TITUS
Svan Chrestomathy (I: Upper Bal): Part No. 56

Text: 41 

Line of edition: 38

41. ლიჯლა̈ჲე̄ლ


Line of edition: 39       ლიჯლა̈ჲე̄ლ ობა̈შ ნუკვიშ ლი ი მა̈გ ლაღვროვა̄ლ ლიხ, მარე ხოშა̄მ ლაღა̈ლს
Line of edition: 40    როგვა̈ ითქარშვ იჯლა̈ჲე̄ლხ მეჯლა̈ჲე̄ლა. მეჯლა̈ჲე̄ლ ხოშა ლაღა̈ლ ზურა̄ლ ლი.
Page of edition: 42 Line of edition: 1    ღვეჟმა̄რე ძვირდ გარ იჯლა̈ჲე̄ლ. ეჯა̄ჲ ლა̈თხვჲარჟი̄ნა̈შდ ლახ ა̈ნთვე̄ნი ცხირშვ ი
Line of edition: 2    პინტშვ ლიჯლა̈ჲე̄ლს, ადო ეჩურ ღვეჟმა̄რა შგვირ ხაბჟა ლიჯლა̈ჲე̄ლ (\\ ლიჯლაე̄ლ).

Line of edition: 3       როგვა̈ ითქარშვ ლიჯლა̈ჲე̄ლ ამჟი̄ნ ლი: მეჯლა̈ჲე̄ლ ქა იშლდა̈ნი ო̄შთხვეშდიაშხვ
Line of edition: 4    როგვა̈ ითქს, ეჯას ჩვაჰრე ზუჰე̄რა̄̈ ლანკვრიჟი̄ნ. სგა იყვბე აშხვ ა̈დგილთე̄სგა.
Line of edition: 5    ერხის ტოტისგა იყდა̄̈ნი, ტვეტს პილა̈რთე̄სგ'ა̈ჲე̄სგი ი ხაყლე როგვა̈ ითქა̈რს: "ჯგრა̄̈გ
Line of edition: 6    ჯლიშ მა̈ლდია̈ნ, მა̈დილ ჯე̄რა! ალ ი ალ გვეშ ჩვე̄მმა ისკეთო̄ლდე̄დს, ღო ისგვი
Line of edition: 7    ლუნჯვა̈რ ახაკვრ მა̈ლდია̈ნ, იშგენ ნო̄სამა გვეშ ოხჩშა! " ეჩქანღო ქა̄ფხჟ̄რე
Line of edition: 8    სამდ თხუმქა, ღო ნე̄სგაქა ი ეჩქანღო ჰოკერქა ი ხოსგდი ქა ნაჴა̈დვ ჯლჲა̈რს. მჯლა̈ჲს
Line of edition: 9    ლახე ლა̈ხჭვედნი, ჟი როქ ხათერ ლუნჯვა̈რს, ტე̄ვას, კუმში კვა̈დს, საკა̈ცხს,
Line of edition: 10    დაგრას, ჰა̈ყბას, ლიდურვა̈ნის ი ხოლა̄მ ი ხოჩა̄მ.

Line of edition: 11       მჯლა̈ჲ ჲერვა̄̈ჲ ლი', ჩი̄ საბრალდ ხა̄რ ქორისგა.

Line of edition: 12       ნაქსევშვ ლიჯლა̈ჲე̄ლ ამჟი̄ნ ლი: ქა იკმუ̄ნეხ ჯო̄დი პინტს ი ჩვა̈ნშა̈ნიხ. ეჩანღო
Line of edition: 13    ჟ'აპურჭა̈ნჲე̄ლეხ, სგ'ა̄̈ჲე̄სგიხ უშკვმუყვ ი ხაფსტუნეხ: "ჯგრა̄̈გ ჯლიშ მა̈ლდია̈ნ!
Line of edition: 14    ალ ი ალ გვეშ ჩვე̄ ნემურჯო̄ლდე̄დს, ღო ნაქსევს ლახცხა̈მვინ ი ლა̈ჯიშს ლახკვიდინ! "
Line of edition: 15    ეჩქანღო ქა̄დ იკმუ̄ნეხ პინტს ი ნა̈კვიდ ლი ჰა ნაცხა̈მ პინტი ნაჯვდი ლნშანთე̄სგა,
Line of edition: 16    ეჩნუშ ესერ ხეჰვდიხ ლალთა̈რჲა̈ ლა̈ნშა̈ნ. ეჩი̄შ მა̈მ ხოხახ, ე ქა ლაბდჟი̄ნ
Line of edition: 17    პინტ ქა იჯოდუნი.

Line of edition: 18       ცხირშვ ლიჯლა̈ნჲე̄ლი ამჟი̄ნ ლი: მეჯლა̈ჲე̄ლ ქ'ა̄ჭა̄რვე სამ მუგუ პინტს, ეჩქანღო
Line of edition: 19    ისგდ ჟ'აკვშდენი ჩი̄. ალჲა̈რს სამ ა̈გიქა სგა ხაჭვენი ცხირს ი ნა̈შყვს ჩვა̈ნგჭე,
Line of edition: 20    ეჩქანღო უშკვთე̄სგ'ა̄̈ჲე̄სგი ი სგა ხოდე̄სგი ჯლა̈ჲს მა̄̈ჲ ხეჭკ̄რ'ე̄ჯას, ეჩქანღო
Line of edition: 21    ქა ხაფშგ̄რე ი ერხი პინტა̄̈რ ლახე ქა ხეფშგ̄რიხ, ეჯა ხოჩა ხოხახ.

Line of edition: 22          ლენჯა̄̈რ




Copyright TITUS Project Frankfurt a/M 1999-2000. No parts of this document may be republished in any form without prior permission by the copyright holder.