TITUS
Svan Prose Texts I (Upper Bal)
Part No. 165
Previous part

Text: 170 
Page of edition: 387 
Line of edition: 7 
170. მურჭუ̄ლი̄დ


Line of edition: 8       ხელწიფს ხორდა მიჟიუწდუნა სი̄მაქ. მა̈გ ალას იშგომდა, მარე ქა
Line of edition: 9    და̈̄ს ლახუ̂ე̄მ. აშხუ̂ ლადა̈ღ სი̄მაქ ლანყაუ̂ა̄ლთ' ა̄ჩა̈დ მიჩა უ̂ა̈ზრა̈ლცახა̈ნ.
Line of edition: 10    აშხუ̂ მინდუ̂ერისგა მჷხმჷ̄რის ხეწა̈დ, ხედუ̂ა̈̄ჲს ხეყა̈̄დ სემი ხოჩა
Line of edition: 11    ლესგდი გოჭა̈რ. სი̄მაქდ ხაშგუ̂მინ: -- ქა̄უ̂ ესერ ლახუ̂ე̄მ ეშხუ გუ̂ეჭ.
Line of edition: 12    -- აშხუ̂ გუ̂ეჭს ესერ ეჩქა ლახუ̂ედი, ლახე ქუთუ̄ლა̈რთეჟი ტუ̂იტელ კა̈ნს
Line of edition: 13    ქა ლახწუ̂ე̄ნი. -- ალა დი̄ნად ა̈დუ̂ა̈შგდე, მარე იშგანღა მჷხმჷ̄რიდ დე̄მღა
Line of edition: 14    ლახუ̂ე̄მ. ეჩქას უ̂ა̈ზრა̈ლდ ხა̈̄ქუ̂ხ მიჟიუწდუნა სი̄მაქს: "მა̈ჲ ესერ
Line of edition: 15    ი̄რა, ლახ მჷხმჷ̄რის ქუთუ̄ლა̈რთეჟი ტუ̂იტელ ქა ლა̈ხწუ̂ე̄ნ' ეჯღა?"
Line of edition: 16    დი̄ნად ქა ლახწუ̂ე̄ნე მა̈გ ქუთუ̄ლთეჟი მჷხმჷ̄რის ი მჷხმჷ̄რიდ ქა
Line of edition: 17    ლახუ̂ე̄მ ამღა გუ̂ეჭ. მე̄რმაჟი̄ნ აჯაღ ათა̄სდ ალ დი̄ნა მჷხმჷ̄რის. აჯაღჷდ
Line of edition: 18    ხაშგუ̂მინ:
Line of edition: 19       -- ეშხუ გუ̂ეჭ ესერ ჩუ̄უ̂ ათყიდ.
Line of edition: 20       -- გუ̂ეჭს ესერ დე̄მღა ჰო̈დი, ეჩჷნქე̄, ლახ ესერ სი̄მაქ ლა̄რტყანჩუ
Line of edition: 21    ტუ̂იტელ დო ლა̈ხწუ̂ე̄ნი. -- ალა სი̄მაქდ ა̈დუ̂ა̈შგდე̄დ, მარე ლახ მო̄მგუ̂ეშ
Line of edition: 22    ოთჩა̈დ სგუ̂ებდ, ქა ლეწუ̂ე̄ნე ხა̄დ მა̈გ ლა̄რტყანჩუ. გუ̂ეჭ ქა̄დ
Line of edition: 23    ლახუ̂ე̄მ.

Line of edition: 24       მე̄სმაჟი̄ნ აჯაღ ლა̈ხტა̈ხ დი̄ნა ი აჯაღჷდ ხაშგუ̂მინ მე̄სმე გუ̂ეჭ, მარე
Line of edition: 25    ჭყინტდ ხა̈̄ქუ̂ ა̈ლა̄რტყანჟი ესერ ქა̄უ̂ ლახწუ̂ე̄ნე მა̈გ ი ქ' ე̄სერ
Line of edition: 26    ხაჰუ̂დი". ალა ჰა̈დურდ მასა̈რდ ა̈დუ̂ა̈შგდე დინად, მარე მა̄მგუ̂ეშ ოთჩა̈დ
Line of edition: 27    სგუ̂ებდ ი ქა ლეწუ̂ე̄ნე ხა̄დ. დი̄ნას ლერსგუ̂ან ლუსუ̂ ჟიქა̄ნ ნიშა̈ნ
Line of edition: 28    ხა̄გა̈ნ. ალას მჷხმჷ̄რი ქა ხეწა̈დ ი ჩუ̂ა̈დნა̈ცხე.

Line of edition: 29       აჩა̈დ ხა̈ნ ი ხუ̂ა̈ჲ მა̄მა ი აშხუ̂ ლადა̈ღ ალ ჭყინტს ა̈ფიცარ ლახხუ̂ი̄დ
Line of edition: 30    ი ლა̈ხჭუ̂ედდა: "იმთ' ე̄სერ ესღრი?" ა̈ფიცარდ ხა̈̄ქუ̂: -- იმთ'
Line of edition: 31    ესღუ̂რი ი ხელწიფ ა̈წუ̂ი̄ლე მიჩა დი̄ნას, მარე ეჩის გარ ხაჰუ̂დი
Line of edition: 32    [ხახუ̂დ-ე́], ჲერუ̂ა̈̄ჲ ჩუ მოშ ა̈თხო̄ლი, იმე დო ხა̄გ მიჩა დი̄ნას ნიშა̈ნ.
Line of edition: 33       -- ეჩი̄ ნიშა̈ნს ლახ მი ჯა̈̄ქუ̂ნინე, იმ ლამჰუ̂ედნე? -- მა̈̄ჲ ჯეკუ̂ეს,
Line of edition: 34    ეჩის ჯაჰუ̂დი სური̄. -- ჲაღო სი რა̈შ ჯაყა, ალაჲ ქა ლა̄მო ი აჯაღ
Line of edition: 35    ემაქმ ამეჟი ათა̈ს მანა̈თ ი ღო ქა ჯა̈̄ქუ̂ნი. მა̈ჲ ნიშა̈ნ ეჩის ხა̄გ. -- ა̈ფიცარს
Line of edition: 36    გუნ ათმა̈ჭრჷნდა რა̈შა̈ ლიჰუ̂დი, მარე დი̄ნა̈̄ მალატდ მა̈გ ათჩომა̈̄უ̂ნე
Page of edition: 388  Line of edition: 1    ი ქა ლახუ̂ე̄მ. ეჩქას ჭყინტდ ხა̈̄ქუ̂: "მიჟიუწდუნა სი̄მაქს, ჲაღო,
Line of edition: 2    მჷრთენ ბარჯჟი ხა̄გ მეშხე ნიშა̈ნ".

Line of edition: 3       ალ' ა̈̄ფიცარს გუნ ათხი̄დჷნ ი აჩა̈დ ხელწიფიშთე̄სგა. ხელწიფს
Line of edition: 4    ხა̈̄ქუ̂: -- მი მიხა ისგუ̂ა დი̄ნა̈̄ ნიშა̈ნ. -- ჲაღუ̂ ე̄სერ ქა̄უ̂ რა̈̄ქუ̂! -- ისგუ̂ა დი̄ნას
Line of edition: 5    მჷრთენ ბარჯჟი მეშხე ნიშა̈ნ ხა̄გ. -- ხელწიფდ რა̈̄ქუ̂: "ჰა̈დურდ ამჟ'
Line of edition: 6    ესერ მა̄მა ლი, მარე მე̄რუ̂ა̄ლე ნა̈მსგიდან ესერ ეში̄ ალა ხოშა ფე̄დიას ა̈რი
Line of edition: 7    ტკიცცახა̈ნ ი ამღ' ე̄სერ ხაჰუ̂დი მიჩ დი̄ნას". მარე ამ დრო̈უ̂ს
Line of edition: 8    მჷხმჷ̄რიდ ა̈ნკიდ ჰერ ი ხა̈̄ქუ̂: -- მიჩ ესერ ხოჩილდ ხოხალ ალ დი̄ნა̄
Line of edition: 9    ნიშა̈ნ. -- ჲაღუ̂ ე̄სერ ქა̄უ̂ რა̈̄ქუ̂! -- ალ დი̄ნას ესერ მურსგუ̂ენ ლისუ̂ ჟიქა̄ნ
Line of edition: 10    უ̂ოქუ̂რა̈ ნიშა̈ნ ხა̄გ. -- ალა ტკიცდ ამჟი ლა̈სუ̂, მარე დი̄ნა ეჯღაი̄
Line of edition: 11    მა̄დ ლახუ̂ე̄მხ ამის. ხელწიფდ რა̈̄ქუ̂: "ბა̄ზი აშხუ̂ უ̂ოთა̈ხისგა ა̈თყუ̂ინიდ
Line of edition: 12    ჲერქჷდა, ჰამს ხედუ̂ა̈̄ჲცახა̈ნ ირდი მიშგუ დი̄ნა, ეჩი̄ ხეხუ̂ ი̄რა".

Line of edition: 13       ამ ლე̄თ ხელწიფდ ძღჷდ ქეიფ აჩუ̂მინ. მჷხმჷ̄რიდ მა̄მგუ̂ეშ ლალე̄მ
Line of edition: 14    ხოჩა̄მ კამპეტა̈რჷნქა. ა̈ფიცარ ჟი უ̂ეთ ესბა̈ჭკუ̂ ლეზობ-ლეთრა. ალჲა̈რ
Line of edition: 15    ჩუ̂ადყურდახ. დი̄ნა შიშდ ა̈ფიცარს ლოხყურდა. ისგლე̄თი უ̂ონაქა
Line of edition: 16    ა̈ფიცარს ჴა̈დ ა̈ხშურა̈̄ნ, მარე ქა̄მაუ̂ ლა̄ზ მა̄მა ხა̄რ. ყო̄რა̈ლ ქა ლჷკილ
Line of edition: 17    ლიხ. მჷხმჷ̄რი კამპეტა̈რს იზბი. ა̈ფიცარ ლა̈ხჭუ̂ედდა: -- იმ ესერ იზბი?
Line of edition: 18    -- იმ ი ლე̄თი ლეზუ̂ებს ჟი უ̂ეთ ესუ̂ებჭკუ̂, ათხე ქა̄მაუ̂ ლა̄ზ მა̄მა მა̄რ
Line of edition: 19    ი ხუ̂იდგა̈რი. -- "ფიცარს ალა ტკიც ლოხხალდა, ჟ'ანჷ̄გა̈ნ ი ჯაჲ ჟ'ესტა̈ხ
Line of edition: 20    მიჩა ქა̄მაუ̂ ნალა̄ზუ̂ს. ალას ხოლა ქუ̂ინ ოთჴანდა. დი̄ნა ამი̄ცახა̈ნ
Line of edition: 21    დეშ აგა̈ჭ ი მჷხმჷ̄რითე ა̈დსიპა̈̄ნ. ალას ხოჩა კამპეტრე ქუ̂ინ ეშ
Line of edition: 22    ხოდურდუნი.

Line of edition: 23       მე̄რმა ლადა̈ღ დი̄ნა მჷხმჷ̄რიცახა̈ნ ა̈ხგუ̂ა̈ბხ. ალა ხელწიფს ათუ̂ა̈შგდჷნ
Line of edition: 24    ი უ̂არ ხა̈̄ქუ̂ მჷხმჷ̄რის: "მიშგუ̂ა გეზალს ეჩქა ლაჯჰო̈დნე̄, ლახე,
Line of edition: 25    ათა̈ს რა̈ჭუ̂ მაყა ი ეჯჲა̈რს სამ ზაუ̂ისგა ეჯჟი ჟ'ემჷლდეღი, ერე აშხუ̂ი̄ლსი̄
Line of edition: 26    დო̄სა ათქარუ̂ი ი დო ქა მოშ ჲა̈რ აჯღორუ̂ი".

Line of edition: 27       ამნე̄მ ალა ჩუ ჩუ̂ემინ. სგა ლა̈ჲბა̈რჲე ათა̈ს რა̈ჭუ̂ ი ადჲე. ჟი ლახსგურდა
Line of edition: 28    რა̈შს ი აჩა̈დ გოროდთე. ამჩუ ლახხუ̂ი̄დ ეშხუ დედბერ.
Line of edition: 29    ალა ლი გუდმეცა̈ლ. დედბერდ ხა̈̄ქუ̂: "იმთ' ე̄სღრი, სი მა̄რე?" ჭყინტდ
Line of edition: 30    ქო̄ხუმბაუ̂ე, იმუ̂ა̈̄ჲჟი ლა̈სუ̂ მიჩა გუ̂ეშ. დედბერდ ხა̈̄ქუ̂: "რა̈ჭუ̂ა̈ლს სი
Line of edition: 31    დეშ ხილდეღ, მარე აშხუ̂ ღუ̂აჭა̈რს ხუღუ̂ა სტუ̂ი̄რა̈ლ, ეჯჲა̈რისგა ეშხუ
Line of edition: 32    მაჰუ̂რე̄ნე ლი. ეჩას ე მოშ ჟი ხიყდი, ეჩქას ეჩი̄ ჰერშუ̂ ჩი̄ ჟი ხილდეღ,
Line of edition: 33    მა̄დეჲ დეშ". ჭყინტდ ალ სტუ̂ი̄რ ჟ'ა̈ნყიდ, ხოჩა ლერქუ̂ა̈ლ
Line of edition: 34    ქა̈̄ნცა̈̄დ, ლახსგურდა რა̈შს ი ატა̈ხ უ̂ეშგდ. უ̂ოდ-ი-უ̂ოდ ხელდეღ რა̈ჭუ̂ა̈ლს.
Line of edition: 35    სემი ლადა̈ღ ხოკა̈ლდა, ეჩქას ხელწიფდ მე̄რმე ლერქუ̂ა̈ლ
Line of edition: 36    ათქუ̂ა̄ლე ი აჩა̈დ მურჭუ̄ლი̄დთე ი ხა̈̄ქუ̂: -- ჩუ̄უ̂ ესერ ათყიდ ეშხუ
Line of edition: 37    რა̈ჭუ̂! -- რა̈ჭუ̂ს ესერ თეთრღა დე̄მის ჰო̈დი; მიჩ ესერ ეშხუ თუ̂ა̈ლ
Line of edition: 38    ხორი, ეჯა ქა̄უ̂ ლახუ̂ე̄მ ი ეჩქას ესერ ჩუ̂ათყიდნე. -- ხელწიფს გუნ
Page of edition: 389  Line of edition: 1    ათლო̄ნ, მარე მა̈ჲუ ხოჩუ̂მინა̈̄ნ? ქა ლეჰუ̂დი ხა̄დ. რა̈ჭუ̂ ა̈გით' ა̄დჲე. ისგლე̄თი
Line of edition: 2    უ̂ონაქა მურჭუ̄ლი̄დ ხელწიფი ჰა̈ზუ̂თე̄სგ' ა̄ნჴა̈დ, ლაჲშჷმე
Line of edition: 3    სტუ̂ი̄რ ი რა̈ჭუ̂დ ეშ წუ̂ისდ გარ ა̈ნკიდ ლაჴუ̂რაქა.

Line of edition: 4       მე̄რმა ლადა̈ღ ხელწიფდ მიჩა ხეხუ̂ ადზჷზე. ხელწიფი ხეხუ̂დ
Line of edition: 5    ხა̈̄ქუ̂: -- ჩუ̄უ̂ ესერ ათყიდ ეშხუ რა̈ჭუ̂! -- რა̈ჭუ̂ს ესერ თეთრღა დე̄მის
Line of edition: 6    ჰო̈დი; მიჩ ესერ ერ მჷსკა̈დ ხა̈̄ზ, ალა ქა̄უ̂ ლახუ̂ე̄მ ი ღო ქ' ე̄სერ
Line of edition: 7    ლახუ̂ედნე. -- ხელწიფი ხეხუ̂დ მჷსკა̈დ ქა ლახუ̂ე̄მ ი რა̈ჭუ̂ ა̈გით' ე̄სყა.
Line of edition: 8    ა̈გითეშა̈̄ლიდ მა̄დხუ̂ა̈ჲ ხოკა̈ლდა ქორთე̄სგ' ე̄ჩქას ესშუმე სტუ̂ი̄რ ი ალას
Line of edition: 9    რა̈ჭუ̂ ჩუ დამ ოთჩა̈დ. ცა̈რიე̄ლ ანტა̈ხ მიჩა ჭაშუ̂თე̄სგა.

Line of edition: 10       მე̄სმა ლადა̈ღ ხელწიფდ მიჩა დი̄ნ' ა̄დზჷზე. დი̄ნად ხა̈̄ქუ̂: -- ჩუ̄უ̂ ესერ
Line of edition: 11    ათყიდ ეშხუ რა̈ჭუ̂. -- თეთრღ' ე̄სერ დე̄მის ჰო̈დი. -- ჲაღო, მა̈ჲ ესერ
Line of edition: 12    ხაკუ? -- მა̈ჲ ესერ-ი მიჩ ესერ არშუ̂ილ ხა̈̄ზ, ეჯა ჩუ̄უ̂ ესცუ̂ირ ი რა̈ჭუ̂ს
Line of edition: 13    ესერ ქა ლახუ̂ედნე. -- დი̄ნად ალა გუნ ა̈დუ̂ა̈შგდე, მარე უ̂ეშგიმპილს
Line of edition: 14    იშგენ მა̄მგუ̂ეშ ოთჩა̈დ სგუ̂ებდ ი ჩუ ლეცუ̂რე ხა̄დ. დი̄ნად რა̈ჭუ̂ ჟ'ანკულთხნე
Line of edition: 15    ი ეჯჟი̄ნ ადჲე ქორთე. ლჷკილ ლარდაისგა ჩუ̂ათბეხ. აშუ̂მე
Line of edition: 16    მურჭუ̄ლი̄დ სტუ̂ი̄რს, ალა რა̈ჭუ̂ს ქა ხესმი, მარე მა̈ჲ ჩუ̂ემინას: ლუკულთხა̈ნ
Line of edition: 17    ლი ლჷკილ ლარდაისგა ი ქა ლა̄ზ დე̄მთე ხა̄რ.

Line of edition: 18       უ̂ეშგინპილი დრო̈უ̂ ერ ანჴა̈დ, ეჩქა მურჭუ̄ლი̄დ ჟ'ა̈ნმა̄რა̈̄ნ, სგა̄ჩა̈დ
Line of edition: 19    ხელწიფი ჰა̈ზუ̂თე̄სგა, რა̈შს ჟი ხასგურდ' ე̄ჯჟი. ალას დი̄ნა ქა ხეწა̈დ
Line of edition: 20    ი ჩუ̂ათირ, მე̄უ̂არ ლახლატჷნ, ჟ'აჩა̈დ ლჷკილ ლარდათე, ჩუ̂ადკარე
Line of edition: 21    ი რა̈ჭუ̂ ჟ'ანფუშდუ̄რე. მურჭუ̄ლი̄დდ ლაჲშჷმე სტუ̂ი̄რ ი რა̈ჭუ̂დ
Line of edition: 22    ეშ წუ̂ისდ ა̈ნკიდ ყო̄რქა. მურჭუ̄ლი̄დ რა̈ჭუ̂ა̈ლ მა̈გ სგა ლახბა̈რჲე. ხელწიფდ
Line of edition: 23    მიჩა ლიხჷლწიფ ალას ოთმა̈ზრე.

Line of edition: 24       ხოჩა ლირდე-ლიზგ' ა̈̄დჴიდხ ი ლჷმზჷრე̄უ̂ ხიშდ.



Next part


This text is part of the TITUS edition of Svan Prose Texts I (Upper Bal).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.