TITUS Texts: Svan Chrestomathy (I: Upper Bal)

TITUS
Svan Chrestomathy (I: Upper Bal): Part No. 221

Text: 181

Line of edition: 33

181. გულქანა̈ჲ ი გა^̄̈ბი̄ლ

Line of edition: 34       აშხვ სოფელისგა ლმზიგ გა^̄̈ბი̄ლ. ეჯკა̈ლიბ ხოლა მახლიშ ი ბაქარა̈ჲ ჩუ ლმა^̄̈რ,
Line of edition: 35    ერე ჟი და^̄̈რ მოშ ხა̈წნო̄ლნა. ჩუ ხათრონა ჩი̄ს, ერე ამჟი ბაქარა̈ჲ ლმა^̄̈რ, მარე
Line of edition: 36    ეჯღა^̄̈ჲ ჩი ჩუ ხაღვროვა̄ლა, ჩი̄ მიჩა ლი̄ქვს ჩუ ხაჩვმა^̄̈ვნუნა. ღვეშგმე პილს ჩი̄
Line of edition: 37    ჟ'ოხთო̄ნა მიჩა ხოლა მახალ, მა̈გ გუდ ა̈მჴედ მიჩა ლიღვროვა^̄̈ლს ი ჩუ და^̄̈რ იმის
Line of edition: 38    ხაჯრა̈ვნა. თმ' ა̄ხჴედა მიჩ გარ ი ა̈მჩედე̄ლი მე̄რმა სოფლა̈რთე "ჰ'ა^̄̈რ ესერ ხეთხი
Line of edition: 39    ლეღვროვა^̄̈ლ". ოთზელა̄ლა მო̄შ-მო̄შ სოფლა̈რ. ჩიდ ჩვოთღორვა. ლიღვროვა^̄̈ლს
Line of edition: 40    მა̈გ გუდ ხა̈ჴდა̈ნვნა ი ლარდა მა̄მ ხა̄რა, ეჩქას აჯაღ ლმა^̄̈ზ მე̄რმა სოფელთე. ამჟი
Line of edition: 41    ლაზელა̄ლჟი̄ნ ათჴა̈დ̄ნე̄ნა ესნა̈რ აშხვ სოფელთე ი ბაზი აშხვ მეზგა ლა̈ხმუშგვრა^̄̈ნ.
Line of edition: 42    ლა̈დჲარა̄ლჟი̄ნ ესნა̈რ ლა̈ხჭვედდა მიჩა მა̈ინძელს: "მა̈გვა̈რ ესერ ზაობ ა̈მჴედ
Page of edition: 156 Line of edition: 1    მინეშმყ ამზავ?" ამნე̄მ ლახტიხ: "მა̄მ' ე̄სერ ხა̈ცხი̄დო̄ლნ' ე̄ჯღა^̄̈ჲ-ეჯღა^̄̈ჲ". "ბაქა̈რს
Line of edition: 2    ესერ მაგვა̈რდ იმჴერიხ ამეჩუ̄ნ?" "ბაქრე მე̄მბვა̄ლდ ესერ გულქანა̈ჲ ქა ხა̄რხ. მინს
Line of edition: 3    ესერ ში და^̄̈ს ხაკუხ ბა̈ქი ლი̄ქვი̄სგთე. ჩიჲა̈ მქაფდ ესერ ქა ლ' ე̄ჯ ზურა̄ლ". "სერ
Line of edition: 4    ესერ ხასმა ჲა̈რ̄ მებქარა^̄̈ლ?" "ხასმ'ე̄სერ ეშხუ მა̄რე გა^̄̈ბი̄ლ, მარე ეჯ' ე̄სერ ჯვედჲას
Line of edition: 5    იზგე ი მა̈ჲ ესერ ხოხალ ხედა დვა^̄̈ხწინიხ". "იმ' ე̄სერ იზგე ეჯ გულქანა̈ჲ?" ალ
Line of edition: 6    მა̄რე̄მ ქა ლახთო̄ნე, იმვა^̄̈ჲ იზგ' ე̄ჯ გულქანა̈ჲ. ბა̄ზი ჩვასა̈დ ამეჩუ̄ნ ი მე̄რმა ლადა̈ღ
Line of edition: 7    ლა̈ხმუშგვრა^̄̈ნ გულქანა̈ჲს. გულქანა̈ჲდ ტაბა̈გ ოსგე გა^̄̈ბი̄ლს ი ტაბა̈გჟი̄ნ ჩუ მა̄მგვეშ
Line of edition: 8    ესვდე. ოხღელი გა^̄̈ბი̄ლ ლეზობ ი ლახე ჩუ მა̄მგვეშ ესვდე, ეჩქას ლა̈ხჭვედდა: "ხიად,
Line of edition: 9    მინეშმყ ესერ ტაბგა̈რ იმ ათვეხ?" "იმ ესერ ი ჟი ლა̈ხტყი̄რ ი ეჩქას ესერ
Line of edition: 10    ქუთ-ჭიშდვა̈რს ეშ ხა̈ცხვია̄ლვნე". გა^̄̈ბი̄ლდ ა̈ნწვე̄ნე ტაბა̈გ, მარე ფიცა̈რ გარ ლა̈სვ
Line of edition: 11    ი ჟი იმ ოხვტყი̄რნა. ჩვასა̈დ ამჟი̄ნ უდჲარად გა^̄̈ბილ. გულქანა̈ჲდ ჟ'ოხვეცხ ტაბა̈გ
Line of edition: 12    ი ლა̈ხჭვედდა: "მაგვა̈რდ ესერ ხა̄რა ღალ? მე̄რმაჟი̄ნ ესერ ხოჩე̄ლ მეხო̄ლი̄ვ ხა̄რ".
Line of edition: 13    "ხოჩა გუჟი̄ნ ესერუ ხორი მიჩა თხვიმ! ამთა̄ნ ტაბგობ ესერ ელოლა̈იშ ი გელოლა̈ჲ
Line of edition: 14    ნე̄სგ' ე̄სერი მა̄მ ხა̄რ, ა̄დო იშგნა^̄̈გ ესერ იმე ხე̄რო̄ლ". "ეჯ' ე̄სერ იმე ლიზ ე, ელოლა̈იშ
Line of edition: 15    ი გელოლა̈ჲ ლახვ?" "ეჯ' ე̄სერ ჯვე̄დიას". "მა̈ზუმ ესერ ხე̄ზნი?" "მა̈ზუმ ი
Line of edition: 16    ამნეშ ი ეჩავ ხოზი, ამზუმ". "ძღდ შუკვ ესერ ლმა^̄̈რ. შდავალშვ ესერ ადჰე̄სგი
Line of edition: 17    მოშ მა̄რე აშხვ ლადა̈ღ ეჩავ?" "მასა̈რდ ესერ, მარე ჰა^̄̈ღვირდ ესერ ეშდჲორი ჴა̈ლ
Line of edition: 18    ბერჟა̈ ნა̄ჭა ხაკუ, ჰნგირდ _ უშბა^̄̈ კა̈ცხ ი მდრა̈ჴდ _ ჰე̄რვია^̄̈ ლანგა̈ვ, ავჟანდა^̄̈რდ
Line of edition: 19    ესერ ლაბრა̈ჴიშ ი უღვირი თანღა̈რ ხაკუჩ ი მსრთავა̈რდ _ კა̄ლა̈ ჭალა̈ჲ ი
Line of edition: 20    ლენჴერა". "ლახე ესერ ადრინე მა̄რე, თხუმჟი̄ნ ლეგა̈მდ მა̈ჲ ა̈ხკვედნი?" "მა̄რ'
Line of edition: 21    ე̄სერ ფაყვ მა̄მ ხაკუჩ. ბიქვ ესერ თხუმ ეჩჟი̄ნ ჩუ ხოწრა̈ნ', ე̄რე ზისხი მაჯო̄ნდ".
Line of edition: 22    "ელოლა̈იშ ი გელოლა̈ჲ უშხვა̄რ ნე̄სგ' ე̄სერ გუნ ტებდი ლია?" "ფაყვა̈ ლიგემ
Line of edition: 23    ესერ მა̄მ ლი წეს". "ჲაღვ' ე̄სერ ჯ'ა̄დრი ჩიქე შდავალ ლარმეჲთე". ხა^̄̈ქვ ზურა̄ლდ.
Line of edition: 24    გა^̄̈ბი̄ლ ქორს აცვირ ი ჯა ქა^̄̈მთ' ა̄ჩა̈დ. ანჴა̈დ გა^̄̈ბი̄ლ, ჩვადკარე თში̄ნგ, ქ'ა^̄̈ნკიდ ამხა̈ნქა
Line of edition: 25    თა̈შ ი იდჲარა^̄̈ლ ი ჩვესდე ტაბა̈გჟი̄ნ, სგ'ა̄ჩა̈დ მარა̈ნთე, ქ'ა^̄̈ნგვეშ ეშხუ ფაკა̈ნ
Line of edition: 26    ჰარა̈ყ. ალა̄ჲ ჩვესგე სგვებინჩუ̄ნ. ჩვა̈დდი̄რა^̄̈ნ ი ჩვა̈დშდმა^̄̈ნ ი ხოჩა̄მ გუჟი̄ნ ა̈რი,
Line of edition: 27    ტაბა̈გ მიჩ' ა^̄̈დგილჟი̄ნ ესგე. ამჟი̄ნ გულქანა̈ჲ ანჴა̈დ. გა^̄̈ბი̄ლ ლა̈ხჭვედდა: ოხურმ'
Line of edition: 28    ე̄სერ მა̄ შდავალ?" "ა̄დვ ესერ, მარე ჩვე̄სერ დე̄მჟი მოშ ხაბემ. ფა̈თვა̈ კალშვ ესერ
Line of edition: 29    ოთბა ჩუ, მარე დო̄ვ ესერ ჟ'ა̈ნქვიც. მა^̄̈დილუ ხე̄რა, ჯ'ე̄სერ ლერქვა̈რს ლა̈ჲცა^̄̈დნე,
Line of edition: 30    ეჩქად ესერ სგა̄ვ ლოხგუდირდა ქა^̄̈მ". გა^̄̈ბი̄ლ ჟ'ან̄გა̈ნ ი ქა^̄̈მ მა̄ჲ ესხო̄ლ. ლა̈ჲწვე̄ნე
Line of edition: 31    გულქანა̈ჲდ თში̄ნგ ი ალა ჰა̈რი ლიზ. გვი ვეთ ოთხა̈პ ხრშვ, მარე ჩვადჭკრნე.
Line of edition: 32    გა^̄̈ბი̄ლ სგ'ა̄ნჴა̈დ ი ხა^̄̈ქვ ზურა̄ლს: "მიჩა შდავალს ესერ ჰნგირ ჩვოხკვარა ი ჯა
Line of edition: 33    ქ'ა^̄̈მპერე̄ლი. ჰნგირს ესერ თე̄ვ ლახხვეტ, ადო ჩუ ნო̄რდ ადყუჩუ̄რას". "ნომმა̄ვ
Line of edition: 34    ესერ ღედ ხა̄რ. ალ ჰნგრი ყუმბა̈რ ჩუქვა̄ნ ესერ ჯა მაზვა̈ბს ახზვა̈ბნი ეჯგვა̈რს,
Line of edition: 35    ერე ლჯად ხოჩა ლესვ". "იმჟ' ე̄სერი?" "იმჟ' ე̄სერი ი მხა̈რ ჰამს ა̈ნჴდენი, ეჩქას
Line of edition: 36    ხეწდენი. ბა̄ზ' ე̄სერ მიჩ ნახმუ̄რ კიბდვენ ხა̄რ ლეშყვდი ი მა̄მ ესერ ხოჟიბ. ათხ'
Line of edition: 37    ე̄სერ ჯა მიჩა შუკვსუ აჩა̈დ ი მხა̈რ ჰამს ესერ ლჯე̄მი სარაგს ლახთრე ი ლა̈დი̄შ
Line of edition: 38    შგვირს ქა ლა̈ჲტიხჲე̄ლი, ადო ხოლა̄მდ ესერ ესო̄ზი. დე̄ჲ ესერ ლეზვებ ხო̄მა ი დე̄ჲ
Line of edition: 39    ლეთრე ხო̄შვა". გა^̄̈ბი̄ლ ჟ'ანგა̈ნ ი ლე̄თი̄ ნარდვ მეზგათე̄დ ატა̈ხ. ალ მა̄რე ლა̈ხჭვედდა:
Line of edition: 40    "მაგვა̈რდ ესერ ახშდაბა გულქანა̈ჲ?" "სურუ ხოჩა̄მდ ესერ. თვეთნა ჴა̈ნი
Line of edition: 41    ლეღვ, დია̈რ ი ჰარა̈ყ ესერ ეშ ესვჰარა ი ბა̈ქ ესერ მა̄მ ხახლე̄ნა. ქ' ე̄სერ მა^̄̈ჲ ხო̄ქვა,
Line of edition: 42    მა̈გ ტკიც გარ ესერ ხო̄ქვა ი ბა̈ქდ ესერ მა̄მგვეშ ახჴედა". ალ მა̄რა გუნ ათნბაჟნ.
Line of edition: 43    ბა̄ზ' ა̄ნჴა̈დ გულქანა̈ჲ ი ნა̈დიჲარობენ თშინგთე̄'სგა ციცვ ადგენე, ეჩქანღო

Copyright TITUS Project Frankfurt a/M 1999-2000. No parts of this document may be republished in any form without prior permission by the copyright holder.