TITUS
Svan Prose Texts I (Upper Bal)
Part No. 160
Previous part

Text: 165 
Page of edition: 375 
Line of edition: 2 
165. და̈უ̂თა̈გნ ი ცხუ̂ითა̈გნ


Line of edition: 3       ლა̈სუ̂ხ ხეხუ̂-ჭა̈შ. ჭა̈შ გუნ მეთხუ̂ია̈რ ლა̈სუ̂. ეჯ დრო̈უ̂ქა ალას
Line of edition: 4    გეზალ ა̈ხთენა̈̄ნ ეშხუ̂ი, ჟახად ათჟა̈ხხ ცხუ̂ითა̈გნ. მუ ჩუ̂ადგან. გეზალდ
Line of edition: 5    გუნ ლითხუ̂იარ ა̈დბინე. აშხუ̂ შჷყჟი̄ნ ღუ̂აში ჟი ხა̈̄ცუდა ი მუგუ̂ლი ბიკი̄.
Line of edition: 6    ჩი ლე̄თ ახღუ̂ა̈̄ნდა ა̈გითე, ჰა̈დურდ ჩი ლე̄თ. ლეღუ̂ ჩიგარ მასა̈რდ
Line of edition: 7    ხუღუ̂ა̈̄ნ. აშხუ̂ დრო̈უ̂უნღო ლეღუ̂ ჩუ ხოშთხენდა ი მიჩა̈შდ
Line of edition: 8    ლეზობდ მა̄მ ხუღუ̂ა̈̄ნ, ნა̈ბოზს ლახ ჴედენდა. ხე̄ქუ̂ მიჩა დის: "იმღა
Line of edition: 9    გუ̂ეყა̈რ ალა, ათხედ ლეღუ̂ შუნ გუღუ̂ა̈̄ნ, ათხე მა̄მა გუღუ̂ა?" მიჩა
Line of edition: 10    დიდ ხე̄ქუ̂, ერე "მეზუ̂ბელა̈რს ხუ̂ა̄მნე ი ჩუ შდეხნა". ალა გეზალდ მა̄მა
Line of edition: 11    ა̈დჯირუ̂ე ი ბა̈ქ (\\ ლირტყო̈ლა̈̄ლ) ლახბაჟჷნდა ამი̄ ლი̄ქუ̂ი̄სგ. აშხუ̂ჟი
Line of edition: 12    ხე̄ქუ̂ მიჩა დის: "მიშგუ̂ი დი, ჴა̈დ ნაცხა̈მ იმღა ჯა̄რ?" -- ხოჩა ბედ
Line of edition: 13    გუ̂ა̄რ ი ჩუ̂ა̈თუ̂ლუგუ̂რა̈ნ". ცხუ̂ითა̈გდ მა̄მა ა̈დჯირუ̂ე ალ ამბა̈უ̂, მარე
Line of edition: 14    ალას (\\ ალ ამბა̈უ̂ს) ჩოთთხუ̂მანე.

Line of edition: 15       ოხჴა̈დ ალ ზურა̄ლს დრო̈უ̂ ი ჩუ̂ა̈დღუ̂აჟა̈̄ნ, ჭყინტ ა̈ხთაუ̂ა̈̄ნ. ნა̈ბოზს
Line of edition: 16    ცხუ̂ითა̈გნ ა̈გითე ანჴა̈დ ლა̈თხუ̂იარხა̈ნ. ათჩო̄ნდა ბო̈ფში ლიწედ: "დიდა̈ბუ
Line of edition: 17    ხა̄რ ღე̄რბათუ̂, იმუ̂ა̈̄ჲ ღერთემ მუხუ̂ბე ლამე̄მ!" ხე̄ქუ̂ მიჩა დის,
Line of edition: 18    ერე "მიშგუ̂ი დი, სი მერტყო̈ლა̄ლდა̈ს, მი გუდ მეჴდე ხუ̂ა̈სუ̂, ერე სი
Line of edition: 19    ღანაუ̂ ხა̈სუ̂ ი ათხე ქა ლა̄მეკუ̂შ, ჲა̈რ ლი ისგუ̂ი ლელა̈ტ". ეჩქა ხე̄ქუ̂
Line of edition: 20    ეჩნე̄მ, ერე "თუ̂ეთუ̂ნე და̈̄უ̂ მა̈მთქუ̂ა, ეჩხა̈ნქა მეყა̈რ ალა, ლეღუ̂ს ეჩას
Line of edition: 21    ხუ̂ა̄მნა̈ს ი ნა̈ბოზს ლეღუ̂ ეჯღა ა̈დძუ̂ირა̈̄ნ".

Line of edition: 22       ბა̄ზი ჩუ̂ა̈რიხ ალჲა̈რ, ლახუ̂ბა, უშხუდ, ხოხუ̂რა მუხუ̂ბე კამინს(უ̂) ლადეღუ̂შ
Line of edition: 23    იცხემ, ირთხინს ლე̄თშუ̂. ალ ბეფშუ̂ს შიშდ მახეღუ̂ა̈ჟ ახფას.

Line of edition: 24       ალ დრო̈უ̂ჟი მიჩა მუ ანჴა̈დ. თუ̂ეთუ̂ნე და̈̄უ̂, ხე̄ქუ̂ ალ ზურა̄ლს,
Line of edition: 25    ერე "ალას და̈უ̂თა̈გნ როქუ ათჟა̈ხხ". ზურა̄ლდ ხე̄ქუ̂ და̈̄უ̂ს, ერე "სგუ̂ებნე
Line of edition: 26    გეზალს ოლსახთად მა". და̈̄უ̂დ ხე̄ქუ̂, ერე "ნა̈ბოზს მი ბალუ̂ა̈რდისგა
Line of edition: 27    ხუ̂ირდი ი ბერჟა̈ წირდ ესუ̂სიპი ი ჩუ̂ა̈ნშყუ̂დენი ი თხუ̂იმს ჩოთბიჴუ̂ე
Line of edition: 28    ი ჩოთდაგრი. ეჩქა ნა̈ჲ ი გუშგუ̂ეჲ გეზალ გარ ლირდიდ".

Line of edition: 29       ალა, და̈უ̂თა̈გნ, გუდმეცა̈რ ლი, ჟ'ა̈ნჰურნე ი გუდ აჴა̈დ. ბა̄ზი
Line of edition: 30    მიჩა მუ ბალუ̂ა̈რდისგა ა̈რი. მიჩა მუხუ̂ბე ანჴა̈დ, ეჩქა ყო̄რჟი̄ნ ესხუ̂ი̄დ,
Line of edition: 31    ხა̈̄ქუ̂, ერე ჟი ლა̈მქუ̂ე̄ცინ!" ეჩნე̄მ შჷყთეჟი ჟ'ესგენე ი თხუმქა ქა̈̄ხთხა̈ფ,
Line of edition: 32    თხუმჟი ა̈თფარა̈̄ნ ი ბა̄ზი დაგრა ჩოთჟომე. სგა̄ჩა̈დხ ქორთე̄სგა,
Page of edition: 376  Line of edition: 1    ეჩქა მიჩა დი ა̈თცუ̄დ ხოხუ̂რა̄მ გეზალს, და̈უ̂თა̈გნს: მა̈ფშა̈̄რ მუხუ̂ბა
Line of edition: 2    იმღა ხექუ̂ე̄ცინა̈̄ლ?" ეჩქა მიჩა ხოშა̄მ გეზალდ ხე̄ქუ̂, ერე "დე̄მის ფეშუ̂ნა,
Line of edition: 3    მი ალა მალა̈ტ".

Line of edition: 4       მესმა ლადეღ ცხუ̂ითა̈გნ ლა̈თხუ̂იართე აჩა̈დ. თუ̂ეთუ̂ნე და̈̄უ̂
Line of edition: 5    სგა̄ნჴა̈დ ზურა̄ლთე. ცხუ̂ითა̈გნი დითე. ხე̄ქუ̂, ერე "მე̄რმა ლადეღ ნა̈ბოზს
Line of edition: 6    ალას მი ლოქ ჩოთდაგრი. ლალცჷყნათე̄სგა ოდრჷნე. ბერჟა̈
Line of edition: 7    თეტე̄ნა̈რდ ესუ̂სიპი ი ეჩას ნე̄სგაქა ჩუ̂ა̈ქუ̂ცე ი ჩოთდაგრი". გუდმეცა̈რ
Line of edition: 8    მიჩა ხოხუ̂რა მუხუ̂ბე გუდ აჴა̈დ ი მე̄რმა ლადეღ ჰამუნღოჲ ნა̈ბოზდ
Line of edition: 9    იშდრა̄ლდა ყო̄რჟი ი ხოღელდა მიჩა მუხუ̂ბა ცხუ̂ითა̈გს. ნა̈ბოზს
Line of edition: 10    ეჯა ანჴა̈დ. ხე̄ქუ̂: "მიშგუ მუხუ̂ბე, ნა̈ღლია̈შჟი ლა̈მჩიხინ". ამნე̄მ
Line of edition: 11    ჟ'ა̈ნკიდ, ნაღლია̈შისგა ლა̈ჲყედნე ი სგა̄დჲე ქორთე. მე̄რმე დაგრა ბა̄ზ'
Line of edition: 12    ათქა̈დ. ეჩქა მიჩა დი გუნ ბჷგიდ ა̈თცუ̄დ.

Line of edition: 13       ბა̄ზი ჩუ̂ადყურდახ ი ცხუ̂ითა̈გნ ლა̈თხუ̂იართე აჩა̈დ. ანჴა̈დ თუ̂ეთუ̂ნე
Line of edition: 14    და̈̄უ̂ მიჩა ლელა̈ტ ზურა̄ლთე, ცხუ̂ითა̈გნი დითე. ხე̄ქუ̂, ერე "მე̄რაქა
Line of edition: 15    ა̈ნჴუ̂დენა მი, იმუ̂ა̈̄ჲ ა̈გის ისგუ̂ა გეზალს ცხუ̂ითა̈გნს კარაუ̂ ხეგნი, ეჩეჩუ
Line of edition: 16    ჩუ̂ა̈ნშყუ̂დენი, ჩოთყიმი". ალა ხოხუ̂რა̄მ მუხუ̂ბე̄მ, და̈უ̂თა̈გნდ, ჟ'ა̈ნჰურნე
Line of edition: 17    ი აჩა̈დ მიჩა მუხუ̂ბე̄მი ნა̄ზუ̂ს, სგა̄ჩა̈დ კარაუ̂თე̄სგა. ალას თუ̂ეთუ̂ნა
Line of edition: 18    კოჯისგა კარაუ̂ ხო̄გ. ნა̈თხუ̂იარე̄მი ჯიჯუ̂შ ჩუ ლჷგე ი ტუფშუ̂ ჩუ
Line of edition: 19    ლუ̄შგ. მიჩა მუხუ̂ბე ცხუ̂ითა̈გნ ჩუ იუ̂ჟა. ა̈ნკიდ მიჩა მუხუ̂ბე̄მი თხუ̂იმ
Line of edition: 20    ი ღულა̈ჲჟი ჩუ̂ესდე. ეჩქა ალა ჟ'ანჲა̈ცხ, ლოხსგიდა მიჩა მუხუ̂ბა ჟიბაუ̂:
Line of edition: 21    "ჸეჰ, ღე̄რბეთ, სი ლა̄მეშდ, იმნე̄მ აჯჴიდ სი ამჟი ჯუ̂ე̄დიათე უ̄ზუ̂ნუნა
Line of edition: 22    შუკუ̂ს!" ხე̄ქუ̂ ეჩქა ცხუ̂ითა̈გს ერე "ცუჴემა̈დ ქა ლა̄მო!" ამნე̄მ ხე̄ქუ̂,
Line of edition: 23    ერე: "მა̈ჲ ჯა̄რ?" -- "მეშხე მე̄რე ანღრი დეცქა, ეჩის ხუ̂ა̈ფშუ̂დე". ცხუ̂ითა̈გდ
Line of edition: 24    ხე̄ქუ̂, ერე "მე̄რა̈̄ლს მი ლახე ცუჴემა̈დს ხუ̂ა̈ფშუ̂დუნი ეჩქა,
Line of edition: 25    ცხუუ̂ა̈რ ჩუ̂ა̈მშდეხნიხ". ჰაჯ მა̄მა ახკიდ ი ქა̄თჴიდუ̂ნე ცუჴემა̈დ. ჟ'ა̈ნბუ̄წე,
Line of edition: 26    ახფიშუ̂დ მეშხა მე̄რა, ჩუ̂ანშყა̈დ მეშხე მე̄რე ი ტუ̂იბისგა ხოჲა̈ხ.
Line of edition: 27    ეჩჟი ძღჷდ ჰერ ა̈ნკიდ, ერე ქოყანა უშხუ̂ა̄რ ლახა̈̄ნწყუ̂. "ჸოჰ სი ხოლა
Line of edition: 28    ჩუ̂ემნ, მიშგუ̂ი მუხუ̂ბე და̈უ̂თა̈გნ, იმღა ჩუ̂ემნ ალა?" ნა̈თხუ̂იარე
Line of edition: 29    ჟ'ა̈ნცუ̂ეხ, ქორთ' ა̄ნჴა̈დხ.

Line of edition: 30       მინე დის ალა ცხუ̂ითა̈გნდ ქო̄ხო̄მბაუ̂ე. ეჩას ათსა̈სტკჷნ. ბა̄ზი ჩუ̂ადყურდახ
Line of edition: 31    მა̈გ. ეჩქა ლე̄თშუ̂ ანჴა̈დ ალა̄, მინე დი, იმუ̂ა̈̄ჲ ა̈გის ტუ̈ბისგა
Line of edition: 32    და̈̄უ̂ ხოჲა̈ხ, ეჩხა̄უ̂ აჩა̈დ, ეჩის (\\ ეჩას) ღუ̂ესე ქო̄ხკიდ ჴადუ̈სგა ი ა̈გითე
Line of edition: 33    ანჴიდ. ამი̄ კუბდა̈̄რ მე̄რმა ლადეღ ქა̄ნნაყე. ჲორი, ხოჩა̄მ ლეღუ̂იშ.
Line of edition: 34    ანჴა̈დ და̈უ̂თა̈გნ ი ლიც ჩუ̂აბიდ ი ხე̄ქუ̂ მიჩა დის, ერე "ლიც ახა̈ჲ
Line of edition: 35    ნიჩუ̂არეშ ი ტოტრე ლაბრა̄ლდ". ეჩქა ალა ჩუ̂აჩა̈დ ი ლიც ანჴიდ.
Line of edition: 36    მიჩა გეზალდ დი̄რა̈რ კაჟი ჟ'ესსიპე. ალა ლჷცხა̈ნ ანჴა̈დ, მინე დი.
Line of edition: 37    ლა̈ხჭუ̂ედდა: "დი̄რა̈რ დე̄სა დამ ახფრი̄ნთედ?" ეჩქა ხე̄ქუ̂ და̈უ̂თა̈გდ,
Page of edition: 377  Line of edition: 1    ერე "დე̄სა, ნიშგუ̂ეჲ გუ̂ეშ მა̄მა ლიზ ეჯა". ეჩქანღო ლიდიარა̈̄ლ ა̈ნბინეხ
Line of edition: 2    ი ლახუ̂ბა იზბიხ დია̈რს, მინე დი ხოსგდი ეჯჲა̈რს ი ხასკუ̂რელ,
Line of edition: 3    ერე "იმღა მო̄მა იდგა̈რი და̈̄უ̂ა̈ ღუ̂ესე̄მი კუბდა̈̄რშუ̂?!" ხა̈̄ქუ̂ და̈უ̂თა̈გდ
Line of edition: 4    მინე დის' ერე "ლა̈ჲდი̄რა̈̄ნუ ჯაი". ეჩქა ეჩნე̄მ ჟ'ა̈ნბიჴუ̂ დია̈რ, ამი̄
Line of edition: 5    ქუ̂ინ ხოჲა̈ხ ნიჩუ̂ა̈რჟი ი ალ ჩუ̂ა̈დკა̄ფ ი ჩუ̂ადგან. ცხუ̂ითაგნდ ლიგუ̂ნ'
Line of edition: 6    ა̈დბინე. ეჯა ხოხუ̂რა მუხუ̂ბა ხასდიკჷნდა: "მიჩა დის თა̈კუ̂ს ხაბემ ი
Line of edition: 7    ბოგჩუ ჩუ̂აკუ̂ა̄ნე". ხოხუ̂რა მუხუ̂ბე̄მ კუბდა̈̄რ ჩუ ლალე̄მ, ხოშა̄მ მუხუ̂ბე̄მ
Line of edition: 8    მა̄დე. ხოხუ̂რა მუხუ̂ბე̄მ თა̈კუ̂ ლა̈ჲბე ი ქა̄დჲე ი ბოგჩუ ჩუ̂ადკუ̂ა̈რ.

Line of edition: 9       ალჲა̈რ ჩუ̂არდახ უშხუდ. ლახუ̂ბა, ძღჷდს ითხუ̂იარდახ. აშხუ̂ ლადეღ
Line of edition: 10    ლიჩი̄ჟა̈̄ლდ გუ̂ი ლახა̄დხ. ხექუ̂ ხოხუ̂რა̄მ მუხუ̂ბე̄მ: "დეცთე ცუჴემდა̈რ
Line of edition: 11    ალკუ̂ა̈რიდ, ჰე გუშგუ̂ეჲ ცხუუ̂ა̈რ იმუ̂ა̈̄ჲ ა̈გის ხოჲხენა[ხ], ეჩეჩუ
Line of edition: 12    გუშგუ̂ეჲ ლა̈ხხუ̂ა ირდიხ ი ნა̈ჲ ეჩხა̈ნ ლა̈ხხუ̂ას ა̈ლჴდედ". ადკუ̂ა̈რხ ი
Line of edition: 13    კე̄სა̈რშე̄რ ლჷყა̄რჟი ხოჲა̈ხ[ხ]. კე̄სა̈რდ ხუ̂ა̈ჲ მა̄რე ჩუ̂ადნა̈ზო̄რე ი დეშა̈რდ
Line of edition: 14    ა̈ნყუ̂იფ ცხუუ̂ა̈რ. ეჩქა დი̄ნა̈̄ლდ ხე̄ქუ̂ხ კე̄სა̈რს. მინე მუს: "ალას როქუ̂
Line of edition: 15    და̈̄რ მოშ იყუ̂ფე მინე პატრონუნქა, ეჯღა ლახხუ̂იეხუ, მინე პატრონ
Line of edition: 16    ჟი ხეთხე̄ლიხ ცხუუ̂ა̈რს". აჩა̈დ ხა̈ნი ი ანჴა̈დხ მინე პატრონა̈რ ცხუუ̂ა̈რთე.
Line of edition: 17    ჟ'აჩა̈დხ ლჷყა̄რთე ი ხე̄ქუ̂ხ კე̄სა̈რს, ერე "ამე̄სგა მერდე ლაუ̂დილა
Line of edition: 18    მინსუ ლახუ̂ე̄მ ლა̈ხხუ̂ად".კე̄სა̈რდ ხე̄ქუ̂, ერე "ცხუუ̂ა̈რ ჟიუ̂ ა̈ნყუფუ̄რე[ხ],
Line of edition: 19    მინეშ ჰე̄ ლი[ხ]". ეჩქა ცხუუ̂ა̈რ ჟ'ა̈ნყუფუ̄რეხ. კე̄სა̈რს გუნ ათსაკუ̂რლჷნდა
Line of edition: 20    ი ქა ლახუ̂ე̄მ დი̄ნა̈̄ლ ალ ლახუ̂ბას, ცხუ̂ითა̈გს ი და̈უ̂თა̈გს.

Line of edition: 21       ალჲა̈რდ ლა̈ხხუ̂ა ქორთ' ა̄ნჴიდხ ი ხოჩა ლიზგე ა̈დჴიდხ ი ლჷმზჷრე̄უ̂
Line of edition: 22    ხი.



Next part


This text is part of the TITUS edition of Svan Prose Texts I (Upper Bal).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.