TITUS
Svan Prose Texts II (Lower Bal)
Part No. 83
Previous part

Text: 83 
Page of edition: 174 
Line of edition: 7 
LXXXIII. ჲელბათჷრ


Line of edition: 8       იმეგ ა̈რი ეშხუ მარე. ღერმათ ი მარა ჩი ხეჴგრა̈ლ ხახვ. სოფელ
Line of edition: 9    ლჷზერთექა აჩა̈დ, ხა̈ქვე სოფელს: -- ხახვ ხვეჴჷრა̈ლ ჩი.

Line of edition: 10       ეშხუ მარემ [ხა̈ქვე]: -- მიჩეშთოღ აჩა̈დ. ეშდორი ხორი მიჩ
Line of edition: 11    დინაგეზალ. ჲერვა როქ ხოცხონეს, ეჯი აშოღ ა̈ნთიშ.

Line of edition: 12       აჩა̈დ ათხე ი მაჰრენე ქა̈ნთიშ, ქორთ' ა̈ნჴიდ. ჩვა̈დღანვა̈ნ. გეზალ
Line of edition: 13    ქანთავე, ღვეშგმავ ქანთავე ი სგებნავ ჩვადირტყვ. ათხე ხოლა
Line of edition: 14    გუჟ' ადჷრდა ალ მარე. აჩა̈ღ ადა̈იდ სოფელ ლჷზერთე: -- ა სოფელ
Line of edition: 15    ლჷზერ! მა̈ ჩვემნე, ხოჩა სოფელ ლჷზერ, მიშგვა ხახვემ გეზალ
Line of edition: 16    ღვეშგმავ ქანთავე ი სგებნავ ჩვადირტყვ?

Line of edition: 17       ათხე ხა̈ქვ' აშხვ მარემ: -- ჲაღვე, ამის ჯი როქ ოსთვენისგ. შომა
Line of edition: 18    ჩვა̈დღანვენეს, ეჩქას ჟიბე ატაჟაჟი ათყვინ, ეშხუ პოლ ჟ'ოხოკდ,
Line of edition: 19    სი ჩუქვაქალისგა ჩოოდარა̈ჯ. ეჯი გეზალს ქანთა̈ვისგ, ეჩქას ჩოხშყედსი
Line of edition: 20    ეჩელექვა, სი ჟ'ა̈ხიკდ ი ათხა̈ ჯოდიათე, მიჩა დის ნომა ხაწონა.

Line of edition: 21       ჟ'ა̈ნკიდ ამნემ, კალთა̈ს ლა̈ჲჭენ, ჩა̈ჟ ხორი, გა̈ბუდა ხაშხა, ამის
Line of edition: 22    ჟი ლახსგურდა ი ადაე ეჯგვა̈რ ა̈დგილს, ერე ჩაჟვემ ლაზ ოდე ლა̈სვ,
Line of edition: 23    ეჩქად ჩაჟვშვ [ესღჷრდა], ეჩქანღო ჩაჟვ ჩოხქა̈ხ, ათხე ჭჷშხშვ ესღრი.
Line of edition: 24    ამეჩუ ლახ ა̈ხფა̈შ ი დეშ ხა̈მედა ლიბა̈ჴი, ლა̈ხბურგა̈ნ მეჴრას ჩინჩვილს:
Line of edition: 25    -- ხოშა ღერმეთ, ამის ჯინემ როქ ქვინუღ ლახცვირ, გიმჟი
Line of edition: 26    მა̈ არდეს, ჩინი მენწირ[ოღ ახფასე], -- ლა̈ხბურგა̈ნ ი ჟ'ადკვა̈რ
Line of edition: 27    კოჯა̈რჟი. ჩვაცვირ ალი ამეჩუ. ალ მარე ქორთ' ანჴა̈დ.

Line of edition: 28       მიჩა გეზალს ჲელბათჷრ ხაჟხა. ეჯგვა̈რ ა̈ხფას ამის, ეჯგვა̈რ
Line of edition: 29    ა̈ხფას, ერე ქვეყანაჟი ამგვა̈რ მარე მადმ' ა̈რი. მოლე ხა̈ნ აჩა̈დ.
Line of edition: 30    ეჩქას მიჩა მუდ რა̈ქვე, ერე: "ათხე როქ ჯი მიჩა გეზალთე დემ
Line of edition: 31    ადრინე, ეჯურ როქ დემ იგნი". ჩა̈ჟ ხორი, ამის ლახსგურდა ი
Line of edition: 32    ესღრი, ვოდე ჩაჟვემ შუკვ ლი, ეჩქად ჩაჟვშვ ესღრი. ჩაჟვემ შუკვ
Line of edition: 33    ჩოთშდა̈ხ, ეჩქას ჩოხქა̈ხ ი ჭჷშხშვ ესღრი. ხეწა̈დ ალი, ჲელბათჷრ:
Line of edition: 34    -- დიდა̈ბუღ ათჴედა ღერმათ! ამსვალდჷნქა მა̈გ მიწვა ლესწირდ ი
Line of edition: 35    ჩი ხვა̈წნენა, ათხე ამსვალდს ხვეწდ, ამისი ჩოთწინი.

Line of edition: 36       მიჩა მუ ხეწა̈დ, მიჩა მუდ ხა̈ქვე: -- ბუა̈შ თერაჯო, ხონკი ანჴედ
Line of edition: 37    მიშგვათელისგა, ოდო ისგვა სეუდშვ გვი მიხპენი.

Page of edition: 175 
Line of edition: 1       ათხე ა̈ნსკორე ამნემ, ჲელბათჷრდ: -- ე, იმღა მაყლე ბუას, ა
Line of edition: 2    ჩოცხირე ჩიქი, ეჩქანღო ეჯღაჲ ჟი ხვეჰელი ამიშ ლა̈ნწირს.

Line of edition: 3       სგანჴა̈დ მიჩა მუეშთელისგა, ლა̈ხყაჰა̈ნ მიჩა მუ. ათხე ლა̈ხჭედივ
Line of edition: 4    ჲელბათჷრ მიჩა მუს: -- იმღა როქ ხაყლე მიჩა გეზალს?

Line of edition: 5       -- იმღა ი, -- ქოხომბავე მა̈გ, ერე, -- ამჟი ლა̈სვ, ამჟი. ისგვა
Line of edition: 6    დიდ მა̈ნკუ ქაჲთავე, ეჩქანღო ჩვაჯირტყვ, ეჩქას ამჟი, ამჟი ჩვემნ
Line of edition: 7    მი, -- მა̈გ ქოხომბავე. ხა̈ქვე ჲელბათჷრდ მიჩა მუს: -- ჲაღვე, ათხე
Line of edition: 8    ქორთე ლჷჩედდ.

Line of edition: 9       -- ა მა̈დილ ჯერი, ბუა̈შ თერაჯო, ქორთე დეშ ჯინჴრინე სი,
Line of edition: 10    ოდო ეჩქას ისგვა დი ადა̈იდ ჩვად ჯურტყვი.

Line of edition: 11       ალი მადე ჩემინ, ეჯღაჲ ქორთე ლიზი ხაკუ. ანღრიხ ქორთე
Line of edition: 12    აშხუდ. ამეჩუ მიჩა დი ყორჟი ლჷგ. ხეწა̈დ ათხე მიჩა გეზალს ი:

Line of edition: 13       -- ა მა̈დილ ხერი, ხონკი ანჴეს მიჩეშთეჲსგა, ოდო გვი ხოხპენი
Line of edition: 14    მიჩა სეუდშვ.

Line of edition: 15       ათხე ისგაჷჴა̈დ მიჩეშთეჲსჷა. -- ხეყჰა̈ლ ესერ მიჩა გეზალს, --
Line of edition: 16    ეჩქას ჩვადირტყვ. ლერსგვენ ში ჟიბოვ ლა̈ხსა̈დ. ანჴა̈დ ი ეჩქას ლერსგვენ
Line of edition: 17    შივშ ყიას ლოხთილ, ჟ'ახკვარნე მიჩა თხვიმ. ათხე ლა̈ხბურგა̈ნ
Line of edition: 18    მეჴრას ი სოფელ ლჷზერთექა ადჲე, ხა̈ქვე სოფელ ლჷზერს, ერე:

Line of edition: 19       -- ხოჩა ლჷზერ სოფელ, გეზლა̈შ მურტყვი დი ჯირიხ ჲა̈სა?

Line of edition: 20       -- მიჩ ესერ ნომოვ ხორდა, ოდო მინს ესერ და̈ს ხორიხ. 20

Line of edition: 21       -- ჲაღვე 'სერ მიჩი მადე ხაკუჩ.

Line of edition: 22       ლა̈ხბურგა̈ნ მეჴრას ი ლჷცთე ადკვა̈რ. ჩვა̈რიხ მიჩა მუ ი ჯი გარ
Line of edition: 23    ქორლისგა. ათხე მიჩა მუს ხა̈ქვე, ერე:

Line of edition: 24       -- ე ბუა, ათხე მი ლა̈ჩიჟალთე ღური.

Line of edition: 25       -- აღვე, ლა̈ჩიჟალთე ე ღჷრი, მიშგვა ჩაჟვ ახსგურდ, დეცე
Line of edition: 26    ჴომ ლეჟა მერაშალ ლახ ხეწე, ეჩქას მიშგვა ჩაჟვ ლა̈ხჭედ, ეჯი ქა
Line of edition: 27    ჯექინე.

Line of edition: 28       ჟ'ახსგურდა ამ ჩაჟვ, ესღრი ი ვობა̈შ ადა̈ზინე. ამეჩუ ა̈თსგიდივ
Line of edition: 29    დეცე ჴომთე ი მერა ხეწა̈დ. ჩაჟვ ალაგვა ხაშხა.

Line of edition: 30       -- ალაგვა, ამ დეცე ჴომხენ მერე იწენი, ალი მა̈ ირი?

Line of edition: 31       -- ალი ვერზმეკ მარე, მიჩა მუხვხე რა̈ჭიკავ, მიჩა მუხვბე სოსრუღ
Line of edition: 32    (\ სოსრუყვ), ეჯა̈რ ანღრიხ.

Line of edition: 33       -- ათხე იმჟი ხეჩენი გვიშგე გეშ?

Line of edition: 34       -- იმჟი ი მჷკლიდ ლიბა̈ჴის ოხბინისგ, სი ხოლა გუჟი ხარდ!
Line of edition: 35    ამჟი უშხვარ ლახხვიდხ.

Line of edition: 36       -- ხოჩა ლადეღ -- ხა̈ქვე იელბათჷრდ ალა̈რს, -- იმთე როქ
Line of edition: 37    ესღრიხ, მინ'ოღ მა̈ზიგ ლახჴედა?

Page of edition: 176 
Line of edition: 1       -- იმთე როქვ ი ლა̈თხვართე.

Line of edition: 2       -- ჲაღო მიჩი დო როქ ინჴრინეხ!

Line of edition: 3       -- იმღა როქ მადე, აშოღ როქ ანჴა̈დ.

Line of edition: 4       ესღრიხ ათხე ხოშა მინდორ ლეჟა. ამეჩუ აშხვ მინდორლისგა
Line of edition: 5    ხა̈ქვეხ ჲელბათჷრს: "ჯინემ ამეჩუ სადგემუღ ანსყე". ლა̈ხბურგა̈ნ
Line of edition: 6    ათხე ნენზა̈რს, ლახყვიფ ნენზა̈რ ი უშხვარ ლახჭიდ, სადგემ ანსყე
Line of edition: 7    ლა̈იდ ეზერ.

Line of edition: 8       ალა̈რ: -- მინ როქ ბა̈ზი ლა̈თხვართე ღჷრიხ ი ნა̈თხროლს როქ
Line of edition: 9    ა̈ნჴდეხ.

Line of edition: 10       ჲელბათჷრდ რა̈ქვე: -- ხოშა როქ ღერმეთ, ეჯგვა̈რ როქ (\ როქოღ)
Line of edition: 11    ადმჷხე, ერე ვერზმეკს ი მიჩა ლახვბას ქვინ ვენდ ა̈თსეხ ი
Line of edition: 12    ნა̈თხვრა ნომაგეშ ხეკარქეხ.

Line of edition: 13       ანჴა̈დ ალ ჲელბათჷრ, აჩა̈დ, ვოშთხ ლიხ ი ვოშთხ ღვაშ იდგა̈რალი
Line of edition: 14    სადგემთეჲსგ' ანჴიდ მა̈გ. ამეჩუ ბა̈ზი ხა̈რჯ ანსყე ხოჩა. ვერზმეკ
Line of edition: 15    ი მიჩა ლახვბა, მა̈ჲ ხოგხ ქვინ, მა̈ჲ მადე, ეჯჟი ანტა̈ხხ. ალის
Line of edition: 16    ხა̈რჯ ლჷმარე ხარ. ლა̈ხჭედივხ ვერზმეკ ი მიჩა ლახვბა: -- იმხენ
Line of edition: 17    როქ ოხჴიდა ალ ღვაშა̈რ?

Line of edition: 18       -- იმხენ როქ ი ზექრე ომჩედელი ი ეჩქას როქ ამუგ ომჴედელიხ,
Line of edition: 19    ეჩქას როქ ჩოთდაგრა. ალი როქ ლი, იშგენ მამაგეშ.

Line of edition: 20       ათხე ჩვა̈დხარჯა̈ნხ, ხა̈ქვეხ ჲელბათჷრს, ერე: "ჩაჟა̈რს სგოღ ლა̈ხჭა̈მ
Line of edition: 21    ლალდა̈ღს!" ალა̈რ ჩვადყურდახ. ეჩქა ჲელბათჷრ ჟ'ახსგურდა
Line of edition: 22    მიჩა ჩაჟვ, აჩა̈დ. ხა̈ქვე მიჩა ჩაჟვ, ერე: -- ა ალაგვა, ასავლეთი-
Line of edition: 23    დასავლეთი{შ} უშხვარ ნენსგა კოჯლისგა ჲელტა̈ ბერჟემ ნაჭოშ ჩუ
Line of edition: 24    ხა̈ბ, ეჯის ჯჷლყჷ ხაჟა. ეშთეჲსგა დემ ოლღრინედ, ეჯურ დემეგ
Line of edition: 25    გვეჩვმინი (უნდა: გვაშიდ).

Line of edition: 26       ეჩქას ჩაჟვემ ხა̈ქვე: -- ეშთეჲსგა და̈სმოშ ხოზნა, ნა̈ იმეგ ოლღრინედ?

Line of edition: 27       -- ეჯგვა̈ მა̈ ირი, ეჯღაი მამა გვეჩვმინი უზად.

Line of edition: 28       -- ჲაღვე ეჩქას ძგიდთეჲსგ' ოლღრინედ, -- ეჩქას ქუნ იყერ
Line of edition: 29    ამსვალდა̈შ ჲელტა̈, ეჯგვა̈რს თჷრტნი, ერე კოჯ ჩუ ბეჭკვნი:

Line of edition: 30       -- სემი თხუმ ლექკა, სემი ფოყა̈რ ლექვა მჷრდა̈ჴ მაჴდ, ეჩქას მი ჩუ
Line of edition: 31    ხვა̈სკნე ეჩელექვა. ეჩქა ჲელტა̈ ჟი ხა̈ქვცე ნაჭას ი მი მიჩა ჯჷლყჷს
Line of edition: 32    ჟი ჴვიდე.

Line of edition: 33       ამჟი ჩემინხ ალი. ათხე ბჷრგჷნ ხარხ ჩაჟა̈რს. ლა̈ხჭედივ რა̈ჭიყავ: --
Line of edition: 34    მა̈ როქ ამბა̈ვ ლიზ, იმღა როქ ბჷრგნიხ ამჟი?

Line of edition: 35       -- იმღა როქ ი მა̈ბზა̈რ ლიხ ი იშდრა̈ლხ.

Line of edition: 36       ჰამს ჟ'ანჷგა̈ნ რა̈ჭიყავ, ხეწა̈დ ალ ჯჷლყჷს, ხოშა მინდორ გეში
Line of edition: 37    ლი, ლა̈ხჭედივ ჲელბათჷრს: -- იმხენ როქ ომჴედელ' ალიმა̈გ ჯჷლყჷ?

Page of edition: 177 
Line of edition: 1       -- ეჯი როქ მიჩა გეშ მადმა ლი. მიჩ როქ სგოხჴიდა, ჯინემ
Line of edition: 2    ჩოღ ადჷთალე.

Line of edition: 3       ამნემ, რა̈ჭიყავდ, ხა̈ქვე: -- იმჟი როქ ადჷთალას, ჭჷშხ როქ
Line of edition: 4    ლოხბერგი, წარბხანს მა̈ჴდე: შდჷმ ლოხბერგი, ა̈მჴეფნი.

Line of edition: 5       დეშ ადჷთალე. ანჴა̈დ ჲელბათჷრ, ხებერგ' აშხვ ჭჷშხ ი აშხვთე
Line of edition: 6    აკვანე, მერმა ჭჷშხ ხებერგი, მერმათე აკვანე. ამჟი ჩვადჷთალე. სემი
Line of edition: 7    ნა̈თი ეჯა̈რს ლახემ, სემი ლახვბა ლიხ, მევშთხვე ნა̈თი ჯინემ ესყედინ.

Line of edition: 8       -- მინე ნა̈თი ა̈ეხუღ, მიჩა ნა̈თის როქ ჯ' ა̈ისგ.

Line of edition: 9       ათხე სოსრუღდ ხა̈ქვე ჲელბათჷრს: -- იმხენ როქ ოჴიდა, ეჯი
Line of edition: 10    ქოღ ხა̈ქვე, მიჩა როქ ნა̈თის ქა ხა̈ტხე.

Line of edition: 11       -- ჲაღვე როქ მიჩა ნა̈თი მადე ხაკუ, მიჩ როქ დინაგეზალ ხორი
Line of edition: 12    ბაბრუნდიშ მურყვამჟი მიჟ-დოშდლა̈შ უწდუნა, ეჯი მიჩ ხახვდ
Line of edition: 13    ქოღ ლახემ. მიჩა როქ ნა̈თის ნაჭვლაშდ ხაჰვდი, ალა̈რ როქ იმხენ
Line of edition: 14    ოხჴიღა, ეჯის როქი ქა ხაყლე.

Line of edition: 15       ათხე ჩვა̈დრიგვა̈ნხ. ჲელხათჷრდ მიჩა ნა̈თი ნაჭვლაშდ ქა ლახემ,
Line of edition: 16    ჯჷლყჷ იმხენ ანჴიდ, ალი ქა ხა̈ქვე. ათხე ხა̈ქვე ჲელბათიჷრს: "ამ
Line of edition: 17    ლადეღ ანჴედ ნიშგეშთე ი ისგვა ხახვ ქა ლაჯჰედნე".

Line of edition: 18       ლადეღ ოსკა̄ცხ. ჲელბათჷრ ქორთე ანჴა̈დ, მიჩა მუს ხა̈ქვე:
Line of edition: 19    -- ბუა, მი ვერზმეკს, სოსრუღს ი რა̈ჭიყავს ოსჩიჟენ.
Line of edition: 20    -- ალი ხოჩა, ბუაღო, მარე ეჯის ეჯჷვა̈რ ჯიმილ ხორი, ისგვა
Line of edition: 21    ლა̈რმითე ა̈ნიზინი.

Line of edition: 22       ათხე ახსგურდა ჩაჟვ, ეშდორი მარე ლა̈ჲჴერნე, ესღრი. ამეჩუ
Line of edition: 23    ა̈თსგიდივ დეცე ჴომთე, მერაშალ ხეწა̈დ. ლა̈ხჭედივ მიჩა ჩაჟვ:
Line of edition: 24    -- ამეჩუ ჷერაშალ იწენი, ალი მა̈ ირი?

Line of edition: 25       -- ალი ისგვა ხახვემ ჯიმილ ანღრი ისჷვა ლა̈რმითე.,

Line of edition: 26       -- აღვე ათხე იმჟი ხეჩენი?

Line of edition: 27       -- იმჟი ი მი მჷკლიდ ლიბა̈ჴის ოთბინისგ, სი ხოლა გუჟი ხარდ.

Line of edition: 28       ამჟი უშხვარ ლახხვიდხ. -- ხოჩა ლაღეღ! -- ხა̈ქვე ჲელბათჷრდ:
Line of edition: 29    -- იმთე როქ ესღრი, ხოჩა მარე?

Line of edition: 30       -- იმთე როქ ოსღრი ი იმგვალეგ როქ ა̈რი ჲლბათჷრ, ეჩა
Line of edition: 31    ლა̈რმითე.

Line of edition: 32       -- ალა̈რ როქ მა̈ ხარ მარქვა̈რ (ლაბერკლა \ ბერკლა̈რ)?

Line of edition: 33       -- მა̈ ი ჲელბათჷრიშ ლაბერკლა.

Line of edition: 34       -- ჲაღვე როქ, მა̈დილ ხერი, ჟ'ოღ ახთონე მიჩი.

Line of edition: 35       სგესდე შია̈რქა ჲელბათჷრს, ჭახრაგა̈რ ლოხთჷლჷრე, ეჩქას ოთსტუნივ
Line of edition: 36    ჲელბათჷრს: -- ათხე ქოღ ათკიდ!

Line of edition: 37       ქათკიდ ათხე. -- ათხე მიჩუღ ლახწონე, მა̈დილ ხერი, მიჩ ესერ
Line of edition: 38    ხოხალდესუ მა?

Page of edition: 178 
Line of edition: 1       ქა ლოხხელ ამნემ შია̈რ. ჲელბათჷრდ სგესდე მარქვა̈რ, ლოხთჷლჷრე
Line of edition: 2    ჭახრაგა̈რ, ფხულა̈რქა ზისხდ ლაჲსკინე (\ ანსკინე).

Line of edition: 3       -- ათხე როქ, მა̈დილ ხერი, ქოღ ათკიდ!

Line of edition: 4       -- ა, ჯი ჟაღვემ გეზალ, ჲელბათჷრ როქ ჯი ლიზ. შიშდ ათხე
Line of edition: 5    მიჩა ხეხვ ქოღ ლახემ, მადე როქი კინჩხს ჟი ხა̈ქვცე.

Line of edition: 6       -- ხონჴრივუღ ი მიჩა ხეხვს ათხე როქ ხაჰვდი.

Line of edition: 7       ა̈დჴერნე ეშდორი მარე ჲელბათჷრდ ქორთე, ეშდორი ჩაჟვემ
Line of edition: 8    ლა̈ბ ალი ბზითდ ლახემ ი მიჩა დაჩვირ თხუმ ლოხკვა̈რ ჲელბათჷრს,
Line of edition: 9    ქორთ' ანჴიდ ჲელბათჷრდ. ქვერწლობ აჩვმინ ეჯგვა̈რ, ერე მიჩა
Line of edition: 10    სამშობლო მა̈გ ქორს ხორდა.

Line of edition: 11       ოდ ეჯა̈რს ლეწედ, ეჩქად გვიშგე მარცხ-მავინ ნჷმაგეშ ომჴედელიოღ.


Line of edition: 12 
შიო ცალანი. ცალანარი. ვ. თოფურია. I.VIII.1927



Next part


This text is part of the TITUS edition of Svan Prose Texts II (Lower Bal).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.