TITUS
Svan Prose Texts I (Upper Bal)
Part No. 148
Previous part

Text: 153 
Page of edition: 349 
Line of edition: 1 
153. მეჷხმჷ̄რი ი ა̈ფიცარ


Line of edition: 2       ლჷმზჷრე̄უ̂ ხი ი ხეხუ̂-ჭა̈შ. ლა̈სუ̂ხ ეშხუ ხეხუ̂-ჭა̈შ მე̄უ̂არ ღა̈რიბ.
Line of edition: 3    ხორდახ ეშხუ ჭყინტგეზალ ი ეშხუ ნეზუ̂. ნეზუ̂ ჩუ̂ა̈დზა̈̄ნ ი გოჭა̈რ ანთაუ̂ე
Line of edition: 4    უსგუ̂ა. ათბა̈რჲეხ მინე გეზალს ლალდა̈ღთე. ხელდეღ ალა̄, ჭყინტ,
Line of edition: 5    ი ამჩიქქა ანღრი ამექა ხელწიფი დი̄ნა ი მიჩა აფხნეგა̈რ. ხელწიფი
Line of edition: 6    დი̄ნას ეზა̈რ ლახბაჟჷნ გოჭა̈რ ი სგა ლა̈ხღუ̂აჭრა̈̄ნ მჷხმჷ̄რის. ხა̈̄ქუ̂
Line of edition: 7    მჷხმჷ̄რის, ერე "ეშხუ გო̈ჭ ესერ ჩუუ̂ ათყიდ ი, მა̄ზუმ ესერ ხეკუ̂დენი
Line of edition: 8    თეთრ, ეჩზუმს ესერ ლაჰო̈დნე". მჷხმჷ̄რიდ ხა̈̄ქუ̂: "თეთრღა ესერ დე̄მ
Line of edition: 9    ჰო̈დი, იშგენუ ესერ მა ლახუ̂ე̄მ". ხელწიფი დი̄ნად ხა̈̄ქუ̂: "იშგენ ესერ
Line of edition: 10    მა̈ჲ ლახო̄მას?" მჷხმჷ̄რიდ ხა̈̄ქუ̂: "მა̈ჲ ესერ ი ბარჯა̈ლთეჩუ̄ნ ესერ მა̈გ
Line of edition: 11    ქაუ̂ ხაწუ̂ე̄ნე ი ეჩქა ესერ ქა ლაჰო̈დნე გოჭა̈რს". დი̄ნას ხამჭირჷნ, მარე
Line of edition: 12    მიჩა აფხნეგა̈რდ ხა̈̄ქუ̂ხ: "მა̈ჲ ესერ ხოჭირ ეჯღა, ერე ამის ლახწუ̂ე̄ნი
Line of edition: 13    ბარჯა̈ლთეჩუ?" დი̄ნად ქა ლახწუ̂ე̄ნე ი მჷხმჷ̄რიდ ქა ლახუ̂ე̄მ ეშხუ
Line of edition: 14    გუ̂ეჭ. ნა̈ბუზს ა̈გითე ანჴიდ ხამა̈რ ი ეშხუ გუ̂ეჭ ქა ხაკლი̄ნ. ალა ჟი
Line of edition: 15    ლახთირხ მიჩა დი-ი-მუდ ი ხოლა̄მდ აჴიდხ მინე გეზალ.

Line of edition: 16       მე̄რმა ლადეღ აჯაღ ადჲე ლალდა̈ღთე ი მიჩა დი-ი-მუდ ჩუ̂ადშგურა̄ნეხ,
Line of edition: 17    ერე "ლა̈დი ესერ ეში̄ ხოჩა̄მდუ ესჷლდეღა̈̄ნ, ადო ა̈გითე
Line of edition: 18    ესერ ა̈ნჴდენი, ეჩქა ესერ ჰა̈დურდ ხოლა̄მდჷდ ა̈ჴდეხ!" ჭყინტდ ადჲე
Line of edition: 19    ლალდა̈ღთე ი ამჩიქქა ანღრიხ ამექა ხელწიფი დი̄ნა ი მიჩა აფხნეგა̈რ.
Line of edition: 20    ხელწიფი დი̄ნად რა̈̄ქუ̂, ერე "მა̈ჲ ესერ ეზა̈რ ლი ეშხუ გუ̂ეჭ მიჩა
Line of edition: 21    გუ̂ეჭი ტყუბად (\\ ტუ̂ელდ)!" დი̄ნა აჯაღ სგა̄დ ლა̈ხღუ̂აჭრა̈̄ნ მჷხმჷ̄რის
Line of edition: 22    აშხუ̂ გუ̂ეჭს: "ეშხუ გუ̂ეჭ ესერ ჩუუ̂ ათყიდ ი ხუ̂ა̈ჲ თეთრს ესერ ლაჰო̈დნე".
Line of edition: 23    მჷხმჷ̄რიდ ხა̈̄ქუ̂: "თეთრღ' ე̄სერ დე̄მ ხაჰუ̂დი". "ჲაღო ესერ
Line of edition: 24    იმღა ხაჰუ̂დი?" -- "იმღ' ე̄სერ ი ლუსუ̂ა̈რთეჩუ̄ნ ესერ მა̈გ ქაუ̂ ხაწუ̂ე̄ნე
Line of edition: 25    ი ეჩქ' ე̄სერ ქა ლაჰო̈დნე". დი̄ნას მა̄დ ხონდა ლიწუ̂ენე, მარე მიჩა
Line of edition: 26    აფხნეგა̈რდ ხა̈̄ქუ̂ხ, ერე "მა̈ჲ ესერ ხოშგურ ხოლა̄მ მჷხმჷ̄რიდ? ქაუ̂
Line of edition: 27    ესერ ლახწუ̂ე̄ნე!" დი̄ნად ქა ლახწუ̂ე̄ნე ლუსუ̂ა̈რთეჩუ. ჭყინტდ ქა ლახუ̂ე̄მ
Line of edition: 28    ეშხუ გუ̂ეჭ. დი̄ნას მურსგუ̂ენ (\\ ლურსგუ̂ენ, ლერსგუ̂ენ) ბარჯჟი ეშხუ
Line of edition: 29    უ̂ოქუ̂რა̈ ლუსდუ̈გ ხა̄გა̈ნ. ამის მჷხმჷ̄რი ქა ხეწა̈დ. უ̂ოქუ̂რა̈ ლუსდუ̈გ
Line of edition: 30    ლა̈სუ̂ დი̄ნა̈̄ ლა̈ჲშა̈ნ. ნა̈ბუზს მჷხმჷ̄რიდ ანჴიდ ხამა̈რ ა̈გითე ი ეშხუ
Line of edition: 31    გუ̂ეჭ აჯაღ ქა ხაკლი̄ნდა. ათხე ჟ'ათსგურდახ მიჩა დი-ი-მუი ლაყა̈რს
Line of edition: 32    ჰაჯ მა̄მა ახკიდხ. მჷხმჷ̄რიდ ხა̈̄ქუ̂, ერე "ნუმაუ̂ ესერ ხატყციხ ი
Line of edition: 33    გოჭრე ფა̈სს ესერ ოხჴიდე". მერმა ლადეღ აჩა̈დ მჷხმჷ̄რი ი შუკუ̂ისგა
Line of edition: 34    ჩუ̂ადყურდა.

Line of edition: 35       დი̄ნა̈̄ მუ-ხელწიფს ოხგაცხდა, ერე "ერუ̂ა̈̄ჲ ესერ მიჩა დი̄ნა̈̄ ლა̈ჲშა̈ნს
Line of edition: 36    გუდ ა̈ჴდენი, ეჩას ესერ ლაჰო̈დნე დი̄ნას ხეხუ̂დ". ამხა̄უ̂ მა̈გ
Page of edition: 350  Line of edition: 1    ესღრ' ათხე ი ლა̈ჲშა̈ნ და̈̄ს ხოხა. ეჯ შუკუ̂ქ' ე, უმუ̂ა̈̄ჲ მჷხმჷ̄რი აყუ̂რა,
Line of edition: 2    ა̈ნჴა̈დ ეშხუ ა̈ფიცარ. მჷხმჷ̄რიდ აქა̈̄ნი მა̄მ' ო̄ხკიდ. ა̈ფიცარდ რა̈̄ქუ̂:
Line of edition: 3    "უ̂იდრობა მჷხმჷ̄რის ესერ აქა̈̄ნი მა̄მ ოხკიდა!" ალა ქა ხასჷმდა მჷხმჷ̄რის
Line of edition: 4    ი ხა̈̄ქუ̂ ა̈ფიცარს: "უ̂იდრობა ესერ ეჯა ი̄რ' ე̄, ესუ̂ა̈̄ჲს ესერ, იმთე

Line of edition: 5       დო ესღრი , ეჯა მა̄მ ხოხა". ა̈ფიცარდ ხა̈̄ქუ̂: "იმღ' ე̄სერ ხა̄რ ალა?
Line of edition: 6    მჷხმჷ̄რიდ ხა̈̄ქუ̂: "ჲაღ' ე̄სერ ხოხა მა̄, მა̈ჲ ნიშა̈ნ ესერ ხა̄რ ხელწიფი დი̄ნას?"
Line of edition: 7    ა̈ფიცარდ ხა̈̄ქუ̂: "მიჩ ესერ დე̄სა ხოწუ̂ა, მა̈ჲ ესერ ხოხა, მა̈ჲ
Line of edition: 8    ნიშა̈ნ დო ხა̄რ!" მჷხმჷ̄რიდ ხა̈̄ქუ̂: "ჯ' ე̄სერ ლახთო̈̄ნი ი თეთრუ ლახუ̂ე̄მ
Line of edition: 9    ხუ̂ა̈ჲ!" ა̈ფიცერდ ხა̈̄ქუ̂: "ქ' ე̄სერ ლახ ლახთო̈̄ნნე, ეჩქ' ე̄სერ ქა
Line of edition: 10    ლაჰო̈დნე". მჷხმჷ̄რიდ ხა̈̄ქუ̂: "ჩიქე ესერ თეთრუ ლახუ̂ე̄მ ი ეჩუნღო
Line of edition: 11    ესერ ქა ლახთო̈̄ნნე". ა̈ფიცერდ ქა ლახუ̂ე̄მ უსგუ̂ა ქე̄სა თეთრ. მჷხმჷ̄რიდ ქა
Line of edition: 12    ხა̈̄ქუ̂, ერე "ბარჯჟი̄ნ ესერ ხა̄რ დი̄ნას უ̂ოქუ̂რე ლუსდუ̈გ" (ეჯა
Line of edition: 13    მა̄დ ხა̈̄ქუ̂ მჷხმჷ̄რიდ, ხედუ̂ა̈̄ჲ ბარჯჟი ხა̄დ ლუსდუ̈გ). ა̈ფიცარს ათხი̄დჷნ
Line of edition: 14    ი აჩა̈დ. ჭყინტდ ა̈გითე აჩა̈დ ი უ̂ო̄შთხუ̂ ქე̄სა თეთრ მიჩა დის ი
Line of edition: 15    მუს ლახუ̂ე̄მ: "ალ' ე̄სერ გოჭრე ფა̈სდუ ხა̄დხ". ჲერუ ქე̄სა მიჯნე̄მ
Line of edition: 16    ესყედა̄ნე ი აჩა̈დ ქალაქთე. ქალა̈ქს ა̈ნყიდ შაქა̈რ, კანფეტ ი იშგენ მუხუ̂ჭი
Line of edition: 17    ლეზბუ̄რა. ეჩუნღო აჩა̈დ ხელწიფთე, ხედუ̂ა̈̄ჲ დი̄ნას ა̈წუ̂ი̄ლა,
Line of edition: 18    ეჩხა̄უ̂.

Line of edition: 19       დჲნა̈̄ ლა̈ჲშა̈ნს ჩუ და̈̄რ მოშ ხეხუ̂ა, ჲერ იმ ყჷლე ი ჲერ იმ. ღუ̂ეშგინპილს
Line of edition: 20    ა̈ფიცარდ რა̈̄ქუ̂, ერე "ჲაღო ესერ ჯა რა̈̄ქუ̂ინნე დი̄ნა̈̄ ლა̈ჲშა̈ნს".
Line of edition: 21    ხელწიფდ ხა̈̄ქუ̂: "ქაუ̂ ესერ რა̈̄ქუ̂ აღო!" ა̈ფიცარდ ხა̈̄ქუ̂, ერე
Line of edition: 22    "დი̄ნას ესერ ბარჯჟი უ̂ოქუ̂რე ლუსდუ̈გ ხა̄გ". ეჩუნღო ხელწიფ ლა̈ხჭო̈დდა:
Line of edition: 23    "ხედა̈̄ ბარჯჟი̄ნ ესერ ხა̄გ უ̂ოქუ̂რე ლუსდუ̈გ?" ა̈ფიცარდ
Line of edition: 24    დეშმა ლახტიხ. ეჩქა ქა̄ნჴა̈დ მჷხმჷ̄რი ი რა̈̄ქუ̂, ერე "ჲაღო ესერ ჯა
Line of edition: 25    რა̈̄ქუ̂ინნე, ხედუ̂ა̈̄ჲ ბარჯჟი̄ნ ესერ ხა̄რ უ̂ოქუ̂რე ლუსგუ̈გ".ხელწიფდ
Line of edition: 26    ხა̈̄ქუ̂: "ჲა̈ღო ესერ ქაუ̂ რა̈̄ქუ̂". მჷხმჷ̄რიდ ხა̈̄ქუ̂: "დი̄ნას ესერ უ̂ოქუ̂რე
Line of edition: 27    ლუსდუ̈გ ხა̄გ მურსგუ̂ენ ბარჯჟი".

Line of edition: 28       ათხე დი̄ნა ლა̈ცლა̈უ̂ია̄ლდ ოხჴა̈დხ ა̈ფიცარს ი მჷხმჷ̄რის. დი̄ნას,
Line of edition: 29    მა̈ჲ საკუ̂რელ, ა̈ფიცართე ხოცხა̈̄ნ ლიწუ̂ი̄ლა̈̄ლ. ხელწიფდ რა̈̄ქუ̂, ერე
Line of edition: 30    "ბა̄ზ' ესერ ა̈ფიცარ ი მჷხმჷ̄რი სგაუ̂ ლოხყუ̂ინეხ დი̄ნას ეჩხა̈ნ-ამხა̈ნ
Line of edition: 31    ი მჷხა̈რ ესერ ხედუ̂ა̈̄ჲშთე ქა ისპი დი̄ნა, ეჩი̄შ ესერუ ლა̈სუ̂".

Line of edition: 32       ეჯ ლე̄თ ჩუ̂ადყუ̂ინეხ აშხუდ. დი̄ნა ა̈ფიცერთე გარ სიპდა, მჷხმჷ̄რის
Line of edition: 33    ქაჲ დე̄სა ხეთლენ. მჷხმჷ̄რიდ კანფეტა̈რ ი ალა ლალე̄მ. ამ
Line of edition: 34    დრო̈უ̂ს ა̈ფიცარს ქა̄მოუ̂ ლი̄ზი ა̈ხკუ̂ა̈დ ი ლა̈ხჭუ̂ედდა მჷხმჷ̄რის: "ქა̄მოუ̂
Line of edition: 35    ლა̄ზ ესერ იმე ი̄რა?" მჷხმჷ̄რიდ ხა̈̄ქუ̂: "ქა̄მოუ̂ ლა̄ზ ესერ დე̄მე, მიჩ
Line of edition: 36    ესერი ხა̄რა ქა̄მოუ̂ ლე̄ზი ი ტა̈შდჟი̄ნ ესერ ა̈მჩედ ი ეჩუნღო ესერ
Line of edition: 37    ჩუ ლოხმამა, ადო მჷხა̈რ ესერ ლეყმე ი̄რო̄ლ". ა̈ფიცარ ჟ'ანჷგა̈̄ნ, ქა̄ჩა̈დ
Page of edition: 351  Line of edition: 1    ტაშდჟი ქა̄მოუ̂ (\\ ჩუ̂ადსგა̈̄რ ტა̈შდჟი) ი ეჩუნღო ჩუ ლალე̄მ.
Line of edition: 2    ლაზობჟი ულმაშა̈რს ჟ'ა̈ხცომა̈̄ნ ი ჩუ̂ადყურდა ეჯჟი. ათხე დი̄ნას
Line of edition: 3    ხოლა ქუ̂ინ ლახჴანდა ი მჷხმჷ̄რითე ა̈სიპდა ი ქა̈̄თტჷ̄შა̈̄ნ ამის.

Line of edition: 4       მე̄რმა ლადეღ ა̈ნწუ̂ე̄ნეხ ი დი̄ნა ქა ხატჷ̄შა მჷხმჷ̄რის ი ა̈ფიცარს
Line of edition: 5    ჟი ლუთულუ̂აფე ხა̄რ მა̈გ სგუ̂ებინჩუ. დი̄ნა მჷხმჷ̄რის ლახუ̂ე̄მხ ი სგა̄თგურგუ̂ნეხ,
Line of edition: 6    ა̈ფიცარს პაღუ̈რ ხაჴიდხ ი ქა̄დკუ̂ა̈რხ ეჩჟი.

Line of edition: 7       მჷხმჷ̄რიდ ი დი̄ნად ხოჩა ლირდე̄-ლიზგე ა̈დჴიდხ ი ლჷმზჷრე̄უ̂ ხი!



Next part


This text is part of the TITUS edition of Svan Prose Texts I (Upper Bal).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.