TITUS
Svan Prose Texts I (Upper Bal)
Part No. 159
Previous part

Text: 164 
Page of edition: 368 
Line of edition: 10 
164.   ხა̈ჯი დაუთ


Line of edition: 11       (ლუსუ ცჷგინ)

Line of edition: 12       ლა̈̄სუ̂ხ ხა̈ჯი დაუთ ი მიჩა ხეხუ̂. ალჲა̈რს ხორდახ ეშხუ ჭყინტგეზალ
Line of edition: 13    ი მე̄რმე დი̄ნა. ხა̈ჯი დაუთს ი მიჩა ხეხუ̂ს ხეკუ̂ა̈დხ ქაბათე
Line of edition: 14    ლი̄ზი. ჭყინტს ინჴრინახ, მარე დი̄ნა̈̄ ლიესგი მა̄დ ხეკუ̂ა̈დხ. რა̈̄ქუ̂ დი̄ნა̈̄
Line of edition: 15    დიდ, ერე "ჲა̈სუ ესერ ლახბა̈რჲეხ მინე დინაგეზალ?" ხა̈ჯი დაუთდ
Line of edition: 16    რა̈̄ქუ̂: "ჲა̈ს ესერ ი ეფენდის ესერუ ლახბა̈რჲეხ". ზურა̄ლდ რა̈̄ქუ̂,
Line of edition: 17    ერე "ეზა̈რ ესერ, სგაუ̂ ესერ ლახბა̈რჲეხ".

Line of edition: 18       ალჲა̈რდ დი̄ნაგეზალ სგა ლახბა̈რჲეხ ეფენდის ი სგა ლახშგურა̄ნეხ
Line of edition: 19    ეჩჟი̄ნ, უმუ̂ა̈̄ჲჟი (\\ უმჟჷუ̂ა̈̄ჲჟი) მიჩა გეზალ. ალჲა̈რ აჩა̈დხ ქაბათე
Line of edition: 20    ი ჭყინტგეზალი ა̈დჴერნეხ. ეფენდიდ დი̄ნას მომსახუ̂ირდ ლახუ̂ე̄მ ეშხუ
Line of edition: 21    დედბერ. დი̄ნა ეზა̈რ ლესგდი ლა̈̄სუ̂ ი ეფენდის ეზა̈რ ხებჟა̈̄ნ. ეფენდიდ
Line of edition: 22    ხა̈̄ქუ̂ დედბერს, ერე "მა̈ჲ ესერ ხაკუ მიჩა̈შხა̈ნქა, ალ დი̄ნას ესერ
Line of edition: 23    ჰე̄ სგა მოშ ჴიდე მიჩა̈შთე̄სგა". დედბერ აჩა̈დ დი̄ნათე ი ხა̈̄ქუ̂, ერე
Line of edition: 24    "ალა ესერ მა̈ჲ ლ'-ა, მიჩა ნამა̄რ დია̈რს ი ლეზუ̂ებს ესერ ხოლა ქუ̂ინ
Line of edition: 25    ხოჴან?" დი̄ნად ხა̈̄ქუ̂: "ხოლა ქუ̂ინ ესერ იმჟი ხეჴნი, ჩიგა̈რ ესერ
Line of edition: 26    ლჷმსყა̈უ̂ინ ლეზო̈ბს ი ალა ესერ დე̄სა მოშ ხო̄ქუ̂ა მიჩა ბაბა ხა̈ჯი
Line of edition: 27    დაუთს!" დედბერ ჩიგარ ხაყლა, ერე "მიჩა ნამა̄რს ესერ წიდი ქუ̂ინ
Line of edition: 28    ხოჴან". დი̄ნა იჴა̄ნე მიჩა შია̈რს, მარე დე̄მშა ქუ̂ინ ხაჴან. დედბერდ
Line of edition: 29    ხა̈̄ქუ̂: "მიჩა ლაცლ' ე̄სერ ჩიგარ აბანოისგა ისტღუნა̈̄ლხ ი ჯ' ე̄სერ
Line of edition: 30    ხა̈დურდ დე̄სა ლჷბრე̄ლი აბანოისგა". დედბერდ ხა̈̄ქუ̂ ა̈ჯ' ე̄სერ
Line of edition: 31    ადინე აბანოთე ი ჩუ ესერუ ა̈დბარა̈̄ნ".

Line of edition: 32       დი̄ნა ოთჴერდა ი ხოხალდა, ერე "ტკიცდ ესერ აბანოთე მირე̄ს
Line of edition: 33    ა̈ჲე̄სგი". სგა̄დიე დედბერდ ეფენდი̄ ლა̈ლგმა̈̄რმჷყ. ამჩუ ყო̄რა̈ლ სგა̄დკარე
Line of edition: 34    აშხუ̂ ლარდა̈̄შ ი დი̄ნას სგა ლოხჯუ̈̄რ ამხა̄უ̂თე̄სგა. ამე̄სგა ჩუ
Line of edition: 35    სგურ ეფენდი. ეფენდიდ ხა̈̄ქუ̂: "ჯ' ე̄სერ ხოჩა დი̄ნა, მიჩ ესერ ხაკუ
Page of edition: 369  Line of edition: 1    ჯა". დი̄ნად ხა̈̄ქუ̂: "ხაკუჩ ესერ, მარე შგუ̂ირ ესერ ხე̄რა, მიჩა დის
Line of edition: 2    ი მუს ესერ მიჩა გეზლა̈ გუ̂ა̈რდ ლოხბა̈რჲახ მიჩა თხუ̂იმ". ეფენდიდ
Line of edition: 3    ხა̈̄ქუ̂: "ლოხბა̈რჲახ ესერ, მარე დეშ ესერ აჭკჷრნე". დი̄ნად ხა̈̄ქუ̂:
Line of edition: 4    "ეზერ ესერ ჲაღო, მა̄რ' ე̄სერ ზურა̄ლ დეშ ხა̈წრე". დი̄ნად ხა̈̄ქუ̂, ერე
Line of edition: 5    ა̈ჯ' ე̄სერ ღუ̂ა̈ჟმა̄რაცახა̈ნ ნალყურ დე̄სა ლი ი ათხ' ე̄სერ ჯა ქაუ̂ ა̈დბარა̄ლა̈̄ნ
Line of edition: 6    საპონშუ̂". ეფენდი სგა ლახა̄დ ლაბრა̄ლს. დი̄ნა საპენს ხოხჯჷნა.
Line of edition: 7    ამნე̄მ გუნ ოთხჷჯნე ი პე̄რ ახა̄გა̈̄ნ ეფენდის თე̄რა̈ლქა, ეჩქა
Line of edition: 8    ლა̈სგიდ დე̄სა ხა̄დ. დი̄ნად ქა̄დსკინე ჭიქი ლაჴუ̂რაქა (ყო̄რა̈ლ ქა ლჷდე
Line of edition: 9    ლა̈̄სუ̂ხ). დი̄ნა აჩა̈დ მიჩა ბაბა ხა̈ჯი დაუთი ლარდათე (\\ ქორთე). ამეჩუ
Line of edition: 10    არდა ჯა გარ ი იგუ̂ა̈ნდა. ეფენდიდ ლა̈ირ ოთზჷზე ხა̈ჯი დაუთს:
Line of edition: 11    "მიჩა დი̄ნ' ე̄სერ ილქა̄მა̈̄ლ, უ̂ოდ-ი-უ̂ოდ ესერ ლჷმგიჭუ̂ინ ი ათხ' ე̄სერ
Line of edition: 12    დეშ ოთგი̄ჭა ი მუნდრო̈უ̂ ესერ ნუმაუ̂ ხა̄რ. მიჩა შია̈რისგა ესერ მა̄მა
Line of edition: 13    ა̈რი ეჯ დი̄ნა".

Line of edition: 14       ლა̈ირ ოთჴა̈დ ხა̈ჯი დაუთს. ალა ქა̈̄დჭოდა̄ნე, ეჩქა მე̄უ̂არ ა̈ნხირნა̈̄ნ.
Line of edition: 15    ხა̈ჯი დაუთს ლიჴდა̄ლე დრო̈უ̂ ხა̄დ ა̈გითე. მიჩა ჭყინტგეზალს
Line of edition: 16    ხა̈̄ქუ̂, ერე "ჯ' ე̄სერ სგუ̂ებინუ აჩა̈დ ი მიჩა დაჩუ̈რ ესერ ჩუ[უ̂] ა̈ძიჰ ი
Line of edition: 17    ზისხ ესერ სგაუ̂ ლახხუ̂იე შუკუ̂ჟი". გეზალ ანჴა̈დ სგუ̂ებინ ი სგა̄ჩა̈დ დი̄ნათე̄სგა.
Line of edition: 18    დი̄ნას ქა ხა̈̄ქუ̂ ერე "ეფენდის ესერ მიჩა ბედჟი ამჟი-ამჟი
Line of edition: 19    ლა̈ირ ოხზჷზა, ერე ჯ'ე̄სერ იქა̄მა̈̄ლ. ალა ესერ მინე მუ ხა̈ჯი
Line of edition: 20    დაუთს მე̄უ̂არ ოთსა̈სტკა ი ჯ'ე̄სერ ოხზჷზა მიჩა ლა̈ძჰენთე ი ზისხ
Line of edition: 21    ესერ სგაუ̂ ლახხუ̂იე შუკუ̂ჟი. დი̄ნად ხა̈̄ქუ̂: "ეზარ ესერ, ალა ესერ ამჟი
Line of edition: 22    ი̄რა, უმუ̂ა̄ლე ესერ ღე̄რბათ ჩუუ̂ ოთცხირა! ჯ'ე̄სერ ჩუუ̂ ა̈ძიჰ ი მიჩა
Line of edition: 23    ზისხ ესერ ოთჴიდუ̄ მინე მუს". მიჩა ჯუმილდ მა̄დ ა̈ძიჰ მიჩა დაჩუ̈რ
Line of edition: 24    ა̈დჴერნე ჯუ̂ე̄დია მინდო̈რთე ი ამე ჩუ̂ა̈ძიჰ დაჩუ̂რა̈ მჷქაფ როსკო̄ლ.
Line of edition: 25    ამი̄ ზისხ სგა ლა̈ჲჭუ̂ე̄ნ პლატოქს ი ადიე ეჩჟი. შუკუ̂ჟი სგა ლახხუ̂ი̄დ
Line of edition: 26    ხა̈ჯი დაუთ ი მიჩა ხეხუ̂. ხა̈ჯი დაუთდ ხა̈̄ქუ̂ მიჩა გეზალს. ერე "მა̈ჲ
Line of edition: 27    ესერ ხოჩუ̂მინა, ოთძიჰ' ე̄სერ მა̄?" გეზალდ ხა̈̄ქუ̂: "ა̄დუ, ჩუ ესერ
Line of edition: 28    ოთძიჰა, ზისხ ესერ პლატოქდ ხოჭო̄ნა". ზისხ ქა ლახწუ̂ე̄ნე ხა̈ჯი დაუთს.
Line of edition: 29    ხა̈ჯი დაუთდ ხა̈̄ქუ̂, ერე "ამჟი̄ნ ესერ ხა̈კუ̂და ეჩის (\\ ეჩას)!"
Line of edition: 30    ხა̈ჯი დაუთ, მიჩა ხეხუ̂ ი გეზალ ა̈გითე ანჴა̈დხ.

Line of edition: 31       დი̄ნა ესღრ' ესღრი ი აშხუ̂ აგის მჷლდეღს ათა̄სდ. ხა̈ქუ̂, ერე "მიჩა
Line of edition: 32    გებენ ესერ ქაუ̂ ლოხცა̈̄დ". მჷლდეღდ ხა̈̄ქუ̂, ერე "მიჩ ესერ ხოჩა
Line of edition: 33    ლერქუ̂ა̈ლ ხა̈̄ქუ̂ ი ალჲა̈რ ესერ ხოლა̈̄ლ ლიხ". დი̄ნად ხა̈̄ქუ̂: "ქაუ̂ ესერ
Line of edition: 34    ლოხცა̈̄დ ეში̄". მჷლდეღდ ქა ლოხცა̈̄დ. დი̄ნად სგა ლა̈ჲქუ̂ე მჷლდეღი
Line of edition: 35    ნაქუ̂ა̈მ ი აჩა̈დ. ესღრ' ესღრი ი აშხუ̂ ა̈გის სარაგცახა̈ნ ხოჩა მეგმა̈რ
Line of edition: 36    ლჷგხ. დი̄ნა ჟ'აჩა̈დ მეგა̈მთეჟი. ლა̈ჲსგიდა ეჩხა̄უ̂-ამხა̄უ̂ ი ფე̄დიას ჰადაუ̂ჯუყშა
Line of edition: 37    (\\ ხადაუ̂ჯუყშა) იზგახ. ჰადაუ̂ჯუყშა ლა̈წდაუ̂ ჩა̄ჟა̈რს ლათუ̂ნათე
Line of edition: 38    ალ სარაგთე ჴიდახ.

Page of edition: 370 
Line of edition: 1       აშხუ̂ინ ანჴიდხ ჩა̄ჟა̈რ. ჩა̄ჟა̈რს ქუ̂ინ მირა̈̄მშა ლახჴანდახ ი ჟიბოუ̂
Line of edition: 2    ლა̈ჲსგიდახ. ლიც მა̄დ ლაი̄შხ. ამჟი ჴიდახ ჩიგარ, მარე ჩა̄ჟა̈რ ჟიბოუ̂
Line of edition: 3    გარ ისგიდდახ ი ლიცს დე̄მ ითრახ. ალა ქო̄ხო̄მბუ̂ეხ მეფე̄ გეზალს.
Line of edition: 4    ამნე̄მ ჟ'ა̈ნკიდ თო̈ფ ი აჩა̈დ სარაგთე. ლა̈ჲსგიდა ჟიბოუ̂ ი მეშხო̄ლ
Line of edition: 5    ესწუ̂ე̄ნე. ეჩქა ლახტუ̈̄ლ, ერე "ჩუუ̂ ესერ ანჴა̈დ, ერუ̂ა̈̄ჲღენ ლი, ადო
Line of edition: 6    ესერ თო̈ფს ხატყცი". ეჩქა დი̄ნა ჩუბოუ̂ ლა̈ჲსგიდა მეგა̈მხა̈ნჩუ, ფაყუ̂ ჩოხშყა̈დ
Line of edition: 7    ი ეჩქა ლუსდგუ̂ა̈რი ქა̄ნშჷ̄დხ ი გიმმჷყ ა̈ჰი̄დხ. ეჩქა ჭყინტ, მეფე̄
Line of edition: 8    გეზალ, სგა ლოხგუდირდა ლუსდგუ̂ა̈რს ი ჩუ̂ა̈ნი̄ყ დი̄ნა. ალა
Line of edition: 9    მე̄უ̂არ ათჩო̄ნ ჭყინტს ი ლა̈ხიადა̄ლოშ ადიე მიჩა მუთე: "მიჩოშდ ესერ
Line of edition: 10    ღე̄რბათ ხეხუ̂ ლოჰოდა". ალა მეფესი ათჩო̄ნ, მარე ეჯა ხალო̄ნ, ერე
Line of edition: 11    დი̄ნას და̈̄რ ხორდა. ათხე ჭყინტდ სგა̈̄დგურგუ̂ნე დი̄ნა, მარე დი̄ნა ქა
Line of edition: 12    დე̄მ გა̈რგლი ი აშ ეჯკა̈ლიბ ლესგდი ჩუ ლი, ერე ჟი ხებიდ (\\ ჟი
Line of edition: 13    ტუ̂არ). ამის ი ჭყინტს გეზლი̄რ ა̈ხთენა̈̄ნხ ჲერუ ჭყჷნტა̈რ. დი̄ნა ქა დე̄მ
Line of edition: 14    გა̈რგა̈ლდა ი აშხუ̂ინ ჭყინტ მელთერთე აჩა̈დ. მელთერდ ხა̈̄ქუ̂, ერე
Line of edition: 15    "მიჯნე̄მ ესერ ეშხუ წჷრნი ლჷგრეუ̂ ა̈ნყიდ ი ეჯა აშხუ̂ მიჩა გეზალს
Line of edition: 16    ხედუ̂ა̈̄ჲ ესერ ხოშა ხალტინს, ეჩასუ ლახუ̂ე̄მ. ჯა აჩა̈დუ ესერ ი ჩუუ̂
Line of edition: 17    ესერ ა̈თპა̈ჟ".

Line of edition: 18       ჭყინტდ ალა ამჟი ჩო̈მინ. ჟ'ა̈ნყიდ ეშხუ წჷრნი ლჷგრე ი მუგდაჲ
Line of edition: 19    ესღრი იმთე, ეჩჟი ქა ლახუ̂ე̄მ აშხუ̂ გეზალს ლჷგრე ი ქა̄ჩა̈დ ყო̄რქა.
Line of edition: 20    მე̄რმა გეზალდ ლიგუ̂ნი ა̈დბინე: "მიჩოშდ ესერ იმღა მო̄დ ლოჰოდა?"
Line of edition: 21    ეჩქა ზურა̄ლდ ხა̈̄ქუ̂, ერე "ჟიუ̂ ესერ ახშდეხა ლჷგრე-ჲ იშგენი̄, უმუ̂ა̈̄ჲ
Line of edition: 22    ესერ ეშხუ ლჷგრე ჩუ ხოთხა, ეჩე ესერ მე̄რმეი ჩუუ̂ ხოთხა!" ამჩიქქა
Line of edition: 23    ჭყინტ ჩუ ხეპა̈ჟ ყო̄რ სგა̈̄ნჩუ, ქა̄ნსკინე ლაპა̈ჟხა̈ნქა ი ჟი ლა̈ჲცხუ̂ა̈პ
Line of edition: 24    დაშნა̈ჲ ი ხა̈̄ქუ̂ დი̄ნას, ერე "მიჩ ესერ შიშდ ჩუ̂ადგა̈რი, ალამა̈გ ხა̈ნს
Line of edition: 25    ნაღროუ̂ა̄ლუ̈̄რ. ჰე̄ ესერ გა̈რგლა ჩუ ხახლე̄ნა, იმღა ესერ მო̄დ ლჷმგჷრგა̈ლინ?"
Line of edition: 26    დი̄ნა უ̂უშკუ̂დ ა̈ხშჷმ ი ხა̈̄ქუ̂ მიჩა ჭა̈შს: "მიჩაუ̂ ესერ ცოდ
Line of edition: 27    ხა̄რ ჲაღო! მიჩ ესერ ლიგჷრგა̈ლი მა̄დ ხა̈კუ̂და ჩიქე, ეჯღა ერე ხოჩა̄მდ
Line of edition: 28    ესერ ხა̈ჴდა̈ნნა ჩიქე̄ ნაუ̂გჷრგა̈ლი.

Line of edition: 29       დი̄ნად ქო̄ხო̄მბუ̂ე მა̈გ, იმუ̂ა̈̄ჲჟი ლა̈̄სუ̂ მიჩა გუ̂ეშ. ეჩქა მიჩა ჭა̈შდ
Line of edition: 30    ჟ'ანმა̄რე ხეხუ̂ ი გეზლი̄რ ი ჩხარა ლეჴა̈ნ ძღუ̂ენ, ამის სგა ლოხჴერნე
Line of edition: 31    ჩხარა მა̄რე, ეშხუ ზურა̄ლ მიჩა ხეხუ̂მი მჷ̄ზნა̈ნიდ ი ადზჷზე ხა̈ჯი
Line of edition: 32    დაუთიშთე, მიჩა ხეხუ̂მი მუთე. ხეხუ̂ ი გეზლი̄რი̄ აჩა̈დხ მიჩა ლამუ̂ა̈რთე
Line of edition: 33    (\\ ლამუ̂ართე). შუკუ̂ჟი ჩუ̂ა̈თბურა̈̄ნხ ი ჩუ̂ადჷგა̈̄ნხ მინდო̈რისგა.
Line of edition: 34    მინდო̈რისგა ეშხუ ქორ ლჷ̄გა̈ნ ი სგა̄ჩა̈დხ ამხა̄უ̂. ამე̄სგა ჩუ̂ადჷ̄გა̈̄ნხ ბა̄ზი.
Line of edition: 35    ღუ̂აჟა̈რს ლა̈ხგუმა̄რა̈̄ნხ ზურა̄ლდ ი ხა̈̄ქუ̂ხ, ერე "ჯ' ე̄სერ ბა̄ზი მინს
Line of edition: 36    ხაკუხ". ზურა̄ლდ ხა̈̄ქუ̂: "მინეშდ ესერ მა̄დ ოხბა̈რჲა მიჩა ჭა̈შს მიჩა
Line of edition: 37    თხუ̂იმ ი მიჩა მუთ' ე̄სერ ოთბა̈რჲა". ღუ̂აჟა̈რდ ხა̈̄ქუ̂ხ, ერე "ოხბა̈რჲა
Page of edition: 371  Line of edition: 1    ესერ, მარე ბა̄ზ' ესერ მინს ხაკუ[ხ] ჯა". ეჩქა ზურა̄ლდ ხა̈̄ქუ̂, ერე
Line of edition: 2    ა̈ეზერ ესერ, ჲაღო, ჩუუ̂ ესერ ადყუ̂ინეხ". აჩა̈დ კოტო̄ლ ხა̈ნ ი დი̄ნად
Line of edition: 3    რა̈̄ქუ̂, ერე "ქა̄მთე ესერ ღჷრი". ეჩქა მა̄რა̈̄ლდ თა̈კუ̂ ლახბეხ ი ქა̄ფუ̈შდხ ეჩჟი.
Line of edition: 4    თა̈კუ̂ს სგა ლოხგუდირდახ. დი̄ნად ხა̈̄ქუ̂ მიჩა მომსახუ̂ირს,
Line of edition: 5    ერე "ქაუ̂ ესერ ოთჴერდა ჯაი". მომსახუ̂ირ ქო̄თჴერდა. დი̄ნად თა̈კუ̂
Line of edition: 6    ქა̈̄ნფიშგ ი მეგა̈მს სგა ლახბე. მომსახუ̂ირ სგა̄ნჴა̈დ ქორთე. ღუ̂აჟა̈რდ
Line of edition: 7    რა̈̄ქუ̂ხ: "მა̄მ' ე̄სერ იჴდა̈ნნი-მუ დი̄ნა ქორთე?" თა̈კუ̂ს სგო̄ხბჷდხ, მარე
Line of edition: 8    ალა მეგა̈მს ხა̈̄ბჷდ ი დეშ ა̈ნთირნეხ სგა. აჩა̈დხ ქა̄მთე ი ზურა̄ლ დე̄სა
Line of edition: 9    არდა. ალა ხოლა̄მდ ლახბაჟჷნხ ღუ̂აჟა̈რს ი რა̈̄ქუ̂ხ, ერე "მა̈ჲ ესერ
Line of edition: 10    ა̈ნგონუ̂ახ, მინე მახუ̂ში ესერ ჩი̄ თხუმა̈რს ოთშჷდი̄რნე!" რა̈̄ქუ̂ხ, ერე
Line of edition: 11    ა̈ჲაღო ესერ მიჩა გეზლი̄რ ესერ ჩუუ̂ ა̈ძიჰხ (\\ ჩუუ̂ ადძიჰნიე̄ლეხ) ი
Line of edition: 12    ეჩუნღო ესერ ჟიუ̂ ანჯა̈ბხ ი ღუ̂ეშგდუ ოთტიხხ მინე ხოშა̄მ". ჩუჲ ამჟი
Line of edition: 13    ჩო̈მინხ: ბოფშა̈რ ჩუ̂ა̈ძიჰხ ი ეჩუნღო ჟ'ანჯა̈ბხ ი რა̈̄ქუ̂ხ, ერე "ალჲა̈რ
Line of edition: 14    ესერ ოთჴიდხუ მინე ხოშა̄მ ი ხა̈̄ქუ̂ხუ, ერე "ეჯ ზურა̄ლ როქუ̂ ჩუ̂ა̈დსო̄ყა̈̄ნ
Line of edition: 15    ი გეზლი̄რ როქუ̂ ჩუ̂ა̈ძიჰ ი ცხუ̂ადისგა როქუ̂ ჟ'ანჯა̈ბ".

Line of edition: 16       მე̄რმა ლადეღ აჩა̈დხ ღუ̂ეშგდ ი მეფე̄ გეზალს ბოფშა̈რ ლჷძჰინიე̄ლე
Line of edition: 17    ოთჴიდხ. ალა ლეგდ ლახბაჟჷნ მეფე̄ გეზალს ი მე̄უ̂არ ათუ̂ა̈შგდჷნ.

Line of edition: 18       დი̄ნა ესღრ' ესღრი ი აშხუ̂ ა̈გის მინდო̈რისგა მჷლდეღს ათა̄სდ.
Line of edition: 19    ხა̈̄ქუ̂ ამის, ერე
Line of edition: 20       -- მიჩა გებენ ესერ მიჩუ ლოხცა̈̄დ ი მიჯნე̄მ ესერ მიჩა ლერქუ̂ა̈ლუ
Line of edition: 21    ლა̈ჲქუ̂ე. -- მჷლდეღდ ხა̈̄ქუ̂, ერე
Line of edition: 22       -- მიჩა ლერქუ̂ა̈ლ ესერ ხოლა̈̄ლ ლიხ ი მიჩა ხოჩა̈̄ლ.
Line of edition: 23       -- ეჩი̄ სერდ' ე̄სერ მიჩ ნუმაუ̂ ხა̄რ!

Line of edition: 24       მჷლდეღდ ქა ლოხცა̈̄დ გებენ ი დი̄ნა აჩა̈დ. აჩა̈დ დი̄ნაი მჷლდეღი
Line of edition: 25    სა̈ხჟი სგა̄ჩა̈დ მიჩა მუე სოფელთე̄სგა. ამე იზელა̈̄ლ ი ხაყლე ჩი̄: "ჯალჩი
Line of edition: 26    ესერ დო̄ს ხაწჷხ" (ჯალჩის სა̈უ̂ჲა̈რ ფა̈მლის ხაყლეხ). აჩა̈დ
Line of edition: 27    მიჩა მუე ქორ ნა̈ფდიათე. იტუ̈̄ლიე̄ლ ამე "დო̄ს ესერ ჯალჩი ხაწჷხხ".
Line of edition: 28    ხა̈ჯი დაუთდ ხა̈̄ქუ̂, ერე
Line of edition: 29       -- მა̈ჲ ესერ ხა̈მჲედა ღო?
Line of edition: 30       -- მა̈ჲ ესერ ი ზექი ლიმა̄რე, ლიცი ლიჴდე ი ყუ̂ელფჩუ ლიშდა̈ბ.

Line of edition: 31       ხა̈ჯი დაუთდ ჩუ̂ადგენე ჯალჩიდ.

Line of edition: 32       მეფე̄ გეზალ ლახსგურდა ჩა̈̄ჟს ი ჩხარა მა̄რე სგა ლა̈ჲჴერნე ი ანჴა̈დ
Line of edition: 33    ხა̈ჯი დაუთი სოფელთე. ამე ლა̄ჲჭო̈დიე̄ლე ხა̈ჯი დაუთი ქორ.
Line of edition: 34    ხა̈ჯი დაუთი ქორ უმუ̂ა̈̄ჲ ლა̈̄სუ̂, ალა ჟ'ა̈ნმეჴრე ი სგა ლა̄ხმუშგუ̂რა̈̄ნ
Line of edition: 35    ამის. ხა̈ჯი დაუთს მე̄უ̂არ ათხი̄დჷნ ამი̄ ლიჴედ. ამნე̄მ ჴა̈ნ ა̈ძიჰ ი ეფენდი
Line of edition: 36    ა̈წჰე აჯაღ. ეფენდი ანჴა̈დ ხა̈ჯი დაუთიშთე. "ბა̄ზი, -- რა̈̄ქუ̂ მეფე̄ გეზალდ,
Line of edition: 37    ჰადაუ̂ჯუყშა ჭყინტდ, ერე -- ლიჰრაკა̈̄ლუ (\\ ჰარკობ) ესერ
Page of edition: 372  Line of edition: 1    ახა̄დხ". ხა̈ჯი დაუთდ ხა̈̄ქუ̂ ეფენდის, ერე "ანჰარკეუ̂ ესერ მა". ეფენდიდ
Line of edition: 2    ქა̄ნჰარკე ეშხუ ჰარა̈კ. ეჩუნღო ხა̈̄ქუ̂ხ ხადაუ̂ჯუყშა ჭყინტს, ერე
Line of edition: 3    "მიჯნე̄მუ ესერ მა ანჰარკე ათხე". ამნე̄მი ანჰარკე. ღუ̂ეშგინპილს ჟ'ანჷ̄გა̈̄ნ
Line of edition: 4    ჯალჩი ი ხა̈ქუ̂, ერე "აშხუ̂ ჰარა̈კს ესერ ჯაი ანა̈̄მბუ̂ი". ეჩქა ხა̈ჯი
Line of edition: 5    დაუთდ, ეფენდიდ ი ალჲა̈̄რდ რა̈̄ქუ̂ხ, ერე "ამის ესერ კისდ ჩუ ხეხლი
Line of edition: 6    ხოჩა ჰარა̈კ. ხუ̂ა̈ჲ ღოლჲა̄ქრე ნა̈ჭმინა̄ლ ესერ ლი". ხა̈̄ქუ̂ხ, ერე "ანა̄მბუ̂ეუ̂
Line of edition: 7    ესერ, ჲაღო!" ჯალჩიდ ა̈ნბინე:

Line of edition: 8       "მიჩ ესერ ხასმა ეშხუ ჰარა̈კ, ერე ლჷმა̈̄რ ეშხუ მა̄რე, ხედუ̂ა̈̄ჲს
Line of edition: 9    ესერ ჟახად ხაჟხე̄ნა ხა̈ჯი დაუთ. ხა̈ჯი დაუთს ესერ ხარდენა ჲერუ
Line of edition: 10    გეზალ. ეშხუ ჭყინტ ი მე̄რმე დი̄ნა. ხა̈ჯი დაუთს ესერ ქაბათე ხა̈კუ̂და
Line of edition: 11    ლი̄ზი. ეჩხა̄უ̂ ესერ ლჷმჲა̈̄სგუ̂ინ ხეხუ̂ს ი ჭყინტგეზალს, დი̄ნაგეზალ
Line of edition: 12    ესერ ა̈გის ოთცუ̂ი̄რა ი ეფენდიდ ესერ ლოხბა̈რჲა. ერე "მიჩა ლიჴდა̄ლ
Line of edition: 13    ესერ ჩუუ̂ ლოხშხუ̂ინ დი̄ნა მიჩა გეზლა̈ გუ̂ა̈რდ". ეფენდის ესერ
Line of edition: 14    ჩოთბაცა ხოჩა̄მდ ლიშხუ̂ნი ი სგ' ე̄სერ ლოხბა̈რჲა. ხა̈ჯი დაუთ ესერ
Line of edition: 15    მიჩა ლჷხა̈ხუ̂-ლჷგზა̈ლდ ა̈მჩედ ქაბათე. ა̈მჩედ ესერ კოტო̄ლ ხა̈ნ ი ეფენდის
Line of edition: 16    ესერ დი̄ნა̈̄ ლილა̈ტ ხა̈კუ̂და. აშხუ̂ინ ესერ სგო̄თღორუ̂ა მიჩა
Line of edition: 17    ლარდათე ი ყო̄რა̈ლ ესერ ჩოთკჷლა. ეჩქა ესერ დი̄ნას ხო̄ქუ̂ა ეფენდიდ,
Line of edition: 18    ერე "მიჩა დი̄-მუს ესერ მიჩა ლელა̈ტდ მა̄დ ლოხბა̈რჲახ მიჩა
Line of edition: 19    თხუ̂იმ. ეჩქა ესერ ეფენდის ხო̄ქუ̂ა: "მა̄დ ესერ ლოხბა̈რჲახ, მარე დეშ
Line of edition: 20    ესერ აჭკჷრნე". ეჩქა ესერ დი̄ნას ხო̄ქუ̂ა: "ჲაღო ესერ ჯა მა̄რაცახა̈ნ
Line of edition: 21    ნალყურ დე̄სა ლი, ქაუ̂ ესერ ა̈დბარა̈̄ნ ხოჩა̄მდ". ეჩქა ესერ ეფენდი
Line of edition: 22    ლაბრა̄ლს ლახა̄რა. დი̄ნა ესერ საპო̈ნს ხახჯინნა, ეჩქა ესერ ეფენდი̄შდ
Line of edition: 23    თე̄რა̈ლქა ოთხჷჯნა საპო̈ნ ი პე̄რ ახგენე̄ნა. ეჩქა ესერ დი̄ნას ქო̄თსკინა
Line of edition: 24    ჭიქი ლაჴუ̂რაქა. დი̄ნ' ე̄სერ ა̄გითე ა̈მტეხ მიჩა. ეფენდის ესერ
Line of edition: 25    ლა̈ირ ოთზჷზა ხა̈ჯი დაუთიშდ ქაბათე, ერე "მიჩა დი̄ნა ესერ სურუს
Line of edition: 26    ილქა̄მა̈̄ლ ი ჩი ლე̄თ ესერ ღუ̂აჟა̈რცახა̈ნ გარ ა̈რი. უ̂ოდ-ი-უ̂ოდ ესერ
Line of edition: 27    ლჷმგიჭუ̂ინ ი ღუ̂ეშგინპილს დეშ ოთგი̄ჭა ი ათხ' ე̄სერ ეჯ დი̄ნა მიჩა
Line of edition: 28    შჷნისგა მა̄მ ა̈̄რი. მუნდრო̈უ̂ ესერ ნუმაუ̂ ხა̄რ ხა̈ჯი დაუთ". ალ ლა̈ირ
Line of edition: 29    ათჴედა ხა̈ჯი დაუთს, ეჩქა ესერ მე̄უ̂არ ალხირნე̄ლი, მიჩა გეზალდ
Line of edition: 30    ესერ ხო̄ქუ̂ა, ერე "აჩა̈დუ ესერ სგუ̂ებინ, მიჩა დაჩუ̈რ ესერ ჩუუ̂ ა̈ძიჰ
Line of edition: 31    ი ზისხ ესერ სგაუ̂ ლახხუ̂იე შუკუ̂ჟი!" ხა̈ჯი დაუთი ჭყინტგეზალ ესერ
Line of edition: 32    ა̈გითე ა̈მჴედ, მიჩა დაჩუ̈რ ესერ ა̈გის ესხუ̂იე̄ნა, მარე ესერ ეჩი̄ ლიძჰენი
Line of edition: 33    ესერ დეშ ოხცხუ̂ა̈ლი̄ნა ი ეჩი̄ მჷქაფ ესერ როსკა ოთძიჰა. ეჩი̄
Line of edition: 34    ზისს ესერ სგა ლოხჭო̄ნა პლატოქდ ი სგ' ე̄სერ ლოხხუ̂ია მიჩა მუ
Line of edition: 35    ხა̈ჯი დაუთიშდ. ხა̈ჯი დაუთ ესერ ლახჭუ̂ედნა. ა̈ოთძიჰ' ე̄სერ მა̄ ჩუ?"
Page of edition: 373  Line of edition: 1    ეჩქ' ე̄სერ მიჩა ჭყინტს ხო̄ქუ̂ა, ერე "ჩუ ესერ ოთძიჰა, პლატოქდ
Line of edition: 2    ესერ ხოჭო̄ნა ზისხ". ხა̈ჯი დაუთს ესერ ხო̄ქუ̂ა, ერე "ამჟი̄ნ ესერ
Line of edition: 3    ხა̈კუ̂და ეჩის!" ხა̈ჯი დაუთ ი მიჩა ხეხუ̂ ი გეზალ ესერ ა̈გითე ა̈მჴედხ.
Line of edition: 4    დინ' ე̄სერ ა̈მჩედ. ა̈მჩედ ი აშხუ̂ ა̈გის მჷლდეღს ათლაკა. ეჯნა̈რ
Line of edition: 5    (\\ ეჩი̄შდ) ხო̄ქუ̂ა, ერე "მიჩა გებენ ესერ მიჩუ ლოხცა̈̄დ ი მიჩა
Line of edition: 6    ლერქუ̂ა̈ლ ესერ მიჯნე̄მუ ლა̈ჲქუ̂ე". მჷლდეღს ესერ მა̈ხიადა̈̄რ ქა ლოხცა̄და.
Line of edition: 7    დი̄ნა ესერ ა̈მჩედ ი აშხუ̂ ა̈გის სარაგცახა̈ნ ხოჩა̄მ მეგა̈მთეჟინ ამჩედ.
Line of edition: 8    ეჯ სარაგთ' ე̄სერ ჰადაუ̂ჯუყშა ლჷმჲა̈̄სგუ̈ნხ ჩა̄ჟა̈რს ლათუ̂ნა̈̄ლდ. ოთხუ̂იახ
Line of edition: 9    აშხუ̂ინ ჩა̄ჟა̈რ ი ლიც ესერ მა̄დ ლოხშუ̂ახ ი ჟიბოუ̂ ესერ გარ
Line of edition: 10    ლჷმსგიდუ̈ნხ. ამჟი̄ნ ესერ მე̄რმაჟი ხოჩუ̂მინახ ი მე̄სმაჟი. ეჩქა ესერ
Line of edition: 11    ქო̄ხო̄მბუ̂ახ ალა ჰადაუ̂ჯუყშა ჭყინტდ. ჭყინტ ესერ ა̄მჩედე̄ლი ეჩხა̄უ̂
Line of edition: 12    ი მეშხო̄ლ მირ ესწუ̂ე̄ნა მეგა̈მჟი. ეჩქ' ე̄სერ ლოხტუ̄ლა, ერე "ერუ̂ა̈̄ჲ
Line of edition: 13    ესერ ღენ ლი, ჩუუ̂ ესერ ანჴა̈დ, ადო ჩუ ესერ ადგა̈რი!" დი̄ნას ესერ
Line of edition: 14    თხუ̂იმ ჩუბოუ̂ ხოჩუ̂მინა, ეჩქა ესერ ფაყუ̂ ჩუ̂ახშყედა ი ლუსდგუ̂ა̈რი
Line of edition: 15    ესერ ჩუ̂ალში̄დლიხ. ჭყინტს ესერ ჩოხო̄ყა დი̄ნა ი მე̄უ̂არ ესერ ათჩო̄ნა
Line of edition: 16    ეჩი̄ ლიბეგუ̂. ჭყინტს ესერ ხეხუ̂დ ოთყედა̄ნა. დი̄ნა ესერ ქა
Line of edition: 17    დე̄მ ლჷმგჷრგა̈ლინ ი ეჩჟი̄ნ ესერ ლჷმა̈რდ. აშხუ̂ინ ესერ ჭყინტს წჷრნი
Line of edition: 18    ლჷგრე ლოჰოდა მიჩა გეზალდ, ხედუ̂ა̈̄ჲ ესერ ხოშა ხალტე̄ნა. მერმა
Line of edition: 19    ბეფშუ̂ს ესერ ლიგუ̂ნი ოთბინა, ეჩქა ესერ ხო̄ქუ̂ა დი̄ნას, ერე "ლჷგრეჲ
Line of edition: 20    ესერ ჟიუ̂ ახშდეხა ი იშგენი̄ მა̈გ". ალა ესერ ქა ხასმა მიჩა ჭა̈შს ი
Line of edition: 21    ეჩქა ესერ დაშნა̈ჲ ოხცხუ̂აპა ი ხო̄ქუ̂ა დი̄ნად, ერე "იმღა ესერ ხაღროუ̂ა̄ლა
Line of edition: 22    ათხად ი იმღა ესერ დო̄მ ლჷმგჷრგა̈ლინ?" დი̄ნას ესერ ლიგჷრგა̈ლი
Line of edition: 23    ოთბინა, ქო̄ხო̄მბუ̂ა მიჩა ამბა̈უ̂. ეჩქა ესერ ჭყინტს ჟ'ოხმა̄რა
Line of edition: 24    ჩხარა უ̄ღუ̂ა ჴა̈ნი ლებიდ ძღუ̂ენ, მიჩა ხეხუ̂ ი გეზლი̄რ ი ჩხარა მა̄რე.
Line of edition: 25    ხეხუ̂დ ესერ მომსახუ̂ირ ზურა̄ლ ლოხჴერნა ი ოთზჷზა ესერ ეჩჟი
Line of edition: 26    ხეხუ̂მი ლამუ̂ართე. შუკუ̂ჟი̄ნ ესერ ჩუ̂ათბურე̄ნახ ი აშხუ̂ მინდო̈რისგ'
Line of edition: 27    ე̄სერ ქორ ლჷმგენ, ეჩე̄სგა ესერ ჩუ̂ალგენე̄ლიხ. ეჯ ლე̄თ ესერ ჩხარა̄მ
Line of edition: 28    მა̄რა ზურა̄ლდ ლახგუმა̄რე̄ნახ (\\ გუ̂ი ლახა̄რახ) ი ზურა̄ლ ესერ ქა̄თჩედახ.
Line of edition: 29    ეჩქა ესერ ღუ̂აჟა̈რს ლახყალუ̈̄ნნახ, ერე მინე ხოშა ესერ მინს
Line of edition: 30    თხუმა̈რს ათქუცი̄რნე". ეჩქა ესერ ხო̄ქუ̂ახ, ერე "მინე ხოშა̄მ ესერუ
Line of edition: 31    ხა̈̄ქუ̂ხ, ერე "ეჯ ზურა̄ლ როქუ̂ ჩუ̂ა̈დსო̄ყა̈̄ნ ი გეზლი̄რ როქუ̂ ჩუ̂ა̈ძიჰ ი
Line of edition: 32    ეჩუნღო როქუ̂ ჟ'ანჯა̈ბ ცხუ̂ადუ̈სგა". ღუ̂აჟა̈რს ბო̄ფშა̈რ ჩოთძიჰახ ი
Line of edition: 33    ეჩუნღო ჟ'ოხჯაბახ ცხუ̂ადუ̈სგა. მერრმა ლადეღ ა̈მტეხხ ესერ ღუ̂აჟა̈რ
Line of edition: 34    მეფე̄შთე̄სგა ი ხო̄ქუ̂ახ ესერ ჭყინტდ, ერე ეჯ ზურა̄ლ როქუ̂ ჩუ̂ა̈დსო̄ყა̈̄ნ.
Line of edition: 35    გეზლი̄რ როქუ̂ ჩუ̂ა̈ძიჰ ი ჟი როქუ̂ ანჯა̈ბ ცხუ̂ადუ̈სგა". ალა
Line of edition: 36    ჭყინტს ლეგდ ლახბაჟა ი ა̈მპერე̄ლი ესერ ი ხა̈ჯი დაუთიშთე ა̈მჴედე̄ლი.
Line of edition: 37    ზურა̄ლ ესერ ა̈მჩედ, შუკუ̂ჟი̄ნ ლუღუ̂ეჟმა̄რუ ლერექუ̂ ლოხქუ̂ა
Line of edition: 38    ია́ჯალჩიდ ესერ ჲერე̄ს ათგენე̄ნა".

Page of edition: 374 
Line of edition: 1       ალა ქა რა̈̄ქუ̂ ჯალჩიდ, ეჩქა ფაყუ̂ ჩუ̂ა̈ნკიდ ი რა̈̄ქუ̂: "ალა ესერ
Line of edition: 2    მა̈გ ჯა ლი ი ხოჩაუ̂ ესერ ლე̄თ ხა̄რ მიჩა მუ ხა̈ჯი დაუთს ი მიჩა
Line of edition: 3    დედეს, მიჩა ჯჷმილს ი მიჩა ჭა̈შს!" ალჲა̈რს ჩი̄ მე̄უ̂არ ათჩო̄ნხ ეფენდი̄შჷნქა
Line of edition: 4    ი ჩხარა̄მ მა̄რანქა. ხადაუ̂ჯუყშა ჭყინტ ლა̄პა̈რ ი ეფენდის
Line of edition: 5    კინჩხ ჟ'ახქუ̂იც. ეჩუნღო ყო̄რა̈ლ ქო̄თდა̄ლე ი ჩხარა̄მ მა̄რა, მიჩა
Line of edition: 6    მჷნჴრა̄ლას, ჩი̄ ჟ'ახქუცუ̄რე თხუმა̈რ. ეჯ ლე̄თ ეჩჩუ ჲეშდ მა̄რე ადგან.
Line of edition: 7    ხადაუ̂ჯუყშა ჭყინტდ მიჩა ა̈გითე ადიე მიჩა ხეხუ̂ ი ხოჩა ლირდე̄ლიზგე
Line of edition: 8    ა̈დჴიდხ.

Line of edition: 9       უ̂ოდ ეჩის თანშუ̂ დო ლეწედ, ეჩქად ნო̄სამაუ̂ ლოგზიგა!



Page of edition: 375 
Line of edition: 1 
მესტიური
Next part


This text is part of the TITUS edition of Svan Prose Texts I (Upper Bal).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.