TITUS Texts: Svan Chrestomathy (I: Upper Bal)

TITUS
Svan Chrestomathy (I: Upper Bal): Part No. 161

Text: 136

Line of edition: 9

136. ლა̈კრი ლიგემ

Line of edition: 10       მეზგე ლახე იგმა^̄̈ლ, ეჩქას ჩიქე ბა̈ჩს, კირს, ქვიშა, ჭერს, დირს ი იშგენ ბა̈რგს
Line of edition: 11    ამა̄რე. ამი̄ ნამა̄რუნღო მა^̄̈ნკვი ხაკუჩ ერე ლა̈კირ ადგას. ლა̈კრი ლაგა̈მჟი̄ნ მეზგე
Line of edition: 12    ჴელვანა̈რნქა ნადა̈რსი იწვა̈ნი. ჰამს სგვებნა̄ვ ჰარა̈ყს ხა̈მზრიხ სოლომნს, ერე
Line of edition: 13    "ლა̈კრი ლაგა̈მჟი̄ნ ლემრცხად დო̄რ ა̈დსერის ი ხოჩა სტა̄რვინ ესხა̄რვნას ლა̈კირს".
Line of edition: 14    ჩუ იხე̄ვსა^̄̈ლხ, ჰარა̈ყს ჩუ ჲთრეხ ი ეჩანღო ჩიდ მა^̄̈ნკვი ხოშა̄მ ჯო̄დი ფათქს აბრჯეხ,
Line of edition: 15    ამის ხაჟხა გვემ. ალა ლი კირი ლაგა̈მ ი ეჩქანღო ჩუ ლშიხ კირი შედ. ფათქა̈
Line of edition: 16    ნაბრჯნღო სგა^̄̈ნჩუ გრკიდ აშხვ ალა̈ბზუმ ნაკლათხა ბა̈ჩა̈ ჴვილას ხაგემხ ი ეჩქანღო
Line of edition: 17    იბნეხ კირი ლიგემს. სგვებინისგა აშხვ ყო̄რჲა̄ქს ხა̈ჩოხ ი ხოშა̄მ ბა̈ჩა̈ ლაგა̈გია̈რს
Line of edition: 18    აკჩეხ, ეჩი̄ ჟიქა̄ნქა სგელ კას ხალფა̈რიხ. ლა̈კრი ლაგა̈მჟი̄ნ ჲერხი სგა^̄̈ნჩუ̄ნ
Line of edition: 19    ლგხ ი ინკვეხ ლა̈კირს, ჲერხი ქა̄მენისგა ხემშედა^̄̈ლხ. ჟი ინი̄კვი, ეჩქას სგა^̄̈ნჩუ ეშხუ
Line of edition: 20    მა̄რე გარ სედნი. გუნ ჟი ნეკვნი ი ჟი იხუ̄პი ლა̈კირ, ეჩქას სგა^̄̈ნჩუ̄ნ მერდა
Line of edition: 21    თხვიმ გარ ხოწვა, ეჩქანღო შიჲა̈რ გარ ი ღვეშგმეპილს ნე̄სგანჩუ̄ნ თალს ხატყციხ.
Line of edition: 22    კლთხი ჰერს და^̄̈რ მოშ იკედ ლა̈კრი ლა̈ნკვაჟი̄ნ ი სგა^̄̈ნჩუ̄ნ მერდა მასა̈რდ
Line of edition: 23    ლემყა̈ლვ ხა̄რ, ეჯღ' ე̄რე ლა̈კირ ლახ სგა̄თრეღვნი, ეჩქას სგა^̄̈ნჩუ მერდე ჩუ ილტნი.
Line of edition: 24    ამღა ლა̈კრი მგა̈მდ გუნ ლხა̈ლ ი ჩუ ხეხლი ხოჩა̄მდ ლიგემ, ეჯა გარ ხაშდბა.
Line of edition: 25    თალა̈ ნა̈ყირუნღო სერ მა̈ზუმვა^̄̈ჲ ხეღვე̄ნი მეზგა კირ, ეჩზუმს ჩი̄ ჟიქა̄ნ ჟი ხა̈შდეხ.
Line of edition: 26    კირ ჩუ შდეხნ', ე̄ჩქას ჟიქა̄ნ ჯვა̈რს ხოსყე̄ნეხ ი სერ ჟი იშვმინეხ. ეჩქანღო
Line of edition: 27    ეშხუ ქორა̈შ სგ'ა̄დ ღრი ლა̈კირთე̄'სგა. აშხვ ბოთლიკ ჰარა̈ყს ჟ'ი̄დ ხა̈მზრი სოლომნს
Line of edition: 28    ი ეჩქანღო სგა^̄̈ნჩუ̄ნ ლემასგვ ა̄შვე. ლემასგვ ქ'ა̄ღუზე ი ეჩქას ჟი ჴედნი ი
Line of edition: 29    ალ ნათხუმ ჰარა̈ყს მა̈გ ჩუ ითრეხ. ჲერვა^̄̈ჲ ლა̈კრი მგა̄ლა̄ ი̄რიხ, ეჯჲა̈რს ნა̈ჭმუნდ
Line of edition: 30    ლემზრა̈ლ ხუღვეხ.

Line of edition: 31       ამ ლადა̈ღ მელკირა^̄̈ლ მეზგა ლელკირი მხე̄რხად მესვფელა^̄̈ ხოხვრა^̄̈ლ მა̈გ
Line of edition: 32    ხაწახ. ჲერხი ლელკირს აქვცუ̄რეხ ხერხარშვ, ჲერხი აშხრ̄რეხ ი ჲერხი შიდეხ ლაკირთე̄'სგა
Line of edition: 33    ჩუ ლუქვცუ̄რა კუდრა̈რს. ლა̈კირ ქა იღუ̄ზი ი ჰა̄ლ მოშ ხემჟვეღი, ეჩჟი̄ნ
Line of edition: 34    შიდეხ ლელკირს. ლახე სგა^̄̈ნჩუ̄ნ უშხვა̄რ ხებვეგიხ ლელკირა̈რ, ეჩქას ჯო̄დი
Line of edition: 35    კეტარშვ ჩვაყლუ̄რეხ ი წესდ არდვნეხ. სა̈დლობა̈ დვრევჟი̄ნ ლა̈კრი მგა̄ლა სგა
Line of edition: 36    ღრიხ ქორთე ი ჩუ იხრჯა^̄̈ლხ. ამლა̈დღიშდ ი ამ ლე̄თიშდ მელკირა^̄̈ლ მეზგა ლა̈ჲსა^̄̈ლ
Line of edition: 37    ხო̄გ. ნა̈სდილობენ ჟი იშვმინეხ ი სერ ლა̈კრი მგა̄ლას ლა̈დი მა̄მგვეშ ხოწივხ.
Line of edition: 38    ხოხვრა^̄̈ლ იმქრა^̄̈ლხ ლელკირი ლაჭკვრას, ლაშხრ̄რას ი ლა̈კირთე̄სგა
Line of edition: 39    ლიშდეს.

Line of edition: 40       ჩუ იბვრ', ე̄ჩქას კალვისგა ლმშხილს გემხ ი ეჩხა̄ვ ხეთვეფხ. ჲერვა^̄̈ჲ ლმშხილს
Line of edition: 41    ქა ხატყცი, ეჯა ეზერდ ხაბჟახ.
Page of edition: 108 Line of edition: 1    ლმშხილ ხაჟხა ე̄ჯას ე: ყა^̄̈რს ნე̄სგაისგა ქა ხატა̄ბეხ ეჩეჟი̄ნ, თვეთნაჟი̄ნ, შიხშვ
Line of edition: 2    მურგვალ აბზი ნაზიმ ნიშა̈ნს ხა̈გნეხ. ვახშმობა̈ დვრევ ჴედნ', ე̄ჩქას ალ მეზგა იშ
Line of edition: 3    გენ ლწსა^̄̈ლი ხორიხ ი სგაღრიხ ქორთე ლახრჯა̄ლდ. ბა̄ზი ხეკვეს ერე გუნ ლითრე
Line of edition: 4    ლესვ. მერდა̄ლას ი ლწსას მასა̈რდ ხო̄ზხ სგვებინჩუ̄ნ ლეღვ ი იშგენ ხოჩა
Line of edition: 5    ხა̈რჯ. ლითრ' ე̄ჯკა̈ლიბდ ლ' ე̄რე ისგლე̄თს ქა ხოქა^̄̈ბი, მა̄დეჲ ჩუ ირჰი, ეჩქას გარ
Line of edition: 6    იგნა^̄̈ლხ ჟი.

Line of edition: 7       ქა^̄̈მ ლა̈კირცახა̈ნ მერდა̄ლას ჰარყი ნა̈ჭმუნ მასა̈რდ ხუღვეხ, ეჯჲა̈რსი ხა̄რხ ლიხი̄რულ
Line of edition: 8    ი ხოჩა ლარდა. მე̄რმა ლადა̈ღ მესვფელა ჩუ ფხეჟნიხ ი ქორა̈შ გარ ხაშდბა
Line of edition: 9    ლა̈კრი ლიშხის, მარე ობა̈შინ აჯაღ ჴედნიხ მუმურჯვა ი ეჯჲა̈რ აჯაღდ ხომურჯვიხ
Line of edition: 10    ლელკირი ლახე̄რხას.

Line of edition: 11       ლე̄თი̄ ნათუნ მა̄რა^̄̈ლ გვიანდქა ჟი იგნა^̄̈ლხ ი ჩუ̄დ ისგვრიხ სა̈დილდ. ლა̈დი
Line of edition: 12    აჯაღდ ხა̄რხ ხოჩა ბედ ი ხინ ი ნა̈ბოზს, ესვა^̄̈ჲ ხა̈ჲმედა, ხომურჯვი ლა̈კრი ლა̈შიხს.
Line of edition: 13    ლა̈კრი კა̈ცხჟი̄ნ ერ ჯვა̈რი̄ლს ხაჴლეხ, ეჯა ლახე ჩუ იშხი, ეჩქას ლა̈კირი ლშიხ
Line of edition: 14    ლი.

Line of edition: 15          ლენჯა^̄̈რ

Copyright TITUS Project Frankfurt a/M 1999-2000. No parts of this document may be republished in any form without prior permission by the copyright holder.