TITUS
Svan Prose Texts I (Upper Bal)
Part No. 168
Previous part

Text: 173 
Page of edition: 391 
Line of edition: 1 
173. და̈ლ ი უ̂ობურ დადა


Line of edition: 2       ლიხ სემი ლახუ̂ბა. ალჲა̈რს ხორიხ გუნ ლჷმბეც დი-ჲ მუ, ეჯჟი
Line of edition: 3    ლჷმბეც, ერე ქონება -- დეცე-გიმ, კუმა̈შ ი იშგენ მა̈გ მასა̈რდ ხუღუ̂ახ.
Line of edition: 4    გეზლი̄რე ხოჩა̄მდ ლირდი̄ გუ̄ღა დემგუ̂აშ აზა̄რეხ. დი-ჲ მუ ჩუ̂ათთაგანხ.
Line of edition: 5    ლაქუ̄ნაუ̂ა̄ლჟი გეზლი̄რს ესცუ̂ირხ ამბა̈უ̂, ერე "მინე ნარდა̈უ̂ ქა
Line of edition: 6    ლა̈ხშყეხ ი ხა̈ყრიხ, ლჷდგა̈რიშდ მა̈̄ჲ წეს ლი: ტჷტა̈ დია̈რ, ლაშდღუ̂ა̄ლ
Line of edition: 7    ი კათტაბა̈გ". გეზლი̄რდ მა̄მგუ̂ეშ ადზა̄რეხ: მა̈̄ჲ ქონება შუნ ხუღუ̂ა̈̄ნხ,
Line of edition: 8    მა̈გ მინე დიეშ-ი მუუ̂ე ლაშდღუ̂ა̄ლს, ტჷტა̈ დია̈რს ი კათტაბა̈გს
Line of edition: 9    ლახჴჷმრეხ. ლახუ̂ბას მა̄მგუ̂ეშ ესსა̈დხ: დე ქორ, დე გიმ ი დე კუმა̈შ;
Line of edition: 10    გუნ ა̈დღირბა̈̄ნხ ი ხეკუ̂ეს ერე აჩეხ იშგანთე ლა̈ლზიგა̄ლდ. სერ ხოშა
Line of edition: 11    მუხუ̂ბე̄მი ნა̄ქუ̂ჟი ჟ'ოხქა̈ფხ ამეჩუ̄ნა̈ ლა̈ლზიგას ი აჩა̈დხ ჯუ̂ე̄დია
Line of edition: 12    ქუ̂ეყანათე. ამჩუ აშხუ̂ მინდუ̂ერთე̄სგა ა̈თჴა̈დჷ̄ნხ ი აშხუ̂ ბაღს ხეწა̈დხ
Line of edition: 13    ი სგა̄ჩა̈დხ ამხაუ̂თე̄სგა. ბაღისგა მეჩი ბაბა აბე̄რგა. ალ ბაბას ლა̈ხჴჷ̄რა̈̄ნხ სემი
Line of edition: 14    ლახუ̂ბა:
Line of edition: 15       -- სგა̄უ̂ ესერ ლა̈ჲტყუბე ლა̄ლზიგა̄ლდ. -- ალ სემი ლახუ̂ბა მა̈გ
Line of edition: 16    მეთხუ̂ჲა̈რ ლიხ. -- იმუ̂ა̈̄ჲ ესერ ჩუ̂ადგარნიხ, უშხუდ ლეჴმა̈რი ი̄რა.
Line of edition: 17       -- ეზერ ესერ. -- ბაბად ხა̈̄ქუ̂.

Line of edition: 18       სამ ლადა̈ღუნღო აჩა̈დ მაშე̄ნე მუხუ̂ბე ლა̈თხუ̂ჲართე. ლახუ̂ბას სგუ̂ებინისგა
Line of edition: 19    ქა ლუ̄ქუ̂ ხა̄რხ, ერე "ლახ ესერ ლა̈თხუ̂ჲართე ქა̄დრიხ, ეჯ
Line of edition: 20    ლე̄თ ქა̈̄მ მესედ მა̄მ ლიხ. ლახ ქა̈̄მ ჲა̈რ ა̈სდენიხ, ეჩას მო̄ლე ხეყა̈რ".
Line of edition: 21    მაშე̄ნა მუხუ̂ბა ა̈თჴა̈დჷ̄ნ ხოშა̄მ კოჯთე, გუ̂ი ლახუ̂ე̄მ ი ხეწა̈დ ღუ̂აშს.
Line of edition: 22    ღუ̂აშს ქო̄ხჰაუ̂ჯე ი მა̄მა ხეთხა̈̄ნ. ღუ̂აშდ ქა̈̄დსკინე ი კოჯა̈ ყო̄რა̈ლ ა̈დკარა̈̄ნხ,
Line of edition: 23    ღუ̂აშ სგა̄ჩა̈დ ამხა̄უ̂თე̄სგა. მეთხუ̂ჲა̈რ უ̂ეშგინ ეშჭიმ. ამჩიქს
Line of edition: 24    ჯუ̂ე̄დიახა̈ნ მეთხუ̂ჲა̈რს ლახსჷმდა ლიკილი; ლაჲსგიდა კოჯა̈ თხუმთე,
Line of edition: 25    მარე დე̄მგუ̂აშ ხეწა̈დ. მჷკი̄ლი ლი კოჯა̈ დალ. ალ კოჯისგა და̈ლს
Line of edition: 26    ხორი ღუ̂აშა̈ ჯუ̂ეგ. მეთხუ̂ჲა̈რს და̈ლ ქა ხეწა̈დ კოჯა̈ თხუმხა̈ნჩუ, გურე̄ჭ
Line of edition: 27    ახფიშუ̂დ ი მეთხუ̂ჲა̈რ ჩუ̂ადმჷრცხე. ბა̄ზი ალა ა̈გითე იმ ა̈ტხენ? ა̈გის
Line of edition: 28    ლახუ̂ბა იგუ̂ნიხ: "ხოშა̄მ მუხუ̂ბა ათყერ' ე̄სერ მო̄ლე!"

Line of edition: 29       მე̄რმა ლადა̈ღ აჩა̈დ მანე̄სგჷრე მუხუ̂ბე. ალა̈̄ჲ ალ კოჯს ლახა̄გა̈ნ,
Line of edition: 30    ღუ̂აშს ხეწა̈დ. ამნე̄მი ქო̄ხჰაუ̂ჯე, მა̄მა ხეთხა̈̄ნ. ღუ̂აშს კოჯა̈ ყო̄რა̈ლ
Line of edition: 31    ა̈თკარა̈̄ნ ი სგა̄ჩა̈დ. ა̈თჭა̈მ მეთხუ̂ჲა̈რ, მარე ალასი̄ და̈ლდ გურე̄ჭ ახფიშუ̂დ
Line of edition: 32    ი ჩუ̂ადმჷრცხე. ა̈გის ხოხუ̂რა მუხუ̂ბე ოხღელი ლახუ̂ბას, მარე
Line of edition: 33    დე̄მხა̈ნ ანტა̈ხხ.

Line of edition: 34       მე̄რმა ლადა̈ღ აჩა̈დ ჯაჲ ლათხე̄ლთე ხოშა̄მ ლახუ̂ბა̈̄შ. იმუ̂ა̈̄ჲ კოჯთე
Line of edition: 35    მიჩა ლახუ̂ბ' ა̄ჩა̈დხ, ეჯ კოჯს ხეწა̈დ; კოჯს ღუ̂აშ ხელწბა. ქო̄ხჰაუ̂ჯე
Line of edition: 36    ი ჩუ̂ადხუ̂იტლე, მარე ჩუ მა̄მ ესსა̈დ. ღუ̂აშს კოჯა̈ ყო̄რა̈ლ ა̈თკარა̈̄ნ
Line of edition: 37    ი ამხა̄უ̂თეჲსგა ლა̈ჲსკინე. უ̂ეშგიმპილს მეთხუ̂ჲა̈რდ რა̈̄ქუ̂ე: "მი̄უ̂ ლჷჭა̈თ
Page of edition: 392  Line of edition: 1    ხუ̂ი, სგა მო̄დ ა̈თუ̂ჭემ!" ალა კოჯა̈ და̈ლდ ა̈ნმეჴრე ი ლიკი̄ლი ლა̈ჲბინე.
Line of edition: 2    ალა მეთხუ̂ჲა̈რს ქა ხასჷმდა. მეთხუ̂ჲა̈რ კოჯა̈ ყო̄რს სგა ლა̈ხპა̈ჟ. კოჯა̈
Line of edition: 3    და̈ლ ჩუბაუ̂ ლა̈ჲსგიდა, ჩუქუ̂ა̄ნ მაუ̂ინს ქა და̈̄ს ხეწა̈დ ი რა̈̄ქუ̂: "ხეკუ̂ეს
Line of edition: 4    ესერ ერე ხეწეს მიჩა ღუ̂აშა̈ ჯუ̂ეგს". კოჯა̈ და̈ლდ ყო̄რა̈ლ ჩუ̂ესკარე,
Line of edition: 5    მეთხუ̂ჲა̈რ ყო̄რს სგა ხაპიჟ. კოჯა̈ და̈ლს ქა ხეწა̈დ ი ლუსდგუ̂ა̈რს ხაფხეჭ,
Line of edition: 6    სგა იყირ მუჭუ̂ედს ი ქა ლა̈ხყაჰა̈̄ნ. ათხე მეთხუ̂ჲა̈რდ ხაშგუ̂მინ:
Line of edition: 7       -- ლახუ̂ბა მიშგუ ს'ა̈ჯმჷრცხა, ჯაბიც, ერე უ̂ეშგდ ლამტჷხა.
Line of edition: 8       -- ეჯჲა̈რს მი უ̂ეშგდ ლაჯტიხე. ნა̈ჲ ალსყად ლიხეხუ̂-ჭაშუ̂. მიშგოუ̂
Line of edition: 9    ალა და̈̄ს ხობდაუ̂ა: ხუ̂ა̈ჲ მა̄რე ჩუ მიმჷრცხა. სი ლჷმა̈̄რხი ლჷჲმედ.
Line of edition: 10    ჴერჴჲა̈ნ მეთხუ̂ჲა̈რ ი ამღა მაკუ სი მი ჭაშუ̂დ. -- და̈ლდ ხა̈̄ქუ̂ მეთხუ̂ჲა̈რს:
Line of edition: 11       -- სი ჯუგუ̂მა̈რდ მაჴდ ჲარუ̂ ბარჯ ნე̄სგაისგა, მი კი̄ლს ა̈ხუ̂კედნე
Line of edition: 12    ი ლახუ̂ბას ისგუ̂ა ლჷჲარდ ეჯგენი სგუ̂ებინჩუ.

Line of edition: 13       მეთხუ̂ჲა̈რდ ჯუგუ̂მა ხაჴიდ, და̈ლდ კი̄ლ-კი̄ლ ლა̈ჲკიდ ი ლახუ̂ბა
Line of edition: 14    ლჷჲარდ სგუ̂ებინჩუ̄ნ ესგენე. ხოშა ლახუ̂ბა ქორთ' ა̄დზჷზეხ, ხოხუ̂რა
Line of edition: 15    მუხუ̂ბე ჩუ̂ასა̈დ ამჩუ კოჯა̈ და̈ლცახა̈ნ. და̈ლს ჭა̈შმი ღულა̈ჲჟი ჩუ
Line of edition: 16    ლა̈ხუ̄ჟ. ჭა̈შ ხეხუ̂მი ფა̈თუ̂ა̈რს ხეშდრა̈̄ლ. ფა̈თუ̂ა̈რისგა ა̄ხბა̈გუ̂ სემი კჷლ.
Line of edition: 17    ჭაშუ̂ემ ხეხუ̂ს თხუ̂იმ გა̈ნთ' ე̄სუ̂დე ი ჯ აჩა̈დ ყო̄რა̈ლ ლაკრა̈̄ლთე. ალ
Line of edition: 18    დრო̈უ̂ს და̈ლხ ჟ'ა̈ხჲა̈ცხჷ̄ნ, მიჩა ჭაშუ̂ უ̂ეშგიმისგა სგა ხაფხეჭ ი ყო̄რლე
Line of edition: 19    ლიკრე მა̄დ ათნებე. მე̄რმაჟი̄ნ და̈ლს ჩუ̄დ ხეუ̂ჟუნი ჭა̈შმი ღულა̈̄რქა.
Line of edition: 20    უფგოშ ჭა̈შ ქო̄თჩა̈დ, ალ კჷლარშ ყო̄რა̈ლ ჩუ̂ადკარე. და̈ლდ ალა
Line of edition: 21    გუ̂იანდ გარ ა̈ნმეჴრე. ლჷკილ ქორხა̈ნქა, ხედუ̂ა̈̄ჲ ჭაშუ̂ემ ადკარე, აშხუ̂
Line of edition: 22    მეპო̈̄რ ნა̈პრდ ანსკინე, ქა̄მენჩუ ზურა̄ლა̈ არშუ̂ილ ხორიკდა, ჟ'ა̈ნკიდ
Line of edition: 23    ი ეშ ლახქარუ̂ე ჯუ̂ე̄დია ქუ̂ეყანათე. ალა და̈ლს ათსა̈სტკჷნ, ლაგუ̂ა̈ნს
Line of edition: 24    ქჷმრა̈ლს დე̄მის იფკუ̂ე, ეჯღ' ე̄რე "ამუნღუ̂' ე̄სერ მიჩა ლირდე მა̄მა
Line of edition: 25    ლი სერ!"

Line of edition: 26       ნა̈პრს ალ არშუ̂ილ ჩოხშყა̈დ ეჯ ა̈დგილთეჩუ, იმუ̂ა̈̄ჲ ა̈დგილს
Line of edition: 27    იყუ̂ბა̄ლ ჩიე̄სგი სა̈ხჷლწიფი ხა̄ლხ ი ხელწიფ. ხა̈ლხ მა̈გ ალ არშუ̂ილს
Line of edition: 28    ხეწუ̂ე̄ნა̈̄ლ. ალას ხელწიფ ლახე ხეწა̈დ, ხელწიფდ ლა̈ჲფა̈შუ̂დ, ერე
Line of edition: 29    "მიშგუ ლიხჷლწიფ მა̄მ მაკუ ეჩქად-ე́, უ̂ოდ ალ არშუ̂ლი ნადა̈̄სგუ̂
Line of edition: 30    ზურა̄ლს ამაუ̂ დო ჲა̈რ ა̈მჴიდე!"

Line of edition: 31       ხელწიფს ხორი ეშხუ უ̂ა̈ზირ, ჟახად ხაჟხა უ̂ობურ დადა. დადად
Line of edition: 32    ხელწიფს იმედ ხა̈̄ქუ̂, ერე "ალ ზურა̄ლს ესერ ჯა ამაუ̂ ხოჴდე.
Line of edition: 33    ჯ' ე̄სერ კეცთე̄სგაუ̂ ადგენეხ, ეშხუ ბოთლიკ ბა̈ნგუ ლახუ̂ე̄მხ, ქა̄მენქა
Line of edition: 34    ხოჩა̄მდ ჩუ̄უ̂ ადლაფრეხ ი ძუღუ̂ათე̄სგა სგა̄უ̂ ადკუ̂ა̈რხ". ალა ხელწიფდ
Line of edition: 35    მა̈გ ამჟი ჩუ̂ემინ. ძუღუ̂ად დადა ჯუ̂ე̄დჲათ' ა̄დჲე, ჯუ̂ე̄დი' ა̈̄გის ეჯ კოჯს
Line of edition: 36    ხოძგა̈რ, იმუ̂ა̈̄ჲ ა̈დგილს არშუ̂ლი პატრონ დი̄ნა იზგა. უ̂ობურ დადა
Line of edition: 37    კეცხა̈ნქა ქა̄ნჴა̈დ, ყო̄რს ლახა̄გა̈ნ ამჩუ ხეხუ̂-ჭა̈შს ი ხა̈̄ქუ̂: "მათხოუ̂ა̈რ
Line of edition: 38    ხუ̂ი, მა̈დილ ჯე̄რახ, ქორთ' ა̈̄მხინდ". ალჲა̈რდ დადა ქორთ' ა̈̄დხინა.
Page of edition: 393  Line of edition: 1    დადას ბა̈ნგ შუნჟი ხუღუ̂ა. დი̄ნა̈̄ ჭაშუ̂ ალა ჩუ ლახა̈̄შ, ჭა̈შ უ̂ეშგიმჩუ
Line of edition: 2    ა̈დსიპდა ი ჩუ̂ა̈დბჷნგაუ̂ა̈̄ნ. კოჯა̈ და̈ლდ მიჩა ჭა̈შ ყო̄რ ქა̄მენჩუ ანჴიდ,
Line of edition: 3    ჩუ̂ესდე სტოლქა, ჯაჭა̈რქა მიჩა ჭაშუ̂ ჟ'ათირ: "ალ გუ̂ეშ სი უ̂ობურ
Line of edition: 4    დადად ჯაყერ. უ̂ოქუ̂რა̈ მჷსკა̈დს თხურმა̈̄შ ჯა̈ცუ̂რე. მი დადას ესუ̂ყა
Line of edition: 5    ჯუ̂ე̄დია ქუ̂ეყანათე. სამ ზაუ̂ისგა დეჲ ქა ჲა̈ს ხუ̂აგჷრგა̈ლი, დე ლი̄ცუ̂ს
Line of edition: 6    ჲა̈რ მოშ მითხფე".

Line of edition: 7       უ̂ობურ დადად და̈ლ ხელწიფს ოთჴიდ. ხელწიფს ამზუმ მა̄მგუ̂ეშ
Line of edition: 8    ხა̈ხიადე̄ნა.

Line of edition: 9       ალ ხელწიფს მე̄რმე უ̂ა̈ზირი ხორი. ალ უ̂ა̈ზირ ხელწიფს სგა ლა̈ხღანუ̂ა̈̄ნ.
Line of edition: 10    უ̂ა̈ზირ ჩუ̂ა̈დღუ̂აჟ ი ჭყინტ ა̈ხთენა̈̄ნ. ალა ხელწიფს ათლო̄ნ,
Line of edition: 11    გეზალ ფუცხუ̂ჟი ჟ'ესლაჯა̈̄უ̂ნე ი სგა̄თკუ̂არნე ძუღუ̂ათე̄სგა. ძუღუ̂ად
Line of edition: 12    ბეფშუ̂ ჩუ მა̄დ ა̈დლაკუ̂ე ი ჯუ̂ე̄დიათ' ა̄დჲე. ალა ეჯ რიყს ხოძგა̈რ,
Line of edition: 13    ხედუ̂ა̈̄ჲ რიყს ეჯ კოჯ ხა̄გ, იმუ̂ა̈̄ჲ კოჯა̈ და̈ლა̈ ჭა̈შ ა̈რი ლჷბჷნგაუ̂ე.
Line of edition: 14    ბეფშუ̂დ ფუცხუ̂ა̈რ ჟ'ა̈ნძგუ̂იბ, გა̈ნხა̈ნ ლახა̄სდხ ღუ̂აშა̈ ჯუ̂ეგ. ეშხუ ღუ̂აშ
Line of edition: 15    ალას ხეწა̈დ. ღუ̂აშ ქა̄ჩა̈დ ბეფშუ̂თექა ი ლისუ̂ ლოხუ̂დე. ბეფშუ̂ს ჩიგარ
Line of edition: 16    აჩგუნახ. ამჟი ღუ̂აშა̈რცახა̈ნ ალ' ე̄ზა̈რთექ' ა̄ნჴა̈დ ი ღუ̂აშა̈რცახა̈ნ ლიზელა̈̄ლ
Line of edition: 17    ლა̈ჲბინე. ჯუ̂ეგ ნა̈ბოზს ქორთე ღჷრი, ბეფშუ̂ ლჷბჷნგაუ̂ა მა̄რა
Line of edition: 18    ხეწა̈დ სტოლქა. ტუ̂ეტ ლახფედე ი ჟ'ანჲა̈ცხ, ბეფშუ̂ს ათყალუ̈̄ნდა-ჲ
Line of edition: 19    გა̈ნთ' ა̄ჩა̈დ. ალას ჯა ქა ხეწა̈დ ი ხა̈̄ქუ̂ მიჩა თხუმ: "მი̄უ̂ ხუ̂ი ლჷჭა̈თ,
Line of edition: 20    მო̄დ ა̈ხუ̂შინა̄უ̂რა". ამნე̄მ ალა სგა̈̄დშინა̄უ̂რე, ყო̄რ ქა̄მენჩუ̄ნ ლჷჯე̄მი
Line of edition: 21    სარაგ ანღრი. ამნოშ უშხუ̂ა̄რე თხუ̂იმ ქა̄დბარა̄ლეხ. კოჯა̈ და̈ლა̈ ჭაშუ̂
Line of edition: 22    მა̈̄ჲ შჷყჟი ხეჲრა̈̄ნ, ალა ბეფშუ̂დ ქო̄თჭოდა̄ნე. ალას ჲორი რაშა̈ლ
Line of edition: 23    ხორი. ჟი ლახსგურდახ ი აჩა̈დხ ეჯ ხელწიფი ქუ̂ეყანათე, ხედუ̂ა̈̄ჲ ხელწიფიცახა̈ნ
Line of edition: 24    მიჩა ხეხუ̂, კოჯა̈ და̈ლ, ა̈რი. დი̄ნას ხელწიფიცახა̈ნ სემი ზა̈ჲ
Line of edition: 25    ხა̄რ. ალ სამ ზაუ̂ისგა დეჲ ლი̄ცუ̂ ხა̄თხფა, დეჲ ქა იშა̈შდ ხოგჷრგალა.

Line of edition: 26       და̈ლა̈ ჭა̈შ ხელწიფს ყო̄რს ლახა̄გა̈ნ. მიჩა ხახუ̂ ქა ხეწა̈დ ი მჷსკა̈დ
Line of edition: 27    ლაჴუ̂რაისგ' ო̄თკუ̂ა̈რ. ხახუ̂ემ ლი̄ცუ̂ი გჷრჰჷ̄ნს ხაჴიდ. ამი̄ ლი̄ცუ̂ნა̈̄ლ
Line of edition: 28    ხელწიფს ათხი̄დჷნ. ხელწიფდ ბა̄ზი̄შდ ადნა̈შნე და̈ლა̈ ლიგურგუნე.
Line of edition: 29    ქა̈̄წსე ხუ̂ა̈ჲ მა̄რე. შუკუ̂ს ესღჷრდახ ლაგურგუნა̄ლთე, ალ დრო̈უ̂ჟი
Line of edition: 30    სგუ̂ებნე ჭა̈შ ჟი ლახსგურდა მიჩა რა̈შს. ხა̈ლხ ჟიქა̄ნქა ათსკინა̈̄უ̂ნე,
Line of edition: 31    მიჩა ხეხუ̂, კოჯა̈ და̈ლ, ჟი იყირ რა̈შთეჟი ი ეშ ლახქარუ̂ე ა̈გითე.

Line of edition: 32       ათხანღო ხელწიფ აჯაღ აზზი მეჩი უ̂ობურ დადას. ხეკუ̂ეს ერე
Line of edition: 33    უ̂ეშგდ ა̈ნტჷხას კოჯა̈ და̈ლ. მე̄რმა̄მ ლი̄ზიჟი ყო̄რს ლახა̄გა̈ნ კოჯა̈
Line of edition: 34    და̈ლს ი მიჩა ჭაშუ̂ ი ხა̈̄ქუ̂: "მათხოუ̂ა̈რ ესერ ლი, მა̈დილუ ხე̄რახ, ი
Line of edition: 35    სგა̄უ̂ ა̈დხინხ". ხეხუ̂-ჭა̈შდ უ̂ობურ დადას სგა̄ხფხიჭეხ, ჟ'ა̈ნკულთხნეხ
Line of edition: 36    ი ძუღუ̂ათ' ა̄დკუ̂ა̈რხ.

Line of edition: 37       ხეხუ̂-ჭა̈შდ ათხანღო ხოჩა ლირდე-ლიზგ' ა̈̄დჴიდხ ი ლჷმზჷრე̄უ̂
Line of edition: 38    ლიშდ.



Page of edition: 394 
Line of edition: 1 
ლენჯერული
Next part


This text is part of the TITUS edition of Svan Prose Texts I (Upper Bal).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.