TITUS
Svan Prose Texts I (Upper Bal)
Part No. 161
Previous part

Text: 166 
Page of edition: 377 
Line of edition: 23 
166. მეთხუ̂ია̈რ ი და̈ლი ლიწედ


Line of edition: 24       ლჷმა̈̄რ ეშხუ მეთხუ̂ია̈რ მა̄რე. სახელად ქუ̂ია იმას რაუ̂აზი. ა̈მჩედე̄ლი
Line of edition: 25    ლა̈თხუ̂იართე. ჩხარა̄მ თანა̈ღს ი ზაგა̈რს ქა̈̄მჩედე̄ლი ი ეჩეჩუ
Line of edition: 26    ჩუ̂ათბურე̄ნა. ჩუ ლახ ათბურე̄ნა, წიფრა̈̄ ძირისგა ლემესგ ოხო̄შუ̂ა.
Line of edition: 27    ეჩეჩუნ ეჯ ლე̄თ ჩუ ლჷმჷრდე̄ლი. აშხუ̂ კჷ̄ლთხი ზაგა̄რხა̈ნქა ჰერ ხასმა.
Line of edition: 28    ერე "მიჩა მუშგუ̂რი ქა̄უ̂ ა̈ნჴერნე ი ჯაჲ ქა̄უ̂ ანჴა̈დ". ამეჩუნ წიფრა
Line of edition: 29    ჩუ̂აბა̈ჴუ̂. ამხა̈ნქა და̈ლ ანჴა̈დ. ხა̈̄ქუ̂ რაუ̂ა̈ზს, ერე "ე, რაუ̂ა̈ზ, ლჷჩედდ!"
Line of edition: 30    რაუ̂ა̈ზდ ხა̈̄ქუ̂ ამის, და̈ლს: იმთე როქუ̂ გუ̂ა̄რ ლე̄ზი?" -- "მიჩა აფხნეგა̈რს
Line of edition: 31    ლოხტუ̄ლახ ი ლე̄ზი ხა̄რხ ეჩხა̈უ̂, ლჷწჰათე, ქუ̂ერწილთე. მიშგუ̂ა
Line of edition: 32    ჭიშხი ნაგა̈მჟი ჭიშხს ხჷგა̈მდა̈ს. ეჩეჩუ მა̈̄ნკუ̂ი კათხს ოხმა̈ზრი მეფეს და
Line of edition: 33    დედოფა̈ლს. ეჩანღო მე̄რმა კათხს ეჩეჩუ მერდას ოთმა̈ზრი, მესმა
Line of edition: 34    კათხს ჩია̈ ლა̈მზჷრა̈̄ლდ ლა̈ხუ̂თჷრე. სი მიშგუ̂ა გუ̂ა̈რდ ახმა̈ზრა̈̄ლ, ეჩანღო
Line of edition: 35    ჟი ხუ̂იგნა̈̄ლ ი ლჷღრიდ გუშგუ̂ეჲ ნა̄ზუ̂ს".

Page of edition: 378 
Line of edition: 1       ალჲა̈რ ქა̄ჩა̈დხ ქუ̂ერწილთე ი ღო სგა̄ნტა̈ხხ. რაუ̂ა̈ზ ჩუ̂ადყურდა ი
Line of edition: 2    და̈ლ წიფრათე̄სგა აჩა̈დ. მე̄რმა ლადეღ ნა̈თხუ̂იარად გუ̂ეში ლა̈სუ̂ ლახუ̂.
Line of edition: 3    ეჩქა რაუ̂ა̈ზ ა̈გითე ანღრი უ̂ეშგდ. ჩხარა ზაგა̈რ უ̂ეშგდ ლეტეხ ხა̄რ.
Line of edition: 4    არა̄მ ზაგა̈რქა ქა̄ნჴა̈დ ი ნა̈თხუ̂იარა̈̄ლს თუ̂ეფ მა̄მ ახფიშუ̂დ. მეჩხრა̈მ
Line of edition: 5    ზაგა̈რთეჟი ანჴა̈დ. ეჩქა თუ̂ეფ ბიდხა̈ნქა ქა̈̄ნკიდ ი ლითოფ ა̈დბინე.
Line of edition: 6    ჩხარა ღუ̂აშ ჩუ̂ადგა̈რ. ჩხარა̄მ ღუ̂აშს ლერსგუ̂ენ შდიმ ჩი̄ ქა̄ხქუ̂იც. ალა
Line of edition: 7    ბაშლჷყთე სგე̄სდე, მიჩა ქორთე ანჴიდ, ხეხუ̂თე ი მუხუ̂ბათე, სგა̄ნჴიდ
Line of edition: 8    ალა̄, შდჷმრა̈რ, ხექუ̂ მიჩა ხახუ̂ემ: "ჯა როქუ̂ ხოლა მა̄რე, ლეღუ̂ ჩოთცუ̂ი̄რა
Line of edition: 9    ი შდჷმრა̈რ სგო̄ხჴი̄და!" ჩუ̂ადკარე მიჩა ხახუ̂ემ სკიუ̂რ. ჟ'ა̈ნკიდ
Line of edition: 10    სკიუ̂რხა̈ნჟი მჷდრა̈ჴ, ხაჴიდ რაუ̂ა̈ზს, მიჩა ჭაშუ̂, ი "წელდუ [ესერ]
Line of edition: 11    ელსიპე̄ლი!" -- ალა ხე̄ქუ̂. ეჩქა ეჯა წელდ ესსიპდა.

Line of edition: 12       ჰა̈დურდ ჩი სოფელს ალა ხაყახ ლამშიად. მიჩა ხეხუ̂ ი მიჩა მუხუ̂ბე
Line of edition: 13    უშხუდ ა̈რიხ ი უშხუდ აყუ̂რეხ ხეხუ̂-ჭა̈ში გუ̂ა̈რდ. ეჩანღო ალა ლიყუ̄ლის
Line of edition: 14    იჩოდა გუნ, ლა̈მჴერ ხუღუ̂ა̈̄ნდა, იმჟუ̂ა̈̄ჲჟი მა̄რა. ეჩქა ჟ'ახჟანდა
Line of edition: 15    მიჩა ხეხუ̂ს ი მიჩა მუხუ̂ბა, ხაჴიდ აჯაღჷდ მჷდრა̈ჴ, მილცდ ესსიპა. ეჯა
Line of edition: 16    რაუ̂ა̈ზი ხეხუ̂მი უდილდ, -- მელთერ ლა̈სუ̂ ი, -- ჟი ლახთირ, ერე რაუ̂ა̈ზს
Line of edition: 17    ამის ხა̈ჩოდახ. ანჴა̈დ ამხა̄უ̂ ეჩი̄ უდილ, ეჩქა სკიუ̂რხა̈ნჟი მჷდრა̈ჴ
Line of edition: 18    ჟ'ა̈ნკიდ, ხაჴიდ მილცს: "რაუ̂ა̈ზდუ ელსიპელი!" ისეუ̂ე, რაუ̂არც იყო
Line of edition: 19    წინ, რაუ̂აზად გედიქცა, რაუ̂ა̈ზიშდ ესსიპდა. ეჩქა რაუ̂ა̈ზს შჷნისგა
Line of edition: 20    მჷდრა̈ჴ ქა ლახუ̂ე̄მ: "ათხე მა̈̄ჲ ჯიცხენდე̄დს, ეჯა ხა̈ყრ!" ჲერქჷდა̈̄შ
Line of edition: 21    ხაჴიდ, ერქჷდა წელდ ესსიპე: ეშხუ ყუ̂ა̈რუ̈ლდ ი მე̄რმე ჭა̈გდ. უშხუდ
Line of edition: 22    ლირდე̄ გა̈მ ი ლილყურიშ მა̄მა ოხჟომე. ათხე სოფლარს ხადია̈̄ნი ჩი̄.
Line of edition: 23    ჲერუ̂ა̈̄ჲ ცა̈გი ლანგა̈უ̂ს ჟი ხა̈ჴჩე, ჲერუ̂ა̈̄ჲ დო̄მა ი დე̄მ ხაჰო̈დდა.



Next part


This text is part of the TITUS edition of Svan Prose Texts I (Upper Bal).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.