TITUS
Svan Prose Texts II (Lower Bal)
Part No. 87
Previous part

Text: 87 
Page of edition: 187 
Line of edition: 26 
LXXXVII. გუდმეცა̈რ ნაღვყურ


Line of edition: 27       არდახ ეშხუ დადა ი ბაბა ი ხორდახ ნაღვჟურგეზალ.

Line of edition: 28       აშხვ ლადეღ ბაბა ი ნაღვჟურ ცხეკთ' აჩა̈დხ. ეჩეჩულა, ნაღვჟურ
Line of edition: 29    გუდმეცა̈რ ლი ი მიჩო მუს ხა̈ქვე: -- ლა̈დი ესერ წჷრნი მარე ჴედნი
Line of edition: 30    აშთეჲსგა, ეჯი ესერ ხეჰრი მიჩა თხუმ, მარე ეჯი ესერ ა̈ნჴდენი,
Line of edition: 31    ეჩქას ჯი წჷრნი ჴანვდ ესსიპი. წჷრნი მარე ლიღვჭარელს ესერ
Line of edition: 32    ხობნე ჴანვემ. ჯინემ ესერ, ეჯგვა̈რ მა̈ ლესეს ი ამგვა̈რ მა̈ ლესეს,
Line of edition: 33    მიჩა თხვიმ ქა ნომოვ ათყიდ ეჯ მარა.

Line of edition: 34       ანჴა̈დ ტკისდ ეჯ წჷრნი ხოშა მარე ი ალ ბეფშილდ ჴანვდ ესბიპჷდ.
Line of edition: 35    ხეღვჭარელ ათხე ალ ჴანვ ეჯ მარე, ბაბა დემ ხა̈ყდივ, მარე
Line of edition: 36    ეჯღაჲ ქახღორვე. სგაღჲე მიჩა ქორთე ი ამეჩულა ალ ჴა̈ნ ჩაჟვდ
Page of edition: 188  Line of edition: 1    ესსიპჷდ. ალ ჩაჟვ ეჯჟი ხაშდბა ალ მარ', ერე აშხვ წა̈მს (\ ასწვა̈მ)
Line of edition: 2    დემის ხამუნდა̈ნივ ბოფშა̈რს. ჯი ახა (\ ლახა) იმთე ღჷრდ, ბოფშა̈რ
Line of edition: 3    ქორთე გარ ათვნახ ალ ჩაჟვ. აშგურა̈ნივ, ერე: -- ქ' ესერ ნომეგოვ
Line of edition: 4    ოთჩა̈დხ ალ ჩა̈ჟ!

Line of edition: 5       ეჯჟი იშდრალ ალ ჩა̈ჟ, ეჯჟი იშდრალ, ერე ამიშ ლიშდრა̈ლ
Line of edition: 6    ბოფშა̈რსი მასა̈რდ ხალტჷნხ.

Line of edition: 7       ქადჲეხ ეშხუ ლათვნათე. ესმურტკვალე ალ ჩაჟვემ ი ქოთჩა̈დხ.
Line of edition: 8    ამჟი წჷრნი მარეჲ ანჴა̈დ. ხეღვეჭინალხ ბოფშა̈რ, მარე დეშ ადირმხ.
Line of edition: 9    ათხე წჷრნი მარე ა̈ხღვა̈ჭ ი დოსდ ირმივ, ეჯჟი კალმახდ ესპჷდ,
Line of edition: 10    სგაჩა̈დ ლჷცთეჲსგა, მარ' ეჯი ძუღვა̈შ ა̈მკდ ესსიპჷდ. ალი ხერმინალ
Line of edition: 11    კალმახს ლჷცისგა, ჟი ირჰივ, ეჯჟი ოხპა̈რ ალ კალმახ ი ა̈ნთროლდ
Line of edition: 12    ესსიპდა, მიჟ-დოშდლა̈შ უწდუნა სიმაქა̈შ კალთა̈თეჲსგ' ესსკინე.
Line of edition: 13    ძუღვა̈შ ა̈ნკ ეჯი ჯაყვდ ესსიპდა. ალ ჯაყვდი ეშთეჲსგ' ადსკინე.
Line of edition: 14    სიმაქდ ჟი ლა̈ჲკიდ ალ ა̈ნთროლ ი ჯაყვ ი იმბაჟელ, "იმხენ ესერ
Line of edition: 15    ა̈ნჴდენივხ?!" ჟი ლა̈ჲკიდ ი ლახტურას ლოხოგა̈ნ. ლიხტურელ ჩიქდ
Line of edition: 16    ოხპა̈რ ა̈ნთროლ ი ნესყად ესსიპჷდ. ჯაყულდ ეჯი ქიპდ ესსიპჷდ ი
Line of edition: 17    ნესყემ ჴემქ' ა̈თცუა̈ნ ქა. ეჩქას ნესყემ ლემსგემ ჰელქ' ადსკინე. ქიპ
Line of edition: 18    ჩვა̈დშიხა̈ნ ი ნესყე ქანტა̈ხ ი ჩიგარიშშალ ხოჩა მახეღვა̈ჟდ
Line of edition: 19    ესსიპდა.

Line of edition: 20       ხეწა̈დ ალ მახეღვა̈ჟ სიმაქს ქა: -- მიჩ ესერ მიჩა კალთაჲსგ'
Line of edition: 21    ათსედა ქვინ. ჰედ ესეროღვ ლა̈სვხ ჯიმილ-დაჩვიღ, მადეჲ
Line of edition: 22    ხეხვ-ჭა̈შ.

Line of edition: 23       ტკისდ ალა̈რ ჩჷა̈დხეხვჭაშა̈ნხ ი ნაღვჟურიშ ქორთ' ამჴა̈დხ.

Line of edition: 24       დადა ი ბაბ' ეჯი ჩა̈რჩს ჭჷშხ ჟი ხაგამხ. ლახედალ ხოჩ' აჩვმინხ.

Line of edition: 25       ეჯა̈რ ოდ ანჴეხ, ეჩქადოვ ლა̈რიდ.


Line of edition: 26 
სალიბე გურჩიანი. ბარში. მ.ქალდანი. 10.VIII.1954



Next part


This text is part of the TITUS edition of Svan Prose Texts II (Lower Bal).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.