TITUS
Svan Prose Texts I (Upper Bal)
Part No. 164
Previous part

Text: 169 
Page of edition: 385 
Line of edition: 1 
169. ზანულ ა̈დილგერი


Line of edition: 2       ზანულ ა̈დილგერი უ̂ა̈რგ ლჷმა̈̄რ ეზერ. ოთკუ̂ი̄ჰა თაფუს, ერე ხი̄რუ̈ლ
Line of edition: 3    მა̄რე ლჷმა̈̄რ: "ეჩხაუ̂ ესერ ღჷრი ლაჭუ̂ნუ̈რდ, ლა̈ხი̄რულდ".

Line of edition: 4       ა̈მჩედე̄ლი ეჩი̄ სოფელთე. სგა̈̄მჩედე̄ლი, ეჩქა სოფელ ლჷზუ̂ერ ლჷმა̈̄რ.
Line of edition: 5    ზანულ ა̈დილგერი ნე̄სგაისგა ლჷმგენ, ლჷმზელა̈̄ლ ლეჟა-ლექუ̂ა,
Line of edition: 6    ლჷმთუ̂ე́დიე̄ლ. ჯა (თაფუ მუჭნური) ჩუ̂ელგენე̄ლი, "ხოჩა ლადეღ"
Line of edition: 7    ხო̄ქუ̂ა. -- შუ̂იდებდუ ესერ ლახჴედა ჯა! თაფუ ესერ ლი მო ჯა? ლიჭნური
Line of edition: 8    ესერ დამ ხოხა? -- ადუ ესერ, მიჩა[უ̂] მა̈ზიგ ლახჴედა. -- სგო̄თხუ̂ჲა
Line of edition: 9    უ̂ოთა̈ხთეჲსგა, ჭუნირ ლოჰოდა. ლიჭნური ოთბინა თაფუს. ჰა̈დურდ სოფელ
Line of edition: 10    სგალახშჷ̄და ლაჰუ̂ნა̈რდ. ზანულ ა̈დილგერი სგა̈̄მჩედე̄ლი,
Line of edition: 11    სჷა ლახსგურე̄ნა. ბა̄ზი თაფუ ამეჩუნ ა̈მსედე̄ლი. ა̈დილგერი̄შდ ხო̄ქუ̂ა,
Line of edition: 12    ერე
Line of edition: 13       -- ჯ' ე̄სერ ეზერ უ̂ა̈რგ ლი მარე აშხუ̂ გუ̂ეშს ხეცხი̄და̈̄ლ.
Line of edition: 14       -- იმ ესერ? -- თაფუ̈̄შდ ხო̄ქუ̂ა.
Line of edition: 15       -- იმ ესერ-ი დ' ე̄სერ ხეხუ̂ ხორი, დ' ე̄სერ მჷ̄ზნა̈ნი ხაყა. მიჩაკა̈ლი
Line of edition: 16    უ̂ა̈რგს ალა მა̄მა ხესგუ, ხეკუ̂ეს ერე ქა̈̄დჩი̄ჟე̄ნს.
Line of edition: 17       -- მიჩაკა̈ლჲა̄ქა̈შ ხეხუ̂ [ესერ] დე̄მე ხოცჷხ. -- თაფუს ხო̄ქუ̂ა, ერე
Line of edition: 18       -- მიჩ ესერ ხოცჷხ მიჩაჲა̄ქა̈შ ხეხუ̂. -- იმე ესერ ხოცჷხ? -- ყოშყაშა.
Line of edition: 19    ეჯჲა̈რს ესერ ხორიხ ეზერ დი̄ნა, მიჩა ხეხუ̂დ ეჯას ხაყა. -- ჲაღო
Line of edition: 20    ესერ, მიჩა მა̈ზიგ[უ] ლახჴედა, ნიშა̈ნჲა̄ქდ უ̂არჩხილს ლაჰო̈დი მასა̈რდ,
Line of edition: 21    ქაუ̂ ოთჴიდ დი̄ნას!

Line of edition: 22       ხოშა კოლეფ ლოჰოდა. დი̄ნა̈̄შდ ოთზჷზა. ქო̄თჴი̄და თაფუს
Line of edition: 23    ეჯნა̈რდ.
Line of edition: 24       -- ალ' ე̄სერ ჲა̈ს ოხზჷზა? -- დი̄ნას ხო̄ქუ̂ა.
Line of edition: 25       -- ზანულ ა̈დილგერის [ესერ] ოხზჷზა ნიშა̈ნდ: იშგუ̂ემ ესერ
Line of edition: 26    ხეხუ̂დ მიჩ.
Line of edition: 27       -- ჲაღო ესერ, მჷხა̈რ ესერ ლერქუ̂ა̈ლს ოხშხებიე̄ლნე, ქაუ̂ ოთჴიდ
Line of edition: 28    ეჩას, უ̂ა̈რგს.

Line of edition: 29       ლახა̄გა̈ნ ალ დი̄ნა, ლერექუ̂ მა̈გ ჟ'ოხშხებ, ეშხუ მჷდრა̈ჴ ანჩუ̂მინ:
Line of edition: 30    -- ალჲა̈რ ესერ მა̈გ ქა̄უ̂ ოთჴიდ! -- თაფუს ლახუ̂ემ. -- ათხ' ე̄სერ მიჩა
Line of edition: 31    მა̈რგია მა̄მა ირახ, მარე მჷ̄ზნა̈ნი ესერ ხეყე̄ნი, ეჩი̄ ლერქუ̂ა̈ლ ესერ
Line of edition: 32    ხე̄რა. ალა ესერ, მჷდრა̈ჴ, ქაუ̂ ლახუ̂ემ. ლახ ესერ იმთე ა̈დჷნგზა̄უ̂რე̄ნს,
Line of edition: 33    ჩა̈̄ჟს ლახ ხაჴჷდეს, ჩუ ლახ აქუ̂ეცს, ეჩქა ესერ მე̄რმე მა̄რე ჴედნი
Line of edition: 34    ლაშგომთე მიჩა.

Line of edition: 35       ლერქუ̂ა̈ლ სგა̈̄დქუ̂ა̄ლე: მა̈გ მიჩა ტა̈ნჟი ნაცბუ̄რშა̄ლ ოხჴა̈დ. -- მიჩაუ̂
Line of edition: 36    მა̈ზიგ ლახჴედა, -- თაფუს ხე̄ქუ̂, -- ალას ესერ ჩუ ხაყა მიჩა ხეხუ̂დ.

Page of edition: 386 
Line of edition: 1       ათხე ანჴა̈დ-ი თაფუ ქა̄ტა̈ხ უ̂ეშგდ. სერ ზანულ ა̈დილგერი აჩა̈დ,
Line of edition: 2    აფხნეგ ლა̈ჲჴერნე, ლანგზა̄რაუ̂დ აჩა̈დ. მჷდრა̈ჴ შჷნ ხუღუ̂ე. ჩა̈̄ჟს ხაჴიდ
Line of edition: 3    ი მჷდრა̈ჴ ჩუ̂აქუ̂ა̈ც. მიჩა ხეხუ̂ს ოხჭირა, ერე "ლახ ესერ მჷდრა̈ჴ ჩოთქუ̂ეცს,
Line of edition: 4    ეჩქა მიჩა მუშგუ̂ემ ესერ ჴედნი. ეჩქა მაყალ ლახა̄დ. ა̈მჴედე̄ლი
Line of edition: 5    ეშხუ მა̄რე, ლახჴერნა, მიჩა ლა̈მთილთე (დი̄ნათე) ლი̄ზი ლოხუ̂ბინა.

Line of edition: 6       ელმა̈̄ზხ, ეჩქა ეშხუ მა̄რე ლჷმა̈რდლიხ ლჷდგა̈რ შუკუ̂ისგა, ეშხუ
Line of edition: 7    ტა̈ხ, ეშხუ ჩა̈̄ჟ. ათხე ა̈მჴედე̄ლიხ ალჲა̈რ ი ტა̈ხ ქო̄თკუ̂არახ, მა̄რე ი
Line of edition: 8    ჩა̈̄ჟ ჩოთშდუღუ̂ახ. ათხე ალჲა̈რს ჟ'ესჭო̄ნახ: "მინე გზა̄უ̂რობ [ესერ]
Line of edition: 9    გზა̄უ̂რობ მა̄მა ლი" ი ა̈გითე ა̈მტეხე̄ლიხ.

Line of edition: 10       მე̄რმა ლადეღ აჯაღ ქა̄დ ლახტეხახ მიჩა ლა̈მთილთე. ელმა̈̄ზხ.
Line of edition: 11    ამეჩუ, იმუ̂ა̈̄ჲ ა̈გის ჩა̈̄ჟ ი მა̄რე ჩუ̂აშდუ̈ღხ, ეჩეჩუ სგა ლახტყუბე̄ნახ
Line of edition: 12    ფი̄ფაშა̄ლ. სგა̈̄მჩედხ ეჩხაუ̂, ეჯ სოფელთე, მიჩა ლა̈მთილა̈შ. ამეჩუ მახეღუ̂ა̈ჟ
Line of edition: 13    ესხუ̂იე̄ნახ ი აქა̈̄ნი ოხკი̄და.
Line of edition: 14       -- მა̈ჲ ამბა̈უ̂ [ესერ] ლი მიჩა სოფელს?
Line of edition: 15       -- კე̄სა̈რშა ესერ ა̈მჴედე̄ლიხ მიჩა დი̄ნა̈̄ ლაშგომთე, ყოშყაშე̄რ
Line of edition: 16    დი̄ნა̈̄ ლაშგომთე. ქუ̂ერწილ ესერ, ლი ი ეზერ ლარდა ლი მინე
Line of edition: 17    სოფელს.
Line of edition: 18       -- ბა̄ზი ესერ მინ ჲარუ̂ მა̄რა სგა ლა̈ჲმუშგუ̂რი[ხ].
Line of edition: 19       -- ბა̄ზი ესერ მინეშმჷყ ირდიხ, მა̈ჲ მიზეზ ი̄რა. -- სგო̄თჴერნა ეჯ ლე̄თ
Line of edition: 20    ი ჩა̄ჟა̈რს ჩუ̂ახქეხახ. -- ჲაღო ესერ, ათხე დი̄ნათე ღჷრი მოშ! -- ჭყინტს
Line of edition: 21    ხო̄ქუ̂ა. ნა̈ქუ̂ცულ მჷდრა̈ჴ შჷნ ხუღუ̂ა̈̄ნ. ჩიქე ჟ'ანსუ̂იბდ, ეჩანღო დი̄ნას
Line of edition: 22    ლა̄ხო მჷდრა̈ჴი ნა̈ქუ̂იც!" სგა̄ჩა̈დ ალა ამხაუ̂თეჲსგა. ლჷჴმელე
Line of edition: 23    ხა̄რხ ლემესგ. ა̈ჟიუ̂ ანრჷჰეხ, ჯ' ე̄სერ ისუ̂ბინი ათხე". ჟ'ალსუ̈ბნე̄ლი
Line of edition: 24    ყოშყაშე̄რ დი̄ნა̈̄ სგუ̂ებინჩუ. ათხე დი̄ნად ხე̄ქუ̂ ჭყინტს: "უ̂ეშგიმხა̈ნუ
Line of edition: 25    [ესერ] ანჴა̈დ, ლაჴუ̂რახა̈ნ, ლაგჷრგა̈ლდ". ეჯ ჭყინტ უ̂ეშგიმხა̈ნ
Line of edition: 26    ა̈მჴედე̄ლი. დი̄ნას ხო̄ქუ̂ა, ერე "ჲა̈რ ესერ ხორი ბა̄ზი მუშგუ̂რა̈ლდ?"
Line of edition: 27    ა̈ჲა̈რ ესერ ი, მიჩა მა̈ზიგუ ლახჴედა მიჩ, ეჯნოშ ესერ დეშ ჴედნია
Line of edition: 28    გუდ, მიჩა ნაჩომ მჷდრა̈ჴ ჲერუ̂ა̈̄იშდ ლოხოდა?" -- ჩუ̂ა̈მტეხე̄ლი ჭყინტ:
Line of edition: 29    "მჷხა̈რ ესერ ესყახ. მიჩ ესერ ა̈დილგერი̄შთე ხოცხა ლი̄ზი ხეხუ̂დ".

Line of edition: 30       მჷხა̈რ ჩუ̂ა̈დრჷჰა̈̄ნ. ესყახ ალ დი̄ნა კე̄სა̈რშე̄რ. ანჷ̄გა̈ნხ ზანულ ა̈დილგერი
Line of edition: 31    ი მიჩა აფხნეგ, ჩა̄ჟა̈რ ანჰჷნგრეხ. ათხე ოხბინეხ ლი̄ცუ̂ა̈̄ლ ალჲა̈რდ.
Line of edition: 32    დი̄ნა ესყახ ეჯჲა̈რს. ეჩქა ხეხუ̂ს ხე̄ქუ̂ხ, ერე "კალონშუ̂ ი სამჷრთალშ[უ̄უ̂]
Line of edition: 33    ესერ ახა̄დხ". ათხე ალჲა̈რს დი̄ნა ჩუ ხაყახ ლჷჩრაუ̂ად. მა̄რა̈̄ლ
Line of edition: 34    აფიშუ̂დხ ქა, ჲეშდჲორი მა̄რე. ათხე დი̄ნას ლა̈ხჭუ̂ედდახ, ერე
Line of edition: 35       -- იმთე როქ ხოცხა ლი̄ზი?
Line of edition: 36       -- მიჩ ესერ ხოცხა ეჩხაუ̂ ლი̄ზ'-ე̄, მა̈̄ნკუ̂ი̄ ნაშგომთე.
Line of edition: 37       -- ჲაღო ესერ, ჩ[უ̄]უ̂ ა̈დსამართლა̈̄ნ, ხოშა ნაჭუ̂ლაშ ესუ̂ა̈̄ჲს ხოჴი̄დე̄ნს,
Line of edition: 38    ეჩხაუ̂ აჩეს.

Page of edition: 387 
Line of edition: 1       ლა̈ხჭუ̂ედდახ ზანულ ა̈დილგერის: ეშხუ უ̂ოქუ̂რა̈ კოლეფ ოხზჷზა,
Line of edition: 2    ეჩჷნქა მა̄მგუ̂ეშ. კე̄სა̈რშე̄რ აშირ მა̄რე ოხზჷზახ ნაჭუ̂ლაშდ. "ალ' ე̄სერ
Line of edition: 3    ჟიუ̂ ა̈ნლაგუ̂ნა̈̄ნ, ხედუ̂ა̈̄ჲ ხოშა ირახ, ეჩისუ ხა̄დ ხეხუ̂დ!" ოხუ̂ლაგუ̂ნახ
Line of edition: 4    ი ეჯას ოხსერა -- უ̂ოქუ̂რს. ეჩქა ეჯ დი̄ნა ზანულ ა̈დილგერის ესსედა
Line of edition: 5    ხეხუ̂დ. ათხე ჩუ̂ა̈მყუ̂ელე̄ლიხ. ხეხუ̂ ა̈დილგერის ოთხუ̂ჲა ა̈გითე. ლჷმზჷრეუ̂
Line of edition: 6    ხი.



Next part


This text is part of the TITUS edition of Svan Prose Texts I (Upper Bal).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.