TITUS
Svan Prose Texts I (Upper Bal)
Part No. 163
Previous part

Text: 168 
Page of edition: 382 
Line of edition: 1 
168.   ბეფშუ̂


Line of edition: 2       ლჷმზჷრეუ̂ ხიშდ ი ჲაღოჲ ხეხუ̂-ჭა̈შ ლჷმა̈̄რხ, ჭყინტგეზალ ხარდე̄ნახ,
Line of edition: 3    ეშხუ ღოლჲა̄ქ ხარდე̄ნახ. ჭყინტ მჷლდეღზუმ ლჷმა̈̄რ, ეჩქა მიჩა
Line of edition: 4    დიდ ი მუდ ხო̄ქუ̂ა: "ალას ესერ ქა̈̄ჲე̄სგი". მეჯო̈გს ათდენა. ეჩქას
Line of edition: 5    მეჯო̈გს ხო̄ქუ̂ა: "ჯაუ̂ ესერ ლახჴედა შუ̂იდებდ! ჩუ̄ ადჷ̄გა̈ნ მიჩე̄შმჷყ
Line of edition: 6    ჯალჩიდ უ̂ოხუ̂იშდ ზაუ̂". ჟ'ოთგენა ეჯა უ̂ოხუ̂იშდ ზაუ̂. ეშხუ ღოლჲა̄ქ
Line of edition: 7    ხაყე̄ნა. ეჩი ჰამა̈რჟინ უ̂ოხუ̂იშდ ზაუ̂ ალგენე̄ლი.

Line of edition: 8       მე̄რმა ლადეღ ფაუ ლოჰოდა ჯო̈გი ლალდა̈ღთე. ეჩქას ხოლა და̈რ
Line of edition: 9    ა̈მჴედე̄ლი (\\ ჩუ̂ალჰა̄უ̂და̈რლი), ბეფშუ̂ს ლიგუ̂ნ' ოთბინა. ეჩქას მიჩა
Line of edition: 10    ღოლჲა̄ქს ხო̄ქუ̂ა, ერე "ლა̈დი ესერ მიჩა ბა̈დშუ̂ იგუ̂ნი, მიჩა ბა̈დშუ̂
Line of edition: 11    ხა̄რ ჭირ. ჯ' ე̄სერ ზაუ̂ისგა იზა̄ლუ̂ნი, ჲარუ̂ ჟინაღს ხოთუ̂უნი, ლადეღისგა
Line of edition: 12    ესერ ჲარუ̂ სეგდა ლჷჯა ხა̄შგუნი: აშხუ̂ ესერ ა̈გითეუ̂ ხოზიზდა
Line of edition: 13    მიჩა დის ი მუს, აშხუ̂ ესერ იჴმა̈რდაუ̂ მიჩა ხაზა̈ინცახა̈ნ. მჷხა̈რ ესერ
Line of edition: 14    ღედ ნომაუ̂ ხა̄რ, და̈რ ესერ ი̄რა. ლა̈დი ესერ იგუ̂ნი, მჷხა̈რ იღრა̄ლუ̂ნი.
Line of edition: 15    ალა ესერ მჷცხი მერმუც ა̈მჴედე̄ლი, მჷხა̈რ ესერ ხოჩა გუ̂ი ხედი.
Line of edition: 16    აჯაღ ესერ უ̂ოხუ̂იშდ ზა̈ჲ ქა̄დზჷგრას, ეჩქ' ე̄სერ მიჩა ხაზა̈ინსუ ხე̄ქუ̂:
Line of edition: 17    "ჯ' ე̄სერ ღჷრი ა̈გითე, ჯო̈გს ესერ ქა იყუ̂ლე მიჩა. მიჩ ესერ ა̈გის
Line of edition: 18    დი̄-ჲ მუ ხორიხ". უ̂ადა ქო̄თზჷგრე ეჩას (უ̂ოხუ̂იშდ ზა̈ჲ ქა ხა̄რა ეჩი̄ცახა̈ნ),
Line of edition: 19    ეჩქა ხაზა̈ინს ხო̄ქუ̂ა: "მიჩა ღოლჲა̄ქა̈რ ა̈გითეუ̂ ადჲე!"

Line of edition: 20       უ̂ოხუ̂იშდ ზაუ̂ისგა ეშხუ ღოლჲა̄ქხა̈ნქა უ̂ოხუ̂იშდ აშირ ღოლჲა̄ქ
Line of edition: 21    ახფასა. ეჩქა ქო̄ხთიშა მიჩა ღოლჲა̄ქა̈რ, ა̈გითე ახყენა, შუკუ̂ისგა
Line of edition: 22    ჩუ̂ალყუ̂ინე̄ლიხ ღოლჲა̄ქა̈რ ი ჯაჲ. ეჩქა ხო̄ქუ̂ახ მიჩა დის ი მუს ა̈გის:
Line of edition: 23    "უ̂ადა მეშთხე ხა̄რ, უ̂ოხუ̂იშდ ზა̈ჲ ლჷზგჷრე ლი". ეჩქა მიჩა მუ ალგენე̄ლი,
Line of edition: 24    მიჩეშთე ალმა̈̄ზ. სგა ლახგენე̄ნა შუკუ̂ისგა მიჩა გეზალს ი ჯო̈გს.
Line of edition: 25    ქა̈̄მჩედე̄ლი [ი] ხო̄ქუ̂ა: "ჟიუ̂ ანჷ̄გა̈ნ ესერ!" ჟი დეშ ოხუ̂ჲა̈ცხუ̂ნა. "ალა
Line of edition: 26    ესერ ლჷდგა̈რ მჷრე̄ს ლი, ადო ესერ ჟი დო ჲეცხნი!" ეჩქა ჭჷშხა̈რს
Line of edition: 27    ახგუდუ̈რნე̄ნა, ლითჷრნე (\\ ლითრინე) ოხბინა. ეჩქას ჟ'ა̈მჲეცხე̄ლი:
Line of edition: 28    -- მა̈ჲ ესერ ეზერ ლაუ̂ჟა ხა̄რა! -- იმჟი ესერ? -- მიჩა მუს ხო̄ქუ̂ა,
Line of edition: 29    -- ლჷდგა̈რ ესერ ხახლე̄ნა. ეჩქას: -- მიჩა მა̈ზიგ[უ] ლახჴედა, იმუ̂ა̈̄ჲ
Line of edition: 30    ესერ ა̈მჴედე̄ლი ჯა, ჯო̈გ ესერ მინეშ ლიზ, ა̈გითეუ̂ ადჲე. ჯ' ე̄სერ
Line of edition: 31    უ̂ეშგდ ხოჭუ̂ე̄ნი. -- უ̂ეშგდ ესერ ნომაუ̂, ა̈გითეუ̂ ანჴა̈დ, მიჩა დის ესერ
Line of edition: 32    ხა̈წდუნი! -- ჯ' ე̄სერ შიშდ ა̈ნჴდენი.

Line of edition: 33       ეშხუ დალისუ̂ ჟ'ა̈ნჷრმე, ბარჯჟი ესდე ი უ̂ეშგდ ეტიხ. მიჩა მუდ
Line of edition: 34    ღოლჲა̄ქა̈რ ა̈გით' ა̄დჲე. ალ ბეფშუ̂ ჩუ̂ასა̈დ აშხუ̂ ა̈გის ცხეკისგა, ალ
Line of edition: 35    ჟინაღ ჩუ̂ა̈ძიჰ, ჟ'ანტყაბე, ლალემ, მა̈̄ჲ ხეკუ̂ა̈დ ეჯა. მე̄რმა ლადა̈ღ
Line of edition: 36    ჟ'ანჷ̄გა̈ნ ი ესღრი სოფელთე. ამეჩუ კე̄სრი სოფელთეჲსგა ა̈თჴა̈დჷნ.
Line of edition: 37    ალას ჯა̈რ ლჷმა̄რე ხა̄რ ი ხელწფი ლალშგა̈რთე ესღრიხ. ალას
Page of edition: 383  Line of edition: 1    ათჩო̄ნა (კე̄სა̈რს): "ეშხუ მა̄რე ლა̈მქა̈მ!" ათხ' ა̄ჩა̈დხ ალჲა̈რ, ხელწფი
Line of edition: 2    ლალშგა̈რთე ესღრიხ. ჲარუ̂ ლა̈დღი ლე̄ზნა ქა̄ჩა̈დხ, ეჩქას კე̄სა̈რს
Line of edition: 3    ლა̈ხშყა̈დ "მიჩ ესერ სკიუ̂რ ათსედა ა̈გის, ეჩას ესერ ბა̄ზი ამაუ̂ ჲერუ̂ა̈̄ჲ
Line of edition: 4    ოხჴიდე, ეჩას ესერ, ეშხუ დი̄ნა ხორი, ეჩას ლახჰო̈დნე ხეხუ̂დ".
Line of edition: 5    ჩუ̂ადყურდახ. ჲა̈ს ხეჲმედო̄ლ ამაუ̂ ლიჴედ?

Line of edition: 6       ჟ'ანჷ̄გა̈ნ ეჯ ბეფშუ̂, ესფჷთხნა̄ლა̈̄ნ, მიმილდ ესსიპდა, ქა̈̄დპო̄რ
Line of edition: 7    ალა-ჲ კე̄სრი ყო̄რჟი ესბეთქ. სგა̄ჩა̈დ მურყუ̂ამთეჲსგა. დი̄ნა ამეისგა
Line of edition: 8    ა̈რი. ა̈ხოჩა ლე̄თ" ხე̄ქუ̂ ალას. -- იმნა̈რ ესერ ა̈მჴედე̄ლი? -- მიჩა მუს
Line of edition: 9    ოხზჷზა, სკიუ̂რა̈̄ლ ესერ ათსედა, ეჯ' ე̄სერ ქაუ̂ ლახუ̂ემ მიჩ. ბა̄ზი
Line of edition: 10    ესერ ამხუ̂ მეჴედდ მიჩა თხუ̂იმ ქა ლოჰოდა. -- მა̈ჲკა̈ლიბ მა̄რე [ესერ]
Line of edition: 11    ა̈მჴედე̄ლი, მიჩა მუ ლახ ლა̈ხჭუ̂ედდე̄დს? -- მა̈ჲ ესერ-ი ჩუ̂ესფჷთხნა̄ლე̄ნს,
Line of edition: 12    უ̂ოქუ̂რა̈ მიმილდ ესსიპდე̄დს, ეჯა ესერ ა̈მჴედე̄ლი, ეჯაუ̂ ხე̄ქუ̂
Line of edition: 13    მიჩა მუს.

Line of edition: 14       სკიუ̂რ ქა ლოჰოდა მიჩა დი̄ნას. ეჩქ' ა̈̄მჴედე̄ლი ყო̄რქა ი ელფჷთხნა̄ლე̄ლი
Line of edition: 15    ი უ̂ოქუ̂რა̈ მიმილდ ელსიპე̄ლი. ქა̈̄მჴედე̄ლი მიჩა ლაშგა̈რთე.
Line of edition: 16    ეჩქას კე̄სრი თხუ̂იმ ჩუ ლჷმყუ̂ინ, ჟი ლოხკი̄და ი ეჯ სკიუ̂რა̈̄ლ სგა
Line of edition: 17    ლოხუ̂და ლათხუმრა̈̄შთე.

Line of edition: 18       ჩუ̂ალრჷჰე̄ლი ი ჟ'ალგენე̄ლიხ. კე̄სა̈რს ხო̄ქუ̂ა: -- ჲა̈ს [ესერ] ოხჴი̄და
Line of edition: 19    მიჩა სკიუ̂რა̈̄ლ?
Line of edition: 20       -- მიჩ ესერ ოხჴი̄და, მიჩა ჩა̈̄ჟსუ ლახსინჯუ̂ე! -- აშხუ̂ ხო̄ქუ̂ა.

Line of edition: 21       ათხე ძუღუ̂აქა ხა̄რახ ლე̄ზი ხელწფი ლალშგა̈რთე. ძუღუ̂აქა შუკუ̂
Line of edition: 22    დეშ ოხთხახ. ჟი ლეჭუ̂ე̄ნი ხა̄რახ. ათხ' ა̈̄გითე ანჴა̈დ სერ, სგა̈̄მჩედე̄ლი
Line of edition: 23    მიჩა გეზალთე. ათხე̄ გზა̄უ̂რობ ჩუ მა̄დ ათმარჯუ̂ა. მიჩა თხუ̂იმ ქა
Line of edition: 24    ლოჰოდა.
Line of edition: 25       -- ჲა̈რ ესერ ა̈მჴედე̄ლი მიჩეშთე̄სგა, მა̈ჲკა̈ლიბ მა̄რე, ჩუ ესერ
Line of edition: 26    თერ მოშ ეჩას?
Line of edition: 27       -- მიჩაუ̂ მა̈ზიგ ლახჴედა! მიჩეშთე უბრალო მა̄რე მა̄მ ა̈მჴედე̄ლი.
Line of edition: 28       -- ჲაღო მა̈ჲკა̈ლი ლჷმა̈̄რ?
Line of edition: 29       -- ეჯ' ე̄სერ ლჷმა̈̄რ: ჩუ̂ესფჷთხნა̄ლე̄ნს ი უ̂ოქუ̂რა̈ მიმილდ ესსიპდე̄დს,
Line of edition: 30    აჯაღ ჩუ̂ესფჷთხნა̄ლე̄ნს, მა̄რად ესსიპდე̄დს, ჩი̄ჟე ეჩასუ ხე̄ქუ̂.

Line of edition: 31       ქა̄ჩა̈დ ი ლაშგა̈რს ხე̄ქუ̂, ერე "ამკა̈ლი-ჲ ამკა̈ლი მა̈რე ა̈მჴედე̄ლი
Line of edition: 32    მიჩა დი̄ნათე̄სგა. ჲა̈ს ხა̈ჲმედა (\\ ხა̈მჲედა) ეჩი̄ ლიჩუ̂მე? -- ხე̄ქუ̂ ალა.
Line of edition: 33    იფთხჷნა̈̄ლხ, მარე და̈̄რ ისპი [უ̂ოქუ̂რა̈ მიმილდ].

Line of edition: 34       ქა̄ნჴა̈დ ალ ბეფშუ̂, ესფჷთხნა̄ლა̈̄ნ ი უ̂ოქუ̂რა̈ მიმილდ ესსიპდა, აჯაღ
Line of edition: 35    ესფჷთხნა̄ლა̈̄ნ, მა̄რად ესსიპდა. ეჩქა კე̄სა̈რს ხო̄ქუ̂ა: "მიჩა ჩი̄ჟე [ესერ]
Line of edition: 36    ლი ჯა". სგა ლახგუდირნე̄ნა მეჴა̈რს, სგო̄თგენა მურყუ̂ამთე̄სგა. ათხე
Line of edition: 37    დი̄ნაცახა̈ნ ა̈რი.

Page of edition: 384 
Line of edition: 1       დი̄ნა ჩუ̂ა̈დღანუ̂ა̈̄ნ, ჭყინტ ა̈ხთენა̈̄ნ. ათხე ალ ჭყინტ ლა̈შდრა̈ლთექა
Line of edition: 2    მეჴდე ლიზ. [ჭა̈შ] ჩუ ლჷმყუ̂ინ ლი, მიჩა ხეხუ̂ თხუმრა̈̄შს ხასგუ̂რე̄ნა,
Line of edition: 3    ეჩქა ლი̄ცუ̂ნა̈̄ლ ოთბინა ჭა̈შს. მიჩა ხეხუ̂ს ხო̄ქუ̂ა, ერე "იმ
Line of edition: 4    ესერ ი̄ცუ̂ნა̈̄ლ?" ეჯ ბეფშუ̂ გუ̂ამა̈რჟი ხასგუ̂რე̄ნა.
Line of edition: 5       -- იმ ესერ ი, მიჩა მა̈ზიგ[უ] ლახჴედა, მეჩი დი̄-ჲ მუ ხორი ა̈გის.
Line of edition: 6    მინს ესერ ეშხუ ღოლჲა̄ქ ხარდე̄ნახ. ეჯ' ე̄სერ ოხჴი̄და ლაჯოგთე,
Line of edition: 7    უ̂ოხუ̂იშდ ზაუ̂ისგა უ̂ოხუ̂იშდ აშირდ ოთგენა. ა̈გითე ესყე̄ნა, ეჩქა შუკუ̂ისგა
Line of edition: 8    ჩოთყუ̂ინა̄ლა, ჯაჲ ჩუ̂ალყუ̂ინე̄ლი ი ჩუ̂ალუ̄ჟნე̄ლი. ეჩქა მიჩა მუ
Line of edition: 9    ა̈მჴედე̄ლი ა̈გიხა̈ნ. ჯა ჩუ ლჷმუ̄ჟინ, ეჩქა მიჩ ი̄სნაუ̂ ლახი̄სნაუ̂ა. ეჯ
Line of edition: 10    ი̄სნაუ̂ს ლა̈დი ხა̈წდა.
Line of edition: 11       -- ეჯა მა̈ჲ ლიზ? -- მიჩა ხეხუ̂ს ხო̄ქუ̂ა.
Line of edition: 12       -- მა̈ჲ ესერ-ი ნებგუ̂აჟინ მიჟ ხა̈წდა, გუ̂ამა̈რჟი ესერ ანტყუ̂ა̈სგ
Line of edition: 13    ხა̈წდა. ეჯას ესერ ლა̈დი თანშუ̂ ხა̈წდა. მიჟ ესერ ჯა ლი, მიჩა მა̈ზიგ[უ]
Line of edition: 14    ლახჴედა. ანტყუ̂ა̈სგ ესერ ბეფშუ̂ ლი, გუ̂ამა̈რჟი ხეშდრა̈̄ლ.
Line of edition: 15       -- ალა ესერ ტკისდ ხა̈წდა ი̄სნაუ̂ს ი ალა ლჷმა̈̄რ მო ლე̄ცუ̂ნა̈̄ლ?
Line of edition: 16       -- ალა ესერ, ამჷნქა ესერ მა̄მგუ̂ეშ.
Line of edition: 17       -- ჩუ ესგე, მიჩ ესერ დი̄ჲ-მუ ხორი მო? -- მიჩა ხეხუ̂ ლახჭუ̂ედნა.
Line of edition: 18       -- დი̄-ჲ მუ ესერ ჩუ ხორი მიჩ ა̈გის.
Line of edition: 19       -- ლამუ̂არს ლირდე შგუ̂ირ ლიზ, ლა̈მთილთეუ̂ ადჲე სერ.

Line of edition: 20       ანჷ̄გა̈ნხ შიშდ მე̄რმა ლადეღ. ქუ̂ერწილ-მა̄რე ლოხჴერნე. ანღრიხ
Line of edition: 21    ათხე ა̈გითე ლჷხა̈ხუ̂-ლჷგზა̈ლდ. ა̈გით' ა̄ნჴა̈დხ ალჲა̈რ. მიჩა დის ი მუს
Line of edition: 22    საბრალდ ხა̄რხ: ღოლჲა̄ქა̈რ ჩუ მეშთხე ხა̄რხ, ლჷრექუ̂ ხოლა̄მდ ლიხ.
Line of edition: 23    მინე გეზალდ ლახტუ̂ი̄ლ ყო̄რხა̈ნისგა: -- შუ̂იდბა ესერ ხა̄რხ მო?
Line of edition: 24       -- შუ̂იდბა ესერ ხა̄რხ. -- ეჯჲა̈რდ ლახტიხხ. ეჩქა ხო̄ქუ̂ახ, ერე
Line of edition: 25       -- მინს ესერ გეზალ ჩუ̂ათქარუ̂ე̄ნახ, მინს ესერ გეზალ იმხა̈ნ
Line of edition: 26    ოხჴედნიხ?
Line of edition: 27       -- ჯ' ე̄სერ მინე გეზალ ლი, ღედ ნომაუ̂ ხა̄რხ!
Line of edition: 28       -- სგა̈̄მჩედლი ქორთე, სგა̄ხშჷ̄დახ მიჩა დი̄-ჲ მუ. ათჩო̄ნახ გუნ.
Line of edition: 29    "ათხ' ე̄სერ იმშა ღედ ხა̄რხ მინს. ხეხუ̂ ახყა ი გეზალი".

Line of edition: 30       ალას ათხე თეთრ მასა̈რდ ხუღუ̂ა. ხოჩა ლარდა ოხყიდ. ამხაუ̂თეჲსგა
Line of edition: 31    ადგენა̄ლე ალჲა̈რ, ამეისგა ათხე (\\ ათხა) ხოჩა სტოლ ესუ̂გე.
Line of edition: 32    ხოჩა ლეზუ̂ებ-ლეთრე. "ათხე ესერ ჩუუ̂ სგურდახ, ხოჩა გუ̂იუ̂ ლა̈ჲდეხ!"
Line of edition: 33    ალჲა̈რდ ხოჩა ლიზგე-ჲ ლირდე ა̈დჴიდხ. სერ მა̄მა ლიზ. ლჷმზჷრეუ̂
Line of edition: 34    ხი.

Line of edition: 35       სერ მე̄რმა ა̈ჯი̄მბუ̂ი.



Next part


This text is part of the TITUS edition of Svan Prose Texts I (Upper Bal).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.