრს-უყოფდეს მათ მეგჳპტელნი, და დასცა უფალმან ეგჳპტე სასწაულებითა, რომელნი ქმნნა მათ შორის, და ამათსა შემდგომად გამომიყვანნა ჩუენ და მამანი ჩუენნი
ეგჳპტით და შეხუედით ზღუასა მეწამულსა. და სდევდეს მეგჳპტელნი უკუანა მამათა ჩუენთა ეტლებითა და ცხენებითა ზღუასა შინა მეწამულსა.
და ღაღად-ვყავთ უფლისა მიმართ და მოსცა ღრუბელი და ალმური საშუალ ჩუენსა და საშუალ მეგჳპტელთასა და მოაწია მათ ზედა ზღუაჲ და დაფარა მათ ზედა. და იხილეს თუალთა ჩუენთა, რაოდენი ქმნა უფალმან ეგჳპტეს შინა და უდაბნოს ზედა, და იყვენით უდაბნოს დღეთა მრავალთა.
და შემოგიყვანნა თქუენ ქუეყანასა ამორრეველთა, დამკჳდრებულთასა წიაღ იორდანისა, და წინაგანგეწყვნეს თქუენ და მიგცნა იგინი უფალმან ჴელ\თა Page of ms. Ga: 345r თქუენთა და დაიმკჳდრეთ ქუეყანაჲ მათი და მოსრენით იგინი პირისაგან თქუენისა.
და აღდგა ბალაკ სეპფორისი, მეფე მოაბისაჲ, და ეწყო ისრაჱლსა. და მიმვლენელმან მიჰხადა ბალაამს, ძესა ბეორისასა, დაწყევად ჩუენდა.
და არა ინება უფალმან ღმერთმან შენმან წარწყმედაჲ შენი და კურთხევითა მაკურთხნა ჩუენ და განმარინნა ჩუენ ჴელისაგან მტერთაჲსა.
და წიაღმოჰვლეთ იორდანე და მოხუედით იერიქოს და ბრძოლა-ყვეს თქუენდამი მკჳდრთა იერიქოჲსათა: ამორრეველმან და ქანანელმან და ფერეზელმან და ეველმან და ქეტტელმან და იევუსელმან და გერგესეველმან, და მოგცნა იგინი უფალმან ჴელთა თქუენთა.
და გამოავლინნა უპირველეს ჩუენსა ბზიკნი და განასხნა იგინი პირისაგან ჩუენისა, ათორმეტნი მეფენი ამორრეველთანი არა მახჳლითა შენითა, არცა მშკლდითა შენითა.
და მოგ\ცნა Page of ms. Ga: 345rb თქუენ ქუეყანაჲ, რომელსა ზედა არა დაჰშუერით მის ზედა. და ქალაქნი, რომელნი არა აღაშენენით, და დაემკჳდრენით მათ შინა. და ვენაჴოანთა და ზეთისხეოანთა, რომელნი არა დაჰნერგენით, შჭამთ.
და აწ ეშიშვოდეთ უფალსა და ჰმსახურეთ მას სისადაგითა და სიმართლითა და აღიხუენით ღმერთნი უცხონი, რომელთა ჰმსახურებდეს მამანი ჩუენნი წიაღ მდინარისა და ეგჳპტეს შინა, და ჰმსახურებდით უფალსა.
ხოლო უკუეთუ არა გთნავს თქუენ მსახურებაჲ უფლისაჲ, გამოირჩიეთ თქუენ თავთა თჳსთად დღეს, ვის ჰმსახურებდეთ: ანუ ღმერთთა მამათა თქუენთასა, ანუ ღმერთთა ამორრეველთასა, რომელთა შორის თქუენ მკჳდრ ხართ ქუეყანასა ზედა მათსა, ხოლო მე და სახლი ჩემი ვჰმსახურებთ უფალსა, რამეთუ წმიდა არს.
და მიმგებელმან ერმან თქუა: ნუ იყოფინ დატევებად ჩუენდა უფალი, ვითარმცა ვჰმსახურეთ ღმერთთა სხუათა,
რამეთუ უფალი ღმერთი ჩუენი არს, მან აღმომიყვანნა ჩუენ ეგჳპტით, სახლით მონათაჲთ, და Page of ms. Ga: 345v რაოდენნი მიყვნა ჩუენ სასწაულნი ესე დიდნი და დამიცვნა ჩუენ ყოველსა შინა ქუეყანასა და გზასა, რომელსა ვიდოდეთ მას ზედა, და ყოველთა წარმართთა, რომელთა წარმოვვლეთ მათ მიერ.
და განჴადა უფალმან ამორრეველი და ყოველნი წარმართნი მკჳდრნი ქუეყანისანი პირისაგან ჩუენისა, არამედ ჩუენცა ვჰმსახუროთ უფალსა, რამეთუ ესე არს ღმერთი ჩუენი.
და თქუა იისუმან ერისა მიმართ: ვერ შეუძლოთ მსახურებად უფალსა, რამეთუ უფალი ღმერთი წმიდაჲ არს და შემშურვებელმან ესრეთ არა თავს-ისხნეს უშჯულობანი თქუენნი და ცოდვანი თქუენნი,
რაჟამს დაუტეოთ უფალი და ჰმსახუროთ ღმერთთა უცხოთა. და ზედამოწევნულმან ბოროტი გიყოს თქუენ და აღგსპნეს თქუენ ნაცვალად, რომელ კეთილი გიყო თქუენ.
და თქუა ერმან იისუჲს მიმართ: არა, არამედ უფალსა ვჰმსახუროთ.
და თქუა იისუმან ერისა მიმართ: მოწამე თქუენ ხართ თქუენ ზედა, თქუენ გამოირჩიეთ უფალი მსახურებად იგი.
და აწ მოსპენით ღმერთნი სხუა ტომთა თქუენ შორისთანი და წარჰმართეთ გული თქუენი უფლისა მიმართ ღმრთისა ისრაჱლისა.
და თქუა ერმან იისუჲს მიმართ: უფალსა ვჰმსახუროთ და ჴმისა მისისაჲ ვისმინოთ.
და აღთქუა იისუმან აღთქუმაჲ ერისა მიმართ მას დღესა შინა და მისცა მას შჯული და მსჯავრი სილოს შინა წინაშე კარავსა უფლისა ღმრთისასა.
და დაწერნა სიტყუანი ესე წიგნსა შინა შჯულისა ღმრთისასა და მოიდო ლოდი დიდი და აღჰმართა იგი იისუმან მუნ ბელეკონსა ქუეშე წინაშე უფლისა.
და თქუა იისუმან ერისა მიმართ. აჰა, ლოდი ესე იყოს თქუენდა. საწამებელად, ამას Page of ms. Ga: 346r ესმნეს ყოველნი თქუმულნი უფლისა მიერ, რაოდენნი თქუნა თქუენდამი დღეს, და იყოს ესე თქუენ შორის საწამებელად უკუანაჲსკნელთა დღეთასა, რაჟამს ეცრუვნეთ უფალსა ღმერთსა თქუენსა.
და განავლინა იისუმან ერი და წარვიდა კაცად-კაცადი ადგიდ თჳსსა.
და ჰმსახურა ერმან უფალსა ყოველთა დღეთა იისუჲსთა და ყოველთა დღეთა მოხუცებულთასა, რაოდენნი მზიდველ იყვნეს ჟამსა იისუჲს თანა და რაოდენთა უწყოდნეს ყოველნი საქმენი უფლისანი, რომელნი უყვნა ისრაჱლსა.
და იქმნა შემდგომად ამათსა და მოკუდა იისუ, ძე ნავესი, მონაჲ უფლისაჲ, წელთა ასდაათთაჲ.
და დაჰფლეს იგი საზღვართა თანა ნაწილისა მისისათა თამნასახარს შინა, მთასა ეფრემისსა, ბღოარით კერძო მთისა გალაადისა,
და დასხნეს მის თანა საფლავსა შინა, რომელსა დაჰფლეს იგი მუნ, დანაკნი კლდისანი, რომელთა მიერ დასცჳთა ძეთა ისრაჱლისათა გალგალთა შორის, რაჟამს გამოიყვანნა იგინი ედჳპტით, ვითარცა განუწესა უფალმან, და არიან მუნ ვიდრე დღეს დღედმდე.
და ძუალნი იოსებისნი აღმოიხუნეს ძეთა ისრაჱლისათა ეგჳპტით და შთაჰმარხნეს იგინი სიკიმათა, ნაწილსა შინა აგარაკისასა, რომელი მოიგო იაკობმან ამორრეველთაგან მკჳდრთა სიკიმაჲსათა ტარიგებითა ასითა, და მისცეს იგი იოსებსა ნაწილად.
და იყო შემდგომად ამათსა და ელეაზარცა, ძე ა\არონ Page of ms. Ga: 346v მღდელისაჲ, მღდელი აღესრულა და დაეფლა ღავაათს, რომელი იყო ფინეეზ ძისა მისისაჲ, რომელი მისცა მას მთასა ეფრემისსა.
მას დღესა შინა მიმღებელთა ძეთა ისრაჱლისათა კიდობანსა აღთქუმისა ღმრთისასა მიმოაქუნდა ისრაჱლისა შორის და ფინეეზ მღდელობდა ელეაზარის წილ, მამისა მისისა, ვიდრემდის მოკუდა და დაეფლა მუნვე ღავაათს.
ხოლო ძენი ისრაჱლისანი წარვიდეს თითოეული ადგიდ თჳსსა და ქალაქად თჳსსა. და ჰმსახურებდეს ძენი ისრაჱლისანი ასტარტეს და ასტაროთს და ღმერთთა წარმართთა გარემოჲსთა მათთასა. და მისცნა იგინი უფალმან ჴელთა ეგლომ მეფისა მოაბისათასა და დაეუფლა მათ წელსა ათსადარვასა.
