TITUS
Svan Chrestomathy (I: Upper Bal): Part No. 147

Text: 122 

Line of edition: 16

122. ქრისდე̄ ნაჭო̄ნ


Line of edition: 17       ხოშა̄მ ღე̄რბათ ქრისდედ ი სამა̄̈ლა̈შდ ლოხვბარჲა შვანს ი მაშრ' ა̈დგილს ლეყ უნზელა̄̈
Line of edition: 18    ლიშნა̈ვი. ფისრა̈ჲ სამა̄̈ლს შვა̈ნისგა ხა̈ხვჲე̄ნა ამი ლიშნა̈ვ ა̄ ლეყუნზელა̄̈შ,
Line of edition: 19    ი ქრისდეს იმრე̄თ, ლეჩხუმს ი ეჩხე̄ შვა̈ნს. ალჲა̈რ ნა̈შნაუნღო უშხვა̄რ იმვა̄̈ჲ ლა̈ხხო̄ლხ,
Line of edition: 20    ეჩქას სერ მინე გვეშ ქა ლუსრულე ხა̄რახ ი ჩუ მეფხეჟ ლმა̄̈რხ. ქრისდედ,
Line of edition: 21    დიდა̈ბ ლეჴედდ ი მა̈ლდშვ გვეშიდ, ჩვადშანვ' ე̄სნა̈რ მიჩა ფოყხა̈ნ ლეყუნზელა-ჲ
Line of edition: 22    ხოჩერო̄ბა. სამა̄̈ლდ ესნა̈რ ფისრა̈ჲდ შვა̈ნისგა გოწხირ, გოგლა̈ნდ, სანწვეფ ი ამკა̈ლიბ
Line of edition: 23    ვისინდობირ ხილ გარ ადშა̈ნვე.

Line of edition: 24       ამჟი̄ნ, ლელტხას, ლექვა̄̈ აშა̈რს, ქრისდე̄ ნაჭო̄ნმყ, უშხვა̄რ ლახხვი̄დხ ქრისდე
Line of edition: 25    ი სამა̄̈ლ ი ლა̈ხჭვედდახ უშხვა̄რ: "მა̈გვა̈რდ ესერ ოთშა̈ნვა̄ლახ მინე ლეშნა̈ვი
Line of edition: 26    ქვეყანაისგა ლეყუნზელა?" სამა̄̈ლდ ხა̄̈ქვ: "მიჩ ესერ გუნ ეზა̈რდ ოთშა̈ნვა მა̈გ".
Line of edition: 27    ეჩქას ქრისდედ ჩ'ოთჯრვე ი რა̄̈ქვ: "მიჩ ესერ ჲაღო მიჩა ფოყხა̈ნ ლეყუნზელა ი
Line of edition: 28    ხოჩა ხილ მა̈გ ჩ'ოთშა̈ნვა̈ ი ჟ'ესჭვე̄ნ. ალ ლაჭვე̄ნჟი̄ნ ქრისდე̄ ჰილვდ ბაჩვჟი̄ნ
Line of edition: 29    სგვებნე ჯა̈ბ ხაჴიდ ი მიჩა ნაზიმ (=ჯა̈ბიშ) ჟ'ესგნე. გა̈ნხა̈ნჩუ̄ნ შიშდ ხოჩა მაზვაბ
Line of edition: 30    ლა̈ხზვა̈ბ, ეჯჲა̈რ ათხეჲ ჩვა̈რიხ, ე ბა̈ჩ ი მაზვა̈ბ. ეჯა ლელტხას ლი, მაზა̄̈ში ჰოკერ
Line of edition: 31    შუკვისგა. ამჟი̄ნ ესნა̈რ სგვებინ ჯგრა̄̈გ ლახხვი̄დდახ ი ხა̄̈ქვ ქრისდეს: "მიჩეშდ
Line of edition: 32    ესერ სამა̄̈ლს ჩ'ოთღორვა, შვა̈ნისგ' ე̄სერ ხოლე̄რობა გარ ოთშა̈ნვა ი ლეყუნზელა
Line of edition: 33    მა̄მა".

Line of edition: 34       ქრისდედ ესნა̈რ ჩვადჭათვნე სამა̄̈ლ, მარე ღვეშდ ეში̄ მა̄მ, ე̄სჭო̄ნა ი შვა̈ნ ყუნზელურ
Line of edition: 35    ა̈მსედ.

Line of edition: 36       ეჩქანღო ამახვდ ესსიპე̄ნა ჯგრა̄̈გს სამა̄̈ლ ი ხვა̈ჲ ხოლ'ო̄ხვსახთა ჯგრა̄̈გი ბედ
Line of edition: 37    ჟი̄ნ, მარე ჯგრა̄̈გს ღე̄რბეთ ი მაცხვა̄̈რ (=ქრისდე) ხაწე̄ნა̄ლახ ი სამა̄̈ლ ქ'ოხვშდი̄ნახ.

Line of edition: 38          ლენჯა̄̈რ





Copyright TITUS Project Frankfurt a/M 1999-2000. No parts of this document may be republished in any form without prior permission by the copyright holder.