TITUS
Svan Prose Texts II (Lower Bal)
Part No. 85
Previous part

Text: 85 
Page of edition: 181 
Line of edition: 5 
LXXXV. ალექსინდრე ი და̈ვით


Line of edition: 6       იმეგ ა̈რიხ ხეხვ-ჭა̈შ. ალა̈რს ხორიხ ეშხუ ნაღვჟურგეზალ. ამარე
Line of edition: 7    ყორჟი ხაგ ეშხუ ჴვამ. ამის ხა̈მთქვა ეშხუ ნა̈პრულდ. ალი ჭჷრჭნი
Line of edition: 8    ჩი ჰამაშა̈რს. ალი ჩამბაჟხ მიჩა დის ი მიჩა მუს. ნაღვჟურდ ხა̈ქვე
Line of edition: 9    მიჩა დის ი მიჩა მუს: -- ალ ნა̈პრულდა̈შ ლიჭჷრჭჷნის მი ქეჲცხირხე,
Line of edition: 10    მარე სგა̈ მადმა ლა̈ჲცხენიხ.

Line of edition: 11       ათხე დიდ ი მუდ ოსცა̈ღხ: -- ჲაღვე მა̈ ლესეს, ქა რექა, ი ეჯღა
Line of edition: 12    დემის ფეშვნიდ.

Line of edition: 13       ათხე ნაღვჟურდ ხა̈ქვე: -- ალ ნა̈პრულდ ჭჷრჭნი ეჯის, ერე: "მი
Line of edition: 14    როქ მეფსი ხოჩა მარე, მიშგუ მუ როქ ლჷცემ. მუგვშე მერი, მიშჷუ
Line of edition: 15    დი პირსახოციშ მჷყდა̈ნი, ეჯგვა̈რ როქ მარე. მეფსი მი. სგა̈ როქ
Line of edition: 16    ხირიდ მიშგუ მოსიპ".

Line of edition: 17       ალი ამბა̈ვ დის ი მუს მადმა ლოხცხონხ. ანჴა̈დ მიჩა მუ: "ალ
Line of edition: 18    ნაღვჟურს ესეროღ მოლე ოხსახთეხ, ოდო გვიშგე ლირდეს ნავურდი
Line of edition: 19    ხეჩენი". ანჴა̈დ მიჩა მუ ი ნაღვჟურ ცხეკთ' ა̈დჴერნე. ნაღვჟურ გუდ
Line of edition: 20    მეჴდელი, მიჩ იმ ხეჩოხ, ეჯის, მარე მ'ოღ ხოჩვმინა̈ნ, თხუმ დეშ
Line of edition: 21    ლა̈ხშა̈დ ეჯღაჲ. აჩა̈დხ ლექჷრდა ცხეკთე. ამეჩუ მიჩა მუდ კიბდონ
Line of edition: 22    ანტაბე, ხა̈ქვე ნაღვჟურს, ერე (ამ ნაღვჟურს ხაშსა ალექსანდრე):

Line of edition: 23       -- ალექსანდრე, ბუაჯო, ამხა̈ლიდ ჭჷშხშვ ანჴედ, მარე სგამა̈ლიდ
Line of edition: 24    კიბდონშვ ჯგა̈ისგ.

Line of edition: 25       ალექსანდრეს აშ ხოხალ, იმ ხეჩო ეჯი, მარე მ'ოღ ხოჩკმინა̈ნ.
Line of edition: 26    სჷაჩა̈ღ კიბდონთეჲსგა. მიჩა მუდ ფიცრა̈რ ჟ'ეშშკა̈დ, ამჟი ჟი ლა̈იცვ.
Line of edition: 27    ესხრიხ, ი ზუღვათე აჩა̈დხ. ლა̈ჲდხიმპრინე (\ ლა̈ჲთხიმპრინე) ალ კიბდონ,
Line of edition: 28    ზუღვათეჲსგა ადკვა̈რ, ჯი ქორთ' ანტა̈ხ.

Line of edition: 29       ესხრი ეშხუ მარე, ესხრი, ესსრი ი ზუღვას ათასდ. ხეწა̈დ, ზუღვას
Line of edition: 30    კიბდონ ხუღვა ლა̈შდრალდ. ალი ქა̈ნტიხ ჯინემ, ადკარე ჩუ ი
Line of edition: 31    ამეჲსგა ეშხუ ჭაბიგვ ა̈რი. ლა̈ხჭედივ ამის: -- მა̈ როქ ამბა̈ვ ლი,
Line of edition: 32    ჰედი ჟახად მა̈ ჯაშხა (უნდა: ხაშბა)?

Line of edition: 33       -- მი მაშხა ჟახად ალექსანდრე. მა̈ დო მაყერხ, დემეგ ოთიბჟ.
Line of edition: 34    დე ნუ მაშყიდ, დე დი მაშყიდ, ამიღა მამაგვეშ მიხალ.

Line of edition: 35       ანჴა̈დ ალ მარე ი ქორთ' ადჲე. ალ მარე ლი ხელწიფხეშ ვა̈ზირ.
Line of edition: 36    ალი ლი ქა ლჷთერ სახენწიფხენქა დროებით. ბა̈ზი ხოლა გუჟი ა̈რი
Line of edition: 37    ალ მარე. ლა̈ხჭედივ ალექსანდრე: -- მა̈ ლი, ბუა, იმღა ხა̈რი ხოლა
Line of edition: 38    გუჟი?

Page of edition: 182 
Line of edition: 1       ათხე ოსცა̈დ ალ მარემ: -- იმღა მადე ხვირდი ხოლა გუჟი, სემი
Line of edition: 2    გარ ლადეღ მიკლი ვადათექა, სამ ლადეღუნღვე ლედგა̈რი ხვი.

Line of edition: 3       -- იმღა, ბუა, მა̈ ლი, ქა მექა.

Line of edition: 4       -- მა̈ ლი ი ხენწიფხეშ ყორჟი ხაგ ეშხუ ჰავლიშ მეგემ. ეჯის.
Line of edition: 5    ხა̈მთქვახ სემი ჭორა̈რ. ეჯჲა̈რ ჭჷრჭნიხ ჩი ჰამს. ეჯი ხამბაჟ ხენწიფხეს:
Line of edition: 6    "მა̈ როქ ირიხ ალ მჷჭჷრჭჷნი? იმ მერგადვნიხ ჩი ჰამაშა̈რს?"
Line of edition: 7    ხეკვეს ამარე ნინ ხოხალდეს; ეჯი მარე ოხჴჷდეხ მიჩა ვა̈ზრა̈რდ.
Line of edition: 8    ათხე, ოდო ეჯის დემ ოხჴიდედ, ლედგა̈რი ხვიდ სამ
Line of edition: 9    ლადეღუნღვე.

Line of edition: 10       ათხე ნაღვჟურდ ოსცა̈დ: -- ეჯღა სი ნომა ანფეშე, ეჯარე ნინ
Line of edition: 11    მი აშ მიხალ, ეჩსავ მი ქა̈მჴერინ.

Line of edition: 12       ალი მიჩა მუს (მუდ ლა̈ჲღვერ) ათხიდჷნ. ანჷგა̈ნხ მერმა ლადეღ
Line of edition: 13    ი აჩა̈დხ ხენწიფხეშთეჲსგა. ამეჩუ ლი ლა̈დი ლჷზრობ. ათხე ლიხ
Line of edition: 14    ლეხჷრტა̈ვი მიჩა ვა̈ზრა̈რ. ამჟი მიჩა მუდ ქანჴიდ მიჩა გეზალ
Line of edition: 15    ალექსანდრე. ლა̈დი ა̈რიხ ალ ჰავლიშ მეგამჟი სემი ჭვერ. ალა̈რ
Line of edition: 16    ჭჷრჭნიხ მეგამჟილა. ნაღვჟურდ ხა̈ქვე: -- ვო ხენწიფხე ისდგვა̈მი
Line of edition: 17    (უნდა: ისგვა̈მი), ალის მი ლახ ქა ჯექინე, მიშგვა ნაქვჟი ჩოთყურულა
Line of edition: 18    ალ ჭორა̈რ, ჰე ეჩქას იმ მიმედე?

Line of edition: 19       ეჩქას ხენწიფხედ ხა̈ქვე: -- ისგვა (\ ისდგვა) ნაქვჟი ჩვათყურულისგ,
Line of edition: 20    ეჩქას ეშხუ მიჟ-დოშდლა̈შ უწდუნა სიმაქ მირი, ეჯის ხახვდ ქა ჯაჰვდი ი
Line of edition: 21    მიშგვა მაღვა̈ნიშ ხჷნსგამ სი ჯიმტკიცა̈ვი.

Line of edition: 22       ათხე ანჴა̈დ ალ ხენწიფხე ი ამიშ პირობ ჩოსდე. ათხე ხაჭჷრჭჷნიხ
Line of edition: 23    ჭორა̈რ ნაღვჟურს, ხემბუა̈ლხ ჭორა̈რ მინე ნამშერის. ათხე
Line of edition: 24    ნაღვჟურდ ხა̈ქვე ხენწიფხეს: -- ჲაღვე, ხენწიფხე, ალა̈რ იმშერა̈ლხ
Line of edition: 25    ისგვაცახა̈ნ ამის, ერე: აშხვ ზავ ესერ ლჷმა̈რელი ბჷგიდ მა̈ჲდარობ.
Line of edition: 26    ეჩქას მიჩა დის ესერ მიჩა გეზალ შჷყლისგ' ესერ ოთცვირა. ალი
Line of edition: 27    მიჩა მუს ესერ მად' ოთცვირა, სგ' ესერ ლოხჴერნა ი ქვინ ესერ
Line of edition: 28    ოთცვირა ი ჟ' ესერ ოხჷრდა. ლა̈დ' ესერ იცლაველხ ამის: ხედას
Line of edition: 29    ესერ ხეკუთნიხ ალ გეზალ? ალ ჭორა̈რ სგურხ ჭა̈რიდ: მჷჟლაწა̈დხენ
Line of edition: 30    სგურ მუ, ნენსგაჩუ მინე გეზალ, მესმე (ჲდი) -- მჷჟლაჰვა̈რხენ.
Line of edition: 31    ათხე ჯეჭვდელხ ამის, ერე: ხედას ხეკუთნი მინე გეზალ, დის
Line of edition: 32    ხეკუთნი {ჰ}ა მუს? ამის ჯეჭვდელხ სი. ამიშ ლარგა̈დითე ანღრიხ
Line of edition: 33    აშმეიდ. ათხე ხეკვეს სი ქოთცხჷრე ალჲა̈რს: დის ხეკუთნი ა მუს?

Line of edition: 34       ანჴა̈დ ხენწიფხე, ხა̈ქვე ალი, ერე: -- ჲაღვე გეზალ მუს ხეკუთნი
Line of edition: 35    ეჯღა, ერე მუეშ ნარდევ ლი.

Line of edition: 36       ამჟი ქოთცხირ ნაღვჟურდ. ანჴა̈დხ ი მუ-გეზალ აშხვჟი ანპა̈რხ, დი
Line of edition: 37    -- მერმაჟი. მუ-გეზალ მჷჟლაწა̈დთე აჩა̈დხ, დი -- მჷჟლაჰვა̈რთე. ათხ'
Line of edition: 38    ანჴა̈დ ალ ხენწიფხე, მიჩა ტა̈ხტხენჩუ ჩვანჴა̈დ, ხა̈ქვე ალ ნაღვჟურს,

Page of edition: 183  Line of edition: 1    ერე: -- მიჩა ლიხენწიფხ მიჩეშდუღ ხომზჷრა̈ნ, მიჩა მაღვენა მა̈გ.
Line of edition: 2       მიჩა დინაგეზალ ხახვდ ლახემ.

Line of edition: 3       ათხე ნაღვჟურდ ხა̈ქვე: -- აღვე მი დეშ მა̈მედა ჩიქი ლიხენწიფხ.
Line of edition: 4    მი თელიშ ლითვრი მაკლი, ხეკვეს ეჩა ლათვრია̈რთე ოჩე,
Line of edition: 5    მი დრევს ლაჲკა̈ცნე ეჩქად ი ეჩქას ირი ლიგურგვინა̈ლ.

Line of edition: 6       ათხე ანჴა̈დ ნაღვჟურ, აჩა̈დ კესა̈რშერთე. ამეჩუ ხაყა კესა̈რს
Line of edition: 7    ლეთვრიდ. მერმა ლადეღ მიჩეშალ (\ მიჩეშშალ) ლეთვრიდ ადა̈იდ
Line of edition: 8    ანჴა̈დ ეშხუ მარე. ამის ხაშხა და̈ვით. კესა̈რს ხორი ეშხუ დინა,
Line of edition: 9    მიჟ-დოშდლა̈შ უწდუნა. ალი ლახლატჷნ ალექსანდრეს ი დინასი
Line of edition: 10    მასა̈რდ ხალა̈ტ, თხუმ უშხვარ ქა ხოცა̈დიხ. ალ დინას ალექსანდრეშ
Line of edition: 11    ნა̈ჴიდ ხა̈რჯჷნქა დეჲშა ხაკუ. ხაშგურანეხ უშხვარ, ერე: "ქა
Line of edition: 12    ნომეგოღ აკვიჰხ, ოდო ლეხჷრტა̈ვი ლიხ ჲორი ლექდა". ჩუ ლი
Line of edition: 13    ამჟი. აშხვ ლადეღ და̈ვითდ ადჲე დინათეჟი ხა̈რჯ, მარე დინად
Line of edition: 14    მადე იკდუნე. ლიგვნ' ა̈დბინე და̈ვითდ. ათხე ანჴა̈დ ალექსანდრე,
Line of edition: 15    ხა̈ქვე ამცახა̈ნ ალ დინას, ერე: -- მინს როქ ლიმხუბ ხარს უშხვარდ
Line of edition: 16    ლუქვე, უშხვრერიშ ლეწვრი-მუწვრი ლიხ, უშხვრერიშ თერრე მუღვნე
Line of edition: 17    ლიხ. ნომოღ აწნა̈ვი მიჩა ნა̈ჴიდ ხა̈რჯს.

Line of edition: 18       დრევ ოსჴა̈დ ალექსანდრეს ლიზია̈შ. ალ' ესხრი ლა̈დი ქა.
Line of edition: 19    ალექსანდრე-ჲ და̈ვით უშხვარ ხაჯეშხ, ჩუ და̈რმოშ ა̈თშინა̈ლი. ამჟი
Line of edition: 20    ანჴა̈დ მესმე მარე, ივანე, მინეშალ (\ მინეზშალ) თელიშ ლათვრითე.
Line of edition: 21    კესა̈რიშ დინა და̈ვითიშ ლჷყდინ ლი. ანჴა̈დ ალექსანდრე,
Line of edition: 22    სგანჴა̈დ მიჩა ბიძიშთეჲსგა, ლიგურგვინა̈ლ ხარს ლა̈დი. ლაგურგვინალთე
Line of edition: 23    ესხრიხ, ამჟი ხეწა̈დ ჯოდიათე ეშხუ მარა. ალექსანდრედ
Line of edition: 24    ხა̈ქვე მიჩა ქვერწლა̈რს: -- ჩოღ ოსღელივხ მოლე ხა̈ნს, მიჩ როქ ალ
Line of edition: 25    მარათე ხარ ლეზი.

Line of edition: 26       ამჟი აჩა̈დ ალექსანდრე, ხეწა̈დ ალის, ალი ლი და̈ვით, მიჩა
Line of edition: 27    მუხვბე. ხა̈ქვე და̈ვითდ: -- მა̈დილ ჯერი, ალექსანდრე, გვიშგე ლიმხუბ
Line of edition: 28    ემმა ჯანწა̈მ, ლა̈დი ა̈მმარგ აშხვ გვაშლისგა.

Line of edition: 29       -- მა̈ ლი ეჯ გვეშ, ქა დემ მაყლეა?

Line of edition: 30       ხა̈ქვე და̈ვითდ: -- აშ-აშ, ამჟი ლი. ივანე მეცლაველ კესა̈რიშ
Line of edition: 31    დინას. ლა̈დი დუელთე მეჴედ ხვიდ. მი დემეგ მა̈მედა ეჩა ლიდუველ.

Line of edition: 32       ალექსანდრედ ხა̈ქვე და̈ვითს: -- {ჲ}აღვე, და̈ვით, მიშგუ ხეხვ
Line of edition: 33    სი ა̈თგურგვინ, ნახუმსერ (\ ნახუნსერ) დეხედა ლიდ, ეჩხავ მი
Line of edition: 34    ოდრინე. მი ოხჴედნი დუელთე ივანეს, მარე ეშხუ გვეშ ლი: ლერქვა̈რ
Line of edition: 35    ჩოლცადუნად, ოდო ეჯნოშ გუდ ნო აჴეხ ეჩხენ ივანე,
Line of edition: 36    ამხენ მიშგუ ხეხვ.

Line of edition: 37       ქა̈დშყუჟურა̈ნხ, ჩვადცადუნეხ. ალექსანდრე აჩა̈დ ივანეშთე, და̈ვითდ
Line of edition: 38    მიჩა ხეხვ სგა̈დგურგვინე. ბა̈ზი უშხვარ ლოხყურდახ. ანჴა̈დ
Page of edition: 184  Line of edition: 1    და̈ვით, ლიმხუბიშ ლა̈სგდიქა დაშნა̈ მუშგვინ უშხვარ ნენსგა ლექვა
Line of edition: 2    ესდე. დემეგ ლა̈ხთალხ უშხვარ სამ ღეთ ლეთ, ეჩქად დაშნა̈ მუშგვინ
Line of edition: 3    უშხვარ ნენსგა ხოსდა. ათხე ალექსანდრე აჩა̈დ ივანეშთე. ალა̈რ
Line of edition: 4    ოხჴჷდხ უშხვარ დუელთე. ხა̈ქვე ივანედ, ერე: -- ჯინემუღ ხაჴირ.

Line of edition: 5       ალექსანდრედ ოსცა̈დ: -- ჯინემოღ ხაჴიდ.

Line of edition: 6       ესსიპე ივანედ, ხაჴიდ წიროლ, მარე თხვიმ დეშ ოხნიკვ. ესსიპე
Line of edition: 7    ალექსანდრედ ი ხაჴიდ ივანეს ი თხვიმ პა̈ნტდ ოთგენე. ათხე დინა
Line of edition: 8    მიჩეშდ ასა̈დ ი მიჩ ოსტკიცეხ ხახვდ. ხეკვეს ერე მჷხა̈რ ბა̈ზი სგა
Line of edition: 9    ა̈დგურგვინას, ამჟი ალექსანდრედ ხა̈ქვე: -- ჲაღვე მი ქორთე უგღებად
Line of edition: 10    დემეგ მაშიდ.

Line of edition: 11       მერმა ლადეღ ნა̈ბ ა̈ნკიდ ი აჩა̈დ ქორთე. ამეჩუ და̈ვითს ხა̈ქვე:
Line of edition: 12    -- ჲაღვე, და̈ვით, ლიმხუბ დეჷეგ ოგყურულა̈ნ, მი ჩოდაგრ ეჯი,
Line of edition: 13    ივანე, ი ხეხვ გვიშგეშდ ასა̈დ. ნა̈ ოგტკიცეხ. ათხე ნა̈ბ ჯუღვა, ხეკვეს
Line of edition: 14    ბა̈ზი აჩე ქორთე, ლიგურჷვინა̈ლ ბა̈ზი ჯარხ. ქა ნომა ამუშხა
Line of edition: 15    ალი. ხეკვეს ნაბა̈ნ ოლდად უშხვარ ნენსგა სვინდშვ ი ნამუსზვ ი
Line of edition: 16    ხოშა ღერთემ თა̈ჲსდებშვ ი ლიღვნაღედ უშხვრერიშ თხუმ.

Line of edition: 17       ამჟი ლერქვა̈რ ჩვა̈დცადუნეხ. და̈ვით აჩა̈დ მიჩა ქორთე, ალექსანდრე
Line of edition: 18    ანტა̈ხ მიჩა ხახვთეჲსგა. ბა̈ზი უშხვარ ლოხყურდახ, ხარს
Line of edition: 19    ლამბუალ ი ლა̈შდრალ. ხა̈ქვე მიჩა ხახვემ: -- ალექაანდრე, ლა̈დიდ
Line of edition: 20    დაშნა̈ მუშგვინ უშხვარ ნენსჷა ჷვისდა ი დემგვაშ მაყჷლ ტკიცჷნქა
Line of edition: 21    ი ლინკუდრჷნქა, ბა̈ზი მა̈ ლი, იმღა მკშდრა̈ლ?

Line of edition: 22       ათხე ალექსანდრედ მადმაგვეშმოშ ლახტის პასვიხ, ხა̈ქვე ალი,
Line of edition: 23    ერე: -- ამჟი როქ მაკფჷნ, ეჯღა.

Line of edition: 24       ათხე მიჩა ხახვ გუხოლა ათხად ამიშ ლიქვისგ, ა̈ნხირნა̈ნ ჟი.
Line of edition: 25    მერმა ლადეღ ქალა̈ქთე აჩა̈დ მიჩა ხეხვ, ა̈ნყიდ ჟაგრა̈რ, ეჯგვა̈რ
Line of edition: 26    ჟაჷრა̈რ, მარემ მუდგა̈ში. მერმა ლაღეღ ნებოზს მიჩა ხახვეს ეჯი
Line of edition: 27    ჟაგრა̈რ მიჩა ჭაშვ ესგვეშ თხუმ ლექვა უშდილ. მარად ჟ'ახქა̈დ ალექსანდრე.
Line of edition: 28    ჩუ ა̈რი ბა̈ზი, იჭირულა̈ლ (\ იჭვირულა̈ლ). ახად ათხე
Line of edition: 29    ჲორი-სემი, ვოშთხ-ვოხუშდ ზა̈, ალექსანდრეს მარემ ლესჷდიდ
Line of edition: 30    მადმა ხაყა. ალექსანდრეს ხუღვე და̈ვითიშ ხახვემ მჷსკა̈დ. ლა̈ჰისტამ
Line of edition: 31    აშხვ ლეთ ალექსანდრეს, ხა̈ქვე ეშხუ მარემ ჰისტამისგა: "ვო ალექსანდრე,
Line of edition: 32    მი ჯექინე, ეჯის ჰემოშ ხიჩო, ეჯი ირი ისგუ ჟაგრა̈რ,
Line of edition: 33    ეჩჷნქა მადმაგვეშ ჯა̈ჰვდური. ისგუ მუხვბე და̈ვითიშ გეზლირიშ ზისხშვ
Line of edition: 34    ლახა ქა ათქა̈ნი, ეჯი ჯაშიდ, იშგენ მამაგვეშ. ალი ამჟი ჯიხალდეს".

Line of edition: 35       ანჷგა̈ნ ალექსანდრე მერმა ლადეღ; მიჩა ხეხვ ი ჯი ხოლამდ ი
Line of edition: 36    ხოჩამდ ჩვა̈დყურულა̈ნხ. აჩა̈დ ალექსანდრე მიჩა ბიძი ხენწიფხეშთე,
Line of edition: 37    ქა ხამშერე მიჩა ნამშერი. ეჩქას ანჴა̈დ მიჩა ბიძი ხენწიფხე, მიჩა
Page of edition: 185  Line of edition: 1    გეზალ ჯა̈რს ესგენე თხუმხენ ლა̈შიალდ, ჩვათდაგრუნე გეზალ მიჩა.
Line of edition: 2    .ღეშგიმ ჯინემ, ხენწიფხემ. იყირ ლივერ, ეაცვირ ღეშგმავ ეშხუ
Line of edition: 3    ამბა̈ვ: -- ხემა როქ, ერე მიჩა გეზალდ ამჷვა̈რ მეცნიერ ჭა̈შ ჩუ
Line of edition: 4    ადდავშე!

Line of edition: 5       ათხ' ანჴა̈დ ალექსანდრე, აჩა̈დ მიჩა მუხვბე და̈ვითიშთე, სგაჲ
Line of edition: 6    აჩა̈დ მიჩა ჰა̈ზვთელისგა (\ ჰა̈ზვთელისდგა). ალექსანდრეს ლა̈ღი ჩუ
Line of edition: 7    და̈რმოშ თერ, აშ აწქუნე წოლირშვ ი შალა̈რშვ. ჩვესგურდა და̈ვითიშ
Line of edition: 8    მინდორლისგა. და̈ვით ი მიჩა ხეხვ, თამარ, - ჩალდყიშ თხუმ
Line of edition: 9    სგურხ.

Line of edition: 10       ალექსანდრედ ხა̈ქვე მიჩა ვა̈ზირს: -- მა̈თილ ესერუღ ხჷრი,
Line of edition: 11    ჟ'ოღ ა̈თცად და̈ვითიშთე, ალექსანღრეშ თერა̈როღ ათღუნავა̈ე,
Line of edition: 12    ერე ამეჩუ როქ ემხუ მარ' ა̈რი, ალი ჷ'ოღ ა̈ნჴერნეხ ჩალდყიშ
Line of edition: 13    ჴომთე.

Line of edition: 14       ამჟი ჟ'აჩა̈დ ეშხუ მარე, ხა̈ქვე და̈ვითს ალექსანღრეშ ნაჰვ, და̈ვით
Line of edition: 15    ჟ'ოხპა̈რ, ჩოთთონე მიჩა ვა̈ზრა̈რს. ვა̈ზრა̈რ მიჩა ჩუ აჩა̈დხ,
Line of edition: 16    ჟ'ა̈ნჴერნეხ ალექსანდრე, ჩალდყიშ ჴომ ჩუ ესსგურეხ. და̈ვითდ ი
Line of edition: 17    მიჩა ხახვემ ღეშ ათირხ ალექსანდრე. ანჴა̈დ და̈ვით, ეშხუ ჭიქ
Line of edition: 18    ღვინა̈ლ ოთხჲე ალექსანდრეს, მადმა ხოხალ, ჲა̈რ დო ლი. ეჯი ლექვ'
Line of edition: 19    ადჲეს ვა̈ზრა̈რდ მიჩა, ეშხუ ჭიქ ღვინა̈ლ ქა ლახემხ ალექსანდრეს.
Line of edition: 20    ალექსანდრედ ჟ 'ა̈ნმეზრე, ქა ოსჴვა̈მ მიჩა მუხვბე და̈ვითს. ანჴა̈დ
Line of edition: 21    ათხე ალექსანდრე, თამარიშ მჷსკა̈დ მიჩ ხუღვა̈ნდა, ალი სგადკვა̈რ
Line of edition: 22    ჭიქთელისგა, ალექანდრეშ თერა̈რ ათღვენე, ერე ალ ჭიქ გეში
Line of edition: 23    ნომ' ადწჷსვას მიჩა ნაღვენღა. ლექვ' ადჲეხ ვა̈ზრა̈რდ მიჩა, ქა ლახემხ
Line of edition: 24    და̈ვითს. და̈ვითდ ალი ჟ'ა̈ნმეზრე ი ჩუ ლაიშ. ხეწა̈დ მჷსკა̈დს,
Line of edition: 25    თამარიშ მჷსკა̈დს, ჩვათირ ალექსანდრეშთე. ლექვ' ატჯუქვრეხ ალექსანდრეშთე
Line of edition: 26    ლაგვნიშვ-ლა̈კილიშვ. სგადჯუქვოე ღა̈ვითდ ლაყჰალთე,
Line of edition: 27    პილა̈რ ლაყჰალს ქახცჷრჷლე. ლიგვნ' ა̈დბინეხ თამარდ ი და̈ვითდ.
Line of edition: 28    ხეჭვდელხ ხეხვ-ჭა̈შ ალექსანდრეს: -- ალექსანდრე, მა̈ ჯეყა̈რ, მიშგუ
Line of edition: 29    თერაჯო? ქა ემჷმბა̈ვ, გვიშგე ლიმხუბ ღერთემ ყერჯო!

Line of edition: 30       ათხე ალექსანდრედ ა̈დბინე ლიმბუა̈ლ-რაგა̈დ, ა̈ხჭა̈მ ძგიდხენ,
Line of edition: 31    მა̈გ ქოხუმბავე: იმჟი მიჩა ხახვემ ხაყერ, იმჟი რაგა̈დ მა̈ნკვიშ ლეთ
Line of edition: 32    ხად, იმჟი ადკუჰურე მიჩა ხახვემ, ეჯი მა̈გ ძგიდიშ ი პილიშ ნენსგა
Line of edition: 33    ქა ხა̈ქვე ა ლექსანდრედ და̈ვითს.

Line of edition: 34       და̈ვითდ ი თამარდ ლიგვსი-ლილჭა̈ლ ა̈დბინეხ. ალექსანდრე ხა̈ქვცუნე
Line of edition: 35    მიჩა მუხვბა და̈ვითს. ჩვა̈რიხ ბა̈ზი, მჷხა̈რ ბა̈ზი.

Line of edition: 36       აშხვ ლეთ ლა̈ჰასტამ და̈ვითს, ერე ხა̈ქვე :ჲ}ძრდვ"ლემ, ერე:
Line of edition: 37    ალექსანდრეს ესერ მიჩა ოხუმეს ჟაგა̈რ აშ ხოხალ.

Page of edition: 186 
Line of edition: 1       ათხე და̈ვით ჟ'ოხპა̈რ ლაყვრაჲსგა, დაშნა̈ს ესფხეჭ, ქანშერე
Line of edition: 2    დაშნა̈ და̈ვითდ, ლამფა ანტვარე, ქაჩა̈დ ალექსანდრეშთე, ხა̈ქვე
Line of edition: 3    ალექსანდრეს: -- ვო ალექსანდრე, ემმა ლიმხუბ გვიშგე, ხა̈ტ
Line of edition: 4    ი ჯვა̈რ, ხოშა ღერთემ თა̈ჲსდებ ჩუ ჯანწა̈მ ე, ისგვა თხუმემ ჟაგრა̈რ
Line of edition: 5    აშ როქ ჯიხა{ლ}, ეჯი ქა მექარ, მადეჲ დაშნა̈ს ხვიჭმინე ყიაქა!

Line of edition: 6       ალექსანდრე ვარს ყჷლე. ეჯის და̈ვით დემ (\ დემის) იჩო: -- ჰედ
Line of edition: 7    მექინე, მადეჲ თხუმ ხვა̈სენი, ხოშა ღერთემ თა̈ჲსდებღო.

Line of edition: 8       ეჩქას ხა̈ქვე ალექსანდრედ: -- მიშგუ ცოდ სი როქუღ ჯარ, ისგუ
Line of edition: 9    სემი ნაღვჟურგეზლა̈შ ზისხჷნქა მადმაგვეშ მაშიდ.

Line of edition: 10       ალი ათხიდჷნ და̈ვითს. ქატა̈ხ მიჩა ლარდათექა, ჟ'ანა̈ჲცხვნე სემი
Line of edition: 11    მიჩა ნაღვჟურგეზალ, ქა̈დჴერნე მერმა ლარდათექა, ტა̈შდთეჲსგა
Line of edition: 12    ჩვა̈ზიჰ სემი ნაღვჟურგვზალ, ქადჲე, ალექსანდრეშთექა, ქაქა̈ნ ეჯი
Line of edition: 13    ზისხშვ. ალექსანდრე მა̈შომა̈ჲ შშალ ამჟი ესპჷდ. ანჴა̈დ ათხე ალექსანდრე,
Line of edition: 14    ლჷდგა̈რ ბოფშა̈რ ქადჲე მიჩა ლარდათექა. და̈ვით ქატა̈ხ
Line of edition: 15    მიჩა ხახვთე, ხაყლე და̈ვით მიჩა ხახვ: -- ო თამარ, ეჯი დერი ალექსანდრე
Line of edition: 16    ჟ'ა̈ნჰედრი, ეჯღა სი იმ ხიჴდე?

Line of edition: 17       თამარდ ხა̈ქვე: -- მაშენ მალა̈ტხ მიშგუ სემი ნაღვჟურგეზალ,
Line of edition: 18    ეჯჲა̈რ დემ[ეგ] მატკლებხ ალექაანღრეშ ბედჟი.

Line of edition: 19       ქოხუმბავე და̈ვითდ თამარს: იმჟი ლა̈ჰისტამ, იმჟი ალექსანდრეს
Line of edition: 20    ი მიჩ ხადხ უშხვარ ნენსგა, იმჟი ალექსანდრე ჟ'ანჰედვრე.

Line of edition: 21       მერმა ლადეღ ჟ'ანჷგა̈ნ ალექსანდრე, მიჩა ბოფშა̈რ ჟ'ანჰედვრე.
Line of edition: 22    ალექსანდრე. ჩა̈ნგს ი ჭჷნირს ხოშმა, მიჩა ბოფშა̈რ, და̈ვითიშ გეზლირ,
Line of edition: 23    შიშპა̈რს ხეჩმჷდა, ჯი ხეღრალჷდ მიჩა ჭირობს, ამჟი და̈ვითს
Line of edition: 24    ი თამარს ესხვიდხ მერმა ლადეღ ლეჰჷრმაშთე ლაღრალშვ ი
Line of edition: 25    შიშპა̈რშვ. ქადკუჰვნეხ ჩითე ალი ამბა̈ვ ლეჟა̈შს ი ლექვა̈შს,
Line of edition: 26    ჩი ხა̈ტცეს (\ ხა̈წჰეხ), ლახედალ აჩვმინხ მა̈ მაჩენე.

Line of edition: 27       სანამ ისინი დეინახო, მანამ შენ იცოცხლე კარგად.


Line of edition: 28 
თედო ქანცლანი. ფხუტრერი. ვ. თოფურიამ. 5.VIII.1927



Next part


This text is part of the TITUS edition of Svan Prose Texts II (Lower Bal).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.