TITUS
Svan Prose Texts II (Lower Bal)
Part No. 88
Previous part

Text: 88 
Page of edition: 188 
Line of edition: 27 
LXXXVIII. გუდმეცა̈რ


Line of edition: 28       ხელწიფხეს ხოგ ლაკგლმა̈ხი ტობ. აშთეჲსგა და̈ს ფიშვდე მიჩეშჷნქა.
Line of edition: 29    მიჩა გეზალ ა̈თჴჷრა̈ნ მასა̈რდ ი სგაფიშვდ ალი. აჩა̈დხ ლაკჷლმა̈ხითე
Line of edition: 30    ი ადკვა̈რხ ისგა ბერჟემ კა̈ვა̈რ ი, მაზუს ქა ხობიდხ, ეჯზუს
Line of edition: 31    სგა ხობიდ.

Line of edition: 32       ათხე ჰედურდ მარე ჩუ მა̈ ხორიხ ამ სახელწიფისგა, მა̈გ აჩა̈დხ
Line of edition: 33    ეჩა ქა ლაბჷდთე. ეჯღაჲ ქა დეშ ხობიდხ. მაზუს ქა ხობიდხ,
Line of edition: 34    ეჯზუს სგა იტხე.

Line of edition: 35       ათხე ვოშთხ უღვა კამბეშ ანჴიდხ ი მა̈გ ხობიდხ. ოხბჷდხ ქა ი
Line of edition: 36    ქანჴიდხ ი ამსვალდ ლა̈სვ. მა̈გ ხარგა̈დიხ, ჩი ხა̈ჰიესგხ ი ლაცვს დეშ
Page of edition: 189  Line of edition: 1    ხოთხრეხ, დეჲ რაგდი. ხელწიფხედ რა̈ქვე: -- ისგოღვ ლოხჴერივხ
Line of edition: 2    ი ქალა̈ქს კჷრკა̈ნდოღვ (\ გჷრკა̈ნდოღვ) ახცხიპხ, იმგვალეგ ესერ
Line of edition: 3    ჰედ ლაცვ ოთთხერნი, მადეჲ ადრა̈გდინისგ.

Line of edition: 4       ლოხჴერივხ ისგა ი ესყახ. ქალა̈ქთე ლექვა მოლე გარ ხოკლიხ,
Line of edition: 5    ეჩეჩუ დად' აჩხტა̈რი ი ლაცვ ოთთხა̈რ.

Line of edition: 6       ქალა̈ქს ლექვ' ოთქა̈ბხ ი ლეჟა ლახტიხხ ი ეშხუ მარე მერმა
Line of edition: 7    ხეღვჭარელ: -- ჲეშდ ზავ ესერ ათხადეს, ეჯ ჩექმოლოღვ (ჲ
Line of edition: 8    ლა̈ფჩინაოა̈როღვ) ათყიდ.

Line of edition: 9       ათხეჲ ლაცვ ოთთხა̈რ ალ მარა. ლა̈ხჭედივხ: -- იმღ' ესერ ათთხერა
Line of edition: 10    ლაცვ მჷჩხტა̈რი დადა̈შმჷყ ი მეღვჭარელაცახა̈ნ?

Line of edition: 11       -- დად' ესერ ხოჩა მჷჩხტა̈რი ლი ე, ჯი სგურ, ეჩეჩუ
Line of edition: 12    ორჩუქა ოქრშვ ერ ჷვეში ლი, იმღ' ესერ დეშ ომჴედელი გუდ?
Line of edition: 13    ჲეშდ ზავემ მეგეჭ ლა̈ფჩინრე მეღვჭარელ ესერ ბა̈იშ მედგა̈რი ლი.

Line of edition: 14       -- ჟჲოღვ ა̈ნკჷრმეხ, აღვე, ალ მარე ლჷდგა̈რ ლესეს ა მადე, ი
Line of edition: 15    ე{ჯ} დადა̈შ ჩუქა ოქრ ზჷსდეს ა მადე.

Line of edition: 16       ათხ' აჩა̈დხ ალ მარათე ი ლჷდგა̈რ ახხვიდხ. ლექვ' აჩა̈დხ, ალ
Line of edition: 17    დად' აჩხტა̈რივ, ამთე, ი ეჯზუ ოქრ ი ვარჩხილ ახხვიდხ, ერე ლეჟა
Line of edition: 18    ვენდ გარ ახშდიხხ.

Line of edition: 19       ალა̈რ მა̈გ ტკიც ლა̈სვხ, ეჩქას, -- ისგოღვ აფიშვდს მიჩა ნარდვთეჲსგა,
Line of edition: 20    -- ალ მარემ იჰერ.

Line of edition: 21       ქაჩა̈დხ ტობთექა, ხგაფიშვთხ ტობთე. ესბა̈ნჩხვ ლერსგვან შივშ
Line of edition: 22    ი ფექ ლახემ კვეცნემ, ესბა̈ნჩხვ ლერთან შივშ ი ლა̈ჲრა̈რ ლახემ.
Line of edition: 23    სგადჲეხ ალა̈რ. ფექ ალი ხელწიფხიშ დიხსა̈ლს ლახემხ. დიხსა̈ლდ
Line of edition: 24    ქანნაყე. აშხვხენიშ მეყილდ ალი ჩვა̈თჩენჩურა̈ჩ. ლჷჩენჩურახენიშ
Line of edition: 25    ხელწიფხეს ოთჴიდ სგა. ათხე ალა̈რა, ქვეყანაჲსგა ქა მა̈ ა̈დქუთნი
Line of edition: 26    ი ჩუ მა̈ ა̈ღჩემნი, მა̈გ ხესმიხ, ჩიმი რაგა̈დ აშ ხოხალხ.

Line of edition: 27       ხელწიფხედ რა̈ქვე: -- ნა̈კვიშ ესერ ჲა̈ს ლოხმამა?

Line of edition: 28       -- ალი ესერ დიხსა̈ლს ლოხმამა.

Line of edition: 29       დიხსა̈ლ ქა იჰერ ხელწიფხედ მიჩეშთე ი ჯინემ ლა̈ჲსგურე სტილს:
Line of edition: 30    -- მიჩ ესერ ხამჷნკა, ეჯი ესერ ხემჷნკი ამისი.


Line of edition: 31 
პავლე პაკელიანი. ჭელირი. მ.ქალდანი. 12.VIII.1954



Next part


This text is part of the TITUS edition of Svan Prose Texts II (Lower Bal).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.