TITUS
Klarjeti Polycephalion
Part No. 37
Previous part

Text: 37 
Page of edition: 353 
Line of edition: 27  ბ̂ საკითხავი ჯუარისათჳსვე, თქუმული მისივე, სიტყუაჲ ჯუარისაჲ


Line of edition: 28       აწ უკუე ვინაჲთგან მადლითა ღმრთისაჲთა მოვიწიენით თქუმულთა ამათ სისრულესა
Line of edition: 29    და ვიდრე დღესასწაულადმდე უქმნელებისა ჩუენისა, რომელ არს გამოჩინებაჲ
Line of edition: 30    განმაცოხველებელისა ჯუარისაჲ, მსგავსად ძალისა ჩუენისა ვთქუათ და ვადიდოთ
Line of edition: 31    ძელი ცხოვრების მომცემელი და მივსცეთ მას ხარებაჲ, ვითარცა დავით წინაწარმეტყუელი
Line of edition: 32    იტყჳს: "მაშინ იხარებდენ ყოველნი ხენი მაღნარისა პირისაგან უფლისა,
Line of edition: 33    რამეთუ მოვალს". და აწ ჩუენცა მას თანა ვიტყოდით და ვთქუათ: გიხაროდენ,
Line of edition: 34    ჵ ჯუარო პატიოსანო! გიხაროდენ, რამეთუ შენ ზედა უფალი ჩუენი იესუ ქრისტჱ
Line of edition: 35    აღმაღლდა განგებულებით, რომელსა შინა დაუნჯებულ არიან საფასენი სიხარულისა
Line of edition: 36    და მხიარულებისანი.
Line of edition: 37       გიხაროდენ, ძელო, ცხოვრების მომცემელო, გიხაროდენ, რამეთუ შენ
Line of edition: 38    მიერ მოგუემადლა სიხარული, რომელი აღმოსცენდების მარადის ცათა შინა
Line of edition: 39    და ქუეყანასა ზედა.

Page of edition: 354 
Line of edition: 1       გიხაროდენ, ჯუარო პატიოსანო, ცხორებისა სასოო, რამეთუ დამბადებელმან
Line of edition: 2    პირველითგან ყოველნი დაბადებულნი სახედ შენდა დაჰბადნა.
Line of edition: 3       იხარებდ, ძელო ძლევაშემოსილო, რამეთუ შენნი ძალნი ზეცისანი იხარებენ
Line of edition: 4    ცხორებისათჳს შენ ძლით ყოფილისა, და შესწირვებ გალობასა შიშით ღმრთისა
Line of edition: 5    დაუდუმებელად და უცვალებელად ყოველსა ჟამსა.
Line of edition: 6       გიხაროდენ, ჵ ჯუარო დიდებულო, რამეთუ შენ მიერ ქალაქთა და უდაბნოთა
Line of edition: 7    და ყოველთა ადგილთა ეკლესიანი მართლმადიდებელთანი დამყარებულ
Line of edition: 8    არიან.
Line of edition: 9       გიხაროდენ, ჵ ძელო სადიდებელო, რამეთუ შენ მიერ აღეხუმიან ყოველნი
Line of edition: 10    პირნი მორწმუნეთანი აღმოთქუმად სიტყუათა საღმრთოთა.
Line of edition: 11       გიხაროდენ, ჯუარო სამგზის სანატრელო, რამეთუ შენ მიერ ანგელოზნი
Line of edition: 12    ზეცისანი კაცთა თანა ქუეყანისათა მოხარულნი ადიდებენ ქრისტესა ღმერთსა,
Line of edition: 13    მაცხოვარსა ჩუენსა.
Line of edition: 14       გიხაროდენ, ძელო საგალობელო, რამეთუ შენ მიერ ქუეყანისა კაცნი,
Line of edition: 15    ვითარცა ანგელოზნი, ცათა შინა მდგომარე არიან წინაშე ღმრთისა, სიხარულითა
Line of edition: 16    გამოუთქუმელითა ადიდებენ დამბადებელსა მათსა მარადის.
Line of edition: 17       გიხაროდენ, ჵ ჯუარო საქებელო, შენ მიერ გათავისუფლდა ადამ წყევისა
Line of edition: 18    მისგან და მხიარული და განახლებული კუალად სამოთხედვე შევიდა და მოიღო
Line of edition: 19    პირველივე იგი ნეტარებაჲ.
Line of edition: 20       გიხაროდენ, ძელო წმიდაო და წმიდამყოფელო ყოველთაო, რამეთუ შენ
Line of edition: 21    ზედა დამშჭუალვითა ძელისაჲთა სამებაჲ წმიდაჲ, სწორი ბუნებითა, ყოველსა
Line of edition: 22    ადგილსა იცნობა და ირწმუნა და იდიდა სამარადისოდ და უკუნისამდე.
Line of edition: 23       გიხაროდენ, ჵ ჯუარო თაყუანის-საცემელო, რამეთუ შენ მიერ ყოველი
Line of edition: 24    სული, რომელსა ჰრწამს ქრისტჱ ჭეშმარიტებით, ცხომდების სამარადისოდ
Line of edition: 25    და უკუნისამდე.
Line of edition: 26       გიხაროდენ, ძელო, ყოველთა მიერ აღმართებულო, რამეთუ შენ მიერ
Line of edition: 27    ყოველნი კეთილნი წარუვალნი მოცემულ არიან კაცთა ნათესავსა ჯერისაებრ.
Line of edition: 28       აწ უკუე რავდენი ვთქუათ, ანუ რავდენი დავაკლოთ, ანუ ვითარ ვადიდოთ
Line of edition: 29    ძალი ჯუარისა დიდებულისაჲ?!
Line of edition: 30       ეჰა, სახელი ჯუარისაჲ, რომელსა შინა დიდებულნი საიდუმლონი ღმრთისა
Line of edition: 31    მაცხოვრისანი დაფარულ არიან, ანგელოზთა პატივ არს და კაცთა დიდება.
Line of edition: 32    რაჲ-მე უკუე იყოს უსაწადელჱს სახელსა ჯუარისასა, უტკბილჱს შჯულსა ქრისტეანობისასა?
Line of edition: 33    ანუ რაჲ-მე იყოს უფროჲს სასწაულთა მფლობელ ჯუარისა ჯუარისცუმულისაჲ?
Line of edition: 34       ჯუარი ნიში არს ღმრთეებისა ძალისაჲ საკჳრველთმოქმედისაჲ.
Line of edition: 35       ჯუარი სიხარული არს ანგელოზთაჲ და მწუხარებაჲ ეშმაკთაჲ.
Line of edition: 36       ჯუარი სასუფეველი არს ეკლესიათაჲ და დამამჴობელი საკერპოთაჲ.
Line of edition: 37       ჯუარი სანთელი არს ყოვლისა დაბადებულისაჲ და ნათელი სამარადისოჲ, ყოველისა
Line of edition: 38    განმანათლებელი.
Line of edition: 39       ჯუარი ზღუდე არს შეურყეველი და გოდოლი დაურღუეველი.
Line of edition: 40       ჯუარი სინათლჱ არს მღდელთაჲ და შუენიერებაჲ ერისაჲ.
Line of edition: 41       ჯუარი სიქადული არს მეფეთაჲ და ძლიერებაჲ მფლობელთაჲ.
Line of edition: 42       ჯუარი საჭუველი არს ძლიერთაჲ და ფარი მებრძოლთაჲ, უძლეველი ყოვლადვე.
Line of edition: 43       ჯუარი ჭური არს მჴედართაჲ, შეუძრწუნებელი წინააღმდგომთაგან.

Page of edition: 355 
Line of edition: 1       ჯუარი მცველი არს ქალაქთაჲ და მფარველი დაბნებისა ყოვლისაჲ.
Line of edition: 2       ჯუარი სიხარული არს მორწმუნეთაჲ და მწუხარებაჲ ურწმუნოთაჲ.
Line of edition: 3       ჯუარი წარმწყმედელი არს ეშმაკთაჲ და ყოველთა მორჩილთა მისთაჲ.
Line of edition: 4       ჯუარი საშინელება არს მტერთა და განმაძლიერებელ მოყუარეთა.
Line of edition: 5       ჯუარი განმდეველ არს ეშმაკთა და მომწოდებელ ანგელოზთა.
Line of edition: 6       ჯუარი სასოჲ არს ქრისტეანეთაჲ და შემაძრწუნებელი უქრისტოჲთაჲ.
Line of edition: 7       ჯუარი სიმტკიცჱ არს შჯულისაჲ და განმაქარვებელი წვალებისაჲ.
Line of edition: 8       ჯუარი მკურნალი არს ჴელოვანი სულთა და ჴორცთაჲ.
Line of edition: 9       ჯუარი ძალი არს უძლურთაჲ და ლხინებაჲ სნეულთაჲ.
Line of edition: 10       ჯუარი ნავთსაყუდელი არს მენავეთაჲ და მაცხოვარ ღელვაგუემულთაჲ.
Line of edition: 11       ჯუარი მშჳდობაჲ არს ზარგანჴდილთაჲ და სასოჲ განწირულთაჲ.
Line of edition: 12       ჯუარი მცველი არს მტერთაგან და მფარველი მოძულეთაგან.
Line of edition: 13       ჯუარი სიქადული არს მართლმადიდებელთაჲ და სატანჯველი მწვალებელთაჲ.
Line of edition: 14       ჯუარი დამჴსნელი არს კერპთმსახურებისაჲ და შემწჱ კეთილადმსახურებისაჲ.
Line of edition: 15       ჯუარი მოძღუარი არს უბიწოთაჲ და მასწავლელი შეცდომილთაჲ.
Line of edition: 16       ჯუარი მცველი არს ქალწულთაჲ და სიმტკიცჱ მოსავთა მისთაჲ.
Line of edition: 17       ჯუარი სიმჴნჱ არს მართალთაჲ და სინანული ცოდვილთაჲ.
Line of edition: 18       ჯუარი სამკაული არს მონაზონთაჲ და შუენიერებაჲ კეთილად ცხორებულთაჲ.
Line of edition: 19       ჯუარი მზრდელი არს ჩჩჳლთაჲ და თანამავალი ჭაპუკთაჲ.
Line of edition: 20       ჯუარი სასოჲ არს ყრმათა და კუერთხი მოხუცებულთაჲ.
Line of edition: 21       ჯუარი საფასჱ არს გლახაკთაჲ მოუკლებელი და მასწავლელი მდიდართაჲ
Line of edition: 22    დაუცადებელი.
Line of edition: 23       ჯუარი გზაჲ არს შეცთომილთაჲ და მომაქცეველი წარწყმედულთაჲ.
Line of edition: 24       ჯუარი განმსუენებელ არს მორწმუნეთაჲ დღისა და მცველი ღმრთისმსახურთაჲ
Line of edition: 25    ღამე ყოლადვე.
Line of edition: 26       ჯუარი წინამძღუარი არს მღჳძართაჲ და მფარველი მძინარეთაჲ.
Line of edition: 27       ჯუარი გზაჲ არს საღმრთოჲ, მიმყვანებელი სამოთხედ.
Line of edition: 28       ჯუარი ბეჭედი არს ღმრთისაჲ, სიქადული ქრისტჱს მორწმუნეთაჲ.
Line of edition: 29       ჯუარი ტაბლაჲ არს მშიერთაჲ და განმაძღებელი ქრისტჱს მორწმუნეთაჲ.
Line of edition: 30       ჯუარი წესი არს კეთილისაჲ წარმართთათჳს და ყოვლისა სოფლისაჲ სიმტკიცჱ
Line of edition: 31    სიბრძნისაჲ და სიღრმე და სიმაღლჱ დაწყნარებისაჲ.
Line of edition: 32       აწ უკუე რავდენი ვთქუათ, ანუ რავდენი დავაცადოთ, ანუ ვითარ გადიდოთ
Line of edition: 33    შენ, ჯუარო პატიოსანო, ცხორებაშემოსილო? რამეთუ შენ მხოლოჲ ყოველთა
Line of edition: 34    დაბადებულთაგან მეუფემან დიდებისამან გყო საჭურველად უძლეველად მტერთა
Line of edition: 35    მიმართ, ეშმაკთა და ცოდვისა და სიკუდილისა. ამისთჳს ნეტარ ვართ ჩუენ
Line of edition: 36    ყოველნი, რომელნი ღირს-ვიქმნენით ხილვად დღესა მას წმიდასა გამოჩინებისა
Line of edition: 37    შენისა წმიდისასა.
Line of edition: 38       შენ ხარ ქადაგებული წინაწარმეტყუელთაჲ. შენდამი იხარებენ ყოვლადვე,
Line of edition: 39    ღაღადებენ ღმრთისა მიმართ და იტყჳან: "მოგუეც სასწაული მოშიშთა ყოველთა,
Line of edition: 40    რაჲთა განვერნეთ პირსა მშჳლდისასა".

Page of edition: 356 
Line of edition: 1       შენ ხარ სიქადული მოციქულთაჲ, რამეთუ იგინი დაუცხრომელად ღაღადებენ
Line of edition: 2    წმიდასა შინა ეკლესიასა ქადაგებითა მათითა მხოლოჲთა, წმიდითა და იტყჳან:
Line of edition: 3    "ხოლო ჩუენდა ნუ იყოფინ სიქადულ, გარნა ჯუარითა უფლისა ჩუენისა იესუ
Line of edition: 4    ქრისტჱსითა".
Line of edition: 5       შენ ხარ გჳრგჳნი მოწამეთაჲ, რომელთა ჯუარი აიღეს და მწრაფლ შეუდგეს
Line of edition: 6    თჳსსა უფალსა.
Line of edition: 7       შენ ხარ სიქადული და სიხარული მათი, რომელნი მკჳდრ არიან მთათა
Line of edition: 8    და ქუაბთა და ნაპრალთა ქუეყანისათა სახელისათჳს ღმრთისა, რამეთუ მათ
Line of edition: 9    ჴორცნი მათნი ჯუარს-აცუნეს ვნებითურთ და ტკივილით.
Line of edition: 10       შენ ხარ მახლობელთა და შორიელთა დაწყნარებაჲ და განსუენებაჲ.
Line of edition: 11       ეჰა, სიხარული ჯუარისამიერი, რომელი გამოუთქუმელ არს.
Line of edition: 12       ეჰა, საიდუმლოჲ მისი, რომელი მიუწდომელ არს, და ვიტყჳ მეცა განკჳრვებით
Line of edition: 13    საყჳრსა თანა საღმრთოსა და ნესტუსა სულიერსა _ წმიდასა პავლეს მოციქულსა.
Line of edition: 14       "ეჰა, სიღრმჱ და სიმდიდრჱ მრავალფერისა მის მიეცნიერებისა ღმრთისაჲ,
Line of edition: 15    რამეთუ სიბრძნენი მისნი გამოუთქუმელ არიან".
Line of edition: 16       ხისა მიერ ცხორებისა მოვკუედით და ძელისა მიერ სიკუდილისა ცხოველ
Line of edition: 17    ვიქმნენით, მადლისა ღმრთისა ვიჴსნენით, რომელი აურაცხელ არს. ამისთჳს
Line of edition: 18    ჯერ-არს ჩუენდა, რაჲთა ვყოთ დღე ესე დღესასწაულად სიხარულისა, "ჟამსა
Line of edition: 19    ყუავილისისა, კიდემდე საკურთხეველისა". ესე ჟამი არს ყუავილისაჲ, რომელნი
Line of edition: 20    უდბებით და დაძუელებით შებაყლებულ არიან ცოდვითა, აწ განახლებით და
Line of edition: 21    მოსწრაფებით შეიმკვნენ დიდებულად სიხარულად და განცხრომად მათ თანა,
Line of edition: 22    რომელნი განსცხრებიან დღესა ქორწილისასა, იხარებენ მხიარულებით ყოვლითა
Line of edition: 23    გულითა.
Line of edition: 24       აწ მოვედით და მოვიღოთ ბრძანებისაებრ, და განვაგდოთ უდებებით
Line of edition: 25    დაჴსნაჲ გონებისა ჩუენისა და სრულ ვიქმნეთ მოჴსენებითა დღისა ამის
Line of edition: 26    სადიდებელისაჲთა დღესასწაულისა ცხოველსმყოფელის ჯუარისაჲთა.
Line of edition: 27       წყალობითა და სარწმუნოვებითა, ვითარცა წიგნი იტყჳს, განვიბანნეთ
Line of edition: 28    ცოდვანი, და მოვიპოოთ კადნიერებაჲ და აღვიღოთ ნეჭთა ჩუენთა ზედა საჭურველი
Line of edition: 29    უძლეველი _ ცხოველსმყოფელი ჯუარი, რომელი ზეგარდამო შევიწყნარეთ დასაწყნარებელად,
Line of edition: 30    დასამშჳდებელად ყოვლისა რისხვისა და ღაღად-ვყოთ ღმრთისა მიმართ ჩუელებისაებრ
Line of edition: 31    გალობისა ანგელოზთაჲსა: "წმიდა არს უფალი, წმიდა არს ძლიერი, წმიდა
Line of edition: 32    არს" უკუდავი უკუნისამდე და უკუნითი უკუნისამდე.
Line of edition: 33       ჵ წმიდაო სამებაო, მიუწდომელო და გარეშეუწერელო და გამოუთქუმელო,
Line of edition: 34    სწორო ბუნებითა და მოსაყდრობითა და ჟამითა და დიდებითა, შეგჳწყალენ
Line of edition: 35    ჩუენ, უღირსნი ესე, და შეგჳნდვენ შეცოდებანი ჩუენნი, და ნუ დაგუშჯი
Line of edition: 36    უშჯულოებათა ჩუენთათჳს. და ნუ მარცხუენ კადნიერად წარმდებებისა ჩემისათჳს,
Line of edition: 37    რომელ-ესე ჴელ-ვყავ უდბებასა და უმეცრებასა შინა ჩემსა ნაკლული ესე
Line of edition: 38    ქებაჲ პატიოსნისა ჯუარიჲ, არამედ შეიწირე, ვითარცა ხარკი თანამდები,
Line of edition: 39    უძლურისა მოსესხისა ნაკლულებით გარდაჴდილი და მიიღე შესხმაჲ ესე. მსგავსი
Line of edition: 40    უძლურებისა ჩემისაჲ. და მომეც მე მადლი, მსგავსი სახიერებისა შე\ნისაჲ,
Page of edition: 357  Line of edition: 1    და დაიცვენ ყოველნი მოსავნი სახლისა შენისა წმიდისანი და მოგუეც პოვნად
Line of edition: 2    წყალობაჲ და სახიერებაჲ შენი დღესა მას მიგებისა შენისასა სამართლად.
Line of edition: 3    რამეთუ შენ ხარ ღმერთი ჩუენი და შენდა შუენის, მამაო და ძეო და სულო
Line of edition: 4    წმიდაო, დიდებაჲ და პატივი და თაყუანისცემაჲ უწინარჱს საუკუნეთა, აწ
Line of edition: 5    და მარადის და უკუნითი უკუნისამდე. ამენ.


Next part


This text is part of the TITUS edition of Klarjeti Polycephalion.

Copyright TITUS Project, Frankfurt a/M, 19.11.2023. No parts of this document may be republished in any form without prior permission by the copyright holder.