TITUS Texts: Svan Chrestomathy (I: Upper Bal)

TITUS
Svan Chrestomathy (I: Upper Bal): Part No. 162

Text: 137

Line of edition: 16

137. ლილგიმა^̄̈ლ ჯვინალდ შვა̈ნისგა

Line of edition: 17       მეზგე ლახ ლილგიმა̄ლს ხემურჯა̄ლ, ეჩქას ძღდ ლემა̄რა^̄̈ლ ხა̄დ ი ხვა̈ჲ ბა̈რგ-ნაბა̈რგ
Line of edition: 18    ი მასალა ხა̄დ ლემა̄რე, ეჩნქა ნამშა̈ი ხა̄დ ლეთმე ი ლემა̄რე მელგიმა̄ლეშ,
Line of edition: 19    ნადრეშ ი მიჩა ხა̈რჯდ, ადო ეჩურ ღალ მა̄მ ხოყა^̄̈დ.

Line of edition: 20       ნა̄თა̄ლვ მა̄რა ლახე სადგვემ მო̄გვეშ ხეხო̄ლდა, ეჩქას მა^̄̈ნკვი ქორ ხა̄დ ლეგემ,
Line of edition: 21    ადო ეჩურ იშგან სადგვემი ლიგემს მა̄მ ხოყა^̄̈დდა. ჩიდ მა^̄̈ნკვი მეზგე ბა̈ჩს ამა̄
Line of edition: 22    რა. ბა̈ჩს ეჯჟი̄ნ ამა̄რა მეზგე, იმვა̈ჲხა̈ნ ხოჩა ლამარჯვ ხა̄დ ლითმე ი ლიჴდე. ჲერხი
Line of edition: 23    რიყისგა ანზო̄რახ ბა̈ჩს, ჲერხი ეშ იბრჯახ ი ჲერხი, ლახ ეჯკა̈ლიბ აგის ი სოფელს
Line of edition: 24    ლა̈სვ, ეჩქას ეშ იკვშა. ქამა̄რა ბა̈ჩს ერ ჟ'ამა̄რა მეზგე, ეჩქას კირს იკვშა. კირი ლა̈კ
Line of edition: 25    ვშა კოჯა̈რისგა ლი. ჲერხი სოფელს ეჯკა̈ლიბ კოჯა̈რ ლიხ კირიშ, ერე ივალადა̈ღ
Line of edition: 26    და^̄̈რ მოშ ხა̈შთხე. ჲერხი სოფლა̈რისგა სბენდიკს იბრჯეხ.

Line of edition: 27       იმვა^̄̈ჲ სოფელისგა დო̄ჲ კირ წვა ი დო̄ჲ სბენდიკ, ეჩქას მე̄რმა სოფელთე ღრიხ
Line of edition: 28    კირი ლა̈კვშათე ი მა̄დეი სბენდიკ ლაბრჯათე. ჲერხი მეზგე მე̄რმა მესვფელხა̈ნქა
Line of edition: 29    ჟი იყდი ქა მეკვშა კირს.

Line of edition: 30       ქა მეკვშე ჲორი ლა̈კრიშ კირ ხაჯეშ ეშხუ ფირვმიშ. ქა მეკვშა კირს მეზგე გალ
Line of edition: 31    დამშვ ჴიდე ქორთე. გალდამ ამის ხაჟხა: სოფელისგა მეზგე თვით სა̈ვ-ჩავ ქა მეკვშა
Line of edition: 32    კირს მა̈გ ხოჴდე მელგიმა^̄̈ლ მეზგა. ალა ჩიჲაშდ ლეჩვმე ლი, მარე კირი ლიჴდე
Line of edition: 33    ბა̈ჩა̈ ნა̈ჴიდუნღო გარ ლი. ბა̈ჩს, ჟი ლმა̄რანღო, ჩიგარ ჴიდე მეზგე ი ხათერ, ერე
Line of edition: 34    სერ ქა ხა̄რ, ეჩქას ჰაჯს ხაკედ ამი̄ ლიჴდეს. ეჩქანღო ქვიშე̄მი ლამა̄რათე ღრი,
Line of edition: 35    ქვიშა ჭალი პილჟი̄ნ ამა̄რე. იშვა^̄̈ჲ მასა̈რდ ხონხა ჭალი პილს ქვიშე. ეჩეჩუ̄ნ ჴანრე
Line of edition: 36    ლიგნე გარ ხაკუჩ, იმვა^̄̈ჲ მო̄დე, ეჩე მო̄შ-მო̄შ ნუკვიშდ ამა̄რეხ ქვიშა. ჲერ ფათქს
Line of edition: 37    აბრჯე, ეჩხა̄ვთე̄'სგა მა̄დხვა̈ჲ ლლჰენდს ხოფშვდე ი ქვიშე ფათქისგა სედნი, ფათქ
Line of edition: 38    ჟი იგვშილი ქვიშოვშ, ეჩქას ამის ჟი იკედ ლა^̄̈ხირშვ ი პილჟი̄ნ დე̄სგი. ეჩქანღო
Line of edition: 39    სგა̄დ ხოფშვდე ლლჰენდს ი სერ ამჟი̄ნ, ოდე ქამა̄რა ქვიშე ჟი დო ინზვე̄რი. ჲერხი
Line of edition: 40    იქი აქ ქოჩო̄ლა̈რს ანზო̄რე ქვიშე̄მიშ ი ეჯჲა̈რს აშხვ ა̈დგილთე̄'სგა ჟ'აყვბე.
Line of edition: 41    ამჟი̄ნ ქამა̄რა ქვიშე ჟი ინზვე̄რი, ეჩქას ქვიშაჲ გალდამშვ ჴიდე მეზგე. ჲერხი სოფელს
Line of edition: 42    გალდამ ლა̈ჴდაჟი̄ნ მა̄მგვეშ ხაზნა ხარჯ ი ამკალიბ. ჲერხის გალდამჟი̄ნ ლა̈-
Page of edition: 109 Line of edition: 1    ჲსა ხა̈მთქვა ი რიჰდ მოგლდამას ი მელგიმა^̄̈ლ მეზგა ხოჩა ხინ ი ხიად ი ლიზვებ-
Line of edition: 2    ლითრე ხა̄რხ.

Line of edition: 3       ალჲარე ლიჴდა̄ლუ ა, კირიშ ი ქვიშე̄მიშ, მეზგა ლემა̄რე ნარ ლელკირ ი ეჯა̄ჲ
Line of edition: 4    აგითე ლეჴდე, ლელკირდ ეშხვ-ა̄შირ მეგემ ჟი ხაკუჩ მეზგა. ეჩნქა ჟი ლემა̄რე
Line of edition: 5    ხა̄რ: დი̄რ, ა̄ღ, ჭე̄რ, ი ყა^̄̈რ.

Line of edition: 6       ალჲა̈რს, ა, ქა მა^̄̈ჲ გვი̄ქვა, მეზგე ჟ'ამა̄რე, ეჩქას მეზგე ჴელვანა̈რს იგნე. ჴელვა̈ნ
Line of edition: 7    ხაჟხა, ქორა̈ ლიგემ ი ლილგიმა^̄̈ლ ჲესვა^̄̈ჲ ხოჩა̄მდ ხოხალ, ეჯას. მეზგე ლახე
Line of edition: 8    ლფშირ ლა̈სვ, ეჩქას მიჩოვშ ამა̄რა, მა^̄̈ჲ ლილგიმა̄ლე̄შდ სა̈ჭირო ლა̈სვ, მა̄დეჲ მასალა
Line of edition: 9    ლამა̄რათეჲ ჟი იგნა ჴელვა̈ნს, მარე ნა̈ლგიმა̄ლვირ ღალ ხოშა ხეკვა̈დ.
Line of edition: 10    სამწხვ ბა̈რგ ი მასალა ჟი იმა̄რო̄ლდა, ეჩქას მა^̄̈ნკვი ლა̈კირს გა̈მდა მეზგე.
Line of edition: 11    ლა̈კირ ლაგა̄მთე ჲესვა^̄̈ჲ ქა ხა^̄̈ქვნინა მეზგე, ეჯა მა̈გ ქა ხომა̈რჯვდა.
Line of edition: 12    ეჯა მა̄დეჲ ჲერხი ხოხვრა^̄̈ლ ქა უ̄ქვადი ქა ჴედენდახ ლელკირ ლაჭკვრათე ი კირი
Line of edition: 13    ლა̈ბშათე.

Line of edition: 14       ჩიქე ლა̈კრი ფათქს აბრჯახ, მა̈ზუმვა^̄̈ჲ ქა მა̄რად ხებჟა^̄̈ნხ, ეჩზუმს, ეჩქანღო
Line of edition: 15    ძირხა̈ნჟი̄ნ გრკიდ ფათქს ბა̈ჩა̈ ფიკვი ჴვილას ხა̈ცხპახ, ეჩეჟი̄ნ კირი ლიგემს იბნახ,
Line of edition: 16    ჲორი სგა^̄̈ნჩუნ არდახ მგა̈მდ ი ჲო̄რი ქა̄მენჩუ̄ნ, იშგენ კირს ხა̈ბშახ. ლა̈კრი
Line of edition: 17    ლიგემ ისგთეჟი̄ნ ჟი ჴედენდა, ეჩქას გა̈რგლას და^̄̈რ მოშ იჩომდა, ეჯღა ერე კლთხი
Line of edition: 18    ჰერს ესერ ლა̈კრი ლაგა̈მჟი̄ნ, ლა̈კრი ლირეღვ ხოხალ. ამჟი̄ნ ქვინ უკი̄დად ი
Line of edition: 19    ლაჴუნჩულა̄ლუშ გა̈მდახ ლა̈კირს. ღვეშგმავ ეშხვი გარ სედენდა სგა^̄̈ნჩუ̄ნ ლა̈კირისგა.
Line of edition: 20    ლა̈კირ აშ გარ ისკრო̄ლ ი ინხუწო̄ლდა ჟიბა̄ვ. სგა^̄̈ნჩუ მერდე თხვიმს ჩუბა̄ვ
Line of edition: 21    ა̈ჲა^̄̈სგდა ი ტოტარშვ გარ იგჭა ჩუ ნაცხატვ კირს. ღვეშმე პილს ქა̄მენ მგემ
Line of edition: 22    ცუყვბას, სკრა̈ კირს, ხა̈ჩხინა ჟიქა̄ნჩუ̄ნ ი სგა^̄̈ნჩუ მერდე ქა ჴედენდა ქა̄მენთე,
Line of edition: 23    მარე მაყალშვ ღალ ჰა̈ბ ქა მეჩდე ხა̄დ. ათხე სერ ლა̈კირ სგა ლეძგვა̈ბდ ლემყა̈ლვ
Line of edition: 24    მა̄მ ლა̈სვ ი მა^̄̈ჲ კირ ქა̄მენჩუ̄ნ ჩუ ირდო̄ლ, ეჩას ჩი ჟიქა̄ნ ხა̈შდახ. კირი ჩუ ნაშდა̈ხუნღო
Line of edition: 25    ლა̈კრი კუნჭილჟი̄ნ ზექი ჯვა̈რს ხაჴლახ. ლა̈კირს სკრე ხეფსო̄ლდა.
Line of edition: 26    ამი̄ ქა ნასრულუნღო (\\ ნაზგრუნღო), ქორა̈ მახვში აშხვ ბოთლიკს, ი ჲედ-ხოხვრა̄მ
Line of edition: 27    სტამა̄ნი̄ლს ჰარა̈ყს შნ ა̈ჲა^̄̈სგდა ი სგა ღრდა ლა̈კირთე̄'სგა. ეჩე̄'სგა ჟი
Line of edition: 28    ხა̈მზირდა ამის ი სამ ლემზირს სოლომნს ი ხეჴ̄რა̄ლ ხოჩა̄მ სევს ი ჰაჯს ი ზგრი
Line of edition: 29    ლიცხპეს ლილგიმა̄ლეშ. ეჩქანღო ბოთლიკს ქა̄მავ ხა̈ბშა. ქა̄მენჩუ მერდა̄ლა მუტვა̈რ
Line of edition: 30    მუგვა̈ლს ი ნეცინდ ლცლ̄რა ფრი ზექა̈რს ხა̈ბშახ, ალა სგა^̄̈ნჩუ ლემასგვ ა̄შვა ი
Line of edition: 31    ეჩქანღო ქა ჴედენდა ქა̄მავ. მე̄რმა^̄̈ლ ქა ლუღუ̄ზა ლემასგვთე ნეცინდ ლცლ̄რა
Line of edition: 32    ზექა̈რს შიდახ. ალჲა̈რს გუნ ჟი ხებდინო̄ლდახ, ეჩქას ხონგრა̄მ ზექა̈რს შიდახ ამხა̄ვთე̄'სგა
Line of edition: 33    ი ამჟი̄ნ ქა̄ღუზახ ბგიდ ლა̈კირს, ხოშა^̄̈ლ ი ლა̈კრი მგა̄ლა, ალ ჟი ნა̈მზურ
Line of edition: 34    ნათხუმს ჩუ ჲთრახ ი ხემზირდახ სოლომნს ხოჩა̄მ სევს ი ჰაჯსი ზგრი ლიცხპეს.
Line of edition: 35    ამჟი̄ნ ხა̈რჯი ჟი იმა̄რო̄ლდა ი ქორშა̈რ, ჴელვანა̈რ ი ნადა̈რ სგა ღრდახ ქორთე
Line of edition: 36    ლახრჯა̄ლდ. აშ ქა უწსად მეჴდა̄ლა ლა̈კირს ხო̄შვახ ლემასგვ ი ჲერხი ლელკირს
Line of edition: 37    ახე̄რხახ.

Line of edition: 38       ქორისგა მერდა̄ლას ტაბა̈გთექა ლეღეს, ქუთვა̈რს ი იშგან ხოჩა̄მ ხა̈რჯს ხოჴდახ.
Line of edition: 39    ნა̈დჲარობენ ლა̈კრი მგა̄ლა ეშ ი აშ ღრდახ ი ჟი იშვმინახ ნა̈ბოზდ. ლა̈კირს
Line of edition: 40    სოფლი ხოხვრა^̄̈ლ ხო̄ზნა̈ნდახ. ალჲა̈რს ჰარა̈ყს ხოჴდა მეზგე ი ჲერვა^̄̈ჲს ხეკვა̈დ თრა.
Line of edition: 41    ჩუ იბვრო̄ლდა, ეჩქას მახეღვაჟა̈რ ყა^̄̈რჟი̄ნ ლმშხილს ხა̈გნახ ი აშხვ მუხვირისგა
Line of edition: 42    ჩუ გა̈მდახ, გა̈ნხა̈ნჩუ̄ნ მუგვა̈ლს და^̄̈სგდახ ჟი მუტვა̈რს, ერე ლმშხილ ხოჩა

Copyright TITUS Project Frankfurt a/M 1999-2000. No parts of this document may be republished in any form without prior permission by the copyright holder.