TITUS
Svan Prose Texts I (Upper Bal)
Part No. 97
Previous part

Text: 104 
Page of edition: 202 
Line of edition: 16 
104. ნაღუ̂ჟურ


Line of edition: 17       ლჷმზჷრე̄უ̂ ხიშდ ი ხეხუ̂-ჭა̈შ. ხეხუ̂-ჭა̈შ ლიხ ეჯჟი დიდა̈რ, ერე
Line of edition: 18    ალ ქუ̂ეყანას ალჲა̈რზუმ დიდა̈რ მა̄მა ა̈რი, მარე გეზალ მა̄მა ხაყახ.
Line of edition: 19    ღე̄რბათს ი მა̄რას ჩი̄ გეზალს ხეჴჷ̄რა̈̄ლხ. ესგე გა̈ჩა̈ კა̈ცხ მიჩა კეთილს,
Line of edition: 20    ხჷნსგა ჯუ̂იდღა ი საკმე̄ლღა აჰედ, ლა̈კირ ადგე ჯუ̂იდიშ ი
Line of edition: 21    საკმე̄ლიშ ღერთა̈ ლაჴჷ̄რა̄ლს: "ნო̄თაუ̂ როქ გეზალ ხათხე̄ლნე" [მარე]
Line of edition: 22    ამნოშ გეზალ მა̄მა ხეთხა̈̄ნ.

Line of edition: 23       აშხუ̂ ლადეღ ლა̈ხმუშგუ̂რა̈̄ნ მეჩი მა̄რე: -- იმ როქ ხაჰუ̂დიხ, გეზალს
Line of edition: 24    ჯათხე̄ლინი? -- ლიზგე-ლირდეს ქა ლაჯუ̂ედნე.

Line of edition: 25       ჟ'ა̈ნკიდ უ̂ისგუ̂, სამდ ჩუ აბიჴუ̂: "სემი ჭყინტგეზალ ა̈ჯთენი.
Line of edition: 26    იშგუ̂იდ ლჷზა̈ჲ შომუ̂ა̈̄ჲ ირა, მაჰუ̂რე̄ნე გეზალ მიშგუ ირა". პირობ
Line of edition: 27    ანსყეხ ამჟი. ამნემ უ̂ისგუ̂ ჩუ ლალემ (ზურა̄ლდ). ალ თუ̂ეისგა ლიღნაუ̂
Line of edition: 28    ა̈ხთენა̈̄ნ. ეშხუ დრო̈უ̂ აჩა̈დ ი ჩუ ა̈დღუ̂აჟ, სემი ჭყინტგეზალ ანთენე.
Line of edition: 29    უშხუ̂ა̄რდ ხოჩა ლიხ მა̈გ, მაჰუ̂რე̄ნე ჰა̈დურდ ხოჩა "ამი̄ მჷქაფ
Line of edition: 30    ჲექჷრდა̈̄შ ქა ხუ̂ა̈მბე ხოშა ლახუ̂ბას". ადგე ქორ, ჩხარა ქორ, ქორისგა
Line of edition: 31    ქორ, ჩხარა̄მინ ჩხარა ლაკილ ოხუ̂სყე, ლეზუ̂ებ ი ლეთრე მა̈გ სგა
Line of edition: 32    ოხჴიდ, ჯაი სგა ლახცუ̂ირ სგა̈̄ნჩუ. ამ დრო̈უ̂ს მეჩი მა̄რე ანჴა̈დ
Line of edition: 33    მუშგუ̂რიდ.
Line of edition: 34       -- მაგუ̂ა̈ჲდ როქ ა̈რიხ? -- სალა̈მ ხე̄ქუ̂ინ. -- ბოფშა̈რ როქ ხოჩა̄მდ
Line of edition: 35    დამ ჯაყახ?
Line of edition: 36       -- ჲერუ როქ ეზერდ, ეშხუ როქ ჩუ̂ამდაგან.

Page of edition: 203 
Line of edition: 1       -- ალა როქ ბა̈ქ ლიზ, ეჯა როქ ჩუ ა̈რი.

Line of edition: 2       ა̈ხჭა̈მ გირიმურგუ̂ალდ ჩხარა ლჷკილს, უ̂ოდ დო ადკარე, ჟ'ა̈ხბა̈გუ̂
Line of edition: 3    ამჩუ ი ქა̈̄ნი̄ყე. მა̈ჲ ჩუ̂ემინას, ნა̈ბ მა̄მ ხა̄რ. ა̈დბინეხ ლი̄ზი. მეჩი
Line of edition: 4    მა̄რას ლაბე̄რგას ათა̄სდხ.
Line of edition: 5       -- ოჲ, საბრალ ამსუ̂ა̄ლდ, მა̈ჲ ხოლა მეჩის ესყა, ამი̄ შია̈რხა̈ნქა
Line of edition: 6    მეჴედ მა̄მა ხი.
Line of edition: 7       -- ეშხუ ამბა̈უ̂ ქორს მი ა̈მსა̈დ. უ̂ეშგდ ტუ̂ეხნი, ჟი დო მიღე̄ლუ̂ე.

Line of edition: 8       ჟ'ესჭუ̂ე̄ნ, ქორთე ატა̈ხ, მიჩა დის ი მუს ხე̄ქუ̂: -- ეშხუ სა̈ინ ლიც
Line of edition: 9    ა̈ნგუ̂ეშ, ბუხუ̂რი თხუმჟი ჩუ̂ესგე: უ̂ოდე ალა ლიცდ ირდი, ეჩქად მი
Line of edition: 10    ლჷჲარდ ხუ̂ირდი; შომუ̂ა̈̄ჲ ალა ზისხდ ესსიპდე̄დს, ეჩჷნღო მი ლჷდგა̈რ
Line of edition: 11    ხუ̂ირა.

Line of edition: 12       სგა ლა̈ჰი̄დდა მიჩა მახუ̂შის. ჟი ხოსგუ̂რა ბარჯჟი, მე̄რა-მე̄ფხა
Line of edition: 13    ნე̄სგაქა ქა̄დჲე. იმთე დო ადჲე, მა̄მა ხოხა. სგა̄დჲე ხოჩა̄მდ ბაღთეჲსგა,
Line of edition: 14    სემი დი̄ნა̈̄ლ ამჩუნ ესხუ̂ი̄დხ. ქა ლახბა̈რჲე მიჩა გეზლი̄რს: "მჷხა̈რ
Line of edition: 15    სა̈დილდ ჟი ლა̈მმა̄რედ!" იშგუ̂იდ ლე̄თ-ლადეღ ლიუ̂ჟე ხა̈მთქუ̂ა, ეჯას
Line of edition: 16    მჷხა̈რ ჰამს ხაყლე. ალა დი̄ნა̈̄ლს გუნ ლახლატჷნხ: "ცოდ მად ლია
Line of edition: 17    ამი̄შ ლიზუ̂ებ (ლი̄მნე)?
Line of edition: 18       -- ხოშა უდილ, მა̈ჲ ჯა̈მჲედა?
Line of edition: 19       -- ეშხუ ლაცხნი̄რს ლოჰუ̂ედნე. ლახ ა̈ხღუ̂ეჭნი, ბარჯ ჟიქა̄ნქა
Line of edition: 20    ადკუ̂ა̄ნე, ეჯჟი ცხეკდ ესსიპი, [ერე] შდუგუ̂ დეშ ი̄ზნი (ადრინე). ეჩქად
Line of edition: 21    ალა ხუ̂ა̈ჲს ადრინე.
Line of edition: 22       -- მანე̄სგრე უდილ, მა̈ჲ ჯა̈მჲედა?
Line of edition: 23       -- ჲაღო, თჷრქა̈დს ლოხ(ჰ)უ̂ედნე. ალ ცხეკს ქა̈̄ფთქე, ბარჯ
Line of edition: 24    ჟიქა̄ნქა თჷრქა̈დს ადკუ̂ა̄ნე, ეჯკა̈ლი კოჯ ჩუ ა̈დგენი, [ერე] დეცს ჟი
Line of edition: 25    ხებკი. ალსმი კოჯ ირა. ეჩქა რა̈შ ჭჷშხა̈რს ეშჭკუ̂ერნე. მიჩ ლი̄ზი
Line of edition: 26    გარჯ ხე̄რა, ეში̄-ეში̄ ლახ ადრი.

Line of edition: 27       ხოხუ̂რა უდილდ: -- მი ლაჯუ̂ედნე ჯიმი ფხიტს. ბარჯ ჟიქა̄ნქა
Line of edition: 28    ქა̄დკუ̂ა̄ნე, ეჯჟი ძუღუ̂ა ჩუ̂ა̈დგენი, ერე თუ̂ით ჯაჲ ჩუ ა̈დღუ̂აპუ̂ი.

Line of edition: 29       ადზჷზეხ სერ ი ადჷნგზა̄რუ̂ეხ. ანჲა̈ცხ ალ მა̄რე, ზაკუსკა [=ლენცელ]
Line of edition: 30    ხაშგუ̂მინ. დი̄ნა̈̄ლდ ხე̄ქუ̂ინხ, მიჩა გეზლი̄რდ: -- ეჩი̄შ მინს ესერ მა̄მა
Line of edition: 31    ხოხახ. ქა̄დსკინე მიჩა რა̈შთექა (ამის ბიქუ̂ი რა̈შ ხაყა): -- სა̈დლობდ
Line of edition: 32    ესერუ აჩა̈დხ, ა ნა̈სდილობენ?
Line of edition: 33       -- ჯინდე̄დს ი სა̈დლობდ ალჩედდ, გინდ-ი ნა̈სდილობენ: გუ̂იშგუ̂ეჲ
Line of edition: 34    გზაუ̂რობ ეში̄ ცუ̂იდ ლი.

Line of edition: 35       ხოჩიდ მადრა̈ჴ, ჟი ლახსგურდა, მე̄რა-მე̄ფხაქა ქა̄დჲე. შიშდ
Line of edition: 36    ოხუნკუ̂ეშდე. ადკუ̂ა̈რ ლაცხნი̄რ, ცხეკდ ადჷგა̄ნ. ლახა̄დ ლაჭკუ̂რას
Line of edition: 37    შდჷქშუ̂ ი ჴაფშუ̂, ლა̄ზ ა̈ნსყე ი სგა̄დ ხეჰა̈̄ლ. "ლა̈ხუ̂სგი უ̂ეშგმაუ̂, აჯაღ
Line of edition: 38    ამღუ̂იჭ. ოთაკუ̂რ თჷრქა̈დ, კოჯ ადჷგა̈̄ნ". ხოჩიდ მადრა̈ჴ მიჩა რა̈შს,
Page of edition: 204  Line of edition: 1    ნა̈ბ ი უმბილ მა̈გ ოთნა̈ჩდე. ამნემ ჭჷშხა̈რ კოჯს ესჭკუ̂ერ. ლახა̄დ
Line of edition: 2    ცხა̄რალშუ̂, ესღუ̂იჭ მა̄რე. ადკუ̂ა̈რ ჯიმი ფხიტ. ეჯი ძუღუ̂ად ჩუ ესსიპდა.
Line of edition: 3    უ̂ოდ-ი-უ̂ოდი ანღრი ძუღუ̂აქა, ეჩქას ნე̄სგაისგა ჩუ ა̈დღუ̂აპუ̂ა̈̄ნ.
Line of edition: 4    "ხუ̂ისგიდდა̈ს, ხუ̂ისგიდდა̈ს, მარე და̈̄რ ამღუ̂იჭდა სერ. ა̈მბურა̈̄ნ აშხუ̂
Line of edition: 5    ხოშა მინდუ̂ო̈რისგა. ესღუ̂რი, ესღუ̂რი, იმთე დო ესღუ̂რი, ამი̄შ მი
Line of edition: 6    მა̄მა მიხალ. იმუ̂ა̄ლე ჯუ̂ე̄დიას ლემესგ ესუ̂წუ̂ე̄ნ. ა̈თუ̂ბინ ლი̄ზი, სგა
Line of edition: 7    ლა̈მჴა̈დჷ̄ნ. ხოშა ლემესგ ჟი ხა̄შუდა, ეშხუ უღუ̂ა ჴანა̈რ ლეღუ̂დ ხა̄გდა,
Line of edition: 8    ხოშა კარდალ ჟი ხოწიბდა, კუ̂აჩხა̈ჲ და̈̄უ̂ ყა̈რუ̂ილდ ხა̄გდა, არა და̈̄უ̂ა̈რ
Line of edition: 9    გირიმურგუ̂ალდ ლემსგა̈ პილა̈რქა ჩუ აყურდახ. მეუ̂არ მა̈იდ,
Line of edition: 10    ღე̄რბეთ ღუ̂არა, ჩუ̂ა̈ხუ̂იკ ხოშა კარდალ გიმთეჩუ, ლეღუ̂ ჟ'ა̈ხუ̂იკუ̂დ
Line of edition: 11    ი, მა̈̄ჲზუმ მეკუ̂ა̈დ, ჩუ ლო̄ხუ̂ა̈მ. კარდალ ჟ'ესუგ, იმჟი ლჷგდა. მა̈ფშა̈̄რ
Line of edition: 12    ხუ̂ა̈სუ̂ მეუ̂არ. მი ჩოთყუ".

Line of edition: 13       ანჷგა̈̄ნ მაშე̄ნე მუხუ̂ბე და̈̄უ̂: "მა̈ჲ როქ ეზერ ნა̄პუ ხათხე̄ნა!"
Line of edition: 14    ქა̈̄დზურიე̄ლე ალ ნაღუ̂ჟურთე. ალა კუ̂აჩხა̈ჲ და̈̄უ̂დ ჩუ̂ოთდურუ̂ანე:
Line of edition: 15    -- ნო̄საუ̂ როქ ლა̈ხფედა̈̄ნ, ადო მინ როქ ჩხარა ლიხ, კარდალს ჩუ
Line of edition: 16    უ̂ედდ იკედხ, ალა როქ მიჩ გარ ჩოხკი̄და.

Line of edition: 17       ჩუ̂ესგურდა. ათხე ანჷგა̈̄ნ მანე̄სგრე. ალისი ამჟი ხეკუ̂ა̈დ ლიზუ̂ებ
Line of edition: 18    ალ ნაღუ̂ჟურა̈შ. ამის კუ̂აჩხა̈ჲ და̈̄უ̂ დე̄მის ხა̈მბე. თუ̂ითჟი მა̈გ ქა̈̄დხერსა̈̄ნხ
Line of edition: 19    არა და̈̄უ̂ა̈რ. გუ̂იანდქა ჟ'ანჷგა̈̄ნ ალ ნაღუ̂ჟურ: -- ხოჩა ლადეღ
Line of edition: 20    მიშგუ̂ა ლახუ̂ბას! -- ხოჩა ლადეღ! -- ოხმა̈ზრეხ ჩიემ. მეუ̂არ ხა̈სისგხ, მარე
Line of edition: 21    ხაყლუ̄ნიხ. -- ნიშგუ̂ეჲ მუხუ̂ბად შომა ჯაყა? ჯუ̂არედინი შუკუ̂ისგა ხოშა
Line of edition: 22    ტო̄მბ ლჷგ. ბზითუნახა̈უ̂ ჴედნი ეშჩუ ისგლა̈დღი ონაქა, პირსახუ̂ეცს
Line of edition: 23    ხოთხფე. ჲერუ̂ა̈̄ჲ ეჯას ქო̄თღინე, ეჯის ხაყა ნიშგუ̂ეჲ მუხუ̂ბად.

Line of edition: 24       ლა̄პა̈რ ი აჩა̈დ. ჩოთდარჯე ტო̄მბმჷყ. ისგლა̈დღი ონაქა ანჴა̈დ
Line of edition: 25    ბზითუნახა̈უ̂, პირსახუ̂ეც ქო̄თთხიფ, ქა̈̄დი̄ღა̄ლა̈̄ნ ი ჩუ̂ა̈დბარა̈̄ნ. ხატეტ
Line of edition: 26    პირსახუ̂ეცს ნაღუ̂ჟურდ, ახღუ̂ა და̈̄უ̂ა̈რთე. ა̈ჰი̄დ სგა, ხატეტხ უშხუ̂ა̄რ,
Line of edition: 27    ეჯჟი ჩუ̂აჴიდ ზითუნახა̈უ̂, პირსახუ̂ეცი ქო̄თღე, უ̂ოქუ̂რე ქოში, ჯაჲ
Line of edition: 28    უ̂ედდ ოთჩა̈დ. სგა̄ჩა̈დ ი და̈̄უ̂ა̈რს ოთჴიდ: "ქა̄თხჲედ გოროდთე ი
Line of edition: 29    ჩუ̂ათხურდაუ̂ედ!" ათბა̈რჲეხ კუ̂აჩხა̈ჲ და̈̄უ̂ს. ხაზელა̄ლნე გოროდისგა.
Line of edition: 30    სგა ლახხუ̂ი̄დ სოუ̂დაგარ: -- ჲა̈ს როქ ლოხოდა მიჩა ხეხუ̂მიშ ქოშ? --
Line of edition: 31    ხოშჩიუ̂ლე პოლციაისგა. უ̂ოქუ̂რე ქოშს ქა̈̄ხბი̄შდხ, და̈̄უ̂[ი̄] ჩუ̂ადჷრმეხ,
Line of edition: 32    სგა̄დგენეხ მურყუ̂ამთე.

Line of edition: 33       ხოღლიხ და̈̄უ̂ა̈რ, დე̄სა ანჴა̈დ კუ̂აჩხა̈ჲ და̈̄უ̂. ლა̄პა̈რხ ი აჩა̈დხ
Line of edition: 34    მე̄რმე და̈̄უ̂ა̈რ. თუ̂ითჟი მა̈გ აჩა̈დხ: "ჲა̈ს ჯიწუ̂ახ, უ̂ოქუ̂რე ქოშ ხუღუ̂ა̈̄ნ
Line of edition: 35    ლეხურდა̈უ̂იდ, [ეჯ] კუ̂აჩხა̈ჲ და̈̄უ̂?" სგა ლახხუ̂ი̄დ სოუ̂დაგარ: "ალჲა̈რი
Line of edition: 36    როქ მჷრე̄ს ხონჴერხ ლა̈ქუ̂თა̈რს!" მა̈გ ჩუ̂ადჷრმეხ ჩხარა და̈̄უ̂ა̈რ, ჩუ
Line of edition: 37    ხაყახ მურყუ̂ამისგა. ჩუ̂ასა̈დ ალ ნაღუ̂ჟურ ჯა გარ.

Page of edition: 205 
Line of edition: 1       ხოღლი, ხოღლი, დე̄მხა̈ნ ანჴა̈დხ. ლა̄პა̈რ ი აჩა̈დ. ხეთხე̄ლი გოროდისგა:
Line of edition: 2    "და̈̄ს ჯიწუ̂ახა კუ̂აჩხა̈ჲ და̈̄უ̂, უ̂ოქუ̂რე ქოშ ლეხურდეუ̂იდ
Line of edition: 3    ხუღუ̂ა̈̄ნ?" სგა ლახხუ̂ი̄დ სოუ̂დაგარ: "ალჲა̈რს როქ მჷრე̄ს ხონჴერ!"
Line of edition: 4    ჩუ̂ადჷრმეხ ალა̄, ნაღუ̂ჟურ. ალას ნაღუ̂ჟურ დე̄მა იჩო: "და̈̄უ̂ა̈რ როქ
Line of edition: 5    [ქა̄უ̂] ლახტიხ ი უ̂ოქუ̂რე ქოში!" ახა̄დხ სა̈ჩიუ̂არ, ზალოგ ესდეხ:
Line of edition: 6    -- ჰე მოშ ჩუ ითხე̄ლი ამთა̄ნ ქოშს ამზუმ-[ი]-ამზუმ უ̂ადაისგა, ეჩქა სოუ̂დაგარ
Line of edition: 7    ლეყმე [ლესუ̂], ჰე დოშ ი ნაღუ̂ჟურ ი და̈̄უ̂ა̈რ მა̈გ ლეყმე.

Line of edition: 8       ა̈დბინე ლი̄ზი, მე̄რმა სახელწიფთე აჩა̈დ. ალ სახელწიფ ლი
Line of edition: 9    ეჯკა̈ლი მა̈ჲდა̈̄რ (უ̂ოქუ̂რ ი უ̂ერცხლ ჟი გუ̂ეში), [ერე] ღჷრიხ მე̄რმა
Line of edition: 10    სახელწიფთე ძუღუ̂აქა პარახოდშუ̂ ლა̈ყიდდ ლეზუ̂ბა̈შ, ჩუ̂აჭჷრთა̈უ̂იხ პარახოთა̈ლს,
Line of edition: 11    ნე̄სგა ძუღუ̂ათეჲსგა სგა ჴიდეხ, ეჩქა მჷრა̈̄მქა ჴედნი ზითუნახა̈უ̂,
Line of edition: 12    ხა̈ტტი პარახოთა̈ლს, პარახოთა̈ლს[ი̄] ჩუ̂აღუპა̈უ̂ი ი მა̄რა̈̄ლს[ი̄].
Line of edition: 13    ამნოშ ლი მა̈ჲდა̈̄რ ალ სახელწიფ. "ჟი̄უ̂ როქ ოხმა̄რეხ ჲორუ პარახოთ.
Line of edition: 14    აშხუ̂ჟი ჯა ხესგუ̂რი, მე̄რმას -- ლეზუ̂ბა̈ ლა̈ჴდად [ა̈ი]". ქა̄დჲე
Line of edition: 15    მე̄რმა სახელწიფთე, ჟ'ანგუ̂ეშლე პარახოთა̈ლ სიმინდშუ̂ ი კუ̂ეცენშუ̂,
Line of edition: 16    ანჴა̈დ ნე̄სგა ძუღუ̂ამჷყ. ა̈ხშდუ̄ლ პე̄რხა̈ნჩუ ზითუნახა̈უ̂, ხატეტ პარახოდს.
Line of edition: 17    უ̂ოდემჩიქად პარახოდს ხონჴუ̂ემ, ხატეტ სგა ი სგა̈̄ნჩუ ა̈ნკუ̂ა̈რ,
Line of edition: 18    ეჯჟი ჩუ̂ადლახუ̂ე̄, ჯა უ̂ედდ ოთჩა̈დ, ოქუ̂რა̈ მჷსკა̈დი ქა̄ხყუ̂იზ
Line of edition: 19    ტოტხა̈ნქა. ქა̄ნჴიდ თაუ̂ისუფა̈ლდ პარახოთა̈ლ. ხელწიფდ ხე̄ქუ̂ინ:
Line of edition: 20       -- მა̈̄ჲ ჯაკუ საჩუქუ̂ა̈რდ, ეჯის ლაჯუ̂ედნე!
Line of edition: 21       -- ამკა̈ლი-ამკა̈ლი უ̂ოქუ̂რე ქოშ [ესერ], იშგენ მა̄მგუ̂ეშ.

Line of edition: 22       ჩუ̂ა̈დნა̈ზუ̂რე მიჩა სახელწიფ, იმუ̂ა̈̄ჲ ე̄სა ქოშ ჩუ̂არდა, ჟ'ანნა̈ზუ̂რეხ
Line of edition: 23    მა̈გ, მარე ამი̄ მაჯო̄ნ მა̄მგუ̂ეშ. ანჷგა̈̄ნ ი ა̈დბინე ლი̄ზი. მესმა ხახელწიფთე
Line of edition: 24    აჩა̈დ. სგა ლა̈ხმუშგუ̂რა̈̄ნ (\\ ლა̈ხმუშგუ̂არ) მეჩი ზურა̄ლს.
Line of edition: 25       -- მა̈ჲ როქ ხაჟხა ალ სახელწიფს?
Line of edition: 26       -- ალ სახელწიფს -- ცოდა̈ სახელწიფ.
Line of edition: 27       -- იმღა როქ ხაჟხა ცოდა̈ სახელწიფ?
Line of edition: 28       -- ეშხუ გეზალ როქ ხაყე̄ნა მინე ხელწიფს ნაღუ̂ჟურ, ეშხუ ზა̈ჲ
Line of edition: 29    როქ ლიზ, ჯა ჩუ̂ათდაგრა. საყდა̈რისგა ჩუ ხაშდღუ̂ა. ჩუ ჰა̄ლ იბრუ̂ი,
Line of edition: 30    ეჩქა ჴედნი ეშხუ ზითუნახა̈უ̂ საყდა̈რთეჲსგა, ლჷდგა̈რს ჟი იგნე, წკეპლა̈რს
Line of edition: 31    ხატყცი, ჟი ასე̄ლუ̂ე, რიჰდ კამპანიას ხასგურხ, იღჷლბუცა̈̄ლხ,
Line of edition: 32    ილგაცა̈̄ლხ, ლირჰა̄ლე ონათე წკეპლა̈რს ხატყცი, ჩუ̄დ ადგა̄რი ი ჩუ̄დ
Line of edition: 33    აშდღუ̂ი ეჯჟი. ამღა ხაჟხა ცოდა̈ სახელწიფ.

Line of edition: 34       ლა̄პა̈რ ნაღუ̂ჟურ ი საყდა̈რთე აჩა̈დ. ლა̈დი უ̂ორმ ანსყე, ჟიქა̄ნ
Line of edition: 35    ბა̈ჩ ა̈თქუ̂ე, ჩუ̂ა̈თპა̈ჟ ამეისგა. ჩუ̂ა̈დბურა̈̄ნ ხოჩა̄მდ. ანჴა̈დ ბზითუნახა̈უ̂,
Line of edition: 36    ჟ'ა̈ნბჷრჯე ხელწიფი გეზალ, ხაჴიდ წკეპლა̈რ ი ქუ̂ინ ლოხგენე, ლიშდრა̈̄ლ
Line of edition: 37    ახა̄დხ. ლა̄პა̈რ ალ ნაღუ̂ჟურ, უ̂ოდემჩიქად ჩუ̂ადგა̈რი, ეჩქად
Line of edition: 38    ხატეტ სგა, ჩუ̂ა̈ნნა̈ხ ბზითუნახა̈უ̂, ჩუ̂ადლახუ̂ე, წკეპლა̈რი ქო̄თღე, ჯაჲ
Page of edition: 206  Line of edition: 1    უ̂ედდ ოთჩა̈დ, ხელწიფი გეზალ ლჷჲა̈რ ოთსა̈დ. ჩუ̂ანჴიდ ხელწიფიშთეჩუ
Line of edition: 2    მიჩა (ხელწიფი) გეზალ. ხელწიფდ ხე̄ქუ̂ინ: -- ამჷნღო სი ხესუ̂
Line of edition: 3    ხელწიფ.
Line of edition: 4       -- ხელწიფობ მი მა̄დე მაკუჩ. ამკა̈ლიბ-ი-ამკა̈ლიბ ქოშ მაკუჩ, ე̄მე ითხი.

Line of edition: 5       ა̈დნა̈ზუ̂რე მა̈გ ქოშ მიჩა სახელწიფიშ, ამი̄ მაჯო̄ნ მა̄მგუ̂ეშ ა̈რი.

Line of edition: 6       ა̈დბინე ლი̄ზი. ესღრი, იმთე დო ესღრი, მა̄მა ხოხალ. ა̈თჴა̈დჷ̄ნ ეჯჟი
Line of edition: 7    ჯო̄დია მინდუ̂ო̈რთე, [ერე] თეს დე̄მის ხოჰი, იმუ̂ა̄ლე ჯო̄დიათე უ̂ოქუ̂რე
Line of edition: 8    ფერიშ შენობ ესწუ̂ე̄ნე. ესღრი, ესღრი, ესღრი, ფე̄დიათე აჩა̈დ,
Line of edition: 9    ჟი ხებიდ. ეჯკა̈ლი ქორ ლჷგ, ჩხარა არტა̈ჟია̈ნ, [ერე] ჰა̈დურდ უ̂ოქუ̂რე
Line of edition: 10    ლიც ხაბიდ მეჰად, თეს მა̄მა იხნი. ეშხუ არაბს ჰუ̈ლუ̂ა̈რ ხაყა
Line of edition: 11    (ხელდეღ). არაბს ხე̄ქუ̂ინ: -- ალა იშა ლ' ა̄, ქორ?
Line of edition: 12       -- თხუმხა̈ნ ესერ ადურტყუ̂ას, ჰა ჭჷშხა̈რხა̈ნ?
Line of edition: 13       -- ეჯის როქ დე̄მ ხეჭუ̂დიე̄ლ: ალა როქ იშა ლ' ა̄, ქორ? -- სამინ
Line of edition: 14    ლა̈ხჭუ̂ედდა, ჩიგარ ამჟი ლახტიხ არაბდ. ლა̈ჲცხუტე ტუ̂ეტ, ხასტუ̂ეფ
Line of edition: 15    ჰა̈ყბაქა ი ჩხარა ზაგა̈რ ეჩხა̈ნ ადკუ̂ა̈რ. სგა̄ჩა̈დ ალ ქორთეჲსგა,
Line of edition: 16    იზელა̈̄ლ ი ამსუ̂ა̄ლდ და̈̄რ ა̈რი. ა̈ნწუ̂ე̄ნე ლოგინ ჩუქუ̂ა̄ნ, ეშხუ ხოჩა
Line of edition: 17    ჲაშიკ ლჷგ, გუ̂ეში ლიზ, მიჩ ერ ხუღუ̂ა̈̄ნ, ეჯთა̄ნ უ̂ოქუ̂რე ქოშა̈რდ.
Line of edition: 18    -- მა̈ჲ ჩუ̂ემინა? ქა̈̄თუ̂ქუ̂ითერნე -- ლიზურა̄ლ ირა, დო̄მაჲ -- ფიქრ მა̄რ.

Line of edition: 19       ჩუ̂ადყურდა ლოგინ ჩუქუ̂ა̄ნ. ჩუ̂ა̈დბურა̈̄ნ მახად. ჩიქ' ა̄ნჴა̈დ ეშხუ
Line of edition: 20    ბზითუნახა̈უ̂, ღო მე̄რმე, ღო მესმე, გუ̂იანდქა არაბ ანჴა̈დ. ხე̄ქუ̂ხ ალჲა̈რდ
Line of edition: 21    (ლაუ̂დილად): "არაბ, უ̂ოხშა̈მ ახმა̈̄რ!" "ქა̄ფხიჟ სტოლ, ჩუ̂ადჷრშე
Line of edition: 22    პირსახოც: მა̈̄ჲ ხაკუ ლეზუ̂ებ ი ლეთრე ამსუ̂ა̄ლდს, მა̈გ ამეჩუ ა̈რი,
Line of edition: 23    ალ სტოლჟი̄ნ. ჟ'ა̈ნკიდ მაშე̄ნე უდილდ ჭიქ: "ალი ღე̄რბათუ ოთმა̈ზრა
Line of edition: 24    ეჯ ამსუ̂ა̄ლდ, ერე ჯუ̂არედინი შუკუ̂ისგა პირსახუ̂ეცს ხოთხფა̈ს,
Line of edition: 25    ჲერუ̂ა̈̄ჲ მა̄რე ქა ხედო̄ლდა, ჩი̄ს ტო̄მბისგა ჩუ ხუ̂აშგუ̂იდდა̈ს. ეშხუ
Line of edition: 26    ნაღუ̂ჟურდ მი ლეგდ ამჴიდ, პირსახუ̂ეცი ქა̈̄მღე, უ̂ოქუ̂რა̈ ქოში́. ოთმა̈ზრაუ̂
Line of edition: 27    ეჯა ღე̄რბათ!" ჩუ ლაი̄შ ი ჩუ̂ესგე ჰა̈რი. ჟა̈ნკიდ მანე̄სგრა
Line of edition: 28    უდილდ ჭიქ ი ჟ'ანმა̈ზრე: "ეჯა[უ̂] ოთმა̈ზრა ღე̄რბათ, ერე ეშხუ სახელწიფ
Line of edition: 29    მეხუ̂ტე მა̄დ მა̈იდშუ̂. ეშხუ ნაღუ̂ჟურდ მატეტ, პარახოთთეჲსგა
Line of edition: 30    ა̈მკუ̂ა̈რ, მი ლეგდ ამლახუ̂ე, მჷსკა̈დი ქა̈̄მღე, სახელწიფი ჟ'ესბიზე".
Line of edition: 31    ჩუ ლაი̄შ ი ჩუ̂ესგე. ხოხუ̂რა უდილს ესჴუ̂ა̈̄მ: "ალა ღე̄რბათუ
Line of edition: 32    ოთმა̈ზრა, -- ხოხუ̂რა უდილდ ლე̄ქუ̂ინ: -- აშხუ̂ ხელწიფი გეზალს ზა̈ჲ
Line of edition: 33    ხა̄დ ლჷდგარჷნღო, ლეთშუ̂ ჟი ხუ̂ასელუ̂ა̈ს, ლადეღშუ̂ ჩუ ხუ̂ადგარდა̈ს.
Line of edition: 34    ანჴა̈დ ეშხუ ნაღუ̂ჟურ, მი ლეგდ ამჴიდ, წკეპლა̈რი ქა̈̄მღე, ხელწიფი
Line of edition: 35    გეზალ ლჷჲა̈რ ამცუ̂ირნე". ჩუ ლაი̄შ ი არაბს ესჴუ̂ა̈̄მ. ჟ'ა̈ნკიდ არაბდ:
Line of edition: 36    "ღე̄რბათუ ოთმა̈ზრა ეჯ ამსუ̂ა̄ლდ[-ე́], ლა̈დი ჰუ̈ლუ̂ა̈რს ხუ̂ელდა̈ღდა̈ს,
Line of edition: 37    ალ ქორა̈შს იჭუ̂დია̄ლ: "იშ' ე̄სერ ლიზ ალ ქორ?" მი ხუ̂ე̄ქარ, ერე
Page of edition: 207  Line of edition: 1    თხუმხა̈ნ-ჷჯ აჯურტყუ̂ა, ჰა ჭჷშხა̈რხა̈ნ? მაჴიდ ტუ̂ეტ შდჷმქა, ჩხარა ზაგა̈რ
Line of edition: 2    ეჩხა̈ნ ამკუ̂ა̈რ. ეჩჷნღო ონღუ̂რი, ათხად ა̈მქა̈ხ ამხა̄უ̂თეჲსგა
Line of edition: 3    ლიჴედ".

Line of edition: 4       ქა̄ნსკინე ლოგინ ჩუქუ̂ა̄ნხა̈ნქა ჭყინტგეზალდ, ჟ'ა̈ნკიდ ჭიქ ი
Line of edition: 5    ჟ'ანმა̈ზრე: "ამჟი ოხუ̂გაცხდე ხოშა უდილს: ჯუ̂არედინი შუკუ̂ისგა
Line of edition: 6    უ̂ოქუ̂რე ქოშ ი პირსახუ̂ეც ქა̈̄ჯიღ ი ამეჩუ ა̈რი. ამჟი ნე̄სგა̈̄ უდილს,
Line of edition: 7    ამჟი მაჰუ̂რე̄ნა̄მ. ა, არაბ, ამეჩუ ხა̈რი სი?" ლა̄პა̈რხ ალჲა̈რ ჟი, ჩი̄ს
Line of edition: 8    ჭა̈შდ ხაკუხ, ალ ლაუ̂დილას დაგრობმჷყ ოხჴა̈დხ.
Line of edition: 9       -- ამჟი მა̄დე ნა̈მთქუ̂ა ნა̈ჲ ნიშგუ̂ეჲმჷყ.
Line of edition: 10       -- ჲაღო, იმჟი?
Line of edition: 11       -- მი ხოშა ლახუ̂ბა მაყახ, მაჰუ̂რე̄ნე მუხუ̂ბე მი ხუ̂ი. მაჰუ̂რე̄ნე
Line of edition: 12    უდილ მიშგუ ხეხუ̂, მანე̄სგრე -- მანე̄სგრე̄მიშ, მაშე̄ნე -- მაშე̄ნე̄მიშ. -- ამჟი
Line of edition: 13    ა̈თსიკთა̈̄ნხ. -- მი გუ̂ეშ მუღუ̂ა ათხე, სა̈ჩიუ̂არ, ეჩხა̄უ̂ ლე̄ზი მა̄რ ი ეჩქად
Line of edition: 14    ჟ'ა̈მღე̄ლა̈უ̂!

Line of edition: 15       ხოშა უდილდ ხე̄ქუ̂ინ: -- ჲაღო, ეჩხა̄უ̂ ხო̄ზი სამ ზა̈ჲა̈ ლე̄ზნე
Line of edition: 16    ჭჷშხშუ̂. სამ ლადეღ ეჩხა̄უ̂-ამხა̄უ̂ აჯი̄ნე არაბ.

Line of edition: 17       ლა̈ჲსგურე ბარჯჟი, ეშ ლახკიჰე. სგო̄თჴიდ უ̂ოქუ̂რე ქოშ თაუ̂რობს.
Line of edition: 18    სოუ̂დაგარს ა̈ხთხა̄ლ თაუ̂რობ, ჩუ̂ადჷრმეხ სოუ̂დაგარ: "ნიშგუ̂ეჲ
Line of edition: 19    განჩინება ამჟი როქ ლიზ: ალა როქ და̈̄უ̂ა̈რსუ ხა̄დხ, სოუ̂დაგარ,
Line of edition: 20    ამზუმ ნა̈ჭი̄რუ̂ი̄ლ ხონდე̄დხ ი ჟიუ̂ ანტყაბეხ". ანმა̈ზრეხ ღე̄რბეთ, ანტა̈ხხ
Line of edition: 21    ნა̄ზუ̂ს, ა̈ნმა̄რა̈̄ნხ ამჩუ მიჩა ხეხუ̂ ი ლაუ̂დილა. არაბდ ლა̈ჲსგურე
Line of edition: 22    მა̈გ ალჲა̈რ ბარჯჟი, კეთილ-ქონა̈ბ შჷნ ლა̄ჲეხ, ანჴა̈დხ ა̈გითე. სგა̄ნჴა̈დხ
Line of edition: 23    ქორა̈ ფე̄დიდ. ამეჩუ ხოჩა მინდო̈რ ანსყე არაბდ. ხოშა უდილდ
Line of edition: 24    ხე̄ქუ̂ინ არაბს: "ჲაღო, პირსახუ̂ეც ჩიქე ჟ'ახკა̈ჩ, ღო ჩუ̂ათტა̈ფ!" გიმჟი̄ნ უ̂ოქუ̂რე
Line of edition: 25    ლჷცჷრაუ̂ე ქორ ჩუ̂ა̈დგა̈̄ნ. "ჲაღო, ათხე ქორა̈ ძირ ჩუქუ̂ა̄ნ
Line of edition: 26    პირსახუ̂ეც ჟ'ახკა̈ჩ!" ეჯჟი ჭანდრი ზექ ჩუ̂ადჷგა̈̄ნ, ერე დეცს ხაუ̂იფ,
Line of edition: 27    ძირისგა ხოჩა ლიც ანღრი.

Line of edition: 28       მე̄რმა ლადეღ ა̈ნსგიდახ მიჩა დი ი მუ ი მიჩა ლახუ̂ბა: "ჲერუ̂ა̄ლეს
Line of edition: 29    ამეჩუ ეჯკა̈ლი უ̂ოქუ̂რა̈ ქორ ოთგა, [ერე] ლისგდის მა̄მა ხოჩა!"
Line of edition: 30    ანწიჰე ქა ალჲა̈რ, მიჩა დი-ჲ მუ ი ლახუ̂ბა. ალჲა̈რს ჩა̈ჩ ხა̄გხ. ლა̈ხჭუ̂ედდა:
Line of edition: 31    -- იმღა როქ ხა̄გხ ალ ჩა̈ჩ?
Line of edition: 32       -- მუხუ̂ბე როქ ხაყე̄ნახ მინს, ეჯა ათთუ̂ეფახ ი ეჯღა როქ
Line of edition: 33    ხა̄გხ ჩა̈ჩ.

Line of edition: 34       ლა̈ჲკიდ წაბ ი ჩუ̂ადწაბუ̄რა̄ლე მა̈გ, ჰა̈დურდ მა̈გ ჩუ̂ადლამზე ი
Line of edition: 35    ხოშა უდილ ხოშა მუხუ̂ბა, მანე̄სგრე უდილ მანე̄სგრა მუხუ̂ბა, მაჰუ̂რე̄ნე
Line of edition: 36    მიჩ ხა̄დ.

Line of edition: 37       ხოჩა ლირდე-ლიზგე ა̈ნჰეხ. ჭირ ეჩე ა̈მცუ̂ი̄რა, ხინ ამხაუ̂ ა̈მჴი̄და.

Line of edition: 38       ლჷმზჷრე̄უ̂ ხი.



Next part


This text is part of the TITUS edition of Svan Prose Texts I (Upper Bal).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.