TITUS
Svan Prose Texts I (Upper Bal)
Part No. 162
Previous part

Text: 167 
Page of edition: 378 
Line of edition: 24 
167. დი-გეზალ


Line of edition: 25       ლჷმზჷრე̄უ̂ ხიშდ ი ამჩუ̂ ა̈რიხ დი-გეზალ. გეზალ დი̄ნო̄ლ ლი ი ჩიგარ
Line of edition: 26    ესღრი ლაცლაცახა̈ნ ლა̈შდრა̄ლთე, ტეხნ' ა̈გითე ი მიჩა დის ხეჭუ̂დიე̄ლ:
Line of edition: 27    "დედე, მა̈გ ლაჯმილას იღუ̂ნე ი მი იმღა დო̄სა მირი ლეღუ̂ნე
Line of edition: 28    ჯჷმილ?" ამი̄ ლა̈ჭუ̂დია̄ლჟი დის ლიგუ̂ნი ხოცქფენი ი ხა̈ტხე მიჩა გეზალს:
Line of edition: 29    "ე̄, ხოჩა მიშგუ გეზალ, ლაჯმილა იმჟი მო̄მ ჯირდა, ჲორი
Line of edition: 30    ჭყინტგეზალ მირდა ი ეჯჲა̈რ ისგუ ლაჯმილა მა̄დ ი̄რო̄ლხა? მარე
Line of edition: 31    აშხუ̂ ლადა̈ღ აჩა̈დხ ლა̈თხუ̂იართე ი ა̈გითე დე̄მხა̈ნ ანტა̈ხხ. დეშმა ა̈ხუ̂მეჴერ:
Line of edition: 32    ლეჟ' ა̄ჩა̈დხ, ჰა ლექუ̂ა, საბრალ მიშგუ̂ი დი̄ნო̄ლ!" ალა ერ
Line of edition: 33    ჟ'ა̈ნმეჴრე დი̄ნად, ხა̈̄ქუ̂ მიჩა დის: "დედე, ლეზიზ ა̈მმა̈̄რ ი ღო ღური
Line of edition: 34    მიშგუ̂ა ლაჯმილა ლათხე̄ლთე, ჟი ხუ̂ითხე̄ლი, იმუ̂ა̈̄ჲ დო ირდიხ". ალა
Line of edition: 35    მიჩა დის გუნ ხასდიკ ი ამი̄ ლა̈̄ქუ̂ი̄სგჟი ჩიგარ ლიგუ̂ნის იბნე ი ხა̈ტხე:
Page of edition: 379  Line of edition: 1    "დეშ ჯუფშუ̂დე აჯაღ სი, ჩუ̄დ მექრა̈უ̂ი ისგუ̂ა ლაჯმილაშა̄ლ ი ეჩქა
Line of edition: 2    სერ მი̄ჲ თხუმ ხუ̂იდგა̈რი". მარე დი̄ნა დე̄მ იჟუ̂მე მიჩა ლი̄ქუ̂ს ი ეში̄
Line of edition: 3    იმა̄რა̈̄ლ ი ეში̄.

Line of edition: 4       ესღრი ი აშხუ̂ ფა̈კუ̄ლსი̄ ინჴრინე. ესღრი ჯუ̂ე̄დია შუკუ̂ს ი სგა̈̄თჴა̈დჷ̄ნ
Line of edition: 5    აშხუ̂ ცხეკთე̄სჷა ი ამე̄სგა ეჯჟი უდუმბირუ̂ ა̈დგილ ჩუ ლი, ერე
Line of edition: 6    შუ̂იმ მა̄მა ხა̄რ ი ამე̄სგა ჩუ ლჷგ ქორ. სგა̄ჩა̈დ ამხა̄უ̂თე̄სგა ი ჟი ლახთირ,
Line of edition: 7    ერე ამჩუ ღუ̂აჟრე ნარდუ̂ გარ ლი ი ჟი გუ̂ეში ლი ნათხუ̂იარე̄მი
Line of edition: 8    ლეღუ̂შ, მა̄რე და̈̄რ ა̈რი სგა̈̄ნჩუ. ათხ' ა̄ლ დი̄ნა-ჲ მიჩა ფა̈კუ̄ლ უშხუ̂ა̄რ
Line of edition: 9    ლა̈ხნაბნა̈̄ნხ, ერე უშხუ̂ა̄რურ დო̄მთ' ა̄ჩეხ. ათხ' ა̄ნჴა̈დხ ი ჩუ̂ა̈თპა̈ჟხ
Line of edition: 10    ალ ქორისგა. ჩუ ლიპჟა̄ლუ̂ დი̄ნად მა̈გ ქა̄დჯე̄ლუ̂ა̄ლე ი სა̈დილი̄ ჟ'ანსყე,
Line of edition: 11    ლემესგ ჟ'ანა̄შუ̂ე ი ჩუ̂ა̈თპა̈ჟხ ჲერქჷდა: დი̄ნა-ჲ ფა̈კუ̄ლი̄. ნა̈ბოზს ჲარუ̂
Line of edition: 12    მახეღუ̂ა̈ჟდ სგა̄ნკარეხ ყო̄რა̈ლ ი სგა̄ნჴიდხ ნა̈თხუ̂იარე. ა̈დსგი̄დრა̄ლეხ
Line of edition: 13    ქორს, ქაჲ ათჷმბაჟჷნხ: "ჲა̈რ ესერ ანჯე̄ლუ̂ა̈̄ლი̄ს ი ჲედ სა̈დილს ჲა̈რ
Line of edition: 14    ანმა̈̄რი̄ს". მე̄უ̂არ ხასკუ̂რელხ. ალას დი̄ნა ქა ხოსგდი ჩი̄. მე̄რმა ლადა̈ღ
Line of edition: 15    ამჟი̄დ ჩუ̂ემინ დი̄ნად. მე̄სმა ლადა̈ღ ანჴა̈დხ ჭეჷნტა̈რ ი ჩოთდარჯეხ
Line of edition: 16    ი დი̄ნა ერ ქა̄ნჴა̈დ ი ხაშდბა, ეჩქა ალჲა̈რი̄ სგა̄ნჴა̈დხ ქორთე ი ახჭუ̂ედიე̄ლეხ
Line of edition: 17    დი̄ნას: "ჲა̈რ ესერ ლი ჯა ი ჲედ იმხა̈ნ ა̈ხჴა̈დჷ̄ნე̄ნა?" ამნე̄მ
Line of edition: 18    ქო̄ხო̄მბუ̂ე, იმუ̂ა̈̄ჲჟი ლა̈სუ̂ ი იმუ̂ა̈̄ჲხა̈ნ ანჴა̈დ. ეჩქა ჭყჷნტა̈რ სგა̈̄ხჭო̄ნა̈̄ნხ
Line of edition: 19    ი ქა ხაცლჷ̄რეხ ჩი̄ ლაყჰა̄ლს: "ჲაღო, მინ ესერ ლიხ მიჩა ლაჯმილა".
Line of edition: 20    ალჲა̈რს უშხუ̂ა̄რე თხუ̂იმ ეჯჟი ჩუ̂ათხი̄დჷნხ, ერე შუ̂იმ მა̄მა ხა̄რ.
Line of edition: 21    ლაჯმილად შიშდ ახჭუ̂ედიე̄ლეხ მინე დიე̄ ამბა̈უ̂. დი̄ნას ლი̄ზი ხაკფჷნდა
Line of edition: 22    უშხუდ მინე დითე, მარე ლაჯმილა მა̄დ ოხჴა̈დხ თანახმას: "ჩიქე ამეჩუ
Line of edition: 23    ლარდე̄დდ ი ღო ეჩუნღო ალღრიდ ი მო̄დეჲ დედესი̄ ამხა̄უ̂ ა̈ლჴდედ".
Line of edition: 24    ა̈რიხ ამჟი: მახეღუ̂აჟა̈რ ლა̈თხუ̂იართ' ე̄სღრიხ ი მინე დაჩუ̂ირ ი ფა̈კუ̄ლ
Line of edition: 25    ჩუ სედნიხ ა̈გის ი ა̈რიხ ამჟი.

Line of edition: 26       აშხუ̂ ლადა̈ღ დი̄ნას შდიხ ა̈ხბა̈გუ̂. ალა ჩუ ლალე̄მ მიჯნე̄მ გარ ი
Line of edition: 27    ფა̈კუ̂ნას მა̄მა ლოხუ̂ე̄თ. ალა გუნ ათხჷრჷნდა ფა̈კუ̄ლს. ათხე დინა
Line of edition: 28    ლემასგუ̂ ა̄შუ̂ე, მარე ფა̈კუ̂ნა ხოდგე-ჲ ხოდგე გარ, უ̂ოდ სპიჩკა ჰა̈დურდ
Line of edition: 29    სგა დო ლახშდიხ. სერ ჟ'ა̈ნხირნა̈̄ნ დი̄ნა, ლახ ლემესგ დოშ
Line of edition: 30    ანა̄შუ̂ე-ჲ ლიგუ̂ნ' ა̈დბინე. ამნე̄მ-ა, ფა̈კუ̄ლდ, ამნოუ̂შ ქა̄ხტიხ ხჷრ
Line of edition: 31    დი̄ნას.

Line of edition: 32       ალ ცხეკისგა იმუ̂ა̄ლე ჯუ̂ე̄დიას იზგა და̈̄უ̂. ალა დი̄ნას ჩუ ხოხალდა
Line of edition: 33    მიჩა ლაჯმილახა̈ნქა. ეჯჲა̈რ აშგურა̄ნახ, ერე "ქა̈̄მთე ი ჯუ̂ე̄დიათ' ე̄სერ
Line of edition: 34    ნო̄მთე̄უ̂ ღჷრი, ადო და̈̄უ̂დ ესერ დო̄ს' ა̄დჷრმას, ადო ესერ, ეჯა ქრისდია̈ნი
Line of edition: 35    ქუ̂ინს შიშდ იყერ, ეჩას ხახუ̂დ ქრისდია̈ნი ზურა̄ლ ესერ ხორი".
Line of edition: 36    ათხე დი̄ნას ერ ლემესგ სგა ლა̈ხდა̈გ, ჲაღო, მა̈ჲუ̄ ჩუ̂ემინ, ანჷ̄გა̈ნ ი
Line of edition: 37    აჩა̈დ და̈̄უ̂ა̈ ხახუ̂თე. ალა სგა ლახხუ̂ი̄დ ყო̄რჟი-ჲ დი̄ნად ხა̈̄ქუ̂: "ჯეჴჷ̄რა̈̄ლ
Line of edition: 38    ი ლემსგი̄ლ ლა̄მო!" ეჩქა და̈̄უ̂ა̈ ხეხუ̂დ ხა̈̄ქუ̂, ერე "ლემესგს ესერ,
Page of edition: 380  Line of edition: 1    მა̈ჲ მაზეზ ი̄რა დო̄მ ლახჰო̈დნე, მარე მიშგუ ჭა̈შ ჰე̄სა იმჴერი, ეჩქა
Line of edition: 2    ეჯა ქა ჯეღუ̂ჭენი, ეჯღა ჲენასდ ადე!" ლემესგ ქა ლახუ̂ე̄მ ი კალთა̈ჲჟი
Line of edition: 3    ტჷტ ოთშიდ. ესღრი დი̄ნა შუკუ̂ს ი კალთა̈ჲ ჩუ̂ა̈თშიხა̈̄ნ ი ტჷტ
Line of edition: 4    ხოშჷ̄დნი შუკუ̂ჟი. იმუ̂ა̈̄ჲჟი დო ლა̈სუ̂, სგა̄ნჰე მიჩა ქორთე ი ჟ'ანა̄შუ̂ე
Line of edition: 5    ლემესგ. ამჩიქქა ლოხფხჷკნე ჲერე̄დ ყო̄რს. დი̄ნას სურუ ათყალუ̂ი̄ნდა,
Line of edition: 6    გუდ ანჴა̈დ, ერე ალა და̈̄უ̂ ლა̈სუ̂. ესნა̈რ ტკისდ და̈̄უ̂ დამ ლჷმა̈̄რ! დი̄ნად
Line of edition: 7    ყო̄რ მა̄დ ოთკარე. ეჩქა და̈̄უ̂დ ხა̈̄ქუ̂: "ჲაღო ფხულე ეში̄ ახყიჰ ყო̄რქა!"
Line of edition: 8    დი̄ნად ტკისდ ქა̄დყიჰე ფხულე. ეჩქა და̈̄უ̂დ ფხულე უშკუ̂თ' ა̈̄დდე
Line of edition: 9    ი ოხუ̂ბინე ზისხს ლიწსუ̂და̈ნ. აშხუნღო სერ დი̄ნა ჩუ̂ა̈დკა̄ფ ყო̄რ სგა̈̄ნ.
Line of edition: 10    ნა̄ბოზს მიჩა ლაჯმილაჲ ანჴა̈დხ ი მინე დაჩუ̂ირ ლახ ამჟ' ესხუ̂ი̄დხ,
Line of edition: 11    სურუ ა̈ნწახუ̂ა̈̄ნხ. ჟ'ოხო̄ზნანეხ მინე დაჩუ̂ირს ი ქა̄ხჭუ̂ედიე̄ლეხ: "მა̈ჲ
Line of edition: 12    ესერ ათყერა?" ამნე̄მ ქო̄ხო̄მბუ̂ე "აშ-ი-აშ ესერ".

Line of edition: 13       მე̄რმა ლადა̈ღ ლაჯმილადი̄ ჩოთდარჯეხ. და̈̄უ̂ ყო̄რსჷდ ლახა̄გა̈ნხ.
Line of edition: 14    დი̄ნა̈̄ ლაჯმილა ქუნოშ არდახ ი შიშდ ჟ'ოხღალბეხ ი ჩუ̂ადგა̈რხ, ჩუ̂აშდუ̈ღხ
Line of edition: 15    მინე ჰა̈ზუ̂ისგა. ამი̄ საფლა̈უ̂ჟი̄ნ ანჴა̈დ გუნ ეზა̈რ ლერტა̈მ. მინე
Line of edition: 16    დაჩუ̂ირს ხა̈̄ქუ̂ხ ლაჯმილად: "დო ხიჴმარი ალ ლერტა̈მს ნა̈̄ყუნთე".
Line of edition: 17    დი̄ნად ჩოთჯჷრუ̂ე-ჲ ანსყე ლეზუ̂ებ ი სგა ხაყერ. სა̈დილდ ერ ჩუ̂ესსგურდახ
Line of edition: 18    მა̈გ დი̄ნანქა, ლაჯმილად თუ̂ით ნა̄პუ ჩუ ლალე̄მხ. შიშდ ჩუ̂ადგანხ.
Line of edition: 19    დი̄ნად ა̈დბინე ლიგუ̂ნი. მა̄მ ხოხალ, მა̈ჲ დო ჩუ̂ემინას. იმუ̂ა̈̄ჲჟი
Line of edition: 20    დო ლა̈სუ̂, ჩუ̂აშდუ̈ღუ̂ ალჲა̈რი̄ ჰა̈ზუ̂ისგა.

Line of edition: 21       ჯა ღალ ანჷ̄გა̈ნ ი აჩა̈დ ჯუ̂ე̄დია შუკუ̂ს. ფა̈კუ̄ლ მა̄დ ა̈დჴერნე:
Line of edition: 22    ხენდროუ̂და გუნ. ესღრი ჯუ̂ე̄დია შუკუ̂ს ი აშხუ̂ ა̈გის ლჷცე პილს
Line of edition: 23    ჟ'ა̈ნშუ̂ემ, ჩუ̂ესგურდა. ამექ' ა̄ნჴა̈დ ეშხუ ღუ̂აჭა̈რ ი ბა̈რგ ხუღუ̂ა̈̄ნ ხუ̂ა̈ჲ.
Line of edition: 24    ალას აჯაღ ხონჴერ აფხნეგა̈რ. დი̄ნას ერ ქა ხეწა̈დ, ეჩქას ჩუ უ̂ეთ
Line of edition: 25    ა̈დსო̄ყა̈̄ნ ღუ̂აჭა̈რ, ეჯჟი ხოჩა ლახბაჟჷნდ' ა̄ლა̄, სი̄მაქ ი ტკისდ ალ დი̄ნად
Line of edition: 26    ხოშა ლამა̈ზ და̈̄რ არდა, ეშ ადღმა. ქა̄ჩა̈დ ალა̄ ღუ̂აჭა̈რ, ი
Line of edition: 27    ლა̈ხჭუ̂ედდა: "იმხა̈ნ ნაჴა̈დუ̂ ესერ ლი?" დი̄ნად ქო̄ხო̄მბუ̂ე. ეჩქა ღუ̂აჭა̈რდ
Line of edition: 28    ხა̈̄ქუ̂: "ჲაღო სი ჩუ̂ესგუ ამჩუ ი მი ტუ̂ეხნი შიშდ ი ა̈ჯჴერნი ა̈გითე".
Line of edition: 29    აჩა̈დ ღუ̂აჭა̈რ ა̈გითე. დი̄ნა̈̄შდ ლერექუ̂ ახმა̄რუ̂ნე მიჩა დაჩუ̂ირს.
Line of edition: 30    ათხე ესტიხ ი ხა̈̄ქუ̂ დი̄ნას. ე́ ა̈ა̈გით' ე̄სერ ა̈ი ხახუ̂დ ი ქუ̂ერწილს
Line of edition: 31    ხემა̄რა̈̄ლხ". აჩა̈დხ დი̄ნათე ი ალა ჩუ სგურ ამჩუ. მარე ხოლა
Line of edition: 32    ლახბაჟჷნდახ. ღუ̂აჭა̈რ ლა̈ხჭუ̂ედდა: "მა̈ჲ როქუ̂ ჯეყა̈რ?" დი̄ნად ხა̈̄ქუ̂:
Line of edition: 33    "ამჟი̄ნ ესერ ხა̈ყრა მიჩა ლაღელისგა". ალა ტკისდ ამჟი მა̄მ ლა̈სუ̂,
Line of edition: 34    მარე შომუ̂ა̈̄ჲ ერე ღუ̂აჭა̈რ ა̈გით' ა̄ჩა̈დ, ეჩქა ამექა ანჴა̈დ მჷლდე̄უ̂ა დი̄ნა
Line of edition: 35    ი ალა̄, ხოჩა დი̄ნა ლჷცთ' ა̄დკუ̂ა̈რ ი ჯა ჩუ̂ესგურდ' ე̄ჩი̄ ა̈დგილჟი.
Line of edition: 36    ამნე̄მ ღუ̂აჭა̈რს ჩუ̂ოთღორუ̂ე. ღუ̂აჭა̈რდ ეში̄ ადჲე ა̈გითე. ქუ̂ერწილ
Line of edition: 37    ხა̄რხ ი ამ დრო̈უ̂ჟი აშხუ̂ მჷკჷლმა̈ხიდ ადჷრმე ჭალა̈ისგა კალხმა̈რ.
Line of edition: 38    ეშხუ კალმახ უ̂ოქუ̂რეშ ლა̈სუ̂ ი ალა ღუ̂აჭა̈რს ოთჴიდ ქუ̂ერწილთე
Page of edition: 381  Line of edition: 1    საჩქუ̂ა̈რდ. ალას ღუ̂აჭრი ხეხუ̂ი̄ ქა ხეწა̈დ ი შიშდ გუდ ანჴა̈დ, ერე
Line of edition: 2    ალა ეჯ ხოჩა დი̄ნა ლა̈სუ̂-ე́, ხედუ̂ა̈̄ჲ ლახლატჷნ ღუ̂აჭა̈რს მა̈̄ნკუ̂ინეშ.
Line of edition: 3    დი̄ნად ხა̈̄ქუ̂: "ჲაღო, ალ' ე̄სერ ჟი̄უ̂ ოხჯა̈ბხ, ეჯჟ' ერ ეშხუ ფხაჲჷლდ
Line of edition: 4    დო̄ს' ო̄თშყეხ ი ეჩქ' ე̄სერ ჯა ეჩაუ̂ ტეხნ'-ე́, მა̈̄ნკუ̂ი ერ ლჷმა̈̄რ". ღუ̂აჭა̈რდ
Line of edition: 5    შიშდ ესუ̂ქიქნე მიჩა მომსახუ̂რას. ალ კალმახ ტკისდ ჟ'ოხჯა̈ბხ
Line of edition: 6    ი ჩუ ხა̄მნეხ, მარე ფხა̄რა̈ლ გიმჟ' ოთშჷ̄დხ. ალ ფხა̄რა̈ლჟი ჰა̈ზუ̂ისგა
Line of edition: 7    ანჴა̈დ გაკ.

Line of edition: 8       აშხუ̂ჟი ღუ̂აჭა̈რს ხა̈̄ქუ̂ მიჩა ხეხუ̂დ, ერე "ალ გაკა̈ ზაქუ̂ხა̈ნქ' ე̄სერ
Line of edition: 9    ჰაკუ̂ა̈ნუ̄ ანტა̄ბეხ. ეჯჟ' ერე ნაფო̈ტ დო̄სა იმე აშყეს იეჩქა ჯა-ჲ მიჩა
Line of edition: 10    გეზალ ესერ ჲერქჷდა ჩუ ისკეთიხ". ალა ჩუ̄დ ჩუ̂ემინხ, მარე ნაფო̈ტ
Line of edition: 11    ეში̄ ჩუ̄დ ოთშყა̈დხ.

Line of edition: 12       ალ ღუ̂აჭრი ფე̄დიას ეშხუ ქუ̂რიუ̂ იზგა ი ანჴა̈დ ალა ფანჩხართე.
Line of edition: 13    ალას ხოჩა ფიცლა̈̄დ ა̈ხგუ̂ა̈ბ ი სგა̄დჲე-ჲ ჟ'ანტუ̂არე მარა̈ნისგა, კეცისგა.
Line of edition: 14    ზურა̄ლ აჩა̈დ ლანყაუ̂ა̄ლთე. ანტა̈ხ ა̈გითე-ჲ ხოსგდი: მიჩა
Line of edition: 15    ღა̈რიბ ქორ კეთილშუ̂ გუ̂ეში ლი, ჩუ ლჷგ სტოლ ი მა̈ჲ ეჩეჟი მო̄დ
Line of edition: 16    ა̈რი. ეჯა მა̄მგუ̂ეშ ლი. ხა̈ხია̈დ ღალ საბალ ქუ̂რიუ̂ ზურა̄ლსი ი იმზირ.
Line of edition: 17    მე̄რმა ლადა̈ღ აჯაღ ამჟი̄დ ლა̈სუ̂ ი ხასკუ̂რელ. ანჴა̈დ მე̄სმაჟი ი ჩოთდარჯე
Line of edition: 18    ი მარა̈ნხა̈ნქ' ა̄ნჴა̈დ ხოჩა დი̄ნა, ხედუ̂ა̈̄ჲ ერ მჷჟშა̄ლ არჰა, ეჯჟი
Line of edition: 19    ლესგდი ჩუ ლი, ერე ეშ ტუ̂არ. ალა ამჟი̄ნჷდ ხოდა̄წყე ჩი̄ ქორისგა̄,
Line of edition: 20    ერ ლა̈სუ̂. ამჩიქქა ზურა̄ლ სგა ჴედნი ი ხეყჰა̈̄ლ დი̄ნას ი ხეჭუ̂დიე̄ლ:
Line of edition: 21    "ჲა̄რ ესერ ლი ი ჲედ იმხა̈ნ ნაჴა̈დუ̂?" დი̄ნა ჩი̄ ქა ხო̄მბუ̂ი, მა̈̄ჲ მიჩ
Line of edition: 22    ჩუ̂ ესამა ხა̈ყრა̈̄ნ. ეჩქა ზურა̄ლ ლიგუ̂ნის იბნე ი მახან ქა̄დ ხეყჰა̈̄ლ. ზურა̄ლ
Line of edition: 23    ერ ჩუ̂ა̈ცხრე გუ̂აშუ̂, ეჩქა ხაყლე: "ჲაღო, ჭყჷნტა̈რ ი ეშხუ დი̄ნა
Line of edition: 24    მიჩ როქუ̂ ათქარუ̂ე̄ნა". ეჩქას გუდ ჴედნიხ ალჲა̈რ-ე̄, მინ დი-გეზალ
Line of edition: 25    ლიხ. ეჯჟი ღალ ჩუ ხა̈ხიადხ, ეჯჟ' ერე შუ̂იმ მა̄მა ხა̄რ.

Line of edition: 26       აშხუ̂ ლადა̈ღ დიდ ხა̈̄ქუ̂ მიჩა გეზალს, ე́ ა̈ქა̄უ̂ ესერ ა̈წჰეხ ღუ̂აჭა̈რ
Line of edition: 27    ი ხოჩა სა̈დილუ̄ ანმა̄რეხ". ალჲა̈რდ ჟ'ანმა̄რეხ ხოჩა სა̈დილ ი ქა̈̄წჰეხ
Line of edition: 28    ღუ̂აჭა̈რ. ესსგურდახ ჩუ ტაბა̈გჟი ი ლა̈ხჭა̈მხ დი-გეზალ ი მა̈̄ჲ ესამა
Line of edition: 29    ალჲარე გუ̂ეშ ჩუ ლა̈სუ̂ თხუმნეშ ი ჰოკარუ̂, ეჯამა̈გ ქო̄ხო̄მბუ̂ეხ. ეჩქა
Line of edition: 30    ღუ̂აჭა̈რ გუდ ჴედნი ჩი̄ ი ალ დი̄ნას ი მიჩა დის ქა ინჴრინე მიჩა
Line of edition: 31    ქორთე. ჯუ̂ინელ ნახა̈ხუ̂ს სგა ხაბემ ჩა̈̄ჟი ჰაკუ̂ა̈დს ი ჟი ხა̈ჴჩე ლაჭმურია̄ლს
Line of edition: 32    გიმს.

Line of edition: 33       ალ ღუ̂აჭა̈რ ი მიჩა ხეხუ̂ ი დიმთილ ხოჩა̄მ ლირდე-ლიზგეს იჴდეხ
Line of edition: 34    ი, უ̂ოდ ნა̈ჲ ალა თანშუ̂ დო ა̈ლსგიდნად ი შდჷმშუ̂ დო ა̈ლჰურნად,
Line of edition: 35    ეჩქადუ̄ ლარიდ!



Next part


This text is part of the TITUS edition of Svan Prose Texts I (Upper Bal).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.