TITUS
Svan Prose Texts II (Lower Bal)
Part No. 82
Previous part

Text: 82 
Page of edition: 172 
Line of edition: 14 
LXXXII. ყარამან


Line of edition: 15       ეშხუ ხეხვ-ჭა̈შ ა̈რიხ ი ლა̈იდ ეჯჟი მალტა̈რ ლიხ, ერე გუნ. ალის,
Line of edition: 16    ღვაჟმარა, ხაშხა ყარამან. ალი ჩი ლადეღ ხაყლე მიჩა ხახვ: -- ეზერ
Line of edition: 17    ესერ მარე მადე ლია?

Line of edition: 18       -- ეზერ ესერ, მარე...

Line of edition: 19       -- მარ' ესერ მა̈? -- ი

Line of edition: 20       -- მ' ესერ ი სურუ ესერ მეშხე ლი.

Line of edition: 21       -- 'აჰ, სურუ ესერ მეშხე ე ლი...

Line of edition: 22       ჰამს ანჷგა̈ნ ი აჩა̈დ ამიშ ლა̈მშედრალთე.

Line of edition: 23       ესხრი, ესხრი ი, ჩიგარ ესღჷრდ', ეჯ შუკვს მად' აჩა̈დ ი მერმა
Line of edition: 24    შუკვს აჩა̈დ ი ამეჩუ ტობ ლჷგ. ლა̈ჲშვემ. მჷჯრა ჟ'ოსყირ, თეფ
Line of edition: 25    ჟ'ოსრეკ. ამჟი ანჴა̈დ მეშხე მაღლავ. ამხენჩუ ჩუ ხაძგერ ტობჩუ ი
Line of edition: 26    ეჩხენჟი თეთნემ (\ თეთნემდ) ანსკინე.
Line of edition: 27    -- ჸეჰ, ლჷკჩ' ესერ მიჩა ბედ, ალი მიჩ ესერი ამჟი ხეყრენი!
Line of edition: 28    ქა̈დშყუჟურა̈ნ, ხაჩეჩხ ამხენჩუ, ანტა̈ხ მერმახენჟი ი თეთნა
Line of edition: 29    სიმაქდ ესპჷდ. ხელწიფხეშ მონა̈დიროლ აღრიხ ათხე ამელექვა,
Line of edition: 30    ხელწიფხეშ გეზალ ისგა ხონჴრიხ. ჩვადირმხ ალი ამეჩუ ი გუნ ხოჩა
Line of edition: 31    სიმაქ ლი ი ისგადჲეხ ქორთე ი ხელწიფხეშ გეზლა̈შ ხახვდ ეს'ედინხ.
Line of edition: 32    ამეჩუ ალის ახთაუნ სემი ნაღვჟურგეზალ.

Line of edition: 33       ა̈ნსკორე, ერე -- ჲა̈ს ხოგზელი ამეჩულა, ჲა̈ს ხოზ ლა̈შდრალდ
Line of edition: 34    -- ი ქანტა̈ხ ტობთე. ადსკინე ნა̈სკინჩუ ი ანტა̈ხ მერმახენჟი ი ჭა̈გდ
Line of edition: 35    ესპჷდ თეთნე. ამეჩულა ქვეყანა̈შ ჲელტა̈. ამის ხაღვიჭ. ხელწიფხეშ
Line of edition: 36    გაზიმდ ლი ი ამარე ჯჷლყჷს ხეჩდა. სემი ზა̈ ჟ'ახად ი სემი ყვარილ
Line of edition: 37    ანთავე.

Page of edition: 173 
Line of edition: 1       ა̈ნსკორე -- ჲა̈ს ესერ ხოგზელი -- ი ქაიდ ატა̈ხ ტობთე. ადა̈იდ
Line of edition: 2    ხამგერიდ აშხვხენჩუ ი ანტა̈ხ მერმახენჟი ჟი ი თეთნა ჯუად ესპჷდ,
Line of edition: 3    ამეჩუ ცა და ქვეყანა̈შ ჟეღ ამის ხაღვიჭ მა̈გ. ჩვა̈დჷნშდექივ, აღვე
Line of edition: 4    მა̈ ირივ. ჩვა̈დზა̈[ნ] ი სემი ანთავე ფეკვნა, ხვირ მა̈გ.

Line of edition: 5       ა̈ნსკორე ადა̈იდ, -- იშ' ესერ ჟეღრე ლაჯვანალდ ომსედ, -- ი
Line of edition: 6    ატა̈ხიდ ტობთექა: -- ჰედ ესერ მოლე ა̈ხფა̈სი, მადეჲ ჩვადტაგრისგ.

Line of edition: 7       ხაძგერ აშხვხენჩუ ი ანტა̈ხ მერმახენჟი ი ჩიგარიშდ ხოშა მეშხე
Line of edition: 8    მარე ანტა̈ხ.

Line of edition: 9       ახაგა̈ნ ქორთე ათხე ი თეფ ი მჯჷრა შჷნ (\ შინ) ლაირმ. ამეჩუ
Line of edition: 10    ხოყა̈რხ ადა̈იდ. ხეწა̈დ მიჩა ხეხვ ი კილს ლახყევანე ი ლესგდიდ ჟი
Line of edition: 11    ლჷქა̈დ ხარ.

Line of edition: 12       ამ დრევჟი ხელწიფხედ აფიშვდ არა̈ბ, ერე: -- მიჩა სამ გეზალს
Line of edition: 13    ესერ ა̈წვილე ი, ერვ' ესერ ლემსგურ სალჯაბს ჟ'ანფუ̈ნისგ, ეჯის
Line of edition: 14    ესერ ხაჰვდი.

Line of edition: 15       ესხრი ქვეყანა̈შ ხოჩა მარე მა̈გ აშთე ი ლა̈ჲსკორე ამნემ: --
Line of edition: 16    მიჩეშდ ესერ ხოშა გაჭირება ჲა̈ს ხოჰია ი ჯ' ესეროღვი აჩა̈დ!

Line of edition: 17       აჩა̈დ ჯიეი (\ ჯეი) ი ლჷც ახაგა̈ნ ხოშა ი ამექა ქა დეშ ღჷრი.
Line of edition: 18    ლახასდხ სემი ლჷჩაჟუ ი [აშხვ ხა̈ქვე]: -- ჟიოღვ ლა̈ჲქაბუნე ი
Line of edition: 19    ქოღვ ადჲე ემექა (\ ამექა)!

Line of edition: 20       ამნემ ადწერალე ი ჩვაცვირ ამეჩუ. მერმა ხა̈ქვე ი უარესდ ამნემ
Line of edition: 21    ადწერალე ი მადე ლა̈ჲქაბუნე ჟი. მესმემ ჟი ლა̈ჲქაბუნე ი ეჩხენ
Line of edition: 22    ჩვესგენე. ადჰიე (\ ათიე) შომაუნღვე ისგა ი ქვეყანა̈შ გენერა̈ლ ი
Line of edition: 23    მარე ალა̈რს ხემბუა̈ლ, სალჯაბა̈რს, მარე და̈რმოშ აფუ̈ნე ჟი. ათხე
Line of edition: 24    ა̈ხცჷერა̈ნ ისგა ამთეჲსგა, ემოშ როქ ოჰიესგ ისგა. შომალე ანჰიე
Line of edition: 25    ისგა ი ლა̈ხჭედივ ამეჩუ ალა̈რს: -- ხუღვ' ესერ მა ამეჩუ ამიშ
Line of edition: 26    ლიმბუა̈ლიშ ნა̈ბ?

Line of edition: 27       ამეჩუ მა̈გ ალის ხოჯლიკი ი ხეცვნა̈ლ.
Line of edition: 28    ხელწიფხედ ხა̈ქვე: -- ქოვ ახჷმბავნეხ, შეიძლებ' ესერ ნა̈ჭირ
Line of edition: 29    ლესეს. ქ' ესერ ჲა̈რ ლაჰედნე, მარ' ეჯღაჲ.

Line of edition: 30       ათხე ლახაგა̈ნ თხუმხენ ალ სალჯაბს ი მიჩა გაჭირება მა̈გ ქოხუმბავე.
Line of edition: 31    ალი ი ალი ქახშდიხ ი ალ სალჯაბ ჟ'ა̈ნფუ̈ნა̈ნ ი ქა̈მინჩუ
Line of edition: 32    ანჴა̈დ.

Line of edition: 33       ქახშჷმ მიჩა თხუმ გეზალს ი ხელწიფხეშ თხვიმ გეზალ ამის
Line of edition: 34    ლახემხ. ლახაგა̈ნ მერმა სალჯაბს ი ამის მიჩა მერმე გაჭირება
Line of edition: 35    (თეთნე ჭა̈გდ ლისპე) ოხუმბავე. ალი ქახშდიხ, ჟ'ა̈ნფუ̈ნა̈ნ ალ
Line of edition: 36    სალჯაბი ი მანესგჷრე გეზალ ამიშ ნენსგა̈შ ნაღვჟურგეზალს
Line of edition: 37    ლახემ.

Page of edition: 174 
Line of edition: 1       აჩა̈დ მესმა სალჯაბთექა ი ამის მიჩა მესმე გაჭირება (ჯუად
Line of edition: 2    ლისპე) ოხუმბავე ი ალიი ჟ'ა̈ნფუნა̈ნ ი მიჩა მანესგჷრა გეზალს
Line of edition: 3    ქა̈ხშჷმ ი მაჰრენ დინაგეზალ ამის ოსმეზრე.

Line of edition: 4       ათხე სერ ქორთ' ანჴა̈დხ, მუ ისგა̈ნტიხხ ი ხოჩა ლირდ'
Line of edition: 5    ადჴიდხ.


Line of edition: 6 
შიო ცალანი. ლანტელი. მ.ქალდანმა. 24.VII.1954



Next part


This text is part of the TITUS edition of Svan Prose Texts II (Lower Bal).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.